Isaya
31 Maye! Kilabo abehlele eGibhide bayokufuna isizo,+
Abathembela eenjomaneni,+
Abathembela eenkaraneni zepi ngombana zinengi,
Neenjomaneni zepi ngombana zinamandla.
Kodwana abathembeli koCwengileko ka-Israyeli,
Begodu abafuni uJehova.
2 Kodwana uhlakaniphile, uzokuletha ihlekelele,
Begodu uzowazalisa amezwakhe.
Uzokuthatha amagadango ngokujamelene nendlu yabenzi bokumbi
Nangokujamelene nalabo abasiza abenzi bokumbi.+
3 AmaGibhide babantu begodu abasinguZimu;
Iinjomani zabo ziinjomani nje kwaphela ingasi ummoya.+
UJehova nakalula isandla sakhe
Nanyana ngubani ofuna ukubasiza uzokuwa
Nanyana ngubani osizwako uzokuwa;
Woke azokutjhabalala ngesikhathi sinye.
4 Ngombana ngilokhu uJehova akutjho kimi:
“Njengombana ibhubezi libhodla, ibhubezi elincani elinamandla, nalibona inyamazana,
Lokha soke isiqhema sabelusi sibizwa ndawonye ngokujamelene nalo,
Begodu lingathuswa kurhuwelela kwabo
Namkha lingabi nesibindi ngebanga lesiyaluyalu sabo,
Ngokunjalo uJehova wamabutho uzokwehla bona azokulwela
INtaba iZiyoni nombundwayo.
5 Njengeenyoni eziphaphako ezivikela abantwabazo, uJehova wamabutho uzokuvikela iJerusalema.+
Uzolivikela, alisindise.
Uzolivikela, alihlenge.”
6 “Buyelani kilo ebenimvukela, nina sitjhaba sakwa-Israyeli.+ 7 Ngombana ngelangelo omunye nomunye uzokulahla abozimu bakhe besiliva abangasizi ngalitho nabozimu bakhe begolide abangatjho litho, abenziwe ngezandla zenu ezinesono.
8 UmAsiriya uzokuwa ngesabula, engasi ngeyomuntu;
Isabula engasi ngeyomuntu, izombulala.+
Uzokubaleka ngebanga lesabula,
Namasokanakhe azokukatelelwa bona asebenze.
9 Idwala lakhe alisazukuba khona ngebanga lokusaba,
Namakhosanakhe azokuthuswa litshwayo,” kutjho uJehova,
Ukukhanya kwakhe kuseZiyoni begodu ikehlakhe yomlilo iseJerusalema.