Joromiya
41 Ngenyanga yekhomba u-Itjhimayeli+ indodana kaNetaniya indodana ka-Elitjhama, obekangewebukhosini namadoda adumileko wekosi, beza namadoda alitjhumi kuGedaliya indodana ka-Arhikhamu eMitsipha.+ Nabasadla ndawonye eMitsipha, 2 U-Itjhimayeli indodana kaNetaniya namadoda alitjhumi ebewanaye basikima basahlela uGedaliya indodana ka-Arhikhamu indodana kaTjhafani ngesabula. Nje-ke wabulala loyo ikosi yeBhabhiloni ebeyimbeke phezu kwenarha. 3 U-Itjhimayeli wasahlela nawo woke amaJuda ebewanoGedaliya eMitsipha namasotja wamaKhaledi* ebewalapho.
4 Ngelanga lesibili uGedaliya abulewe, ngaphambi kobana abantu bazi ngakho, 5 kweza amadoda ama-80 avela eTjhekemu,+ eTjhilo,+ neSamariya.+ Iindevu zawo bezirhuniwe, izambatho zawo bezidatjulwe phakathi, bebazisikile,+ bebaphethe umnikelo weenthoro nepepho emhlophe+ ezandleni zabo bona bakunikele endlini kaJehova. 6 Nje-ke u-Itjhimayeli indodana kaNetaniya waphuma avela eMitsipha bona ayokuhlangana nabo, bekalila njengombana akhamba. Uthe nakahlangana nabo, wathi kibo: “Yizani kuGedaliya indodana ka-Arhikhamu.” 7 Kuthe nabangena ngedorobheni, u-Itjhimayeli indodana kaNetaniya namadoda ebekakhamba nawo babarhayila babaphosela ngepetsini.
8 Kodwana bekunamadoda alitjhumi hlangana nawo athi, ku-Itjhimayeli: “ungasibulali, ngombana sifihle ikoroyi, ibhali, amafutha, neliju esimini.” Nje-ke akhenge ababulale kunye nabafowabo. 9 Nje-ke u-Itjhimayeli waphosela zoke iindumbu zamadoda awabuleleko ngepetsini ekulu, leyo iKosi u-Asa eyayenzela iKosi uBhatjha yakwa-Israyeli.+ Le yipetsi u-Itjhimayeli indodana kaNetaniya ayizalisa ngamadoda arhayiliweko.
10 U-Itjhimayeli wathumba boke abantu ebebasele eMitsipha,+ amadodakazi weKosi nabo boke abantu ebebasele eMitsipha, labo uNebuzaradani induna yabonogada ababeka esirhodlweni sakaGedaliya+ indodana ka-Arhikhamu. U-Itjhimayeli indodana kaNetaniya wabathumba, wakhamba bona ayamele kuma-Amoni.+
11 Kuthe lokha uJorhanani+ indodana kaKhareyarhi nalo loke ibutho leenduna ebelinaye nabezwa ngabo boke ubumbi obenziwe ngu-Itjhimayeli indodana kaNetaniya, 12 bathatha woke amadoda bakhamba bona bayokulwa no-Itjhimayeli indodana kaNetaniya, bamfumana hlanu kwamanzi amanengi* eGibiyoni.
13 Boke abantu ebebano-Itjhimayeli bathaba nababona uJorhanani indodana kaKhareyarhi nalo loke ibutho leenduna ebelinaye. 14 Nje-ke boke abantu u-Itjhimayeli ebekabathumbe eMitsipha+ bajika, babuyela emva noJorhanani indodana kaKhareyarhi. 15 U-Itjhimayeli indodana kaNetaniya namadoda abunane akhamba naye baphunyurha kuJorhanani begodu baya kuma-Amoni.
16 UJorhanani indodana kaKhareyarhi nalo loke ibutho leenduna ebelinaye bathatha boke abantu abavela eMitsipha, labo ababasindise ku-Itjhimayeli indodana kaNetaniya ngemva kokuthi abulele uGedaliya+ indodana ka-Arhikhamu. Babuyisa amadoda, amasotja, abafazi, abantwana, neenkhulu zesigodlo eGibiyoni. 17 Nje-ke bakhamba begodu baya endaweni yokulala eKimhamu ehlanu kweBhetlehema,+ bafuna ukuya eGibhide+ 18 ngebanga lamaKhaledi.* Ngombana besele bawasaba, njengombana u-Itjhimayeli indodana kaNetaniya abulele uGedaliya indodana ka-Arhikhamu, loyo ikosi yeBhabhiloni ebeyimbeke phezu kwenarha.+