LEVITIKUSI

1 UJehova wabiza uMosi wakhuluma naye asetendeni lokuhlangana,+ wathi: 2 “Khuluma nama-Israyeli uthi kiwo, ‘Nangabe omunye wenu ufuna ukuletha umnikelo kuJehova awuthethe efuywenakhe, umnikelwakhe kufuze awuthathe emhlanjini weenkomo namkha emhlanjini wezimvu neembuzi.+

3 “‘Nange umnikelwakhe otjhiswako awuthethe emhlanjinakhe weenkomo, kufuze alethe ikunzana ephilileko.+ Kufuze awulethe ngokuzithandela+ phambi kwakaJehova ebungenweni betende lokuhlangana. 4 Kufuze abeke isandla sakhe phezu kwehloko yekunzana yomnikelo otjhiswako begodu uZimu uzowamukela umnikelo loyo wokulitjalelwa kwezono zakhe.

5 “‘Nje-ke ikunzana leyo kufuze ihlatjwe phambi kwakaJehova, amadodana ka-Aroni, abaphristi,+ azokuletha iingazezo phambi kwakaZimu bekazifafaze kiwo woke amahlangothi we-aldara,+ elisebungenweni betende lokuhlangana. 6 Isilwana ekuzokwenziwa ngaso umnikelo otjhiswako kufuze sisuswe isikhumba besihlahlelwe.+ 7 Amadodana ka-Aroni, abaphristi, kufuze abase umlilo e-aldareni+ begodu abeke kuhle iinkuni emlilweni. 8 Amadodana ka-Aroni abaphristi, azokuthatha iintokana zenyama,+ ihloko nomhlwehlwe* akubeke phezu kweenkuni emlilweni ose-aldareni. 9 Amathumbaso neenqatha zaso kufuze zihlanzwe ngamanzi begodu umphristi kufuze azitjhise e-aldareni njengomnikelo otjhiswako, umnikelo owenziwe ngomlilo uliphunga elimnandi kuJehova.+

10 “‘Nange umnikelwakhe otjhiswako awuthethe emhlanjini wezimvu namkha weembuzi, kufuze akhethe iramu+ namkha ipongo ephile kuhle.+ 11 Kufuze ihlatjelwe ngehlangothini elingetlhagwini le-aldara phambi kwakaJehova begodu amadodana ka-Aroni abaphristi azokufafaza iingazi zayo emahlangothini woke we-aldara.+ 12 Uzoyihlahlela begodu umphristi uzokubeka iintokana zenyama kuhle, ihlokwayo nomhlwehlwayo* phezu kweenkuni ezivuthako ezise-aldareni. 13 Kufuze ahlanze amathumbayo neenqatha zayo ngamanzi begodu umphristi kufuze azitjhise e-aldareni. Lokho kuzakuba mnikelo otjhiswako, umnikelo owenziwe ngomlilo uliphunga elimnandi kuJehova.

14 “‘Nangabe unikela ngeenyoni bona zibe mnikelo otjhiswako kuJehova, uzokunikela ngamajuba wommango namkha amajuba amancani afuywako.+ 15 Umphristi kufuze awalethe e-aldareni, aqunte iinhloko zawo bekawatjhise e-aldareni kodwana iingazi zawo kufuze aziphophisele eqadi kwe-aldara. 16 Kufuze akhuphe indlelo yawo, ahlube iinsiba zawo begodu awalahlele ngeqadi kwe-aldara epumalanga, ezaleni.*+ 17 Kufuze awasike emaphikweni kodwana angawahlukanisi. Ngemva kwalokho umphristi uzowatjhisa e-aldareni phezu kweenkuni ezivuthako. Amnikelo otjhiswako, umnikelo owenziwe ngomlilo uliphunga elimnandi kuJehova.

2 “‘Nange umuntu aletha umnikelo weenthoro+ kuJehova, kufuze anikele ngeflowuru esefiweko, kufuze awuthele ngamafutha bekathele nepepho emhlophe.+ 2 Uzowuletha emadodaneni ka-Aroni abaphristi, umphristi uzokunghwatha iflowuru ayizalise isandla namafutha nepepho emhlophe, uzowutjhisa e-aldareni ukwenzela bona uZimu akhumbule woke umnikelo,+ umnikelo owenziwe ngomlilo uliphunga elimnandi kuJehova. 3 Nanyana yini esele nakwenziwa umnikelo weenthoro ngeyaka-Aroni namadodanakhe.+ Icwengeke khulu.+ Ithethwe emnikelweni kaJehova owenziwe ngomlilo.

4 “‘Nange unikela umnikelo weenthoro obhagwe e-ondweni, kufuze wenziwe ngeflowuru esefiweko, uburotho oburondo obunganasibiliso obuvuleke phakathi obuhlanganiswe namafutha namkha iimphaphatha ezinganasibiliso ezitjhatjhwe ngamafutha.+

5 “‘Nange umnikelwakho weenthoro wenzelwe epanini,+ kufuze wenziwe ngeflowuru esefiweko iflowuru enganasibiliso evangwe namafutha. 6 Kufuze uhletjhulwe ube ziinquntwana bewuthele amafutha phezu kwawo.+ Mnikelo weenthoro.

7 “‘Nangabe umnikelwakho, mnikelo weenthoro owenzelwe epanini, kufuze wenziwe ngeflowuru esefiweko nangamafutha. 8 Umnikelwakho weenthoro owenziwe ngezintwezi, kufuze uwulethe kuJehova begodu uzokulethwa kumphristi, yena awutjhideze hlanu kwe-aldara. 9 Umphristi uzokuphakamisa ingcenye yomnikelo weenthoro,+ ukwenzela bona uZimu akhumbule woke umnikelo begodu umphristi uzowutjhisa e-aldareni ube mnikelo owenziwe ngomlilo, oliphunga elimnandi kuJehova.+ 10 Nanyana yini eseleko nakwenziwa umnikelo weenthoro, ngeyaka-Aroni namadodanakhe. Icwengeke khulu. Ithethwe emnikelweni kaJehova owenziwe ngomlilo.+

11 “‘Akunamnikelo weenthoro onesibiliso okufuze uwulethe kuJehova,+ ngombana akukafuzi wenze ihlama enesibiliso namkha utjhise iliju libe mnikelo kuJehova owenziwe ngomlilo.

12 “‘Izintwezi ungaziletha kuJehova bona zibe mnikelo weenthelo zokuthoma,+ kodwana akukafuzi uzitjhise e-aldareni bona zibe liphunga elimnandi.

13 “‘Yoke iminikelo yeenthoro kufuze inungwe ngetswayi; ungakhohlwa ukuwununga ngetswayi ngombana itswayi lizokukhumbuza isivumelwano sakaZimu. Yoke iminikelwakho kufuze uyinunge ngetswayi.+

14 “‘Nange uletha umnikelo weenthoro weenthelo ezivuthiweko zokuthoma kuJehova, kufuze ulethe iinthoro ezitja ezikhanzingiwe emlilweni, ikoroyi,* kube mnikelo weenthelo zakho zokuthoma ezivuthiweko.+ 15 Kufuze uwuthele ngamafutha begodu ufake ipepho emhlophe kiwo. Lo mnikelo weenthoro. 16 Umphristi uzowutjhisa e-aldareni ukwenzela bona uZimu akhumbule woke umnikelo,+ okuziinthoro ezigayiweko, amafutha nepepho emhlophe kube mnikelo kuJehova owenziwe ngomlilo.

3 “‘Nangabe umuntu unikela umhlatjelo wetjhebiswano+ awuthethe emhlambinakhe weenkomo, kungaba yikomo eduna namkha esikazi, kufuze anikele ngekomo ephile kuhle phambi kwakaJehova. 2 Kufuze abeke isandla sakhe phezu kwehloko yekomo leyo begodu izokuhlatjwa ebungenweni betende lokuhlangana; amadodana ka-Aroni, abaphristi, azokufafaza iingazi zayo emahlangothini woke we-aldara. 3 Ingcenye yomhlatjelwakhe wetjhebiswano uzoyinikela ibe mnikelo kuJehova owenziwa ngomlilo:+ Umhlwehlwe+ osemathunjini, woke umhlwehlwe osemathunjini, 4 neziso ezimbili ezinomhlwehlwe. Uzokususa umhlwehlwe osesibindini asuse neziso.+ 5 Amadodana ka-Aroni azowutjhisa e-aldareni phezu komnikelo otjhiswako obekwe phezu kweenkuni ezivuthako;+ loyo mnikelo owenziwe ngomlilo oliphunga elimnandi kuJehova.+

6 “‘Nange umnikelwakhe awuthethe emhlambinakhe wezimvu namkha weembuzi bona enze umhlatjelo wetjhebiswano kuJehova, kufuze anikele ngesilwana esiduna namkha esisikazi esiphile kuhle.+ 7 Nakaletha iramu elincani bona libe mnikelwakhe, kufuze alilethe phambi kwakaJehova. 8 Uzokubeka isandla sakhe phezu kwehloko yeramu begodu izokuhlatjwa phambi kwetende lokuhlangana. Amadodana ka-Aroni azokufafaza iingazi zalo emahlangothini woke we-aldara. 9 Uzokuletha umhlwehlwe ovela emhlatjelweni wetjhebiswano bona ube mnikelo kuJehova owenziwe ngomlilo.+ Uzokususa woke umhlwehlwe osemsileni eduze nomgogodlha, umhlwehlwe osemathunjini, woke umhlwehlwe osemathunjini, 10 neziso ezimbili ezinomhlwehlwe. Uzokususa umhlwehlwe osesibindini asuse neziso.+ 11 Umphristi kufuze awutjhise e-aldareni. Lokhu kukudla,* mnikelo kuJehova owenziwe ngomlilo.+

12 “‘Nangabe umnikelwakhe yimbuzi, kufuze awulethe phambi kwakaJehova. 13 Uzokubeka isandla sakhe phezu kwehloko yembuzi, izokuhlatjwa phambi kwetende lokuhlangana begodu amadodana ka-Aroni azokufafaza iingazi zayo emahlangothini woke we-aldara. 14 Ingcenye yomnikelwakhe azoyiletha bona ibe mnikelo kuJehova owenziwe ngomlilo, mhlwehlwe osemathunjini, woke umhlwehlwe osemathunjini,+ 15 neziso ezimbili ezinomhlwehlwe. Uzokususa umhlwehlwe osesibindini asuse neziso. 16 Umphristi kufuze awutjhise e-aldareni. Lokhu kukudla,* mnikelo owenziwe ngomlilo bona ube liphunga elimnandi. Woke umhlwehlwe ngewakaJehova.+

17 “‘Lo mthetho enizokuphila ngawo iinzukulwana ngeenzukulwana, kizo zoke iindawo enizokuhlala kizo: Kufuze ningadli umhlwehlwe namkha iingazi.’”+

4 UJehova waraga wathi kuMosi: 2 “Tjela ama-Israyeli uthi, ‘Nange umuntu angenza isono angakanqophi+ ngokuthi enze nanyana yini uJehova athi ingenziwa:

3 “‘Nange umphristi+ ozesiweko enze isono+ bewabangela abantu bona babe nomlandu, kufuze alethe ikunzana ephilileko kuJehova bona ibe mnikelo wesono ngebanga lesono asenzileko.+ 4 Uzokuletha ikunzana leyo ebungenweni betende lokuhlangana+ phambi kwakaJehova, abeke isandla sakhe phezu kwehlokwayo begodu uzoyihlaba phambi kwakaJehova.+ 5 Ngemva kwalokho, umphristi+ ozesiweko uzokuthatha ezinye iingazi zekunzana leyo azilethe etendeni lokuhlangana; 6 umphristi uzokufaka umunwakhe eengazini+ azifafaze kalikhomba+ phambi kwakaJehova, phambi kwerharideni lendawo ecwengileko. 7 Umphristi uzokutjhatjha ezinye iingazi eempondweni ze-aldara lepepho enuka kamnandi+ eliphambi kwakaJehova etendeni lokuhlangana; zoke iingazi eziseleko zekunzana uzozithela esisekelweni se-aldara lomnikelo otjhiswako+ elisebungenweni betende lokuhlangana.

8 “‘Uzokususa woke amafutha wekunzana yomnikelo wesono kuhlanganise nomhlwehlwe osemathunjini, amafutha asemathunjini, 9 neziso ezimbili ezinamafutha. Uzokususa namafutha asesibindini, asuse neziso.+ 10 Uzokususa izintwezi njengombana kwenziwa ngomhlatjelo wetjhebiswano.+ Umphristi uzozitjhisa e-aldareni lomnikelo otjhiswako.

11 “‘Kodwana isikhumba sekunzana, inyama, ihloko, iinqatha, amathumbu nomswanayo+ 12 koke okuseleko kwekunzana uzokukhuphela ngaphandle kwekampa endaweni ehlwengileko lapho kulahlelwa khona umlotha begodu uzokutjhisa emlilweni weenkuni.+ Kufuze akutjhisele ezaleni.

13 Nangabe yoke ihlangano yakwa-Israyeli yenze isono ingakanqophi+ kodwana ingakayeleli ukuthi yenze into uJehova athi ingenziwa+ 14 begodu isonweso saziwe, ihlangano kufuze ilethe ikunzana phambi kwetende lokuhlangana bona kwenziwe umnikelo wesono. 15 Abadala behlangano bazokubeka izandla zabo phezu kwehloko yekunzana phambi kwakaJehova begodu ikunzana izokuhlatjwa phambi kwakaJehova.

16 “‘Ngemva kwalokho umphristi ozesiweko uzokuletha ezinye iingazi zekunzana leyo etendeni lokuhlangana. 17 umphristi uzokufaka umunwakhe eengazini, azifafaze kalikhomba phambi kwakaJehova phambi kwerharideni.+ 18 Umphristi uzokutjhatjha ezinye iingazi eempondweni ze-aldara+ phambi kwakaJehova etendeni lokuhlangana; zoke iingazi eziseleko uzozithela esisekelweni se-aldara lomnikelo otjhiswako elisebungenweni betende lokuhlangana.+ 19 Uzokususa woke amafutha bekawatjhise e-aldareni.+ 20 Uzokwenza ekunzaneni le njengombana enze ekunzaneni yomnikelo wesono. Ngilokho azokwenza, umphristi uzoyenzela umnikelo wokulitjalelwa kwezono+ begodu izokulitjalelwa. 21 Uzokulayela bona ikunzana ikhutjhelwe ngaphandle kwekampa begodu itjhiswe njengombana kutjhiswe yokuthoma.+ Mnikelo wesono wehlangano yakwa-Israyeli.+

22 “‘Lokha ikosana+ nayenza isono ingakanqophi ngokwenza enye yezinto uJehova uZimayo ayale bona zingenziwa begodu ibe mlandu 23 namkha ilemuke bona yenze isono ngokweqa umthetho, kufuze ilethe ipongo encani ephile kuhle bona ibe mnikelwayo. 24 Izokubeka isandla sayo phezu kwehloko yepongo encani begodu iyihlabele lapho kuhlatjelwa khona iminikelo etjhiswako kaJehova.+ Mnikelo wesono. 25 Umphristi uzokufaka umunwakhe eengazini zomnikelo wesono, azitjhatjhe eempondweni+ ze-aldara lomnikelo otjhiswako. Kuthi eziseleko, azithululele esisekelweni se-aldara lomnikelo otjhiswako.+ 26 Uzokutjhisa amafuthayo e-aldareni njengamafutha womhlatjelo wetjhebiswano;+ umphristi uzomenzela umnikelo wokulitjalelwa kwezono begodu uzokulitjalelwa.

27 “‘Nanyana ngubani enarheni owenza isono angakanqophi begodu abe mlandu ngokwenza enye yezinto uJehova ayale bona zingenziwa+ 28 namkha alemuke bona wenze isono, kufuze alethe imbuzana esikazi ephile kuhle bona ibe mnikelwakhe wesono asenzileko. 29 Uzokubeka isandla sakhe phezu kwehloko yomnikelo wesono, uzowuhlabela lapha kuhlatjelwa khona umnikelo otjhiswako.+ 30 Umphristi uzokufaka umunwakhe eengazini azitjhatjhe eempondweni ze-aldara lomnikelo otjhiswako, kuthi eziseleko azithululele esisekelweni se-aldara.+ 31 Uzokususa woke amafutha+ njengombana asuswa emhlatjelweni wetjhebiswano+ begodu umphristi uzowatjhisa e-aldareni abe liphunga elimnandi kuJehova, umphristi uzomenzela umnikelo wokulitjalelwa kwezono begodu uzokulitjalelwa.

