Joromiya
39 Ngomnyaka wethoba wokubusa kweKosi yakwaJuda uTsedekhiya, ngenyanga yetjhumi, uNebukadinetsari* ikosi yeBhabhiloni nalo loke ibutho lakhe beza eJerusalema balivimbezela.+
2 Ngomnyaka we-11 wokubusa kwakaTsedekhiya, ngenyanga yesine, ngelanga lethoba lenyanga, babhuruza amaboda wedorobho.+ 3 Woke amakhosana wekosi yeBhabhiloni angena ahlala phasi eSangweni eliPhakathi,+ bekunguNerigali-Saretseri omSamgari, uSarisekimi omRabisari,* uNerigali-Saretseri omRabimegi* nawo woke amakhosana wekosi yeBhabhiloni.
4 Lokha iKosi yakwaJuda uTsedekhiya nawo woke amasotja ababona, babaleka,+ baphumela ngaphandle kwedorobho ebusuku ngendlela esengadini yekosi, baphuma esangweni phakathi kwamaboda amabili baraga ngendlela ye-Araba.+ 5 Kodwana amaKhaledi* abagijimisa, abamba uTsedekhiya emmangweni othabaleleko weJerikho.+ Amthumba begodu amletha eKosini yeBhabhiloni uNebukadinetsari eRibhila+ enarheni yeRhamathi+ lapha amgweba khona. 6 Ikosi yeBhabhiloni yathi kurhayilwe amadodana kaTsedekhiya phambi kwakhe eRibhila, begodu ikosi yeBhabhiloni yathi zoke iinkhulu zakwaJuda kufuze zirhayilwe.+ 7 Waphophaza amehlo kaTsedekhiya, ngemva kwalokho wambopha ngeenketani zekhopha bona amlethe eBhabhiloni.+
8 Ngemva kwalokho, amaKhaledi* atjhisa indlu yekosi* nezindlu zabantu,+ agiriza amaboda weJerusalema.+ 9 UNebuzaradani+ induna yabonogada wathatha boke abantu ebebasele edorobheni, wabasa ekudingisweni eBhabhiloni, ababaleki ebebazinikele kuye nawo woke umuntu oseleko.
10 Kodwana uNebuzaradani induna yabonogada watjhiya enarheni yakwaJuda abanye babantu abatlhage khulu, labo ebebanganalitho. Ngelangelo wabanikela namasimu wamadiribe namasimu bona basebenze.*+
11 Nje-ke iKosi yeBhabhiloni uNebukadinetsari* yanikela uNebuzaradani induna yabonogada imiyalo le malungana noJoromiya yathi: 12 “Mthathe umtlhogomele; ungamlimazi; umnikele nanyana yini ayifunako.”+
13 Nje-ke uNebuzaradani induna yabonogada, uNebutjhazibani umRabisari,* uNerigali-Saretseri umRabimegi,* nawo woke amadoda adumileko wekosi yeBhabhiloni bayala 14 bona kukhutjhwe uJoromiya ngesiRhodlweni sakaNogada+ begodu asiwe kuGedaliya+ indodana ka-Arhikhamu+ indodana kaTjhafani,+ alethwe ngendlinakhe. Besele atjhatjhululiwe ahlala hlangana nabantu.
15 UJoromiya nakasavalelwe ngesiRhodlweni sakaNogada+ ilizwi lakaJehova lafika kuye lathi: 16 “Khamba, utjele u-Ebede-Meleki+ umTopiya ukuthi, ‘Nakhu uJehova wamabutho, uZimu ka-Israyeli, akutjhoko: “Qala ngizalisa amezwami ngokuletha ihlekelele edorobheneli ingasi okuhle, begodu ngelangelo nizokubona lokhu kwenzeka.”’
17 “‘Kodwana ngizokusindisa ngelangelo,’ kutjho uJehova, begodu ‘angekhe unikelwe ebantwini obasabako.’
18 “‘Ngombana kwamambala ngizokwenzela indlela yokobana uphunyurhe begodu angekhe uwe ngesabula. Uzokusindisa ukuphila kwakho ngombana uthembele kimi,’+ kutjho uJehova.”