IRhubo
Kumnqophisi. Lizokuvunywa ngendlela yengoma ethi “Ungatjhabalalisi.” Irhubo laka-Asafa. Ingoma.
75 Maye! Zimu, siyakuthokoza, siyakuthokoza;
Igama lakho liseduze,+
Begodu abantu bamemezela imisebenzakho emangalisako.
2 Wena uthi: “Nangibeka isikhathi,
Ngahlulela ngobulungiswa.
3 Ngesikhathi iphasi nazo zoke izakhamuzi zalo zincibilikiswa,
Ngimi owenza iinsika zalo zadzimelela.” (Sela)
4 Ngithi kozikhakhazisako, “Ungazikhakhazisi,”
Ngithi kokhohlakeleko, “Ungawaphakamisi amandlakho.
5 Ungaphakamiseli amandlakho phezulu
Namkha ukhulume ngokuzikhakhazisa.
6 Ngombana ukuphakanyiswa akuveli
Epumalanga namkha etjingalanga namkha esewula.
7 Ngombana uZimu unguMahluleli.+
Wehlisa omunye umuntu aphakamise omunye.+
8 Ngombana kunekapho esandleni sakaJehova;+
Iwayini linegwebu begodu livangwe ngokupheleleko.
Uzolithulula nakanjani,
Begodu boke abakhohlakeleko bephasi bazolisela, bebasele nehlamalo.”+
9 Kodwana mina, ngizokumemezela lokhu ngokungapheliko;
Ngizokubhinela uZimu kaJakopo iindumiso.
10 Ngombana uthi: “Ngizokuqunta woke amandla wabakhohlakeleko,
Kodwana amandla wabalungileko azokuphakanyiswa.”