32 “‘Kodwana nakanikela ngemvana bona ibe mnikelwakhe wesono, kufuze alethe imvana esikazi ephile kuhle. 33 Kufuze abeke isandla sakhe phezu kwehloko yomnikelo wesono begodu awuhlabele lapha kuhlatjelwa khona umnikelo otjhiswako.+ 34 Umphristi uzokufaka umunwakhe eengazini azitjhatjhe eempondweni ze-aldara lomnikelo otjhiswako,+ kuthi eziseleko azithululele esisekelweni se-aldara. 35 Uzokususa woke umhlwehlwawo ngendlela ekususwa ngayo umhlwehlwe weramu encani yomhlatjelo wetjhebiswano, umphristi uzowatjhisa e-aldareni phezu kweminikelo kaJehova eyenziwe ngomlilo,+ umphristi uzomenzela umnikelo wokulitjalelwa isono asenzileko begodu uzokulitjalelwa.+

5 “‘Nange umuntu abona omunye enza isono namkha ezwe ngesonweso+ kodwana angayi lokha nakezwa bona kufuneka abantu abazokuba bofakazi ngesonweso, uzokuba nomlandu begodu uzoziphendulela.

2 “‘Umuntu nakathinta nanyana yini engakahlwengeki, kungaba sibandana esifileko esingakahlwengeki, isilwana esifuywako namkha ezinye iinlwana ezincani,*+ naye akakahlwengeki begodu uzokuba mlandu ngitjho nanyana enze lokhu angakatjheji. 3 Namkha nangabe umuntu uthinta into engakahlwengeki ephuma emuntwini,+ nanyana yini engakahlwengeki engamenza naye angahlwengeki begodu azi ngayo uzokuba nomlandu.

4 “‘Nange umuntu afunga ukwenza okuthileko angakacabangi, kungaba kukwenza okuhle namkha okumbi, nanyana yini, bese alemuke ukuthi ufunge arhabile, uzokuba nomlandu.+

5 “‘Nakafumaneka anomlandu malungana nokhunye kwalokhu, kufuze avume ukuthi wone ngayiphi indlela.+ 6 Uzokuletha umnikelo womlandu kuJehova ngebanga lesono asenzileko,+ uzokuletha imvana esikazi namkha imbuzana esikazi ayithethe emhlambinakhe bona ibe mnikelo wesono. Nje-ke umphristi uzomenzela umnikelo wokulitjalelwa kwesono sakhe.

7 “‘Kodwana nangabe akakghoni ukunikela ngemvu, kufuze alethe amajuba amabili wommango namkha amajuba amabili amancani+ afuywako kuJehova bona abe mnikelwakhe womlandu ngebanga lesono sakhe. Linye kuzokuba ngelomnikelwakhe wesono, elinye kube ngelomnikelo otjhiswako.+ 8 Uzowaletha kumphristi, umphristi uzokuthatha lokuthoma enze umnikelo wesono begodu alisike kancani entanyeni. 9 Uzokufafaza ezinye iingazi zomnikelo wesono emahlangothini we-aldara, kuzakuthi iingazi eziseleko aziphophisele esisekelweni se-aldara.+ Mnikelo wesono. 10 Elinye uzolinikela bona libe mnikelo otjhiswako ngokuya ngokweenqophiso zeminikelo etjhiswako+ begodu umphristi uzomenzela umnikelo wokulitjalelwa kwezono ngebanga lesono asenzileko begodu uzokulitjalelwa.+

11 “‘Nangabe akakghoni ukunikela ngamajuba amabili wommango namkha ngamajuba amabili amancani afuywako, kufuze alethe kwetjhumi kwe-efa*+ kweflowuru esefiweko bona kube mnikelwakhe wesono. Akukafuzi afake amafutha namkha ipepho emhlophe ngombana mnikelo wesono. 12 Uzoyiletha kumphristi, umphristi uzoyinghwatha izale isandla ukwenzela bona uZimu akhumbule woke umnikelo begodu uzoyitjhisa phezu kwe-aldara phezu kweminikelo kaJehova eyenziwe ngomlilo. Mnikelo wesono. 13 Umphristi uzomenzela umnikelo wokulitjalelwa kwezono ngebanga lesono asenzileko, uzokulitjalelwa nanyana ngiziphi izono azenzileko.+ Okuseleko emnikelweni kuzokuba ngekomphristi+ njengomnikelo weenthoro.’”+

14 UJehova waraga wakhuluma noMosi wathi: 15 “Nange umuntu aziphatha ngokungathembeki, aphule umthetho kaJehova omalungana nezinto ezicwengileko angakanqophi,+ kufuze alethe iramu eliphile kuhle kuJehova alithethe emhlambinakhe bona libe mnikelo womlandu,+ lilingane nesiliva letjhekeli* ngokwesilinganiso setjhekeli sendawo ecwengileko.+ 16 Uzokuhlawula ngebanga lesono asenzileko endaweni ecwengileko, uzokungezelela ehlawulweni ingcenye eyodwa kezihlanu.+ Uzoyinikela umphristi begodu umphristi uzomenzela umnikelo wokulitjalelwa kwezono+ ngeramu yomnikelo womlandu, uzokulitjalelwa.+

17 “Nangabe umuntu wenza isono angakanqophi ngokwenza into uJehova angayifuniko, uzokuba mlandu begodu kufuze ajeziselwe isono sakhe.+ 18 Kufuze athathe iramu emhlambinakhe ngokwesilinganiso esifaneleko ayinikele umphristi bona ibe mnikelo womlandu.+ Umphristi uzomenzela umnikelo wokulitjalelwa kwezono ngebanga lomtjhapho awenze angakanqophi begodu uzokulitjalelwa. 19 Mnikelo womlandu. Unomlandu wokonela uJehova.”

6 UJehova waragela phambili wathi kuMosi: 2 “Nange umuntu ona angathembeki kuJehova+ ngokukhohlisa umakhelwanakhe ngento aphathiswe yona, namkha ngento abolekwe yona+ namkha adlelezele umakhelwanakhe, 3 namkha nange afumana okuthileko okulahlekileko bekaleye amala ngakho, nange afunga amala ngananyana ngisiphi isono asenzileko,+ nakhu okufuze akwenze: 4 Nange umuntu onile begodu amlandu kufuze abuyise akwebileko, akudlelezeleko, ebekaphathiswe khona namkha into ebeyilahlekile ayifumeneko, 5 namkha nanyana yini ayifunge ngamala, kufuze ahlawule begodu angezelele ingcenye yinye kezihlanu yehlawulo leyo.+ Kufuze ayinikele umnikazi ngelanga afunyenwe amlandu ngalo. 6 Kufuze alethe kumphristi iramu eliphile kuhle alithethe emhlambinakhe bona libe mnikelo womlandu oya kuJehova, ngokwesilinganiso esifaneleko somnikelo womlandu.+ 7 Umphristi uzomenzela umnikelo wokulitjalelwa kwezono phambi kwakaJehova begodu uzokulitjalelwa nanyana yini ayenzileko, eyenze bona abe mlandu.”+

8 UJehova waragela phambili wakhuluma noMosi, wathi: 9 “Tjela u-Aroni namadodanakhe uthi, “Nakhu umthetho womnikelo otjhiswako:+ Umnikelo otjhiswako kufuze uhlale emlilweni ose-aldareni ubusuku boke bekube sekuseni begodu umlilo we-aldareni akukafuzi ucime. 10 Umphristi kufuze ambathe isambatho sakhe sobuphristi esenziwe ngelineni,+ ambathe nebhrugwana langaphasi elenziwe ngelineni.+ Nje-ke umphristi uzokususa umlotha+ womnikelo otjhiswako otjhiswe mlilo ose-aldareni awubeke eqadi kwe-aldara. 11 Uzokuhlubula izambatho zakhe+ ambathe ezinye bekathathe umlotha awuse endaweni ehlwengileko, ngaphandle kwekampa.+ 12 Umlilo uzokuhlala uvutha e-aldareni, akukafuzi ucime. Umphristi kufuze abase iinkuni+ qobe ekuseni begodu ahlalise kuhle umnikelo otjhiswako phezu kwazo. Kufuze atjhise umhlwehlwe womhlatjelo wetjhebiswano phezu kwazo.+ 13 Umlilo kufuze uhlale uvutha e-aldareni, akukafuzi ucime.

14 Nje-ke lo mthetho womnikelo weenthoro:+ Nina madodana ka-Aroni kufuze niwulethe phambi kwakaJehova phambi kwe-aldara. 15 Omunye wawo uzokunghwatha iflowuru esefiweko yomnikelo weenthoro izale isandla, namanye wamafuthawo nayo yoke ipepho emhlophe esemnikelweni weenthoro, uzoyitjhisa e-aldareni bona ibe liphunga elimnandi ukwenzela bona uJehova akhumbule woke umnikelo.+ 16 U-Aroni namadodanakhe bazokudla okuseleko emnikelweni weenthoro,+ bazokudla njengoburotho obunganasibiliso endaweni ecwengileko. Bazokudlela ngesirhodlweni setende lokuhlangana.+ 17 Akukafuzi ibhagwe nananyana yini enesibiliso.+ Ngilokhu engibapha khona eminikelwenami eyenziwe ngomlilo,+ kucwengeke khulu+ njengomnikelo wesono nanjengomnikelo womlandu. 18 Zoke iinzukulwana zaka-Aroni eziduna zizowudla.+ Ngilokhu ezizokuhlala zikufumana eminikelweni kaJehova eyenziwe ngomlilo kizo zoke iinzukulwana.+ Nanyana yini ethinta iminikelo izokucwengeka.’”

19 UJehova wakhuluma noMosi godu: 20 “Lo mnikelo ka-Aroni namadodanakhe abazowuletha kuJehova ngelanga azeswe ngalo:+ Kwetjhumi kwe-efa*+ yeflowuru esefiweko bona kube mnikelo weenthoro waqobe,+ enye ingcenye bazoyinikela ekuseni kuthi enye ingcenye bayinikele ntambama. 21 Izokuhlanganiswa namafutha yenzelwe epanini.+ Uzoyiletha ihlanganiswe kuhle namafutha begodu ihletjhulwe ibe ziinquntwana bona ibe mnikelo weenthoro obhagiweko, iphunga elimnandi eliya kuJehova. 22 Umphristi ozesiweko ozokuthatha isikhundla saka-Aroni hlangana namadodanakhe uzowenza.+ Lesi sinqophiso esizokusebenza ngokungapheliko: Umnikelo opheleleko oya kuJehova kufuze utjhiswe. 23 Woke umnikelo weenthoro womphristi kufuze ube mnikelo opheleleko. Akukafuzi udliwe.”

24 Godu uJehova wakhuluma noMosi, wathi: 25 “Tjela u-Aroni namadodanakhe uthi, ‘Lo mthetho womnikelo wesono:+ Lapho kuhlatjelwa khona+ umnikelo otjhiswako kulapho umnikelo wesono uzokuhlatjelwa khona phambi kwakaJehova. Yinto ecwengeke khulu. 26 Uzokudliwa mphristi owenza umnikelo wesono.+ Uzokudlelwa endaweni ecwengileko, esirhodlweni setende lokuhlangana.+

27 “‘Nanyana yini ethinta inyama yomnikelo izokucwengeka, nanyana ngubani ofafaza iingazi zawo esambathweni sakhe kufuze asihlanze endaweni ecwengileko. 28 Izitja zomdaka* ebeyibiliswe ngazo ziphadlhwe kodwana nangabe beyibiliswe ngezitja zekhopha, izitjezo kufuze zikirwe begodu zihlanzwe ngamanzi.

29 “‘Woke amadoda abaphristi azokudla inyama yomnikelo loyo.+ Yinto ecwengeke khulu.+ 30 Kodwana inyama yomnikelo wesono akukafuzi idliwe nangabe ezinye zeengazi zawo zilethwe etendeni lokuhlangana bona kwenziwe umnikelo wokulitjalelwa kwezono endaweni ecwengileko,+ kufuze itjhiswe ngomlilo.

7 “‘Lo mthetho womnikelo womlandu:+ Uyinto ecwengeke khulu. 2 Bazokuhlabela umnikelo womlandu lapha kuhlatjelwa khona umnikelo otjhiswako begodu iingazi zawo+ zizokufafazwa emahlangothini woke we-aldara.+ 3 Umphristi uzokunikela woke umhlwehlwe,+ kuhlanganise nomhlwehlwe osemsileni, umhlwehlwe osemathunjini, 4 neziso ezimbili ezinomhlwehlwe. Uzokususa umhlwehlwe osesibindini neziso.+ 5 Umphristi uzowutjhisa e-aldareni ube mnikelo kuJehova owenziwe ngomlilo.+ Mnikelo womlandu. 6 Woke amadoda abaphristi azokudla inyama yomnikelo lowo,+ kufuze idlelwe endaweni ecwengileko. Iyinto ecwengeke khulu.+ 7 Umthetho omalungana nomnikelo wesono usebenza nemnikelweni womlandu; inyama yomnikelo ngeyomphristi owenze umnikelo wokulitjalelwa kwezono.+

8 “‘Nange umphristi enzela umuntu umnikelo otjhiswako, isikhumba+ somnikelo otjhiswako loyo kuzokuba ngesomphristi.

9 “‘Woke umnikelo weenthoro obhagwe nge-ondweni namkha waphekwa epotweni namkha epanini+ uzokuba ngewomphristi owunikelako.+ 10 Kodwana woke umnikelo weenthoro ovangwe namafutha+ namkha owomisiweko+ uzokuba ngewamadodana ka-Aroni; woke azokwabelwa ngokulingana.

11 “‘Lo mthetho womhlatjelo wetjhebiswano+ umuntu angawuletha kuJehova: 12 Nakawuletha bona uzokuba mhlatjelo wokuthokoza,+ uzowuletha noburotho obunganasibiliso oburondo obuvuleke phakathi bahlanganiswa namafutha, iimphaphatha ezinganasibiliso ezitjhatjhwe ngamafutha noburotho oburondo obuvuleke phakathi obenziwe ngeflowuru esefiweko, bahlanganiswa kuhle namafutha. 13 Uzokuletha umnikelwakhe kunye noburotho oburondo obuvuleke phakathi obunesibiliso nomhlatjelwakhe wokuthokoza wemihlatjelwakhe yetjhebiswano. 14 Kiyo yoke imihlobo ekhona yoburotho, uzokuthatha uburotho bunye bona bube yingcenye ecwengileko eya kuJehova; buzokuba ngebomphristi ofafaze iingazi zemihlatjelo yetjhebiswano.+ 15 Inyama yomhlatjelo wokuthokoza yemihlatjelwakhe yetjhebiswano kufuze idliwe ngelanga ayinikela ngalo. Akukafuzi kube khona esalako bekube sekuseni.+

16 “‘Nangabe umhlatjelwakhe wetjhebiswano sifungo+ namkha mnikelo osuka ehliziyweni,+ kufuze udliwe ngelanga awunikela ngalo begodu okuseleko kungadliwa ngelanga elilandelako. 17 Kodwana yoke inyama yomhlatjelo eseleko ngelanga lesithathu kufuze itjhiswe.+ 18 Nanyana kunjalo, nange kuba nenyama yomhlatjelwakhe wetjhebiswano edliwako ngelanga lesithathu, loyo owenze umhlatjelo lo angeze amthabise uZimu. Umhlatjelwakhe angekhe wamukeleke; uyinto enyenyisako begodu owudlako kuzokufuze aziphendulele.+ 19 Inyama ethinta into engakahlwengeki akukafuzi idliwe. Kufuze itjhiswe ngomlilo. Woke umuntu ohlwengileko angayidla inyama ehlwengileko.

20 “‘Kodwana nange umuntu ongakahlwengeki adla inyama yomhlatjelo wetjhebiswano oya kuJehova, umuntu loyo kufuze abulawe.+ 21 Nange umuntu athinta nanyana yini engakahlwengeki,+ kungaba kungahlwengeki komuntu namkha kwesilwana+ namkha kwananyana yini engakahlwengeki enyenyisako+ bekadle inyama yomhlatjelo wetjhebiswano owenzelwe uJehova, umuntu loyo kufuze abulawe.’”

22 UJehova waraga wakhuluma noMosi, wathi: 23 “Tjela ama-Israyeli uthi, ‘Akukafuzi nidle umhlwehlwe+ wekunzi, weramu namkha wembuzi. 24 Umhlwehlwe wesilwana esifileko nomhlwehlwe wesilwana esibulewe ngesinye ungasetjenziselwa okhunye kodwana akukafuzi niwudle.+ 25 Nanyana ngubani odla umhlwehlwe wesilwana anikela ngaso bona sibe mnikelo owenziwe ngomlilo oya kuJehova kufuze abulawe.

