Unalue Wasi?
Esyombiriki esyasungawa ahabya Ebabeli ya kera kandi ngoko syakokotibawa kikakanganaya kiti ngoko ebyo eBiblia ikabugha ni bye kwenene?
ABAKAKWESA-KWESA eby’omo kitaka mubafumbula omo matongo w’Ebabeli ya kera mw’esyombiriki esyumire esyabya sikakolesibwa erihimba omuyi. Omughuma wa kubo ye Robert Koldewey, akabugha ati esyombiriki esiri ng’esyo isikakokotibawa omo birunga by’omuliro ebyabya bikabya “ehihya w’omuyi, eyiri eribumba erinatire n’amaghuta . . . mangyi.”
Abakakwesa-kwesa emyatsi y’omo kitaka babirifumbula emyatsi eyikakanganaya ngoko obutabali bwe Babeli bwabya bukakolesya ebirunga by’omuliro ebiri ng’ebyo erikola ebitsibu. Paul-Alain Beaulieu, omukangirirya w’oko iniversite eye Toronto, oyo asi ndeke emyatsi n’omubughe we Asuria ya kera, akabugha ati: “Ebihandiko bingyi by’omo mubughe we Babeli bikakanganaya ngoko omwami mwahamula ati omundu amatendisikya omwami kutse amahalya atolere inyaghusya omw’irunga ly’omuliro n’erihya.” Ng’eky’erileberyako, ebihandiko bighuma by’oko mughulu w’Omwami Nebukadeneza bibughire biti: “Mutoghotayebo, mwokayebo, mukotsayebo, . . . omw’irunga ly’omuliro . . . balwe m’omuki ndeke, mughusebo omo muliro, baholeremo.”
Ekyo kikibukaya abasomi by’eBiblia omwatsi owakabanika omo Danieli esura 3. Omwatsi oyo akabugha ati, Omwami Nebukadeneza mwakokotya esanamu nene y’ehoro n’erisingikayo omo bwerere bw’eDura—ehihya w’omuyi we Babeli. Abalwana Baebrania basatu ye Sadiraki, na Mesaki, na Abedenego babere baghana eryunamira esanamu eyo, Nebukadeneza mwakapikira, amahamula ati “bakaye erirunga ngendo sirinda kwilaba ko likakibawa,” kandi ati abalume basatu abo “bagusebo omwʼirunga erikaka mʼomuliro.” Omumalaika w’amaka mwalamyabo oko luholo.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Embiriki eyumire eyihandikireko erina lya Nebukadeneza
Esyombiriki esyasungawa omo Babeli nasyo sikakanganaya ndeke-ndeke ngoko eBiblia ikabugha ekwenene. Oko syombiriki silebe sya kusyo kuhandikire ebinywa eby’eripipa omwami. Embiriki nguma yihandikireko yiti: “Ingye Nebukadeneza, Omwami we Babeli . . . Enyumba eyo ingye, Omwami w’olukengerwa lunene, n’abirihimba . . . Abatsikulu baghe basyatabala kera na kera.” Ebihandiko ebi bisosone n’ebinywa bya Nebukadeneza eby’eriyipipa ebikabanika omo Danieli 4:30 ebikabugha biti: “Oku si Babeli kunene, oko nabirihimba busana nʼenyumba yʼobwami, omo maka wʼobutoki bwage na busana nʼolukengerwa lwʼerikangabasania lyage kwehi?”