Yokuthoma YeenKronike
21 Ngemva kwalokho uSathana* wajamelana no-Israyeli, wahlohlozela uDavida bona abale u-Israyeli.+ 2 Yeke uDavida wathi kuJowabi+ neenduna zabantu: “Khambani niyokubala u-Israyeli kusukela eBheritjheba kufikela kwaDani;+ nibuye nizongibikela bona ngazi isibalo sakhe.” 3 Kodwana uJowabi wathi: “Kwanga uJehova angandisa abantu bakhe ngokubuyelelwe kali-100! Kosami kghani boke abasiziinsebenzi zekosami? Kubayini ikosami ifuna ukwenza lokhu? Kubayini kufuze ibangele u-Israyeli abe mlandu?”
4 Nanyana kunjalo, ilizwi lekosi laba namandla kunelizwi lakaJowabi. Yeke uJowabi waphuma wabhoda u-Israyeli, ngemva kwalokho weza eJerusalema.+ 5 Nje-ke uJowabi wanikela uDavida inani labantu abatlolisiweko. Isibalo saka-Israyeli woke saba madoda asi-1 100 000 ahlome ngeensabula begodu isibalo sakaJuda bekumadoda azii-470 000 ahlome ngeensabula.+ 6 Kodwana uLevi noBhenjamini azange batloliswe,+ ngombana ilizwi lekosi lamnyenyisa uJowabi.+
7 Intwele azange imthabise nakancani uZimu weqiniso, yeke wajezisa u-Israyeli. 8 Yeke uDavida wathi kuZimu weqiniso: “Ngone khulu+ ngokwenza lokhu. Nje-ke ngibawa ulibalele umtjhapho wencekwakho+ ngombana budlhadlha obukhulu engibenzileko.”+ 9 Yeke uJehova wakhuluma noGadi,+ umboni kaDavida, wathi: 10 “Iya kuDavida uthi kuye, ‘UJehova uthi: “Ngikunikela izinto ezintathu okufuze ukhethe kizo. Khetha leyo okufuze ngiyilethe kuwe.”’” 11 Ngalokho uGadi wangena ngakuDavida wathi kuye: “UJehova uthi, ‘Khetha 12 ukuthi kube neminyaka emithathu yendlala,+ namkha iinyanga ezintathu zokuthanyelwa manabakho kukulapho isabula yamanabakho ikufikela,+ namkha amalanga amathathu wesabula kaJehova, ukugula okutjhabalalisako enarheni,+ lapho ingilozi kaJehova izabe itjhabalalisa+ kwa-Israyeli woke.’ Nje-ke cabangisisa ngokuthi ngimphendule ngithini ongithumileko.” 13 UDavida wathi kuGadi: “Ngibuhlungu khulu. Ngibawa ukuwela esandleni sakaJehova ngombana isirhawu sakhe sikhulu khulu;+ kodwana ngibawa ungangivumeli ngiwele esandleni somuntu.”+
14 Nje-ke uJehova wathumela ukugula okutjhabalalisako+ kwa-Israyeli, kwahlongakala abantu abazii-70 000 kwa-Israyeli.+ 15 Ngaphezu kwalokho, uZimu weqiniso wathumela ingilozi eJerusalema bona iyoyitjhabalalisa kodwana kwathi nasele izokwenza njalo, uJehova wayibona begodu wazisola* ngehlekelele leyo,+ wathi engilozini etjhabalalisako: “Kwanele!+ Yehlisa isandla sakho” ingilozi kaJehova beyijame eduze neselelo saka-Orinani+ umJebusi.+
16 Kwathi uDavida nakaphakamisa amehlwakhe, wabona ingilozi kaJehova ijame phakathi kwezulu nephasi, iphethe isabula+ ngesandla sayo esilulekele eJerusalema. UDavida nabadala, bazigubuzese ngemigodla,+ msinyana baziphosa phasi bebahloma iinhloko phasi.+ 17 UDavida wathi kuZimu weqiniso: “Akusingimi na owathi kubalwe abantu? Ngimi owonileko, ngimi owenze okumbi+ kodwana izimvezi zenzeni? Maye! Jehova Zimami, ngibawa isandla sakho sibethe mina nendlu kababa kodwana ungalethi isibethwesi ebantwini bakho.”+
18 Yeke ingilozi kaJehova yatjela uGadi+ bona atjele uDavida ukuthi akhuphuke ajamisele uJehova i-aldara eselelweni saka-Orinani umJebusi.+ 19 Ngalokho uDavida wakhuphuka ngokuvumelana nelizwi lakaGadi, alikhulume egameni lakaJehova. 20 Ngesikhatheso, u-Orinani wajika wabona ingilozi begodu amadodanakhe amane ebewanaye azifihla. U-Orinani bekabhula ikoroyi. 21 Kwathi uDavida nakakhuphukela kuye, u-Orinani wambona, khonokho waphuma eselelweni, wakhothama kuDavida wahloma ihloko phasi. 22 UDavida wathi ku-Orinani: “Ngithengisela indawo yeselelo bona ngakhele uJehova i-aldara kiyo. Ngithengisela yona ngentengo epheleleko bona isibetho esisebantwini siphele.”+ 23 Kodwana u-Orinani wathi kuDavida: “Ithathe ibe ngeyakho begodu ikosami ayenze okubonakala kukuhle kiyo. Qala! Nginikela ngeenkomo bona zibe minikelo etjhiswako neengodo zesileyi+ bona zibe ziinkuni nekoroyi bona ibe mnikelo weenthoro. Nginikela ngakho koke.”
24 Nanyana kunjalo, iKosi uDavida yathi ku-Orinani: “Awa, kufuze ngiyithenge ngentengo epheleleko ngombana angekhe ngathatha okungokwakho ngikunikele kuJehova namkha nginikele imihlatjelo etjhiswako simahla.”+ 25 Yeke uDavida wathenga indawo leyo ku-Orinani ngegolide elibudisi obumatjhekeli* ama-600. 26 UDavida wakhela uJehova i-aldara+ lapho begodu wanikela imihlatjelo etjhiswako nemihlatjelo yetjhebiswano, wabiza uJehova, yena wamphendula ngokuthumela umlilo+ ovela ezulwini bona utjhise iminikelo ese-aldareni. 27 Nje-ke uJehova wayala ingilozi+ bona ibuyisele isabulayo ngesikhwameni sayo. 28 Ngesikhatheso, uDavida nakabona ukuthi uJehova umphendulile eselelweni saka-Orinani umJebusi, waraga nokwenza imihlatjelo lapho. 29 Nanyana kunjalo, ngesikhatheso ithaberinakeli lakaJehova elenziwa nguMosi emmangweni ne-aldara lomnikelo otjhiswako bezisendaweni ephakemeko eGibiyoni.+ 30 Kodwana uDavida bekangakakghoni ukuya phambi kwalo ayokubuza uZimu ngombana bekasaba ngebanga lesabula yengilozi kaJehova.