26 “‘Ningazidli iingazi+ nanyana kukuphi lapha nihlala khona, kungaba ngezeenyoni namkha ezinye iinlwana. 27 Nanyana ngubani odla iingazi kufuze abulawe.’”+

28 UJehova waraga wakhuluma noMosi, wathi: 29 “Tjela ama-Israyeli uthi, ‘Nanyana ngubani oletha umhlatjelwakhe wetjhebiswano kuJehova, kufuze alethe ingcenye yomhlatjelwakhe bona ibe mnikelo oya kuJehova.+ 30 Uzokuletha umhlwehlwe+ nesifuba bona kube mnikelo owenziwe ngomlilo oya kuJehova, uzowuphephezelisa awuse emuva naphambili, kube mnikelo ophephezeliswako+ phambi kwakaJehova. 31 Umphristi uzokususa umhlwehlwe e-aldareni,+ kodwana isifuba ngesaka-Aroni namadodanakhe.+

32 “‘Uzokunikela umphristi umlenze wangesidleni eminikelwenakho yetjhebiswano bona ube yingcenye ecwengileko.+ 33 Indodana ka-Aroni enikela iingazi zemihlatjelo yetjhebiswano nomhlwehlwe, izokufumana umlenze wangesidleni.+ 34 Ngombana ngizokuthatha isifuba emnikelweni ophephezeliswako nomlenze wengcenye ecwengileko emihlatjelweni yetjhebiswano yama-Israyeli, ngizoyinikela u-Aroni umphristi namadodanakhe, lo mthetho ozokuhlala usebenza ema-Israyelini.+

35 “‘Le yingcenye ezokuthathwa eminikelweni kaJehova eyenziwe ngomlilo ekufuze ibekelwe eqadi bona ibe ngeyabaphristi u-Aroni namadodanakhe ngelanga ababekwe ngalo bona babe baphristi bakaJehova.+ 36 UJehova wayala bona banikelwe ingcenye le evela kuma-Israyeli ngelanga ababeka ngalo.+ Lo mthetho ozokuhlala usebenza eenzukulwaneni zabo zoke.’”

37 Lo mthetho womnikelo otjhiswako,+ umnikelo weenthoro,+ umnikelo wesono,+ umnikelo womlandu,+ umhlatjelo wokubekwa kwabaphristi+ nomhlatjelo wetjhebiswano,+ 38 Njengombana uJehova ayala uMosi eNtabeni iSinayi+ ngelanga ayala ngalo ama-Israyeli bona alethe iminikelwawo kuJehova emmangweni weSinayi.+

8 UJehova waraga nokukhuluma noMosi wathi: 2 “Thatha u-Aroni namadodanakhe,+ izambatho,+ amafutha wokuzesa,+ ikunzi yomnikelo wesono, amaramu amabili nomantji woburotho obunganasibiliso+ 3 bewuhlanganise yoke ihlangano ndawonye ebungenweni betende lokuhlangana.”

4 Nje-ke uMosi wenza koke uJehova amyala ngakho, wabuthelela yoke ihlangano ebungenweni betende lokuhlangana. 5 UMosi wathi ehlanganweni: “Nakhu uJehova asiyale bona sikwenze.” 6 UMosi watjhideza u-Aroni namadodanakhe bewabahlambisa.+ 7 Ngemva kwalokho, wamembathisa iphuraphura+ wayibopha ngebhande elikghatjisiweko,+ wamembathisa ijasana enganamikhono, wamembathisa i-efodi+ ngaphezulu wayibopha ngebhande+ ledinini le-efodi.+ 8 Ngemva kwalokho, wamfaka isikhwanyana sesifubeni+ wafaka i-Urimi neThumimi*+ ngesikhwanyaneni esisesifubeni. 9 Nje-ke wamthwesa itjhila+ elithwalwa ehloko, wabeka isinjana emanyazelako yegolide ngaphambili etjhileni elithwalwa ehloko, itshwayo elitjengisa ukuthi u-Aroni uzinikele kuZimu+ njengombana uJehova ayala uMosi.

10 UMosi wathatha amafutha wokuzesa begodu wazesa ithaberinakeli nazo zoke izinto ebezikilo+ wazicwengisa. 11 Ngemva kwalokho, wafafaza amanye wawo kalikhomba e-aldareni begodu wazesa i-aldara, izitja zalo, isitja sokuhlambela nesisekelo saso ukwenzela bona azicwengise. 12 Emaswapheleni wathela amanye amafutha ehloko ka-Aroni begodu wamzesa ukwenzela bona acwengeke.+

13 UMosi watjhideza amadodana ka-Aroni eduze wawambathisa iimphuraphura wawabopha amabhande akghatjisiweko emadininawo begodu wawathwesa iingwani+ njengombana uJehova ayala uMosi.

14 Ngemva kwalokho, waletha ikunzi yomnikelo wesono begodu u-Aroni namadodanakhe babeka izandla zabo phezu kwehloko yekunzi yomnikelo wesono.+ 15 UMosi wayihlaba wafaka umunwakhe eengazini+ wazitjhatjha eempondweni ze-aldara emahlangothini woke, wacwengisa i-aldara esonweni, kwathi iingazi eziseleko wazithululela esisekelweni se-aldara, ukwenzela bona alicwengisele ukwenza umnikelo wokulitjalelwa kwezono. 16 UMosi wathatha woke amafutha asemathunjini, amafutha asesibindini, iziso ezimbili namafuthazo wawatjhisa e-aldareni.+ 17 Ngemva kwalokho, wathatha okuseleko kwekunzi okuhlanganisa isikhumba sayo, inyamayo nomswanayo wakutjhisela ngaphandle kwekampa+ njengombana uJehova bekamyalile.

18 Nje-ke watjhideza iramu lomnikelo otjhiswako begodu u-Aroni namadodanakhe babeka izandla zabo phezu kwehloko yeramu.+ 19 UMosi walihlaba, wafafaza iingazi zalo emahlangothini woke we-aldara. 20 Wahlahlela iramu, wathatha ihlokwalo, iintokana zenyama nomhlwehlwalo* wakutjhisa emlilweni. 21 Wahlanza amathumbalo neenqatha zalo ngamanzi, ngemva kwalokho uMosi watjhisa iramu loke e-aldareni umnikelo otjhiswako oliphunga elimnandi. Bekumnikelo otjhiswako owenziwe ngomlilo oya kuJehova, njengombana uJehova bekayale uMosi.

22 Ngemva kwalokho, waletha iramu lesibili, iramu lomnikelo wokubekwa kwabaphristi,+ u-Aroni namadodanakhe babeka izandla zabo phezu kwehloko yeramu.+ 23 UMosi walihlaba wathatha ezinye iingazi watjhatjha indlebe ka-Aroni yangesidleni, uthubhakghurwakhe wangesidleni nozwanakhe omkhulu wangesidleni. 24 Ngemva kwalokho, uMosi wathatha amadodana ka-Aroni wawaletha ngaphambili, wathatha ezinye iingazi wawatjhatjha eendlebeni zangesidleni, kibothubhakghuru babo bangesidleni nemazwaninawo amakhulu wangesidleni; kwathi iingazi eziseleko wazifafaza emahlangothini woke we-aldara.+

25 Nje-ke wathatha amafutha, amafutha asemsileni, woke umhlwehlwe osemathunjini, amafutha asesibindini, iziso ezimbili namafuthazo nomlenze wangesidleni.+ 26 Wathatha umantji onoburotho obunganasibiliso ebewuphambi kwakaJehova, wakhupha uburotho bunye obunganasibiliso oburondo obuvuleke phakathi,+ uburotho bunye oburondo obuvuleke phakathi obutjhatjhwe ngamafutha nesiphaphatha sinye.+ Wazibeka phezu kweentokana zamafutha naphezu komlenze wangesidleni. 27 Ngemva kwalokho, wazibeka ezandleni zaka-Aroni nezandleni zamadodanakhe wathoma ukuziphephezelisa wazisa emuva naphambili bona zibe mnikelo ophephezeliswako phambi kwakaJehova. 28 Nje-ke uMosi wazithatha ezandleni zabo wazitjhisa e-aldareni phezu komnikelo otjhiswako. Bezimhlatjelo wokubekwa kwabaphristi oliphunga elimnandi. Bekumnikelo owenziwa ngomlilo oya kuJehova.

29 UMosi wathatha isifuba wasisa emuva naphambili njengomnikelo ophephezeliswako oya kuJehova.+ Isifuba seramu yomhlatjelo wokubekwa kwabaphristi saba ngesakaMosi,+ njengombana uJehova bekamyalile.

30 UMosi wathatha amanye amafutha wokuzesa+ nezinye iingazi ebezise-aldareni wazifafaza ku-Aroni nezambathweni zakhe, wazifafaza emadodaneni ka-Aroni nezambathweni zawo. Wacwengisa u-Aroni nezambatho zakhe, wacwengisa amadodanakhe+ nezambatho zawo.+

31 Nje-ke uMosi wathi ku-Aroni nemadodanenakhe: “Bilisani+ inyama ebungenweni betende lokuhlangana begodu nizoyidlela khona noburotho obusemantjini ebewusetjenziswa nakwenziwa umhlatjelo wokubekwa kwabaphristi njengombana uZimu angiyala, ‘u-Aroni namadodanakhe bazoyidla.’+ 32 Inyama noburotho obuseleko kufuze nikutjhise ngomlilo.+ 33 Akukafuzi niphume ebungenweni betende lokuhlangana amalanga alikhomba bekube kulapho amalanga wokubekwa kwenu bona nibe baphristi sekaphelile, ngombana kuzokuthatha amalanga alikhomba bona nibekwe nibe baphristi.+ 34 UJehova usiyale bona senze koke esikwenze namhlanjesi ukwenzela bona sinenzele umnikelo wokulitjalelwa kwezono.+ 35 Kufuze nihlale ebungenweni betende lokuhlangana ubusuku nemini amalanga alikhomba+ begodu nenze koke uJehova+ aniyale ngakho, ukwenzela bona ningafi ngombana ngilokho engiyalwe ngakho.”

36 U-Aroni namadodanakhe benza koke uJehova abayala ngakho ngoMosi.

9 Ngelanga lobunane+ uMosi wabiza u-Aroni namadodanakhe nabadala bakwa-Israyeli. 2 Wathi ku-Aroni: “Zithathele ikonyana lomnikelo wesono+ neramu lomnikelo otjhiswako, ukhethe eziphile kuhle, uzinikele phambi kwakaJehova. 3 Uzokuthi kuma-Israyeli, ‘Thathani ipongo yomnikelo wesono, ikonyana neramu elincani, ngayinye kufuze ibe nomnyaka munye, zibe ngeziphile kuhle, nenze ngazo umnikelo otjhiswako, 4 nithathe ikunzi neramu yemihlatjelo yetjhebiswano+ bona nenze umhlatjelo phambi kwakaJehova nomnikelo weenthoro+ ohlanganiswe namafutha ngombana uJehova uzokubonakala kini namhlanjesi.’”+

5 Bathatha koke uMosi abayale ngakho bakusa phambi kwetende lokuhlangana. Ihlangano yoke yeza ngaphambili yajama phambi kwakaJehova. 6 UMosi wathi: “Ngilokhu uJehova ayale bona nikwenze ukwenzela bona iphazimulo kaJehova ibonakale kini.”+ 7 Nje-ke uMosi wathi ku-Aroni: “Tjhidela e-aldareni unikele umnikelwakho wesono+ nomnikelwakho otjhiswako+ bewenzele wena nomndenakho umnikelo wokulitjalelwa kwezono, unikele umnikelo wabantu+ ubenzele umnikelo wokulitjalelwa kwezono zabo+ njengombana uJehova ayalile.”

8 U-Aroni khonokho watjhidela e-aldareni wahlaba ikonyana lomnikelwakhe wesono.+ 9 Nje-ke amadodana ka-Aroni aletha iingazi kuye,+ u-Aroni wafaka umunwakhe eengazinezo, wazitjhatjha eempondweni ze-aldara, eziseleko wazithululela esisekelweni se-aldara.+ 10 Emnikelweni wesono, wathatha amafutha, iziso namafutha asesibindini wazitjhisa e-aldareni njengombana uJehova ayale uMosi.+ 11 Watjhisa inyama nesikhumba ngaphandle kwekampa.+

12 Ngemva kwalokho, wahlaba umnikelo otjhiswako, amadodana ka-Aroni amnikela iingazi wazifafaza emahlangothini woke we-aldara.+ 13 Amnikela iintokana zomnikelo otjhiswako kunye nehloko, wazitjhisa e-aldareni. 14 Godu wahlanza amathumbu neenqatha, wazitjhisa phezu komnikelo otjhiswako e-aldareni.

15 Ngemva kwalokho, waletha umnikelo wabantu, wathatha nembuzi yomnikelo wezono zabantu wayihlaba, wenza ngayo umnikelo wesono njengombana enzile keyokuthoma. 16 Waletha umnikelo otjhiswako begodu wawunikela ngokweenqophiso zeminikelo etjhiswako.+

17 Waletha umnikelo weenthoro,+ wawunghwatha wawuzalisa isandla wawutjhisa e-aldareni kunye nomnikelo otjhiswako owenziwa ekuseni.+

18 Ngemva kwalokho, wahlaba ikunzi neramu yomhlatjelo wetjhebiswano wabantu. Amadodana ka-Aroni amnikela iingazi, wazifafaza emahlangothini woke we-aldara.+ 19 Iintokana zamafutha wekunzi,+ amafutha asemsileni weramu, umhlwehlwe osemathunjini, iziso namafutha asesibindini,+ 20 abeka zoke iintokana zomhlwehlwezo eemfubeni, ngemva kwalokho wazitjhisa e-aldareni.+ 21 Kodwana iimfuba nomlenze wangesidleni u-Aroni waziphephezelisa wazisa emuva naphambili, bona zibe mnikelo ophephezeliswako oya kuJehova njengombana uMosi ayalile.+

22 U-Aroni waphakamisela izandla zakhe ngebantwini wababusisa,+ wehla e-aldareni ngemva kokwenza umnikelo wesono, umnikelo otjhiswako nemihlatjelo yetjhebiswano. 23 Emaswapheleni uMosi no-Aroni bangena ngetendeni lokuhlangana, baphuma babusisa abantu.+

Iphazimulo kaJehova yabonakala ebantwini boke,+ 24 kwavela umlilo obuya kuJehova,+ watjhisa umnikelo otjhiswako neentokana zomhlwehlwe ezise-aldareni. Kuthe abantu nababona lokhu barhuwelela, bakhothama.+

10 Kamva amadodana ka-Aroni uNadabi no-Abihu+ ngayinye yathatha into yayo yokuphatha umlilo,+ yafaka umlilo ngaphakathi nepepho.+ Anikela ipepho ngomlilo ongakavumeleki phambi kwakaJehova, okuyinto abatjela bona bangayenzi. 2 Khonokho kwavela umlilo phambi kwakaJehova wabatjhisa+ bahlongakala phambi kwakaJehova.+ 3 Nje-ke uMosi wathi ku-Aroni: “Nakhu uJehova akutjhwileko, ‘Ngizokucwengiswa hlangana nabantu abeza phambi kwami,+ ngizokuphazinyuliswa phambi kwabo boke abantu.’” U-Aroni wathula.

4 UMosi wabiza uMitjhayeli no-Elitsafani amadodana ka-Uziyeli+ usonghwana ka-Aroni, wathi kibo: “Yizani nizokuthatha abafowenu phambi kwendawo ecwengileko nibakhuphele ngaphandle kwekampa.” 5 Batjhidela babathwala basambethe iimphuraphura zabo babakhuphela ngaphandle kwekampa, njengombana uMosi abayalile.

6 UMosi wathi ku-Aroni nakwamanye amadodanakhe u-Elazara no-Itamara: “Ningalisi iinhluthu zenu zibe zide begodu zingakanywa namkha nirathule izambatho zenu,+ khona ningeze nife begodu ilaka lakaZimu lingehleli yoke ihlangano. Abafowenu behlangano yoke yakwa-Israyeli bazokulilela labo uJehova ababulele ngomlilo. 7 Akukafuzi niphume ebungenweni betende lokuhlangana ukwenzela bona ningafi ngombana uJehova unizese ngamafutha.”+ Benza lokho uMosi abayale khona.

