1 Korinte
5 Kubikwe bona kwenziwa izenzo zomseme ezisisono* phakathi kwenu, izenzo ezisisono* ezinjalo ngekhe wazifumana ngitjho nahlangana nabantu beentjhaba—ukuthi umuntu uya emabhayini nomkayise. 2 Kghani niyazikhakhazisa ngalokho? Akukafuzi na nibe lisizi, ukuze umuntu owenze isenzwesi asuswe phakathi kwenu? 3 Nanyana ngingekho ngomzimba, ngikhona ngommoya, begodu sengimahlulele umuntu owenze isenzwesi, njengokungathi nginani. 4 Nanibuthene ndawonye ngebizo leKosethu uJesu, nazi nokuthi nginani ngommoya nangamandla weKosethu uJesu, 5 umuntu onjalo kufuze nimnikele kuSathana bona kutjhatjalaliswe inyama, ukuze ummoya usindiswe ngelanga leKosi.
6 Ukuzikhakhazisa kwenu akusikuhle. Anazi na bona isibiliso esincani sibilisa ihlama yoke? 7 Susani isibiliso esidala ukuze nibe yihlama etja, njengombana ninganaso isibiliso. Ngombana kwamambala, uKrestu imvana yePhasika lethu wenziwe umhlatjelo. 8 Yeke asiwugidingeni umnyanya lo, ingasi ngesibiliso esidala, namkha ngesibiliso sobumbi nokukhohlakala, kodwana ngesikwa esinganasibiliso sokuthembeka neqiniso.
9 Encwadinami nganitlolela bona nilise ukuzihlanganisa nabantu abenza izenzo zomseme ezisisono,* 10 ngingatjho bona nilise ukuzihlanganisa ngokupheleleko nabantu bephaseli abenza izenzo somseme ezisisono* namkha abantu abamarhamaru namkha abadlelezeli namkha abalotjha iinthombe. Ngombana nakunjalo, bekuzokufuze niphume ephasini. 11 Kodwana nje nginitlolela bona nilise ukuzihlanganisa nomuntu obizwa ngokuthi mfowethu kodwana owenza izenzo zomseme ezisisono* namkha omarhamaru namkha olotjha iinthombe namkha othukanako* namkha osidakwa namkha omdlelezeli, ningadli ngitjho nokudla nomuntu onjalo. 12 Kungisiza ngani ukwahlulela abangaphandle? Anahluleli abangaphakathi na, 13 kukulapho uZimu ahlulela abangaphandle? “Susani umuntu omumbi phakathi kwenu.”