Isaya
34 Tjhidelani nizokuzwa nina ntjhaba,
Lalelisisani nina ntjhaba.
Iphasi nakho koke okukilo akulalele,
Inarha nawo woke umkhiqizwayo.
2 Ngombana ukusilingeka kwakaJehova kujamelene nazo zoke iintjhaba,+
Nelaka lakhe lijamelene nalo loke ibutho lazo.+
Uzozinikela ekutjhatjalalisweni;
Uzozirhayila.+
3 Ababuleweko bazokulahlwa,
Umnuko weendumbu zabo uzokukhuphuka;+
4 Loke ibutho lezulwini lizokubola,
Izulu lizokusongwa njengomsongo.
Woke amabutho azokutjhwaba,
Njengekari elitjhwabileko eliwa emthini wamadiribe
Nanjengefeyi elitjhwabileko emthini wamafeyi.
5 “Ngombana isabulami izokuthanjiswa ziingazi ezulwini.+
Izokwehlela kwa-Edomu bona iyokwahlulela,+
Ebantwini engibanikele ekutjhatjalalisweni.
6 UJehova unesabula; izokuzala iingazi.
Ngombana uJehova unomhlatjelo eBhozira,
Ngizokwenza bona kuphalake iingazi zeenlwana ezinengi kwa-Edomu.+
7 Iinkunzi zommango zizokubulawa nazo,
Iinkunzana neenkunzi ezinamandla.
Inarha yakwa-Edomu izokuthanjiswa ngeengazi,
Nethuli layo lizokuthanjiswa ngamafutha.”
8 Ngombana uJehova unelanga lokubuyiselela,+
Umnyaka wokujezisa ngebanga lomlandu ongokomthetho weZiyoni.+
9 Imilanjanayo* izokutjhuguluka ibe sikontiri,
Nethuli layo lizokuphenduka isibabuli,
Begodu inarhayo izokuba njengesikontiri esitjhako.
10 Ebusuku namkha emini engeze sicinywe;
Intuthwaso izokuhlala ikhuphuka nini nanini.
Isizukulwana nesizukulwana sizokuhlala sitjhabalele;
Akekho ozokuphinda adlule lapho ngokungapheliko.+
11 Lizokubuswa ngugubulu negubudu,
Iinkhova namagubulu azokuhlala kiyo.
Ngentambo yokulinganisa nangamatje uZimu uzokulinga inarha le
Atjengise bona izabe inganalitho begodu itjhatjalalisiwe.
12 Akekho eenkhulwini zakhe ozokubizwa ebukhosini,
Namakhosanakhe woke angekhe asaba khona.
13 Kuzokumila ameva emibhotjhongwenakhe evikelekileko,
Ameva nekhula elinameva kuzokuba sendawenakhe evikelekileko.
Izokuba yindawo yeempungutjha,+
Nendawo yeenciliba.
14 Iinlwana zerhalawumbeni zizokuhlangana neenlwana ezenza itjhada,
Imbuzi yommango izokubiza umnganayo.*
Iinyoni* zizokuhlala lapho Zifumane nendawo yokuphumula.
15 Inyoka izokwenza isikhundla sayo lapho, ibekele namaqanda,
Izowaqhoqhosela begodu iwabuthelele ndawonye emthunzinayo.
Amadlanga azokuhlangana lapho, elinye nelinye nomnganalo.
16 Hlolisisa encwadini kaJehova begodu uyifundele phezulu:
Akukho nasinye esizokulahleka;
Akukho nasinye esizokutlhoga umngani,
Ngombana nguJehova okhuphe umyalo,
Begodu mumoyakhe ozozibuthelela ndawonye.
17 Nguye oziphosele ifumbe,
Sisandla sakhe esilinganise indawazo.
Izokuba ngeyazo ngokungapheliko;
Zizokuhlala kiyo kizo zoke iinzukulwana.