Hezekiyeli
25 Ilizwi lakaJehova lafika kimi godu, lathi: 2 “Ndodana yomuntu, qalisa ubuso bakho kuma-Amoni,+ uphorofide ngokujamelene nawo.+ 3 Kufuze uthi, malungana nama-Amoni, ‘Yizwani ilizwi leKosi ePhakemeko uJehova. Nakhu iKosi ePhakemeko uJehova ekutjhoko: “Ngombana uthe, ‘Arha!’ Ngokujamelene nendawami ecwengileko lokha nayisilaphazwako, ngokujamelene nenarha yakwa-Israyeli nayitjhiywa inganalitho, nangokujamelene nendlu yakwaJuda lokha nayisiwa ekudingisweni, 4 Nje-ke ngininikela ebantwini bePumalanga bona nibe ngebabo. Bazokuhloma amakampabo phakathi kwakho, bajamise amatendabo hlangana nawe. Bazokudla iinthelo zakho bebasele ibisi lakho. 5 Ngizokwenza iRabha+ ibe madlelo wamakamela, inarha yama-Amoni ibe yindawo yokuphumula yomhlambi; kuzokufuze nazi ukuthi nginguJehova.”’”
6 Ngombana nakhu iKosi ePhakemeko uJehova ekutjhoko: ‘Ngebanga lokuthi uwahle izandla+ zakho weqayeqa ngeenyawo zakho bewathaba ngenarha yakwa-Israyeli ngokuyinyefula,+ 7 Nje-ke ngizokululela isandla sami ngokujamelene nawe ngikunikele eentjhabeni bona udlelezelwe. Ngizokususa esitjhabeni ngikutjhabalalise eenarheni.+ Ngizokurhayila begodu kuzokufuze nazi ukuthi nginguJehova.’
8 “Nakhu iKosi ePhakemeko uJehova ekutjhoko: ‘Ngombana uMowabi+ neSeyiri+ bathe, “Qala! Indlu yakwaJuda ifana nazo zoke ezinye iintjhaba,” 9 Ngizokulisa uMowabi angakavikeleki kwelinye ihlangothi* lentaba lomkhawulo wamadorobhakhe, ubuhle benarhakhe eBhethe-Jetjhimothi, eBhali-Mewoni ukufikela eKhiriyatayimu.+ 10 Ngizoyinikela kunye nama-Amoni bona ibe lilifa ebantwini bePumalanga,+ ama-Amoni angekhe asakhunjulwa hlangana neentjhaba.+ 11 Ngizokukhupha isahlulelo kuMowabi,+ kuzokufuze bazi ukuthi nginguJehova.’
12 “Nakhu iKosi ePhakemeko uJehova ekutjhoko: ‘U-Edomu uzibuyiselele endlini yakwaJuda bewenza umlandu omkhulu ngokuzibuyiselela kiyo;+ 13 Nje-ke nakhu iKosi ePhakemeko uJehova ekutjhoko: “Ngizokululela isandla sami ngokujamelene no-Edomu ngisuse umuntu nefuyo, ngizoyitjhiya inganalitho.+ Ukusuka eTemani ukufikela eDedani, bazokuwa ngesabula.+ 14 ‘Ngizozibuyiselela ku-Edomu ngesandla sabantu bami u-Israyeli.+ Bazokuletha ilaka nokusilingeka kwami ku-Edomu, ukuthi babone ukuzibuyiselela kwami,’+ kutjho iKosi ePhakemeko uJehova.”’
15 “Nakhu iKosi ePhakemeko uJehova ekutjhoko: ‘Ngebanga lobutha babo obungapheliko, amaFilista azimisela ngokukhohlakala ukuzibuyiselela nokutjhabalalisa.+ 16 Nje-ke nakhu iKosi ePhakemeko uJehova ekutjhoko: “Ngilulela isandla sami ngokujamelene namaFilista,+ ngizowasusa kumaKereti+ bengitjhabalalise izakhamuzi eziseleko ezimagega nelwandle.+ 17 Ngizokukhupha isahlulelo kibo ngezenzo ezikulu zokuziphindiselela ngokubajezisa ngelunya, kuzokufuze bazi ukuthi nginguJehova nangizibuyiselela kibo.”’”