AbaHlulelii
4 Ngemva kokuhlongakala kwaka-Ehudi, ama-Israyeli athoma godu ukwenza okumbi emehlweni kaJehova.+ 2 Ngalokho uJehova wawathengisela esandleni sakaJabhini ikosi yeKanana,+ obekabusa eRhatsori. Induna yebutho lakhe bekunguSisera, obekahlala eRharotjhethi+ yeentjhaba.* 3 Ama-Israyeli alilela uJehova,+ ngombana uJabhini bekaneenkarana zepi ezima-900 ezinemikhwa emide emavilinazo*+ begodu wagandelela ama-Israyeli kabuhlungu+ iminyaka ema-20.
4 UDibhora, umphorofidikazi,+ umkaLapidothi, bekangumahluleli kwa-Israyeli ngesikhatheso. 5 Bekajayele ukuhlala ngaphasi komuthi wesundu kaDibhora hlangana neRama+ neBhetheli+ esifundeni seentaba zakwa-Efrayimu; ama-Israyeli bewakhuphukela kuye bona awahlulele. 6 Wathumela bona kuyokubizwa uBharaki+ indodana ka-Abinowamu eKhedetjhi eNafitali,+ wathi kuye: “Kghani uJehova uZimu ka-Israyeli akakakhuphi umyalo na? ‘Khamba umatjhele* eNtabeni iTabori, uthathe amadoda azii-10 000 kwaNafitali nakwaZebuloni ukhambe nawo. 7 Ngizokuletha uSisera kuwe, induna yebutho lakaJabhini, kunye neenkarana zakhe zepi namabuthwakhe emlanjaneni* weKhitjhoni+ begodu ngizomnikela esandleni sakho.’”+
8 UBharaki wathi kuye: “Nange ukhamba nami ngizokuya, nange ungakhambi nami, nami angeze ngiye.” 9 UDibhora wathi kuye: “Ngizokukhamba nawe nakanjani. Nanyana kunjalo, ijima oya kilo angeze likulethele idumo ngombana uJehova uzokunikela uSisera esandleni somfazi.”+ Yeke uDibhora wasikima wakhamba noBharaki eKhedetjhi.+ 10 UBharaki wabizela uZebuloni noNafitali+ eKhedetjhi, amadoda azii-10 000 alandela emtlhalenakhe. UDibhora wakhuphuka naye.
11 URhebheri umKheni gade azihlukanise namaKheni,+ iinzukulwana zakaRhobabi, umukhwe kaMosi,+ bekahlome itende lakhe eduze nomuthi omkhulu eTsananimu eseKhedetjhi.
12 USisera wabikelwa ukuthi uBharaki indodana ka-Abinowamu ukhuphukele eNtabeni iTabori.+ 13 Khonokho, uSisera wabuthelela zoke iinkarana zepi, iinkarana ezima-900 ezinemikhwa emide emavilinazo* namabutho woke ebekanaye kusukela eRharotjhethi yeentjhaba ukuya emlanjaneni* weKhitjhoni.+ 14 Nje-ke uDibhora wathi kuBharaki: “Sikima, ngombana leli lilanga uJehova ayokunikela ngalo uSisera esandleni sakho. Kghani uJehova akakhambi phambi kwakho?” UBharaki wehla eNtabeni iTabori namadoda azii-10 000 amlandela. 15 Ngemva kwalokho, uJehova watjharaganisa+ uSisera nazo zoke iinkarana zakhe zepi kunye nebutho loke phambi kwesabula kaBharaki. Ekugcineni, uSisera wehla ekaranenakhe wabaleka ngeenyawo. 16 UBharaki wagijimisa iinkarana zepi nebutho bewayokufika eRharotjhethi yeentjhaba. Yeke loke ibutho lakaSisera labulawa ngesabula; akhenge kusinde namunye.+
17 Kodwana uSisera wabaleka ngeenyawo waya etendeni lakaJayeli+ umkaRhebheri+ umKheni, ngombana bekunokuthula hlangana noJabhini+ ikosi yeRhatsori nendlu kaRhebheri umKheni. 18 UJayeli waphuma bona ayokuhlangabeza uSisera, wathi kuye: “Ngena kosami, ngena ngapha. Ungasabi.” Yeke uSisera wangena ngetendeni begodu uJayeli wamembesa ngengubo. 19 Nje-ke uSisera wathi kuye: “Ngibawa ungiphe amanzana ngisele, ngombana ngomile.” UJayeli wavula ibhodlelo lesikhumba lebisi wamnikela wasela,+ ngemva kwalokho wamembesa godu. 20 USisera wathi kuye: “Jama esangweni letende, nakungeza othileko akubuze athi, ‘Kunendoda ngapha?’ uthi, ‘Awa!’”
21 Kodwana uJayeli umkaRhebheri wathatha isikhonkhwani setende nenondo. Kwathi uSisera asayile ngobuthongo begodu adiniwe, wamnanabela wabethela isikhonkhwani ehlokwakhe wamhlanganisa nehlabathi, wahlongakala.+
22 UBharaki waya lapho afunana noSisera, uJayeli waphuma wamhlangabeza, wathi kuye: “Yiza ngizokutjengisa indoda oyifunako.” Wangena naye wabona uSisera ahlongakele, anesikhonkhwani ehloko.
23 Yeke ngelangelo, uZimu wahlula uJabhini ikosi yeKanana phambi kwama-Israyeli.+ 24 Isandla sama-Israyeli saqina khulu phezu kwakaJabhini ikosi yeKanana,+ bekwaba kulapho atjhabalalisa uJabhini ikosi yeKanana.+