2 Timoteo 1:7—‘Ekirimu ekyo oMungu abirituha sikirileka tukubaha’

‘Kusangwa ekirimu ekyo oMungu abirituha Sikirireka tukubaha; nikwa ekirimu kiwe kikatusulaya omo butoki nʼolwanzo, nʼeriyiteya.’—2 Timoteo 1:7, KB80.

Erisako rye 2 Timoteo 1:7 likasonda eribugha litiki?

OMungu anganawatikya omundu inyakola ebyuwene butubaha. OMungu syanzire “tukubaha”, obuba butuwene obo bwanganaleka omundu inyatakola ebikatsemesaya oMungu.

Tulebaye emibere isatu eyiri omo risako eri eyo oMungu akatuha eyangatuwatikya eritendyubawa.

“Obutoki.” Erilua kera, nibya ibane embere w’esyonzighu esikalire n’omo mibere eyikalire, Abakristo bakatoka erikolera oMungu butubaha. Sibaliligha obuba bukabasubya enyuma. (2 Abanya Korinto 11:23-27) Bakatoka bati? Omukwenda Paulo akabugha atya: “Nyitokire erikola ebyosi busana nʼamaka wa Kristo oyukanyitokesaya.” (Abanya Filipi 4:13) OMungu anganaha abakamuramaya ’b’obutoki bunene’ batoke erilwa n’amaligho wosi-wosi.—2 Abanya Korinto 4:7.

“Olwanzo.” Olwanzo lunene oko Mungu lukawatikaya oMukristo erilwira butubaha oko ebyuwene. N’eryanza mulikyabo kikakuna oMukristo erihira ebyo abandi balaghireko embere w’ebiwe, nibya nomo angabya inyakendereribawa kutse inyali omo bwiko.—Yoane 13:34; 15:13.

“Eriyiteya.” Omo Biblia, kangyi-kangyi eriyiteya rikakanganaya oMukristo oyuli n’obutoki bw’erikola eriyisogha eriseghemere eKinywa ky’oMungu. Omundu oyuli n’eriyiteya anganatoka erisighala inyane n’amalengekania awatolere nibya omughulu akalaba omo maligho. Akayisogha erikwamana n’amalengekania w’oMungu, kundi, oko mundu oyo, obwira bwiwe haghuma n’oMungu b’ob’omughaso munene kulenga amalengakania wosi-wosi w’abandi.

Erisako rye 2 Timoteo 1:7 likasonda eribugha litiki

Ekitabu ky’eBiblia kye Timoteo w’akabiri kyahandikawa n’omukwenda Paulo ng’ebaruha eyo ahandikira omwira wiwe mwanzwa kandi oyo abya akakola naye, yo Timoteo. Omo baruha yiwe, Paulo mwasaba omulwana Timoteo erikola kutsibu omubírí w’eritulira. (2 Timoteo 1:1, 2) Alinga Timoteo abya mukutu kandi alinga isyalisegherera abandu, kyanganabya ikyo kyabya kikakiryo omo mibírí yiwe omo ndeko y’ekikristo. (1 Timoteo 4:12) Aliwe Paulo mwibukya Timoteo ngoko abirihabwa olusunzo, omibírí w’embaghane omo ndeko. Mwamubira ati isyabya akasagha omughulu akakolesaya ehamuli yiwe iye ng’omusyakulu w’endeko, omughulu abya akatulira engulu mbuya, n’omughulu abya akayiyinia okwilengwako ry’obwirirya bwiwe.—2 Timoteo 1:6-8.

Nomo oko nzuko ebinywa ebi byatumirawa Timoteo, bikakanganaya ndeke-ndeke ngoko oMungu asyaha abosi abanzire erimukolera munabwire ebyosi ebyo balaghireko batoke erikola batya n’omo hangabya amaligho.