Yesibili YamaKhosi

1 Ngemva kokuhlongakala kwaka-Arhabi, uMowabi+ wahlubuka u-Israyeli.

2 Kungesikhatheso lapho u-Arhaziya arhohlomela khona etjhubeni lekumbakhe elisephahleni ebelivalwe ngeengodo eSamariya, waduleka phasi walimala. Wathumela iinthunywa wathi kizo: “Khambani niyokubuza uBhali-Zebhubi uzimu we-Ekroni+ ukuthi ngizokuphola na.”+ 3 Kodwana ingilozi kaJehova yathi ku-Eliya*+ umTitjhibe: “Sikima uyokuhlangabeza iinthunywa zekosi yeSamariya uthi kizo, ‘Kungombana kunganaZimu na kwa-Israyeli njengombana seniyokubuza kuBhali-Zebhubi uzimu we-Ekroni?+ 4 Yeke uJehova uthi: “Angekhe usuke embhedeni olele kiwo ngombana uzokufa nakanjani.”’” Ngemva kwalokho, u-Eliya wakhamba.

5 Kwathi iinthunywa nazibuyela kuye, wathi kizo: “Nabuya msinyana kangaka?” 6 Zamphendula zathi: “Kunendoda ekhuphuke yazosihlangabeza yathi kithi, ‘Buyelani ekosini enithumileko nithi kiyo, “UJehova uthi: ‘Kungombana kunganaZimu na kwa-Israyeli bona ungaze uthumele bonyana kuyokubuzwa kuBhali-Zebhubi uzimu we-Ekroni? Yeke angekhe usuke embhedeni olele kiwo ngombana uzokufa nakanjani.’”’”+ 7 Wazibuza wathi: “Beyiqaleka njani indoda ekhuphuke yazonihlangabeza begodu yatjho amezwi la kini?” 8 Zamphendula zathi: “Bekuyindoda embethe isambatho soboya,+ ibophe nebhande lesikhumba edinini.”+ Khonokho wathi: “Ngu-Eliya umTitjhibe.”

9 Yeke ikosi yathumela kuye induna yamasotja ama-50 ikhamba namasotjayo ama-50. Nayikhuphukela kuye, bekahlezi esiqongolweni sentaba. Yathi kuye: “Muntu kaZimu weqiniso,+ ikosi ithi, ‘Yewehle.’” 10 Kodwana u-Eliya waphendula induna yamasotja ama-50 wathi: “Nange ngimumuntu kaZimu, akwehle umlilo ezulwini+ urhayile wena namasotjakho ama-50.” Yeke kwehla umlilo uvela ezulwini wayirhayila begodu warhayila namasotjayo ama-50.

11 Yeke ikosi yathumela enye induna yamasotja ama-50 ikhamba namasotjayo ama-50. Induna yakhamba yathi kuye: “Muntu kaZimu weqiniso, ikosi ithi, ‘Yewehle msinyana.’” 12 Kodwana u-Eliya wabaphendula wathi: “Nange ngimumuntu kaZimu weqiniso, akwehle umlilo ezulwini urhayile wena namasotjakho ama-50.” Yeke kwehla umlilo kaZimu uvela ezulwini wayirhayila begodu warhayila namasotjayo ama-50.

13 Ngemva kwalokho, ikosi yathumela induna yesithathu yamasotja ama-50 ikhamba namasotjayo ama-50. Induna yesithathu yamasotja ama-50 yakhuphuka, yaguqa phambi kwaka-Eliya, yamncenga bona abarhawukele bese yathi kuye: “Muntu kaZimu weqiniso, ngibawa bona ukuphila kwami nokuphila kweensebenzi zakhwezi ezima-50 kube ligugu emehlwenakho. 14 Sekwehle umlilo ezulwini warhayila iinduna ezimbili zamasotja ama-50 neenqhema zawo zamasotja ama-50, kodwana nje ngibawa ukuphila kwami kube ligugu emehlwenakho.”

15 Khonokho ingilozi kaJehova yathi ku-Eliya: “Yehla nayo. Ungayisabi.” Yeke wasikima wehla nayo batjhinga ekosini. 16 U-Eliya wathi ekosini, “UJehova uthi: ‘Uthumele iinthunywa bona ziyokubuza kuBhali-Zebhubi uzimu we-Ekroni.+ Kungombana kunganaZimu kwa-Israyeli na?+ Kubayini ungakabuzi yena? Ngebanga lalokho, angekhe usuke embhedeni olele kiwo, uzokufa nakanjani.’” 17 Yeke wahlongakala, ngokuvumelana nelizwi lakaJehova elikhulunywe ngu-Eliya godu ngebanga lokuthi bekanganandodana, ngomnyaka wesibili kaJehoramu+ indodana kaJehotjhafathi ikosi yakwaJuda, uJehoramu*+ waba yikosi esikhundleni sakhe.

18 Malungana nawo woke omunye umlando ka-Arhaziya+ nalokho akwenzileko, akukatlolwa na encwadini yomlando weenkhathi zamakhosi wakwa-Israyeli?