8 Nje-ke uJehova wathi ku-Aroni: 9 “Ungaseli iwayini namkha nanyana kungaba yini edakako, wena namadodanakho lokha naniya etendeni lokuhlangana,+ ukwenzela bona ningafi. Lo mthetho ozokuhlala usebenza kizo zoke iinzukulwana zenu. 10 Lokhu kuzohlukanisa into ecwengileko nengakacwengeki, kuhlukanise into engakahlwengeki nehlwengileko,+ 11 begodu uzokukghona ukufundisa ama-Israyeli zoke iinqophiso uJehova azikhulume kiwo ngoMosi.”+

12 Nje-ke uMosi wakhuluma no-Aroni namadodanakhe egade asele, u-Elazara no-Itamara, wathi: “Eminikelweni kaJehova eyenziwe ngomlilo thathani okuseleko komnikelo weenthoro, nibhage uburotho obunganasibiliso. Uburothobu nizobudlela eduze ne-aldara+ ngombana bucwengeke khulu.+ 13 Kufuze niyidlele endaweni ecwengileko+ ngombana yinto okufuze wena namadodanakho niyithole eminikelweni kaJehova eyenziwe ngomlilo ngombana ngilokhu engayalwa ngakho. 14 Nizokudla nesifuba somnikelo ophephezeliswako nomlenze wengcenye ecwengileko endaweni ehlwengileko,+ wena, amadodanakho namadodakazakho+ ngombana emihlatjelweni yetjhebiswano yama-Israyeli, ngilokhu okufuze wena namadodanakho ninikelwe khona. 15 Azokuletha umlenze wengcenye ecwengileko nesifuba somnikelo ophephezeliswako nomnikelo wamafutha owenziwe ngomlilo bona kuphephezeliswe umnikelo ophephezeliswako, usiwe emuva naphambili phambi kwakaJehova. Ngilokho ozokuhlala ukufumana, wena namadodanakho+ njengombana uJehova ayalile.”

16 UMosi wafunisisa imbuzi yomnikelo wesono+ kodwana wafumana ukuthi itjhisiwe. Nje-ke wasilingeka ngebanga laka-Elazara no-Itamara amadodana ka-Aroni aseleko, wathi: 17 “Kubayini ningakhenge nidlele umnikelo wesono endaweni ecwengileko+ ngombana uyinto ecwengeke khulu begodu uninikele wona bona nisuse isono sehlangano, niyenzele umnikelo wokulitjalelwa kwezono phambi kwakaJehova? 18 Qalani! Iingazi zawo akhenge zilethwe endaweni ecwengileko,+ bekufuze niwudlele endaweni ecwengileko njengombana ngiyaliwe.” 19 U-Aroni waphendula uMosi wathi: “Qala! Namhlanjesi balethe umnikelwabo wesono nomnikelwabo otjhiswako phambi kwakaJehova+ kodwana izintwezi zenzeke kimi. Ngathana ngidle umnikelo wesono namhlanjesi, kghani lokho bekuzomthabisa uJehova?” 20 Kwathi uMosi nakezwa lokhu wazwisisa.

11 Nje-ke uJehova wathi kuMosi no-Aroni: 2 “Tjelani ama-Israyeli nithi, ‘Lezi ziinlwana zephasini eningazidla:+ 3 Zoke iinlwana ezihlukanisa iinqatha kabili begodu ezetjisako ningazidla.

4 “‘Kodwana lezi ziinlwana okungakafuzi nizidle, ezihlangana neenlwana ezetjisako namkha ezihlukanisa iinqatha kabili: likamela liyetjisa kodwana alihlukanisa iinqatha kabili. Lisilaphele kini.+ 5 Imbila ngombana iyetjisa+ kodwana ayikahlukanisi iinqatha kabili. Isilaphele kini. 6 Umqasa ngombana uyetjisa kodwana awukahlukanisi iinqatha kabili. Usilaphele kini. 7 Ifarigi+ ngombana ihlukanisa iinqatha kabili kodwana ayetjisi. Isilaphele kini. 8 Akukafuzi nidle inyamazo namkha nithinte iindumbu zazo. Zisilaphele kini.+

9 “‘Lezi ziinlwana zemanzini eningazidla: Nanyana ngisiphi isilwana esingemanzini esineengwedlo neempepha, kungaba ngelwandle namkha ngemlanjeni, ningasidla.+ 10 Zoke iinlwana zelwandle namkha zemlanjeni kuhlanganise iinlwana ezincani zephasini ezihlala ndawonye zenze iinqhema, iinlwana ezinganangwedlo neempepha kufuze ziqalwe njengezisilapheleko. 11 Kufuze zibe ngezisilapheleko kini, akukafuzi nidle inyamazo+ begodu kufuze ninyenye iindumbu zazo. 12 Koke okusemanzini okunganangwedlo neempepha kusilaphele kini.

13 “‘Lezi ziinlwana eziphaphako okufuze nizinyenye, akukafuzi zidliwe ngombana zisilaphele: Ikhozi, nekhozi+ elidla iinhlambi, idlanga+ elinzima, 14 ikhozi elibomvu, nayo yoke imihlobo yamakhozi anzima, 15 yoke imihlobo yamagubulu, 16 inciliba, isikhova, inyoni yelwandle, yoke imihlobo yamakhozi, 17 isikhova esincani, ikhomoranti,* isikhova esineendlebe ezide, 18 idada, igubulu, idlanga, 19 udoyi, yoke imihlobo yamakhwalimanzi, inukani nomaphelaphelani. 20 Zoke iinunwana ezinamaphiko ezikhamba ngeenyawo ezine zisilaphele kini.

21 “‘Eenunwaneni ezinamaphiko ezikhamba ngeenyawo ezine, ningadla kwaphela lezo ezinemilenze emibili emide, ezeqayeqa ngayo ehlabathini. 22 Nanzi eningazidla: imihlobohlobo yeentethe ezifudukako, ezinye iintethe ezijayekileko,+ abotswiritswiri nezinye iintethe. 23 Zoke iinunwana ezinamaphiko ezikhamba ngeenyawo ezine ziyanyenyisa kini. 24 Ngokuzidla nizozenza nisilaphale. Nanyana ngubani othinta iindumbu zazo uzokusilaphala bekube sentambama.+ 25 Nanyana ngubani oguga iindumbu zazo, kufuze ahlanze izambatho zakhe,+ uzokusilaphala bekube sentambama.

26 “‘Nanyana ngisiphi isilwana esihlukanisa iinqatha kabili kodwana singabi nesikhala phakathi begodu singetjisi, sisilaphele kini. Nanyana ngubani ozithintako uzokusilaphala.+ 27 Zoke iinlwana ezineendlawu, ezikhamba ngeenyawo ezine zisilaphele kini. Nanyana ngubani othinta iindumbu zazo uzokusiphala bekube sentambama. 28 Nanyana ngubani oguga iindumbu zazo, kufuze ahlanze izambatho zakhe+ begodu uzokusilaphala bekube sentambama.+ Zisilaphele kini.

29 “‘Lezi ziinlwana ezincani zephasini ezisilapheleko kini: ifukwana, ikhondlo,+ yoke imihlobo yeembhadwa, 30 umarhwarhwambayi, isibhadwa esikhulu, urhwabhani, isibhadwa sehlabathini nenwabu. 31 Iinlwanezi ezincani zephasini zisilaphele kini.+ Nanyana ngubani othinta iindumbu zazo, uzokusilaphala bekube sentambama.+

32 “‘Nanyana yini iinlwanezi eziwela phezu kwayo nazifako izokusilaphala, kungaba sisitja esenziwe ngesigodo, sisambatho, sikhumba namkha isiqetjhana somgodla. Nanyana ngisiphi isitja esisetjenziswako, kufuze sifakwe ngemanzini, sizokusilaphala bekube sentambama, ngemva kwalokho sizokuhlwengeka. 33 Nangabe ziwela esitjeni esenziwe ngomdaka,* kufuze nisiphadlhe nanyana yini ebeyingakiso izokuba ngesilapheleko.+ 34 Nanyana ngikuphi ukudla okuthintana namanzi ebewasesitjeneso kuzokuba ngokusilapheleko nanyana yini eselwako esesitjeneso izokuba ngesilapheleko. 35 Nanyana yini iindumbu zeenlwanezo eziwela phezu kwayo izokusilaphala. Kungaba yi-ondo namkha isitofu esincani, kufuze siphadlhwe sibe ziinquqwana. Zisilaphele begodu zizokuhlala zisilaphele njalo kini. 36 Mthombo nepetsi kwaphela ezizokuhlala zihlwengile kodwana nanyana ngubani othinta iindumbu zazo uzokusilaphala. 37 Nangabe iindumbu zazo ziwela embewini esazokutjalwa ihlwengile. 38 Kodwana nangabe imbewu ithelwe ngamanzi begodu ingcenye yeendumbu zazo iwela kiyo, imbewu leyo isilaphele kini.

39 “‘Nangabe isilwana enivumeleke ukusidla sifa nanyana ngubani othinta isidumbu saso, uzokuba ngosilapheleko bekube sentambama.+ 40 Nanyana ngubani odla inyama yesilwana esifilekwesi kufuze ahlanze izambatho zakhe begodu uzokuba ngosilapheleko bekube sentambama.+ Nanyana ngubani oguga isidumbu saso, kufuze ahlanze izambatho zakhe begodu uzokuba ngosilapheleko bekube sentambama. 41 Zoke iinlwana ezincani zephasini ziyinto enyenyisako.+ Kufuze zingadliwa. 42 Akukafuzi nidle nanyana ngisiphi isilwana esirhurhubako, nanyana ngisiphi isilwana esikhamba ngeenyawo ezine, namkha nanyana ngisiphi isilwana esincani sephasini esinemilenze eminengi ngombana ziyinto enyenyisako.+ 43 Ningazenzi bona ninyenyise ngokudla nanyana ngiziphi iinlwana ezincani begodu ningazisilaphazi nibe ngabasilapheleko ngebanga lazo.+ 44 Ngombana nginguJehova uZimenu+ begodu kufuze nizicwengise, nibe ngabacwengileko+ ngombana mina ngicwengile.+ Ningazisilaphazi ngokudla nanyana ngiziphi iinlwana ezincani ezikhambakhamba ephasini. 45 Ngombana nginguJehova onikhupha enarheni yeGibhide bona nginitjengise ukuthi nginguZimenu+ begodu kufuze nicwengeke+ ngombana ngicwengile.+

46 “‘Lo mthetho omalungana neenlwana, iinlwana eziphaphako, zoke iinlwana ezikhambakhambako emanzini nomalungana nazo zoke iinlwana ezincani zephasini, 47 ukwenzela bona kube nomehluko hlangana kokusilapheleko nokuhlwengileko nahlangana neenlwana ezingadliwako nalezo okungafuzi zidliwe.’”+

12 UJehova waraga wakhuluma noMosi wathi: 2 “Tjela ama-Israyeli uthi, ‘Nangabe umfazi uba sidisi bekabelethe umntwana omsana, uzokusilaphala amalanga alikhomba, njengalokha nakangakahlwengeki nakasesikhathini.+ 3 Ngelanga lobumnane, umntwana lo kufuze asokwe.+ 4 Uzokuragela phambili azihlambulula amalanga ama-33 ngebanga leengazi ezimlahlekeleko. Akukafuzi athinte nanyana yini ecwengileko begodu akukafuzi atjhidele endaweni ecwengileko bekube kulapho kuphela amalanga wokuhlanjululwa kwakhe.

5 “‘Nangabe ubelethe umntazana, uzokuba ngosilapheleko amalanga ali-14, njengalokha nakasesikhathini. Uzokuragela phambili azihlambulula amalanga ama-66 ngebanga leengazi ezimlahlekeleko. 6 Amalangakhe wokuzihlambulula nasele aphelile ngemva kokubeletha indodana namkha indodakazi, kufuze alethe kumphristi ebungenweni betende lokuhlangana, iramu elincani elinomnyaka munye lomnikelo otjhiswako,+ ijuba elincani elifuywako namkha ijuba lommango lomnikelo wesono. 7 Umphristi uzokuletha umnikelo loyo phambi kwakaJehova, amenzele umnikelo wokulitjalelwa kwezono zakhe, uzokuhlwengeka ngebanga leengazi ezimlahlekeleko nakabelethako. Lo mthetho omalungana nomfazi obeletha umntwana omsana namkha omntazana. 8 Kodwana nakangakghoni ukunikela ngemvu, kufuze alethe amajuba amabili wommango namkha amajuba amabili amancani afuywako,+ elinye lizokuba ngelomnikelo otjhiswako elinye libe ngelomnikelo wesono, umphristi uzomenzela umnikelo wokulitjalelwa kwezono begodu umfazi loyo uzokuhlwengeka.’”

13 UJehova waragela phambili akhuluma noMosi no-Aroni wathi: 2 “Nange umuntu avuvuka esikhumbeni sakhe, abe nesilonda esinesikhumba esomileko namkha ibala elikhanyelako, lokho kungaba kugula kobulepheru*+ esikhumbeni sakhe, kufuze alethwe ku-Aroni umphristi namkha kwenye yamadodanakhe emphristi.+ 3 Umphristi uzokuhlolisisa isilonda esisesikhumbeni sakhe. Nangabe uboya obusesilondeneso butjhugulukile babamhlophe begodu isilonda sibonakala singenelele khulu esikhumbeni, lobo bulepheru. Umphristi uzobuhlolisisa begodu uzokuthi umuntu loyo usilaphele. 4 Nangabe ibala elisesikhumbeni sakhe limhlophe begodu libonakale lingakangeneleli khulu esikhumbeni noboya obusesikhumbeni sakhe nabungakabi mhlophe, umphristi uzokuhlalisa umuntu loyo yedwa amalanga alikhomba.+ 5 Ngelanga lekhomba umphristi uzomhlola, nangabe isilondeso sibonakala ngasuthi sipholile begodu akhenge sisabalale esikhumbeni, umphristi uzomhlalisa ayedwa amanye amalanga alikhomba.

6 Umphristi uzomhlola godu ngelanga lekhomba, nangabe isilonda sipholile begodu akhenge sisabalale esikhumbeni sakhe, umphristi uzokuthi umuntu loyo uhlwengile;+ bekusilonda esinesikhumba esomileko kwaphela. Umuntu loyo uzokuhlanza izambatho zakhe ahlwengeke. 7 Kodwana ngemva kobana umphristi athe uhlwengile, kubonakale godu isilonda esinesikhumba esomileko esikhumbeni sakhe besisabalale, kufuze abuyele ayokuvela phambi komphristi. 8 Umphristi uzosihlola, nangabe isilonda esinesikhumba esomileko sisabalele esikhumbeni, umphristi uzokuthi usilaphele. Bulepheru.+

9 “Nange umuntu aphathwa bulepheru, kufuze alethwe kumphristi, 10 umphristi uzomhlola.+ Nangabe lapha avuvuke khona kunokumhlophe noboya besikhumba sakhe sebumhlophe begodu kunesilonda esivulekileko+ lapha avuvuke khona, 11 lobu bulepheru obuzokuhlala isikhathi eside esikhumbeni sakhe begodu umphristi uzokuthi usilaphele. Angekhe amhlalise yedwa+ ngombana usilaphele. 12 Nange ubulepheru busabalala isikhumba soke kusukela ehloko bekube seenyaweni, nanyana kukuphi lapha umphristi abona khona, 13 umphristi nakamhlolako abone ukuthi ubulepheru busabalele esikhumbeni sakhe soke, uzokuthi umuntu loyo uhlwengile.* Isikhumba sakhe soke sesimhlophe begodu uhlwengile. 14 Kodwana nangabe kuvela isilonda esivulekileko esikhumbeni sakhe, uzokuba ngosilapheleko. 15 Umphristi nakabona isilonda esivulekileko, uzokuthi kuye usilaphele.+ Isilonda esivulekileko sisilaphele. Bulepheru.+ 16 Nangabe isilonda esivulekileko siba mhlophe godu, umuntu loyo kufuze aye kumphristi. 17 Umphristi uzomhlola,+ nangabe isilonda sesimhlophe, umphristi uzokuthi uhlwengile.

