Amabulyo erilua oko basomi betu

Omughulu Dawidi ahandika ebinywa ebiri omo Esyonyimbo 61:8, mwabugha ati akendisyapipa oMungu “ebiro byosi [kera na kera].” Ekyo kikasonda eribugha kiti Dawidi syangaholire?

Iyehe. Ebyo Dawidi ahandika, byabya by’ekwenene.

Tulangire eby’ahandika omo risako eryo n’omo wandi masako awali ngayo: “Litya nasyakwimbira eripipa ebiro byosi, omugulu ngakuha obuli kiro ebyo nabirilagha.” “Nasyakupipa n’omutima waghe wosi uwe Yehova Mungu waghe; Nasyakangania obukulu bwawe kera na kera.” “Nasyakupipa ebiro byosi kera na kera.”​—Esy. 61:8; 86:12; 145:1, 2.

Dawidi mwatalabyaho kateho, mwatalengekania ati syangahola. Abya inianasi ngoko Yehova mwabugha ati abandu bangaholire, busana n’erilolo eryo bakola. Kandi Dawidi abya inianasi ngoko ni mukola nabi. (Enz. 3:3, 17-19; Esy. 51:4, 5) Abya inianasi ngoko abandu abalighirwe n’oMungu nga Abrahamu, Isaka, na Yakobo, nabo nibya mobahola. Dawidi mwaminya ngoko naye angaholire. (Esy. 37:25; 39:4) Aliwe ebinywa ebikabanika omo Esyonyimbo 61:8 bikakanganaya ngoko anzire kandi ayisoghire kundu eripipa oMungu kera na kera, ni bughambu omwibyaho liwe lyosi.​—2 Sam. 7:12.

Dawidi mwanahandika oko ebyo ayilangirira omo ngebe yiwe, ngoko kiri omo Esyonyimbo 18, 51, na 52. Omo Esyonyimbo 23, Dawidi akakanganaya ngoko Yehova ali ng’omulisya oyukasondola, oyukabetekerera, kandi oyukateghaya esyombuli siwe. Dawidi naye ko anabya atya. Kandi abya anzire erikolera oMungu omo ‘biro byosi by’engebe yiwe.’​—Esy. 23:6.

Kandi wibuke ngoko Yehova yo wasondola Dawidi erilabira ekirimu kibuyirire erihandika atya. Emyatsi eyahandika yabyamo obuminyereri obwangabererere omo biro by’embere. Ng’ekyerileberyako, omo Esyonyimbo 110, Dawidi mwakania oko mughulu ogho Omukama wiwe ‘angikere oko luhande lw’ oMungu lw’ amali’ omo lubula n’erihabwa obutoki bunene. Obw’erikolaki? Busana n’erihira esyonzighu siwe omo kitumbi ky’ebisando biwe n’“eritswera ebihanda” oko kihugho. Dawidi abya tata-kulu wa Masiya. Masiya angatabere iniane elubula kandi angabere “muhereri kera na kera.” (Esy. 110:1-6) Yesu mwakangania ngoko obuminyereri obukabanika omo Esyonyimbo 110 bwabya ibukamukanayako kandi ngoko bukendisyabererera n’omo biro ebikasa.​—Mat. 22:41-45.

Inga, Yehova mwasondola Dawidi erihandika emyatsi eyangabere oko mughulu wiwe n’oko mughulu owakasa ogho angalubukire ko n’eripipa oMungu kera na kera. Kwesi Esyonyimbo 37:10, 11, 29 syanganakolesibwa oko mughulu ogho syahandikawako n’oko mughulu owakasa. Musyabererera kera, omo Israeli kandi syasyabererera n’oko mughulu owakasa.​—Ulebaye enungu 8 y’omwatsi “Ulendisyabya haghuma naghe omo Paradiso” omo Gazeti eno.

Omo Esyonyimbo 61:8 n’omo wandi masako ng’eryo, Dawidi abya inianzire eripipa oMungu kera omo Israeli erihika oko luholo lwiwe. Kandi akakanganaya ndeke ndeke ebyo Dawidi akendisyakola omo mughulu owakasa, Yehova abimulubukya.