Joromiya
38 Nje-ke uTjhefathiya indodana kaMathani, uGedaliya indodana kaPhatjhirhuri, uJukali+ indodana kaTjhelemiya, noPhatjhirhuri+ indodana kaMalikiya bezwa amezwi uJoromiya ebekawakhuluma nabo boke abantu, athi: 2 “Ngilokhu uJehova akutjhoko, ‘Loyo ohlala edorobheneli uzokufa ngesabula, ngendlala nangesibetho.*+ Kodwana loyo ozinikela kumaKhaledi* uzokuragela phambili aphila begodu uzokuphephisa ukuphila kwakhe.’+ 3 Ngilokhu uJehova akutjhoko, ‘Idorobheli nakanjani lizokunikelwa emabuthweni wekosi yeBhabhiloni begodu izolithumba.’”+
4 Amakhosana athi ekosini: “Sibawa ubulale indoda le,+ ngombana yehlisa umfutho wamasotja asele edorobheneli, newabo boke abantu, ngokukhuluma amezwi la kibo. Ngombana indoda le ayibafuneli ukuthula abantwaba kodwana ihlekelele.” 5 IKosi uTsedekhiya yaphendula yathi: “Qalani! Usezandleni zenu, ngombana ikosi angekhe yenze litho bona inivimbe.”
6 Nje-ke bathatha uJoromiya bamphosela ngepetsini kaMalikiya indodana yekosi ebeyisesiRhodlweni sabonoGada.+ Nje-ke behlisela uJoromiya phasi ngeentambo. Bekunganamanzi ngepetsini kodwana kunedaka kwaphela, uJoromiya wathoma ukumodza ngedakeni.
7 U-Ebede-Meleki+ umTopiya, omphakulwa endlini yekosi, wezwa bona uJoromiya ufakwe ngepetsini. Ikosi beyihlezi eSangweni lendlu kaBhenjamini,+ 8 Nje-ke u-Ebede-Meleki waphuma ngendlini yekosi, wakhuluma nekosi wathi: 9 “Maye! Kosi, okwenziwe madoda la kuJoromiya umphorofidi bukhohlakali. Amphosele ngepetsini begodu uzokufela lapho ngebanga lendlala, ngombana akunaburotho obuseleko edorobheni.”+
10 Nje-ke ikosi yayala u-Ebede-Meleki umTopiya yathi: “Thatha amadoda ama-30 lapha niyokukhupha uJoromiya umphorofidi ngepetsini ngaphambi kobana afe.” 11 Nje-ke u-Ebede-Meleki wathatha amadoda batjhinga ngendlini yekosi* baya ngaphasi kwendawo yamagugu,+ bathatha izambatho ezimaratha namatjhila amaratha bawehlisela phasi ngeentambo kuJoromiya ngepetsini. 12 Yeke u-Ebede-Meleki umTopiya wathi kuJoromiya: “Ngibawa ufake amatjhila amaratha, izembatho ezimaratha neentambo ngaphasi kwamakhwaphakho.” uJoromiya wenza njalo, 13 bamdosa ngeentambo bona bamkhuphele ngaphandle kwepetsi. UJoromiya wahlala esiRhodlweni sakaNogada.+
14 Ikosi uTsedekhiya yathumela bona kubizwe uJoromiya umphorofidi eze kuye ebungenweni besithathu, okuyindlu kaJehova, begodu ikosi yathi kuJoromiya: “Kunento engifuna ukukubuza yona. Ungangifihleli litho.” 15 UJoromiya wathi kuTsedekhiya: “Nangingakutjela nakanjani uzongibulala. Nangingakupha iseluleko angekhe ungilalele.” 16 IKosi uTsedekhiya yafunga kuJoromiya ngemsitheleni yathi: “Ngifunga uJehova ophilako, osiphe ukuphilokhu, angekhe ngikubulale, begodu angekhe ngikunikele esandleni sabantu abafuna ukukubulala.”
17 Nje-ke uJoromiya wathi kuTsedekhiya: “Ngilokhu uJehova uZimu wamabutho, uZimu ka-Israyeli akutjhoko, ‘Nawuzinikela emakhosaneni wekosi yeBhabhiloni uzokusindisa ukuphila kwakho, begodu idorobheli angekhe litjhiswe ngomlilo, wena nabantu bendlwakho nizokusinda.+ 18 Kodwana nawungazinikeli emakhosaneni wekosi yeBhabhiloni, idorobheli lizokunikelwa amaKhaledi,* azolitjhisa ngomlilo,+ begodu wena angekhe uphunyurhe ezandleni zawo.’”+
19 Nje-ke iKosi uTsedekhiya yathi kuJoromiya: “Ngisaba amaJuda ahlubukele kumaKhaledi,* nangingazinikela kiyo, azongiphatha ngelunya.” 20 UJoromiya wathi: “Angekhe unikelwe kiwo. Ngibawa ulalele ilizwi lakaJehova kilokhu engikutjhoko, kuzokukhambela kuhle begodu uzokuragela phambili uphila. 21 Kodwana nawungafuni ukuzinikela, ngilokhu uJehova angembulele khona: 22 Qala! Boke abafazi abasele ngendlini yekosi yakwaJuda banikelwa emakhosaneni wekosi yeBhabhiloni+ begodu bathi,
‘Abantu othembele kibo bakukhohlisile begodu bakuhlulile.+
Babangele bona inyawo lakho limodze edakeni.
Nje bakujikele.’
23 Boke abafazi bakho namadodanakho azokukhutjhelwa kumaKhaledi,* angekhe uphunyurhe esandleni sabo, kodwana uzokubanjwa yikosi yeBhabhiloni+ begodu ngebanga lakho idorobheli lizokutjhiswa ngomlilo.”+
24 UTsedekhiya wathi kuJoromiya: “Ungatjeli muntu ngezintwezi bona ungafi. 25 Kodwana amakhosana nakangezwa ukuthi ngikhulume nawe bese athi, ‘Sibawa usitjele, utheni ekosini. Ungasifihleli litho, angekhe sikubulale.+ Itheni ikosi kuwe?’ 26 kufuze ubaphendule uthi, ‘Bengibawa ikosi ingangithumeli godu endlini kaJehonathana bona ngiyokufela khona.’”+
27 Ngokukhamba kwesikhathi woke amakhosana eza kuJoromiya, amhlohla ngemibuzo wawatjela koke ikosi emyale ngakho. Yeke akhenge asatjho litho kuye, ngombana akunamuntu ozwe ebebakhuluma ngakho. 28 Bekube lilanga iJerusalema elathunjwa ngalo uJoromiya bekasesiRhodlweni sakaNogada;+ bekalapho bekwaba kulapho iJerusalema lithunjwa khona.+