18 “Nangabe umuntu uba nethumba esikhumbeni sakhe begodu liphole, 19 nange lapho bekunethumba khona kuvuvuka kube mhlophe namkha kube nebala elimhlophe namkha elibomvana kufuze avele phambi komphristi. 20 Umphristi uzolihlolisisa,+ nangabe libonakala litjhingela khulu esikhumbeni begodu uboya obusesikhumbeni sebumhlophe umphristi uzokuthi umuntu loyo usilaphele. Bulepheru obuqubuke ethumbeni. 21 Nange umphristi amhlolisisa abone isilonda sesinganaboya obumhlophe begodu singakangeneleli esikhumbeni, umphristi uzomhlalisa yedwa amalanga alikhomba.+ 22 Nangabe lisabalele esikhumbeni, umphristi uzokuthi umuntu loyo usilaphele. Unobulepheru. 23 Nangabe ibala alikasabalali, lokho kuvuvuka kwethumba kwaphela, umphristi uzokuthi umuntu loyo uhlwengile.+

24 “Nange umuntu atjhiswa mlilo kuvele inyama begodu lapha atjhe khona kubonakale ibala elimhlophe namkha elibomvu nokumhlophe, 25 umphristi uzolihlolisisa. Nangabe uboya obusebaleni sebumhlophe begodu bubonakala bungenelele khulu esikhumbeni, bulepheru obuvele encebenelo begodu umphristi uzokuthi umuntu loyo usilaphele. Uphethwe bulepheru. 26 Kodwana nangabe umphristi uyalihlolisisa begodu ubona bungekho uboya obumhlophe ebaleni, lingakatjhingeli khulu esikhumbeni begodu lipholile, umphristi uzomhlalisa yedwa amalanga alikhomba.+ 27 Umphristi uzomhlola ngelanga lekhomba, nakafumana bona lisabalele esikhumbeni, uzokuthi umuntu loyo usilaphele. Uphethwe bulepheru. 28 Kodwana nangabe ibala alikasabalali esikhumbeni begodu lipholile, kuvuvuka kwaphela okusencebeni, umphristi uzokuthi umuntu loyo uhlwengile, ngombana bekukuvuvuka kwenceba.

29 “Nangabe indoda namkha umfazi uba nesilonda ehloko namkha esilevini, 30 umphristi uzokuqala isilondeso.+ Nangabe isilondeso sibonakala singenelele khulu esikhumbeni begodu sinoboya obutjheli obuncani, umphristi uzokuthi umuntu loyo usilaphele; kugula okuvela esikhumbeni sehloko namkha eendevini. Bulepheru behloko namkha beendevu. 31 Nangabe umphristi ubona isilonda singakangeneleli khulu esikhumbeni begodu kunganaboya obunzima kiso, umphristi kufuze ahlalise umuntu loyo ayedwa amalanga alikhomba.+ 32 Umphristi uzokuhlola isilondeso ngelanga lekhomba, nangabe isilondeso asikasabalali begodu akunaboya obutjheli obuvelileko kiso, nesilonda sibonakala singakangeneli khulu esikhumbeni, 33 umuntu loyo kufuze agude kodwana akukafuzi agude lapha kunesilonda khona. Ngemva kwalokho, umphristi uzokuhlalisa umuntu loyo ayedwa amalanga alikhomba.

34 “Ngelanga lekhomba umphristi uzokuhlola isilondeso godu, nangabe ukugula okuvela esikhumbeni sehloko nokugula okuvela eendevini akukasabalali esikhumbeni begodu akubonakali kungenelele khulu esikhumbeni, umphristi uzokuthi umuntu loyo uhlwengile begodu umuntu loyo kufuze ahlanze izambatho zakhe, uzokuba ngohlwengileko. 35 Kodwana nangabe isilonda sisabalala esikhumbeni sakhe ngemva kokuhlanjululwa, 36 umphristi uzomhlola, nangabe isilonda sisabalele esikhumbeni, umphristi akatlhogi ukuqala uboya obutjheli; umuntu loyo usilaphele. 37 Lokha nakahlolwako kufunyanwe bona isilonda asikasabalali begodu uboya obunzima bukhulile kiso, isilonda sipholile. Kutjho ukuthi uhlwengile, umphristi uzokuthi kuye uhlwengile.+

38 “Nangabe indoda namkha umfazi uba namabala esikhumbeni begodu amabala lawo amhlophe, 39 umphristi uzowahlola.+ Nangabe amabala asesikhumbeni amhlophe, sibabo esinganangozi esiqubuke esikhumbeni. Umuntu loyo uhlwengile.

40 “Nange indoda iqothuka iinhluthu ibe nepandla, ihlwengile. 41 Nangabe indoda iqothuka iinhluthu kusukela ngaphambili ehlokwayo ibe nepandla, indoda leyo ihlwengile. 42 Nangabe kuvela isilonda esibomvu nokumhlophe epandlayo namkha esiphongweni sayo, lobo bulepheru obuqubuke ehlokwayo namkha esiphongweni sayo. 43 Umphristi uzomhlola, nangabe ukuvuvuka kwesilonda esibomvana nokumhlotjhana esiphezu kwepandlayo namkha esiphongweni sayo sifana nobulepheru obusesikhumbeni sayo, 44 inobulepheru. Isilaphele begodu umphristi kufuze athi kiyo isilaphele ngebanga lokugula okusehlokwayo. 45 Malungana nomuntu onobulepheru, izambatho zakhe kufuze zidatjulwe neenhluthu zakhe kufuze zingakanywa, kufuze azivale umlomo ngetjhila begodu arhuwelele athi, ‘Ngisilaphele, ngisilaphele!’ 46 Uzokuba ngosilapheleko bekaphole. Ngebanga lokuthi usilaphele kufuze ahlale yedwa ngaphandle kwekampa.+

47 “Nangabe isambatho sisilaphazwa bulepheru, kungaba sisambatho sewulu namkha selineni, 48 kungaba ziintambo ezitjhinga phasi naphezulu namkha iintambo ezivundlako zetjhila lelineni, namkha zewulu, isikhumba namkha nanyana yini eyenziwe ngaso, 49 nange ibala lokugula elitjheli nokuhlaza kotjani namkha elibomvu, lisilaphaza isambatho, isikhumba, iintambo ezitjhinga phasi naphezulu, iintambo ezivundlako namkha nanyana yini eyenziwe ngesikhumba isilaphazwe bulepheru, kufuze iyokutjengiswa umphristi. 50 Umphristi uzokuhlola izinto ezisilaphazwe kugulokho begodu uzozihlalisa zodwa amalanga alikhomba.+ 51 Ngelanga lekhomba nakayokuhlola izintwezo afumane ubulepheru busabalele esambathweni, entanjeni etjhinga phasi naphezulu, entanjeni evundlako namkha esikhumbeni (esisetjenziselwa nanyana yini), ukugulokho bulepheru obuthelelanako begodu into leyo isilaphele.+ 52 Kufuze atjhise isambathweso namkha intambo etjhinga phasi naphezulu, intambo evundlako ewulwini namkha elinenini, nananyana yini eyenziwe ngesikhumba, lapha ukugulokhu okuvele khona ngombana bulepheru obuthelelanako. Kufuze itjhiswe ngomlilo.

53 “Lokha umphristi nakazihlolako afumana ukugula kungakasabalali esambathweni, entambeni etjhinga phasi naphezulu, entambeni evundlako namkha kinanyana yini eyenziwe ngesikhumba, 54 umphristi uzokuyala bona kuhlanzwe into ebeyisilaphele, ngemva kwalokho uzoyibeka yodwa amalanga alikhomba godu. 55 Umphristi uzokuhlolisisa into esilapheleko ngemva kobana ihlanzisisiwe. Nangabe ukusilaphala kusesekhona ngitjho nanyana ukugula kungakasabalali, isilaphele. Kufuze uyitjhise ngomlilo ngombana idleke ngaphakathi namkha ngaphandle.

56 “Umphristi uzoyihlolisisa nakabona ukuthi ukusilaphala kusukile ngemva kobana ihlanzisisiwe, uzokurathula ingcenye ebeyisilaphele yesambatho namkha yesikhumba namkha yentambo etjhinga phasi naphezulu namkha yentambo evundlileko. 57 Nangabe kubonakala kusesekhona engcenyeni enye yesambatho namkha entambeni etjhinga phasi naphezulu namkha entambeni evundlako namkha kinanyana yini eyenziwe ngesikhumba, kuyasabalala, kufuze utjhise nanyana yini esilapheleko.+ 58 Kodwana nangabe ukusilaphala kuyasuka esambathweni namkha entambeni etjhinga phasi naphezulu namkha entambeni evundlako namkha kinanyana yini eyenziwe ngesikhumba oyihlanzako, kufuze ihlanzwe kwesibili, izokuhlwengeka.

59 “Lo mthetho omalungana nokugula kobulepheru besambatho sewulu namkha selineni namkha sentambo etjhinga phasi naphezulu namkha intambo evundlako namkha nanyana yini eyenziwe ngesikhumba, ukwenzela bona umphristi azi ukuthi ngikuphi okuhlwengileko nokungakahlwengi.”

14 UJehova waragela phambili akhuluma noMosi wathi: 2 “Lo mthetho okufuze ulandelwe mumuntu obekaphethwe bulepheru nakahlanjululwako, lokha nakalethwa kumphristi.+ 3 Umphristi uzokuphumela ngaphandle kwekampa ayomhlola. Nangabe umuntu obekaphethwe bulepheru loyo upholile, 4 umphristi uzomtjela bona alethe iinyoni ezimbili ezihlwengileko, isigodo somsedari, itjhila elibomvu be nehisopi bona azokuhlwengiswa.+ 5 Umphristi uzokuyala bona enye inyoni ibulawelwe emjekeni, emanzini agelezako. 6 Kodwana uzokuthatha enye inyoni ephilako, isigodo somsedari, itjhila elibomvu be! Nehisopi, afake izintwezi eengazini zenyoni ebulawelwe phezu kwamanzi agelezako. 7 Uzokufafaza iingazi kalikhomba emuntwini ohlanjululwa ekuguleni kobulepheru begodu uzokuthi uhlwengile. Uzokulisa inyoni ephilako iphaphele ngaphandle kwekampa.+

8 “Ozihlambululako kufuze ahlanze izambatho zakhe, agude zoke iinhluthu zakhe bekahlambe ngamanzi, uzokuhlwengeka. Ngemva kwalokho, angangena ekampeni kodwana uzokuhlala ngaphandle kwetendakhe amalanga alikhomba. 9 Ngelanga lekhomba uzokuguda zoke iinhluthu ezisehlokwakhe, ezisesilevini namatjhiyakhe. Ngemva kokuthi agude zoke iinhluthu zakhe, uzokuhlanza izambatho zakhe ngamanzi naye ahlambe, uzokuhlwengeka.

10 “Elangeni lobunane uzokuthatha amaramu amabili amancani aphile kuhle, imvana yinye encani esikazi enomnyaka ephile kuhle,+ iflowuru esefiweko yahlanganiswa namafutha emakhilogremu angaba mathathu nesiquntu bona ibe mnikelo weenthoro+ nesilinganiso sinye selogo* yamafutha.+ 11 Umphristi ozokuthi uhlwengile kufuze alethe umuntu ozihlambululako lo neminikelo phambi kwakaJehova ebungenweni betende lokuhlangana. 12 Umphristi uzokuthatha iramu linye elincani alinikele, libe mnikelo womlandu+ nesilinganiso selogo yamafutha, uzoziphephezelisa azise emuva naphambili, kube mnikelo ophephezeliswako phambi kwakaJehova.+ 13 Uzokuhlabela iramu elincani endaweni ekuhlatjelwa kiyo umnikelo wesono nomnikelo otjhiswako,+ endaweni ecwengileko ngombana njengomnikelo wesono, umnikelo womlandu ngewomphristi.+ Uyinto ecwengeke khulu.+

14 “Ngemva kwalokho, umphristi uzokuthatha ezinye iingazi zomnikelo womlandu azitjhatjhe endlebeni yangesidleni yomuntu ozihlambululako, atjhatjhe uthubhakghurwakhe wangesidleni nozwanakhe omkhulu wangesidleni. 15 Umphristi uzokuthatha amanye amafutha+ asesilinganisweni selogo, awathele esandleni sakhe sesinceleni. 16 Umphristi uzokufaka umunwakhe emafutheni asesandleni sakhe sangesinceleni, ngemva kwalokho afafaze amanye amafutha kalikhomba phambi kwakaJehova. 17 Umphristi uzokuthatha amafutha aseleko asesandleni sakhe, atjhatjhe indlebe yangesidleni yomuntu ozihlambululako, atjhatjhe uthubhakghurwakhe wangesidleni nozwanakhe omkhulu wangesidleni, phezu kwalapho atjhatjhe khona iingazi zomnikelo womlandu. 18 Umphristi uzokuthatha amafutha aseleko esandleni sakhe, awatjhatjhe ehloko yaloyo ozihlambululako bekamenzele umnikelo wokulitjalelwa kwezono phambi kwakaJehova.+

19 “Umphristi uzokwenzela umuntu ozihlambululako umhlatjelo womnikelo wesono+ amenzele nomnikelo wokulitjalelwa kwezono, ngemva kwalokho uzokuhlaba umnikelo otjhiswako. 20 Umphristi uzokunikela umnikelo otjhiswako+ nomnikelo weenthoro e-aldareni bekamenzele umnikelo wokulitjalelwa kwezono,+ umuntu loyo uzokuhlwengeka.+

21 “Nangabe utlhagile begodu akanalitho uzokuthatha iramu linye elincani lomnikelo womlandu libe mnikelo ophephezeliswako, bona azenzele umnikelo wokulitjalelwa kwezono, iflowuru eyikhilogremu ehlanganiswe namafutha bona ibe mnikelo weenthoro, amafutha wesilinganiso selogo, 22 namajuba amabili wommango namkha amajuba amabili amancani afuywako, kuye ngokwalokho angakukghona. Elinye kuzokuba ngelomnikelo wesono, elinye kube ngelomnikelo otjhiswako.+ 23 Ngelanga lobunane,+ uzokuletha izintwezi kumphristi ebungenweni betende lokuhlangana phambi kwakaJehova bona kuqinisekiswe ukuhlwengeka kwakhe.+

24 “Umphristi uzokuthatha iramu elincani lomnikelo womlandu+ nesilinganiso selogo samafutha begodu umphristi uzoziphephezelisa azise emuva naphambili, kube mnikelo ophephezeliswako phambi kwakaJehova.+ 25 Uzokuhlaba iramu elincani lomnikelo womlandu, ngemva kwalokho umphristi uzokuthatha ezinye iingazi zomnikelo womlandu azitjhatjhe endlebeni yangesidleni yomuntu ozihlambululako, atjhatjhe uthubhakghurwakhe wangesidleni nozwanakhe omkhulu wangesidleni.+ 26 Umphristi uzokuthela amanye amafutha esandleni sakhe sangesinceleni,+ 27 uzokufafaza ngomunwakhe wangesidleni amanye amafutha asesandleni sakhe sangesinceleni kalikhomba phambi kwakaJehova. 28 Umphristi uzokuthatha amafutha asesandleni sakhe atjhatjhe indlebe yangesidleni yomuntu ozihlambululako, atjhatjhe uthubhakghurwakhe wangesidleni nozwanakhe omkhulu wangesidleni, phezu kwalapho atjhatjhe khona iingazi zomnikelo womlandu. 29 Umphristi uzokuthatha amafutha aseleko esandleni sakhe, awatjhatjhe ehloko yaloyo ozihlambululako, uzomenzela umnikelo wokulitjalelwa kwezono phambi kwakaJehova.

30 “Uzokunikela ngelinye lamajuba wommango namkha ngelinye lamajuba amancani afuywako, kuye ngokwalokho angakukghona,+ 31 elinye kuzokuba ngelomnikelo wesono, elinye kube ngelomnikelo otjhiswako+ nomnikelo weenthoro. Umphristi uzokwenzela umuntu ozihlambululako umnikelo wokulitjalelwa kwezono phambi kwakaJehova.+

32 “Lo mthetho ozokusebenza emuntwini obekanobulepheru onganazinto ezitlhogekako bona azozihlwengisa.”

33 UJehova wathi kuMosi no-Aroni: 34 “Nanifika enarheni yeKanana+ engizoninikela yona bona ibe lilifa,+ ngisilaphaze indlu esenarhenenu ngobulepheru,+ 35 umnikazi wendlu kufuze aye kumphristi athi, ‘Kunokusilaphala okuvelileko endlinami.’ 36 Umphristi uzokunikela umnikazi wendlu leyo iinqophiso zokobana ayihlwengise ngaphambi kokuthi eze azokuhlola ukusilaphala, ukwenzela bona nakafikako angathi yoke into engendlini isilaphele, ngemva kwalokho umphristi uzokuza azokuhlola indlu. 37 Uzokuhlola indawo esilapheleko, nangabe amaboda wendlu asilaphazwe mabala atjheli nokuhlaza kotjani namkha abomvana begodu abonakale angenelele khulu ebodeni, 38 ngemva kwalokho umphristi uzokuphuma ngendlini leyo bekayivale amalanga alikhomba.+

39 “Ngemva kwalokho umphristi uzokubuya ngelanga lekhomba azoyihlola. Nangabe ukusilaphala kusabalele emabodeni wendlu, 40 umphristi uzokuyala bona kukhutjhwe amatje asilapheleko, alahlelwe ngaphandle kwedorobho endaweni esilapheleko. 41 Umphristi uzokuyala bona indlu irhuhlisiswe ngaphakathi begodu nanyana yini esusiweko, kufuze ilahlelwe ngaphandle kwedorobho endaweni esilapheleko. 42 Ngemva kwalokho, bazokufaka amatje lapho bakhuphe khona amanye, uzokusebenzisa idaka elihlukileko bekasinde nendlu leyo.

43 “Nangabe ukusilaphala kubuyile godu endlini leyo ngemva kokuthi amatje akhutjhiwe, indlu yarhuhlisiswa kuhle beyasindwa ngobutjha, 44 umphristi uzokungena ayihlole. Nangabe ukusilaphala kusabalele endlini leyo, bulepheru obuthelelanako.+ Indlu leyo isilaphele. 45 Uzokuyala bona indlu leyo igirizwe, amatjayo, iingodo zayo nalo loke idaka lendlu leyo uzokuthi zilahlelwe ngaphandle kwedorobho endaweni esilapheleko.+ 46 Kodwana nanyana ngubani ongena ngendlini leyo ngamalanga lapho ivalwe khona,+ uzokusilaphala bekube sentambama,+ 47 nanyana ngubani olala ngendlini leyo, kufuze ahlanze izambatho zakhe begodu nanyana ngubani odlela ngakiyo kufuze ahlanze izambatho zakhe.

48 “Nangabe umphristi uyeza abone ukusilaphala kungakasabalali ngendlini leyo ngemva kokuthi isindwe kabutjha, uzokuthi indlu leyo ihlwengile ngombana ukusilaphalokha akusekho. 49 Bona ahlambulule indlu leyo, uzokuthatha iinyoni ezimbili, isigodo somsedari, itjhila elibomvu be nehisopi.+ 50 Kufuze abulalele enye inyoni ngemjekeni emanzini agelezako. 51 Ngemva kwalokho, uzokuthatha isigodo somsedari, ihisopi, itjhila elibomvu be nenyoni ephilako azifake eengazini zenyoni ehlatjiweko leya emanzini agelezako begodu uzokufafaza iingazezo kalikhomba endlini leyo.+ 52 Uzokuhlambulula indlu leyo ngeengazi zenyoni, amanzi agelezako, inyoni ephilako, isigodo somsedari, ihisopi netjhila elibomvu be. 53 Uzokulisa inyoni ephilako iphaphele ngaphandle kwedorobho endaweni evulekileko bese enzele indlu umnikelo wokulitjalelwa kwezono begodu indlu leyo izokuhlwengeka.

54 “Lo mthetho omalungana nanyana ngikuphi ukugula kobulepheru, ukugula kwesikhumba sehloko namkha ukugula okuvela eendevini,+ 55 ubulepheru besambatho+ namkha bendlu,+ 56 ukuvuvuka esikhumbeni, isilonda esinesikhumba esomileko nebala elikhanyelako.+ 57 Khona nizakukghona ukubona lokha into nayisilapheleko nalokha nayihlwengileko.+ Lo mthetho omalungana nobulepheru.”+

15 UJehova waraga akhuluma noMosi no-Aroni wathi: 2 “Khuluma nama-Israyeli uthi kiwo, ‘Nangabe indoda iphuma ukusilaphala ebudodeni bayo, okuphumakokho kuyenza isilaphale.+ 3 Izokusilaphala ngebanga lalokho okuphumako, nange kusaragela phambili kuphuma namkha ingasakghoni ukuthunda ngebanga lalokho okuphumako, isasilaphele.

4 “‘Nanyana ngimuphi umbhede umuntu ophuma ukusilaphala loyo alala kiwo, uzokusilaphala begodu nanyana yini ahlala phezu kwayo izokusilaphala. 5 Umuntu othinta umbhede womuntu loyo, kufuze ahlanze izambatho zakhe, kufuze ahlambe begodu uzokusilaphala bekube sentambama.+ 6 Nanyana ngubani ohlala phezu kwento ebekuhlezi kiyo umuntu ophuma ukusilaphala, kufuze ahlanze izambatho zakhe, ahlambe begodu uzokusilaphala bekube sentambama. 7 Nanyana ngubani othinta umuntu ophuma ukusilaphala, kufuze ahlanze izambatho zakhe, ahlambe begodu uzokusilaphala bekube sentambama. 8 Nangabe umuntu ophuma ukusilaphala ukhafulela umuntu ohlwengileko, umuntu loyo kufuze ahlanze izambatho zakhe, ahlambe begodu uzokusilaphala bekube sentambama. 9 Nanyana ngisiphi isihlalo esibekwa phezu komgogodlha wesilwana umuntu ophuma ukusilaphala ahlala phezu kwaso sizokusilaphala. 10 Nanyana ngubani othinta into ebeyingaphasi kwakhe, uzokusilaphala bekube sentambama nanyana ngubani othwala izintwezo, kufuze ahlanze izambatho zakhe, ahlambe begodu uzokusilaphala bekube sentambama. 11 Nangabe umuntu ophuma ukusilaphala+ uthinta omunye umuntu angakahlambi izandla zakhe, umuntu loyo kufuze ahlanze izambatho zakhe, ahlambe begodu uzokusilaphala bekube sentambama. 12 Umuntu ophuma ukusilaphala nakangathinta isitja esenziwe ngomdaka,* kufuze siphadlhwe begodu nakangathinta isitja esenziwe ngesigodo kufuze sihlanzwe.+

13 “‘Nange ukusilaphala kungasaphumi, uzokubala amalanga alikhomba wokuhlanjululwa kwakhe begodu kufuze ahlanze izambatho zakhe, ahlambe emanzini agelezako, uzokuhlwengeka.+ 14 Ngelanga lobunane, kufuze athathe amajuba amabili wommango namkha amajuba amabili amancani+ afuywako awalethe phambi kwakaJehova ebungenweni betende lokuhlangana awanikele umphristi. 15 Umphristi uzokwenza umnikelo ngawo, elinye lizokuba mnikelo wesono, elinye libe mnikelo otjhiswako begodu umphristi uzomenzela umnikelo wokulitjalelwa kwezono phambi kwakaJehova ngebanga lokusilaphala okuphume kuye.

16 “‘Nange indoda ikhupha isidoda, kufuze ihlambe umzimbayo woke begodu izokusilaphala bekube sentambama.+ 17 Kufuze ihlanze isambatho namkha nanyana yini eyenziwe ngesikhumba ekuphumele kiyo isidoda begodu izokusilaphala bekube sentambama.

18 “‘Nangabe indoda ilala nomfazi kuphume isidoda kufuze bahlambe begodu bazokusilaphala bekube sentambama.+

19 “‘Nangabe umfazi uba sesikhathini, uzokuhlala asilaphele amalanga alikhomba+ ngebanga lokuba sesikhathini kwakhe. Nanyana ngubani omthintako uzokusilaphala bekube sentambama.+ 20 Nanyana yini alala phezu kwayo nakasesikhathini, izokusilaphala begodu yoke into ahlala phezu kwayo izokusilaphala.+ 21 Nanyana ngubani othinta umbhedakhe, kufuze ahlanze izambatho zakhe, ahlambe begodu uzokusilaphala bekube sentambama. 22 Nanyana ngubani othinta nanyana yini ebekahlezi phezu kwayo, kufuze ahlanze izambatho zakhe, ahlambe begodu uzokusilaphala bekube sentambama. 23 Nangabe bekahlezi phezu kombhede namkha phezu kwenye into, ozokuthinta izintwezi uzokusilaphala bekube sentambama.+ 24 Nange indoda ilala nomfazi begodu ukusilaphala kokuba sesikhathini komfazi loyo kuphumele kiyo,+ izokusilaphala amalanga alikhomba begodu nanyana ngimuphi umbhede elala kiwo, uzokusilaphala.

25 “‘Nange umfazi opha iingazi amalanga amanengi+ kungasimalanga aya ngawo esikhathini,+ namkha nange opha isikhathi eside ukudlula amalanga aya ngawo esikhathini, uzokusilaphala hlangana nawo woke amalanga lawo njengamalanga wokusilaphala kwakhe nakasesikhathini. 26 Nanyana ngimuphi umbhede alala kiwo nakophako, uzokusilaphala njengombhede alala kiwo nakasesikhathini+ begodu nanyana yini ahlala phezu kwayo, izokusilaphala njengalokha nakasesikhathini. 27 Nanyana ngubani ozithintako uzokusilaphala, kufuze ahlanze izambatho zakhe, ahlambe begodu uzokusilaphala bekube sentambama.+

28 “‘Kodwana nangabe ukopha sekuphelile, uzokubala amalanga alikhomba, ngemva kwalokho uzokuhlwengeka.+ 29 Ngelanga lobunane, kufuze athathe amajuba amabili wommango namkha amajuba amabili amancani+ afuywako, awalethe kumphristi ebungenweni betende lokuhlangana.+ 30 Umphristi uzokuthatha elinye enze umnikelo wesono, elinye libe mnikelo otjhiswako begodu uzomenzela umnikelo wokulitjalelwa kwezono phambi kwakaJehova ngebanga lokopha kwakhe.+

31 “‘Kufuze nisize ama-Israyeli khona azakuhlwengeka begodu angafi ngebanga lokusilaphaza ithaberinakeli lami elihlangana nawo.+

32 “‘Lo mthetho omalungana nendoda ephuma ukusilaphala, indoda esilapheleko ngebanga lokukhupha isidoda,+ 33 umfazi osesikhathini, nanyana ngiyiphi indoda namkha umfazi onokusilaphala+ okuphuma emzimbeni nendoda elala nomfazi osilapheleko.’”+

16 UJehova wakhuluma noMosi ngemva kokuhlongakala kwamadodana ka-Aroni amabili ngebanga lokutjhidela kuJehova ngendlela engakahlonipheki.+ 2 UJehova wathi kuMosi: “Tjela u-Aroni umfowenu bona angangeni nanyana kunini endaweni ecwengileko+ ngale kwerharideni,+ phambi kwesivalo somFaji ukwenzela bona angafi+ ngombana ngizokubonakala elifini phezu kwesivalo.+

3 “Nakhu u-Aroni okufuze eze nakho nakeza endaweni ecwengileko: ikunzana yokwenza umnikelo wesono+ neramu lokwenza umnikelo otjhiswako.+ 4 Kufuze ambathe iphuraphura yelineni elicwengileko,+ ibhrugwana lelineni+ elizokuvala ubuhlubule bakhe, kufuze azibophe ngebhande elikghatjisiweko lelineni+ begodu athwale itjhila elithwalwa ehloko lelineni.+ Lezi zizambatho ezicwengileko.+ Kufuze ahlambe+ bekazimbathe.

5 “Kufuze athathe ehlanganweni yakwa-Israyeli+ iimpongo ezimbili ezincani zomnikelo wesono neramu linye lomnikelo otjhiswako.

6 “U-Aroni kufuze alethe ikunzi yomnikelwakhe wesono bekenzele yena+ nomndenakhe* umnikelo wokulitjalelwa kwezono.

7 “Uzokuthatha iimbuzi ezimbili, azijamise phambi kwakaJehova ebungenweni betende lokuhlangana. 8 U-Aroni uzokwenza ifumbe ngeembuzi ezimbili, enye izokuba ngeyakaJehova bese enye kuzokuba ngeyaka-Azazeli.* 9 U-Aroni uzokuletha imbuzi ekhethelwe+ ukuthi ibe ngeyakaJehova, enze ngayo umnikelo wesono. 10 Kodwana imbuzi ekhethelwe bona ibe ngeyaka-Azazeli, kufuze ilethwe phambi kwakaJehova iphila ukwenzela ukuthi kulitjalelwe abantu, ngemva kwalokho bazokuthumela imbuzi ka-Azazeli emmangweni.+

11 “U-Aroni uzokuletha ikunzakhe yomnikelo wesono, enzele yena nomndenakhe* umnikelo wokulitjalelwa kwezono. Ngemva kwalokho, uzokuhlaba ikunzakhe yomnikelo wesono.+

12 “Uzokuthatha into yokuphatha umlilo+ ezele amalahle avuthako awathethe e-aldareni+ phambi kwakaJehova nepepho egayiweko enuka kamnandi+ ezele izandla zombili begodu uzokuletha ngale kwerharideni.+ 13 Uzokuthela ipepho emlilweni phambi kwakaJehova+ begodu ilifu lepepho lizokugubuzesa isivalo+ somFaji wobuFakazi+ ukwenzela bona angafi.

14 “Uzokuthatha ezinye iingazi zekunzi+ azifafaze ngomunwakhe phambi kwesivalo ngehlangothini elingepumalanga, uzokufafaza ezinye ngomunwakhe kalikhomba phambi kwesivalo.+

15 “Uzokuhlaba imbuzi yomnikelo wesono awenzela abantu,+ alethe iingazi zawo ngale kwerharideni+ begodu uzokwenza lokho akwenze ngeengazi zekunzi,+ uzozifafaza phambi kwesivalo.

16 Kufuze enzele indawo ecwengileko umnikelo wokulitjalelwa kwezono malungana nezinto ezisilapheleko ezenziwe ma-Israyeli, imitjhaphwawo nezono zawo.+ Ngilokho okufuze akwenzele itende lokuhlangana, elihlangana nalabo abenza izinto ezisilapheleko.

17 “Akunamuntu okufuze angene etendeni lokuhlangana kusukela ngesikhathi u-Aroni angena ngaso bona enze umnikelo wokulitjalelwa kwezono endaweni ecwengileko bekube kulapho aphuma khona. Uzozenzela umnikelo wokulitjalelwa kwezono,+ enzele umndenakhe nebandla loke lakwa-Israyeli.+

18 “Uzokuphuma eze e-aldareni+ eliphambi kwakaJehova, alenzele umnikelo wokulitjalelwa kwezono. Uzokuthatha ezinye iingazi zekunzi nezinye iingazi zembuzi azitjhatjhe eempondweni ze-aldara emahlangothini woke. 19 Uzokufafaza iingazi ngomunwakhe kalikhomba, alihlanze begodu alicwengise ezenzweni zokusilaphala zama-Israyeli.

20 “Nasele aqedile ukwenza umnikelo wokulitjalelwa kwezono+ wendawo ecwengileko, itende lokuhlangana ne-aldara,+ uzokuletha imbuzi ephilako.+ 21 U-Aroni uzokubeka izandla zakhe zombili phezu kwehloko yembuzi ephilako, avume zoke izono nemitjhapho yama-Israyeli, uzokubeka zoke izono phezu kwehloko yembuzi+ begodu uzoyinikela umuntu okhethiweko, umuntu loyo uzoyiraga ayise emmangweni. 22 Imbuzi leyo izokuthwala zoke izono zawo+ izise emmangweni+ begodu u-Aroni uzoyithumela emmangweni.+

23 “U-Aroni uzokungena etendeni lokuhlangana, ahlubule izambatho zelineni ebekazimbethe lokha nakangena endaweni ecwengileko begodu uzozibeka phasi ngapho. 24 Kufuze ahlambele endaweni ecwengileko,+ ambathe izambatho zakhe.+ Uzokuphuma azenzele yena nabantu umnikelo otjhiswako+ begodu enzele yena nabantu umnikelo wokulitjalelwa kwezono.+ 25 Uzokutjhisa amafutha womnikelo wesono e-aldareni.

26 “Umuntu okhambise imbuzi ka-Azazeli+ kufuze ahlanze izambatho zakhe begodu naye ahlambe, ngemva kwalokho angabuya ekampeni.

27 “Ikunzi yomnikelo wesono nembuzi yomnikelo wesono, iingazi zazo ezalethwa endaweni ecwengileko bona kwenziwe ngazo umnikelo wokulitjalelwa kwezono, zizokukhutjhelwa ngaphandle kwekampa begodu iinkhumba zazo, inyamazo nomswanazo kuzokutjhiswa emlilweni.+ 28 Ozozitjhisa kufuze ahlanze izambatho zakhe begodu naye ahlambe, ngemva kwalokho angangena ekampeni.

29 “Lo kuzokuba mthetho ozokuhlala usebenza kini: Enyangeni yekhomba elangeni letjhumi lenyanga, kufuze nidane* ngebanga lezono zenu begodu akukafuzi nisebenze+ nina ma-Israyeli nabantu abavela kwenye inarha abahlala kunye nani. 30 Ngelangeli nizokwenzelwa umnikelo wokulitjalelwa kwezono+ bona kuthiwe nihlwengile. Nizokuhlwengeka kizo zoke izono zenu phambi kwakaJehova.+ 31 Lisabatha lokuphumula kini, kufuze nidane ngebanga lezono zenu.+ Lo mthetho ozokuhlala usebenza.

32 “Umphristi ozesiweko+ bewabekwa bona abe mphristi+ esikhundleni sakayise+ uzokwenza umnikelo wokulitjalelwa kwezono begodu uzokumbatha izambatho zelineni,+ izambatho ezicwengileko.+ 33 Uzokwenzela indawo ecwengileko,+ itende lokuhlangana+ ne-aldara+ umnikelo wokulitjalelwa kwezono begodu uzokwenzela abaphristi nabo boke abantu bakwa-Israyeli umnikelo wokulitjalelwa kwezono.+ 34 Lo kuzokuba mthetho ozokuhlala usebenza kini+ bona nenzele ama-Israyeli umnikelo wokulitjalelwa kwezono ukwenzela bona ahlanzwe ezonweni zawo kanye ngomnyaka.”+

U-Aroni wenza koke uJehova ayala ngakho uMosi.

17 UJehova waragela phambili akhuluma noMosi, wathi: 2 “Khuluma no-Aroni, amadodanakhe nawo woke ama-Israyeli uthi kiwo, ‘Nakhu uJehova akutjhwileko:

3 “‘“Nangabe nanyana ngubani esitjhabeni sakwa-Israyeli uhlaba ikunzi, iramu elincani namkha imbuzi ekampeni namkha nangabe uyihlabela ngaphandle kwekampa, 4 kunokuthi ayilethe ebungenweni betende lokuhlangana bona izokuba mnikelo oya kuJehova phambi kwethaberinakeli lakaJehova, uzokuba nomlandu wokuphalaza iingazi. Uphalaze iingazi, nje-ke kufuze abulawe. 5 Lokhu bekwenzelwa bona ama-Israyeli alethe imihlatjelwawo kuJehova, ebeyenzelwa endaweni evulekileko, ayilethe ebungenweni betende lokuhlangana, kumphristi. Kufuze enzele uJehova imihlatjelo leyo kube mihlatjelo yetjhebiswano.+ 6 Umphristi uzokufafaza iingazi e-aldareni lakaJehova ebungenweni betende lokuhlangana begodu uzokutjhisa amafutha abe liphunga elimnandi eliya kuJehova.+ 7 Nje-ke ama-Israyeli akukafuzi aragele phambili enza imihlatjelo emadimonini+ anjengeembuzi, angwadla nawo.+ Lo mthetho ozokuhlala usebenza kini nakizo zoke iinzukulwana zenu.”’

8 “Kufuze uthi kiwo, ‘Nanyana ngubani esitjhabeni sakwa-Israyeli namkha omuntu ovela kwenye inarha ohlala hlangana nani enza umnikelo otjhiswako namkha umhlatjelo 9 kodwana angawulethi ebungenweni betende lokuhlangana bona awunikele kuJehova, kufuze abulawe.+

10 “‘Nanyana ngubani esitjhabeni sakwa-Israyeli namkha umuntu ovela kwenye inarha ohlala hlangana nani adla nanyana ngimuphi umhlobo weengazi,+ ngizokujamelana naye umuntu loyo begodu ngizombulala. 11 Umphefumulo wananyana yini ephilako useengazini zayo.+ Ngininikele iingazi bona nizifafaze e-aldareni+ khona nizakulitjalelwa izono zenu, ngombana ziingazi ezenza umnikelo wokulitjalelwa kwezono+ ngebanga lomphefumulo okizo. 12 Kungebangelo ngithe kuma-Israyeli: “Akekho namunye kini okufuze adle iingazi nomuntu ovela kwenye inarha ohlala hlangana nani,+ akukafuzi adle iingazi.”+

13 “‘Nange umIsrayeli namkha umuntu ovela kwenye inarha ohlala hlangana nani azuma abambe inyamazana namkha inyoni edliwako, kufuze aphophise iingazi zayo+ bekazivale ngehlabathi. 14 Ngombana umphefumulo wananyana yini ephilako ziingazi zayo, ngebanga lomphefumulo oseengazini. Ngebanga lalokho, ngathi kuma-Israyeli: “Akukafuzi nidle iingazi zananyana yini ngombana ukuphila kwananyana yini kuseengazini zayo. Nanyana ngubani odla iingazi uzokubulawa.”+ 15 Nanyana ngubani, kungaba mIsrayeli namkha umuntu ovela kwenye inarha, odla isilwana asifumene sifile namkha sirathulwe sibandana,+ kufuze ahlanze izambatho zakhe, ahlambe begodu uzokusilaphala bekube sentambama,+ ngemva kwalokho uzokuhlwengeka. 16 Kodwana nange angahlanzi izambatho zakhe begodu angahlambi, uzoziphendulela ngomtjhaphwakhe.’”+

18 UJehova waragela phambili akhuluma noMosi, wathi: 2 “Khuluma nama-Israyeli uthi kiwo, ‘NginguJehova uZimenu.+ 3 Ningaziphathi njengabantu beGibhide, lapho benihlala khona, ningenzi okwenziwa enarheni yeKanana, lapho nginisa khona.+ Ningalandeli amasikwabo. 4 Kufuze nilalele imithetho nemiyalwami benenze ngokuvumelana nayo.+ NginguJehova uZimenu. 5 Kufuze nilalele imithetho nemiyalwami; nanyana ngubani oyilalelako uzokuphila ngebanga layo.+ NginguJehova.

6 “Akunamuntu hlangana nani okufuze atjhinge emabhayini nesihlobo sakhe.+ NginguJehova. 7 Akukafuzi uye emabhayini noyihlo namkha nonyoko. Ungunyoko begodu akukafuzi uye naye emabhayini.

8 “‘Akukafuzi uye emabhayini nomkayihlo.+ Kuhlazisa uyihlo.

9 “‘Akukafuzi uye emabhayini nodadwenu, kungaba yindodakazi kayihlo namkha indodakazi kanyoko, nanyana nibelethelwe endlini yinye namkha abelethelwe ngaphandle.+

10 “‘Akukafuzi uye emabhayini nesizukulu sakho esimntazana kungaba ngesendodanakho namkha sendodakazakho, ngombana sibuhlubule bakho.

11 “‘Akukafuzi uye emabhayini nendodakazi yomkayihlo, umntwana kayihlo ngombana ngudadwenu.

12 “‘Akukafuzi uye emabhayini nokghariyakho. Uziingazi zakayihlo.+

13 “‘Akukafuzi uye emabhayini nomanakho namkha urhulwakho ngombana baziingazi zakanyoko.

14 “‘Akukafuzi uhlazise usonghwanakho namkha usorhulwakho+ ngokuya emabhayini nomkakhe. Usihlobo sakho.

15 “‘Akukafuzi uye emabhayini nomalukazanakho.+ Umkandodanakho begodu kungebangelo kungakafuzi uye emabhayini naye.

16 “‘Akukafuzi uye emabhayini nomrharibakho+ ngombana ukwenza njalo kuhlazisa umfowenu.

17 “‘Akukafuzi uye emabhayini nomfazi nendodakazakhe.+ Akukafuzi uthathe indodakazi yendodanakhe namkha yendodakazakhe bona uye nayo emabhayini. Ziinzukulu zakhe; lesi sisenzo esinyenyisako.

18 “‘Akukafuzi uthathe udadwabo lomkakho abe mfazakho wesibili+ bona uye naye emabhayini umkakho asaphila, ngombana bazokulwa.

19 “‘Akukafuzi uye emabhayini nomfazi osilapheleko ngebanga lokuba sesikhathini kwakhe.+

20 “‘Akukafuzi uye emabhayini nomfazi womunye umuntu, lokho kuyakusilaphaza.+

21 “‘Akukafuzi ninikele abantwabenu kuMoleki.+ Akukafuzi nisilaphaze igama lakaZimenu ngendlela leyo.+ NginguJehova.

22 “‘Akukafuzi uye emabhayini nendoda njengalokha nawuya emabhayini nomfazi.+ Leso sisenzo esinyenyisako.

23 “‘Indoda akukafuzi iye emabhayini nesilwana izisilaphaze ngaso; namkha umfazi akukafuzi aye emabhayini nesilwana.+ Lokho kuphambene nemvelo.

24 “‘Ningazisilaphazi ngananyana yini hlangana nezintwezi, ngombana iintjhaba engiziqotha phambi kwenu zizisilaphaze ngazo zoke izintwezi.+ 25 Nje-ke inarha isilaphele, ngizokuletha isijeziso ngebanga lomtjhaphwayo begodu izakhamuzi zayo zizokukhutjhelwa ngaphandle.+ 26 Kodwana nina kufuze nilalele imithethwami+ nemiyalwami begodu akukafuzi nenze nanyana yini yezintwezi ezinyenyisako, kungaba mIsrayeli namkha umuntu ovela kwenye inarha ohlala hlangana nani.+ 27 Ngombana zoke izintwezi ezinyenyisako zenziwa babantu ebebahlala enarheni le ngaphambi kobana kufike nina,+ kungebangelo inarha le isilaphele. 28 Inarha angeze kutlhogeke inikhuphele ngaphandle ngebanga lokuyisilaphaza, ngendlela ezokukhuphela ngaphandle iintjhaba ebezihlala enarheni le ngaphambi kwenu. 29 Nanyana ngubani owenza enye yezinto ezinyenyisakwezi nabo boke abazenzako, kufuze babulawe. 30 Kufuze nilalele imithethwami ngokuthi ningenzi amasiko anyenyisako la ebewenziwa ngaphambi kobana nifike,+ ukwenzela bona ningazisilaphazi ngawo. NginguJehova uZimenu.’”

19 UJehova waragela phambili akhuluma noMosi, wathi: 2 “Khuluma nehlangano yoke yakwa-Israyeli uthi kiyo, ‘Kufuze nicwengeke ngombana mina Jehova, uZimenu ngicwengile.+

3 “‘Omunye nomunye wenu kufuze ahloniphe unina noyise+ begodu kufuze nigidinge amasabathami.+ NginguJehova uZimenu. 4 Ningafuni isizo kibozimu+ abangasizi ngalitho namkha nizenzele abozimu ngesimbi.+ NginguJehova uZimenu.

5 “‘Nje-ke naninikela umhlatjelo wetjhebiswano kuJehova,+ kufuze niwenze kuhle ukwenzela bona awamukele.+ 6 Kufuze udliwe ngelanga owenza ngalo umhlatjelo nangelanga elilandelako, kodwana nanyana yini eseleko bekube lilanga lesithathu kufuze itjhiswe ngomlilo.+ 7 Nange enye inyama yomhlatjelo idliwa ngelanga lesithathu, iyinto enyenyisako begodu angekhe yamukeleke. 8 Oyidlako uzoziphendulela ngomtjhaphwakhe ngombana usilaphaze into ecwengileko kaJehova begodu umuntu loyo kufuze abulawe.

9 “‘Lokha nawuvunako esiminakho, akukafuzi uvune koke okungemaqadi begodu uburuje isivuno sakho.+ 10 Akukafuzi ubuthelele okuseleko esiminakho yamadiribe namkha udobhe amadiribe awele phasi lokha nakuvunwako. Kufuze uwatjhiyele abantu abatlhagako+ nabantu abavela kwezinye iinarha abahlala hlangana nani. NginguJehova uZimenu.

11 “‘Ningebi,+ ningakhohlisi+ begodu ningadlelezelani. 12 Ningafungi amala egameni lami,+ nisilaphaze igama lakaZimenu. NginguJehova. 13 Akukafuzi udlelezele omunye umuntu.+ Akukafuzi ubambe umrholo wesisebenzi ubusuku boke bekube sekuseni.+

14 “‘Akukafuzi uqalekise umuntu ongezwako namkha ubeke isiqabo phambi komuntu ongaboniko,+ kufuze usabe uZimakho.+ NginguJehova.

15 “‘Ningahluleli ngendlela enganabulungiswa. Ningabi nomusa emuntwini otlhagako ngebanga lokuthi utlhagile namkha nithathe ihlangothi lonjingileko.+ Kufuze nahlulele ngobulungiswa.

16 “‘Akukafuzi ukhambe urhatjha amala ngabanye abantu bona ubehlise isithunzi.+ Akukafuzi ufake ukuphila kwabanye abantu engozini.+ NginguJehova.

17 “‘Ungahloyi umfowenu ehliziywenakho.+ Kunalokho, kufuze umkhalime ukwenzela bona ungabi mlandu njengaye.+

18 “‘Akukafuzi uzibuyiselele+ namkha ubambele umakhelwanakho ivunda, kufuze uthande umakhelwanakho njengombana uzithanda wena.+ NginguJehova.

19 “‘Kufuze nilalele imiyalwami: Akukafuzi nizalanise imihlobo emibili yeenlwana ezifuywako. Akukafuzi nitjale esiminenu ngemihlobo emibili yembewu+ begodu akukafuzi nimbathe izambatho ezenziwe ngeenrhara ezimbili ezihlukileko zahlanganiswa ndawonye.+

20 “‘Nangabe indoda itjhinga emabhayini nomfazi osisebenzi esithenjiswe enye indoda kodwana nangabe umfazi loyo akakahlengwa namkha akakatjhatjhululwa, bobabili kufuze bajeziswe. Kodwana akukafuzi babulawe ngombana bekangakatjhatjhululwa. 21 Indoda leyo kufuze ilethe iramu lomnikelwayo womlandu+ kuJehova ebungenweni betende lokuhlangana. 22 Umphristi uzomenzela umnikelo wokulitjalelwa kwezono ngeramu lomnikelo womlandu phambi kwakaJehova ngebanga lesono asenzileko begodu uzokulitjalelwa isono sakhe.

23 “‘Nanifika enarheni nitjale imithi yeenthelo, kufuze niqale iinthelo zayo njengezisilapheleko nekungakafuzi zidliwe. Iminyaka emithathu kufuze ningatjhideli kiyo. Akukafuzi zidliwe. 24 Ngomnyaka wesine, zoke iinthelo zizokucwengeka begodu nizozinikela kuJehova nithabile.+ 25 Ngomnyaka wesihlanu ningazidla iinthelo zayo, nanyana yini eniyibuthelela kizo izokwandisa isivuno senu. NginguJehova uZimenu.

26 “‘Ningadli litho eneengazi.+

“‘Ningathukuli namkha nenze imilingo.+

27 “‘Akukafuzi nigude iinhluthu ezingemaqadi eenhlokweni zenu namkha niphungule iindevu zenu.+

28 “‘Ningazisiki ngebanga lomuntu ohlongakeleko*+ begodu akukafuzi nizigwale emzimbeni. NginguJehova.

29 “‘Ungahlazisi indodakazakho ngokuyenza ingwadla,+ ukwenzela bona inarhenu ingasilaphazwa bungwadla begodu izale ukuziphatha okumbi.+

30 “‘Kufuze nigidinge amasabathami,+ begodu nihloniphe indawami ecwengileko. NginguJehova.

31 “‘Ningabuzi ezangomeni+ nebantwini ababikezela ngekusasa,+ ngombana bazonisilaphaza. NginguJehova uZimenu.

32 “‘Kufuze usikime+ uhloniphe umuntu oneenhluthu ezimhlophe, uhloniphe umuntu omdala+ begodu usabe uZimakho.+ NginguJehova.

33 “‘Nangabe umuntu ovela kwenye inarha ahlala hlangana nani enarhenenu, akukafuzi nimphathe kumbi.+ 34 Umuntu ovela kwenye inarha ohlala hlangana nani, kufuze nimphathe njengomuntu wenarhenenu+ begodu kufuze nimthande njengombana nizithanda nina ngombana nani nakhe nahlala enarheni ekungasi ngeyenu eGibhide.+ NginguJehova uZimenu.

35 “‘Ningakhwabanisi lokha nanilinganisa ubude, ubudisi namkha into emamanzi.+ 36 Kufuze nisebenzise izinto ezifaneleko zokukala, amatje afaneleko wokukala izinto ezibudisi, i-efa* elifaneleko nehini* elifaneleko.+ NginguJehova uZimenu, owanikhupha enarheni yeGibhide. 37 Kufuze nilalele yoke imithetho nemiyalwami beniyilandele.+ NginguJehova.’”

20 UJehova wakhuluma noMosi wathi: 2 “Kufuze uthi kuma-Israyeli, ‘Nanyana ngimuphi umIsrayeli namkha umuntu ovela kwenye inarha ohlala hlangana nani onikela ngomntwanakhe kuMoleki, umuntu loyo kufuze abulawe.+ Abantu benarheni leyo kufuze bamkghadlhe ngamatje bekafe. 3 Mina ngizokujamelana nomuntu loyo begodu ngizombulala, ngombana unikele umntwanakhe kuMoleki, wasilaphaza indawami ecwengileko+ negama lami elicwengileko. 4 Nange abantu benarheni babona umuntu anikela umntwanakhe kuMoleki kodwana bangenzi litho begodu bangambulali,+ 5 ngizokujamelana nomuntu loyo nomndenakhe.+ Ngizombulala nabo boke abahlanganyele naye ekungwadleni noMoleki.

6 “‘Malungana nomuntu ongathembekiko* oya ezangomeni+ nakubabikezeli bekusasa,+ ngizokujamelana naye begodu ngizombulala.+

7 “‘Kufuze nizicwengise begodu nicwengeke,+ ngombana nginguJehova uZimenu. 8 Kufuze nilalele imithethwami beniyenze.+ NginguJehova onicwengisako.+

9 Nange umuntu aqalekisa uyise namkha unina, kufuze abulawe.+ Ngombana uqalekise uyise namkha unina, iingazi zakhe zizokuba phezu kwakhe.

10 “‘Nje-ke malungana nomuntu ofeba* nomfazi wenye indoda: Umuntu ofeba nomfazi wenye indoda kufuze abulawe, bobabili kufuze babulawe.+ 11 Indoda elala nomkayise ihlazisa uyise.+ Bobabili kufuze babulawe. Iingazi zabo zizokuba phezu kwabo. 12 Nange indoda ilala nomalukazanayo, bobabili kufuze babulawe. Benze okuphambene nemvelo. Iingazi zabo zizokuba phezu kwabo.+

13 “‘Nange indoda iya emabhayini nenye indoda, bobabili benze into enyenyisako.+ Kufuze babulawe begodu iingazi zabo zizokuba phezu kwabo.

14 “‘Nangabe indoda ithatha umfazi, ithathe nomkhwekazayo. Sisenzo esinyenyisako leso,+ kufuze batjhiswe ngomlilo.+ Ukwenzela bona ukuziphatha okunyenyisakokho kungarageli phambili hlangana nani.

15 “‘Nangabe indoda iya emabhayini nesilwana, kufuze ibulawe nesilwaneso kufuze sibulawe.+ 16 Nange umfazi aya emabhayini nesilwana,+ umfazi loyo kufuze abulawe begodu kubulawe nesilwaneso. Iingazi zomfazi loyo zizokuba phezu kwakhe neengazi zesilwanezo zizokuba phezu kwaso.

17 “‘Nange indoda iya emabhayini nodadwabo, indodakazi kayise namkha indodakazi kanina begodu ngamunye abone ubuhlubule bomunye, lihlazo lelo.+ Kufuze babulawe phambi kwabantu. Indoda leyo ihlazise udadwabo. Kufuze iziphendulele ngomtjhaphwayo.

18 “‘Nange indoda iya emabhayini nomfazi osesikhathini, bobabili akhenge bahloniphe iingazi zakhe.+ Kufuze babulawe.

19 “‘Ungayi emabhayini nomanakho, urhulwakho namkha nokghariyakho ngombana uzabe uhlazise isihlobo sakho.+ Kufuze baziphendulele ngomtjhaphwabo. 20 Indoda eya emabhayini nomfazi kasonghwanayo namkha usorhulwayo, imhlazisile.+ Bobabili kufuze baziphendulele ngesono sabo. Kufuze bahlongakale banganabantwana. 21 Nange indoda ithatha umrharibayo, yinto enyenyisako leyo.+ Ihlazise umfowabo. Kufuze bangabi nabantwana.

22 “‘Kufuze nilalele yoke imithethwami nayo yoke imiyalwami+ beniyenze,+ ukwenzela bona inarha enginiletha bona nihlale kiyo inganikhupheli ngaphandle.+ 23 Akukafuzi nilandele amasiko weentjhaba engiziqotha phambi kwenu;+ ngombana zenze zoke izintwezi begodu ngiyazinyenya.+ 24 Kungebangelo ngithi kini: “Nizokuthatha inarhabo, ngizoninikela yona bona ibe lilifa lenu, inarha egeleza ibisi neliju.+ NginguJehova uZimenu onihlukanisako eentjhabeni.”+ 25 Kufuze nenze umehluko hlangana neenlwana ezihlwengileko nezingakahlwengeki hlangana neenyoni ezingakahlwengeki nezihlwengekileko;+ akukafuzi nizisilaphaze ngeenlwana, iinyoni namkha nanyana yini erhurhubako engithe kini isilaphele.+ 26 Kufuze nicwengeke kimi ngombana mina Jehova ngicwengile,+ nginihlukanisa eentjhabeni bona nibe ngebami.+

27 “‘Nange indoda namkha umfazi aba sisangoma namkha umbikezeli wekusasa kufuze abulawe.+ Abantu kufuze bamkghadlhe ngamatje bekafe. Iingazi zabo zizokuba phezu kwabo.

21 UJehova waraga wathi kuMosi: “Khuluma nabaphristi amadodana ka-Aroni uthi kibo, ‘Akunamuntu okufuze azisilaphaze ngebanga lomuntu ohlongakeleko hlangana nabantu bekhabo.+ 2 Kodwana angazisilaphaza ngebanga lesihlobo sakhe, unina, uyise, indodanakhe, indodakazakhe, umfowabo, 3 nodadwabo oyintombi osahlala naye begodu ongakatjhadi. 4 Akukafuzi azisilaphaze ngebanga lomfazi otjhade nendoda evela ebantwini bekhabo. 5 Akukafuzi bagude iinhloko zabo,+ baphungule iindevu zabo namkha bazisike emizimbenabo.+ 6 Kufuze bacwengeke kuZimabo+ begodu akukafuzi basilaphaze igama lakaZimabo,+ ngombana benza iminikelo kaJehova eyenziwe ngomlilo noburotho* bakaZimabo, kufuze bacwengeke.+ 7 Akukafuzi batjhade nengwadla,+ umfazi owasilaphazwako namkha umfazi owatlhalana nendodakhe+ ngombana umphristi ucwengile kuZimakhe. 8 Nina ma-Israyeli kufuze nicwengise umphristi+ ngombana nguye onikela uburotho bakaZimenu. Kufuze acwengeke kimi ngombana mina Jehova onicwengisako ngicwengile.+

9 “‘Nje-ke nange indodakazi yomphristi izisilaphaza ngokungwadla, isilaphaza uyise. Kufuze itjhiswe ngomlilo.+

10 “‘Umphristi ophakemeko hlangana nabaphristi, okwathelwa amafutha wokuzesa ehlokwakhe+ begodu wabekwa bona ambathe izambatho zobuphristi,+ akukafuzi alise iinhluthu zakhe zibe zide, zingakanywa namkha arathule izambatho zakhe.+ 11 Akukafuzi atjhidele kinanyana ngisiphi isidumbu;+ akukafuzi azisilaphaze ngitjho nangebanga lakayise namkha lakanina. 12 Akukafuzi aphumele ngaphandle kwendawo ecwengileko begodu akukafuzi asilaphaze indawo ecwengileko kaZimakhe,+ ngombana itshwayo elitjengisa ukuthi uzinikele namafutha wokuzesa kaZimakhe+ aphezu kwakhe. NginguJehova.

13 “‘Nakathatha umfazi kufuze athathe oyintombi.+ 14 Akukafuzi atjhade nomhlolokazi, umfazi otlhaliweko, umfazi owakhe wasilaphazwa namkha ingwadla; kufuze athathe intombi ebantwini bekhabo bona ibe mkakhe. 15 Akukafuzi asilaphaze abantwabakhe hlangana nabantu bekhabo+ ngombana nginguJehova omcwengisako.’”

16 UJehova waragela phambili akhuluma noMosi wathi: 17 “Tjela u-Aroni uthi, ‘Akukho namunye ebantwaneni bakho kizo zoke iinzukulwana zabo ongatjhidela bona anikele uburotho bakaZimakhe nange arholophele. 18 Akunamuntu orholopheleko ongatjhidela e-aldareni: isiphofu, umuntu ongakghoni ukukhamba kuhle, umuntu orholophele ubuso,* umuntu onomlenze namkha umkhono omude odlula omunye, 19 umuntu ophuke inyawo namkha isandla, 20 onelunda, isirhonodwana, umuntu olimele ilihlo, onesibabo, onobuthi bembuzana namkha olimele izitho zakhe zangaphasi.+ 21 Akunamuntu ebantwaneni baka-Aroni umphristi orholopheleko ongatjhidela e-aldareni bona alethe umnikelo kaJehova owenziwa ngomlilo. Ngebanga lokuthi urholophele, akukafuzi atjhidele e-aldareni bona anikele uburotho bakaZimakhe. 22 Angadla uburotho bakaZimakhe ezintweni ezicwengeke khulu+ nezintweni ezicwengileko.+ 23 Kodwana akukafuzi atjhidele eduze kwerharideni+ begodu akukafuzi atjhidele e-aldareni+ ngombana urholophele; akukafuzi asilaphaze indawami ecwengileko+ ngombana mina nginguJehova obacwengisako.’”+

24 Nje-ke uMosi wakhuluma no-Aroni, amadodanakhe nama-Israyeli woke.

22 UJehova waragela phambili wathi kuMosi: 2 “Tjela u-Aroni namadodanakhe ukuthi kufuze batjhejisise indlela abaziphatha ngayo izinto ezicwengileko zama-Israyeli begodu bangasilaphazi igama lami elicwengileko+ malungana nezinto abangicwengisela zona.+ NginguJehova. 3 Uthi kibo, ‘Eenzukulwaneni zenu zoke nanyana ngubani ebantwaneni benu othi asasilaphele atjhidele ezintweni ezicwengileko ama-Israyeli azicwengisele uJehova, umuntu loyo kufuze abulawe phambi kwami.+ NginguJehova. 4 Akunamuntu ebantwaneni baka-Aroni onobulepheru+ namkha ophuma ukusilaphala+ ongadla ezintweni ezicwengileko bekube kulapho ahlwengeka+ namkha umuntu othinta othileko osilapheleko ngebanga lokuthinta umuntu ohlongakeleko+ namkha indoda ephuma isidoda,+ 5 namkha othinta isilwana esincani esisilapheleko+ namkha othinta umuntu osilaphele ngananyana ngiliphi ibanga begodu ongamenza asilaphale.+ 6 Umuntu othinta nanyana yini esilapheleko uzokusilaphala bekube sentambama begodu akukafuzi adle nanyana yini ezintweni ezicwengileko kodwana kufuze ahlambe.+ 7 Ilanga nase litjhingile uzokuhlwengeka, ngemva kwalokho angazidla ezinye izinto ezicwengileko ngombana zikukudla kwakhe.+ 8 Godu akukafuzi adle nanyana ngisiphi isilwana asifumene sifile namkha nanyana yini erathulwe ziimbandana ngombana zizomsilaphaza.+ NginguJehova.

9 “‘Kufuze balalele imiyalwami bona bangabi nesono ngebanga lokungayilaleli begodu bafe ngebanga lokusilaphaza izinto ezicwengileko. NginguJehova obacwengisako.

10 “‘Akunamuntu ongasingewemndenini wabaphristi ongadla nanyana yini ecwengileko.+ Akunamuntu ovela kwenye inarha ohlala nomphristi namkha isisebenzi esiqatjhiweko esingadla nanyana yini ecwengileko. 11 Nange umphristi athenga isigqila, isigqileso singadla izinto ezicwengileko. Neengqila ezibelethelwe endlinakhe nazo zingakudla ukudla kwakhe.+ 12 Nangabe indodakazi yomphristi itjhada nomuntu ongasimphristi, indodakazi leyo angeze izidle izinto ezicwengileko. 13 Kodwana nange indodakazi yomphristi iba mhlolokazi namkha itlhalwe inganabantwana, ibuyele endlini kayise lapha beyihlala khona nayisakhulako, ingakudla okhunye ukudla kwakayise+ kodwana akunamuntu ongasingewemndenini wabaphristi ongakudla.

14 “‘Nange umuntu adla into ecwengileko ngephoso, kufuze alethe omunye umnikelo kumphristi begodu angezelele ingcenye yesihlanu emnikelweni loyo.+ 15 Abaphristi akukafuzi basilaphaze izinto ezicwengileko ama-Israyeli azinikela kuJehova+ 16 begodu babangele ama-Israyeli bona ajeziselwe isono sawo sokudla izinto ezicwengileko ngombana nginguJehova obacwengisako.’”

17 UJehova waragela phambili wakhuluma noMosi, wathi: 18 “Khuluma no-Aroni namadodanakhe nawo woke ama-Israyeli, uthi kiwo, ‘Lokha umuntu wakwa-Israyeli namkha umuntu ovela kwenye inarha ohlala kwa-Israyeli nakaletha umnikelo otjhiswako+ kuJehova bona enze akufungileko namkha enze umnikelo osuka ehliziyweni,+ 19 kufuze alethe ikunzi ephile kuhle+ ayithethe emhlambini, amaramu amancani namkha iimbuzi bona amukelwe nguZimu. 20 Akukafuzi nilethe nanyana yini erholopheleko+ ngombana angekhe uZimu anamukele.

21 “‘Nangabe umuntu uletha umhlatjelo wetjhebiswano+ kuJehova bona afeze isifungo namkha ube mnikelo osuka ehliziyweni, kufuze alethe isilwana esiphilileko asithethe emhlambini weenkomo namkha emhlambini wezimvu bona amukelwe nguZimu. Isilwaneso akukafuzi sirholophale nakancani. 22 Akukafuzi ninikele ngesilwana esisiphofu, esiphukileko, esisikekileko, esinesupa, esinesilonda esinesikhumba esomileko namkha esinobuthi bembuzana. Akukafuzi nilethe nanyana ngisiphi seenlwanezo kuJehova namkha nenzele uJehova umnikelo onjalo e-aldareni. 23 Ninganikela ngekunzi namkha imvu enomlenze omude namkha enomlenze omfitjhani khulu bona ibe mnikelo osuka ehliziyweni kodwana angekhe yamukelwe bona ibe mnikelo wesifungo. 24 Akukafuzi ninikele kuJehova ngesilwana izitho zaso zangaphasi ezilimeleko, ezipatlaziweko, ezidosiweko namkha ezisikiweko begodu akukafuzi ninikele ngeenlwana ezifana nalezi enarhenenu. 25 Akukafuzi ninikele ngananyana ngiziphi iinlwanezi enizithethe emuntwini ovela kwenye inarha bona zibe kukudla kwakaZimenu ngombana zonakele begodu zirholophele. Angekhe zamukeleke.’”

26 UJehova waraga wakhuluma noMosi, wathi: 27 “Lokha nakuzalwa ikunzi, iramu namkha imbuzi, izokuba nonina amalanga alikhomba+ kodwana kusukela elangeni lobunane ukuya phambili izokwamukeleka bona ibe mnikelo owenziwe ngomlilo oya kuJehova. 28 Akukafuzi nihlabe ikomo nekonyanayo namkha imvu nemvanayo ngelanga elilodwa.+

29 “Nanenza umhlatjelo wokuthokoza kuJehova,+ kufuze niwenze ngendlela ezonenza bona namukeleke. 30 Kufuze niwudle woke ngelangelo, akukafuzi niwubeke bekube sekuseni.+ NginguJehova.

31 “Kufuze nilalele imiyalwami beniyenze.+ NginguJehova. 32 Akukafuzi nisilaphaze igama lami elicwengileko+ begodu kufuze ngicwengiswe hlangana nama-Israyeli.+ NginguJehova onicwengisako,+ 33 onikhupha enarheni yeGibhide bona ngitjengise ukuthi nginguZimenu.+ NginguJehova.”

23 UJehova waragela phambili wathi kuMosi: 2 “Khuluma nama-Israyeli uthi kiwo, ‘Iminyanya kaJehova egidingwa ngeenkhathi ezithileko zomnyaka+ okufuze niyimemezele,+ imihlangano ecwengileko. Nasi iminyanyami egidingwa ngeenkhathi ezithileko zomnyaka:

3 “‘Ningasebenza amalanga asithandathu kodwana ilanga lekhomba lisabatha, lilanga lokuphumula,+ umhlangano ocwengileko. Akukafuzi nenze nanyana ngimuphi umsebenzi. Kufuze kube lisabatha lakaJehova nanyana kukuphi lapha nihlala khona.+

4 “‘Le minyanya kaJehova egidingwa ngeenkhathi ezithileko zomnyaka, imihlangano ecwengileko enifuze niyimemezele ngeenkhathi ezibekelwe yona: 5 Enyangeni yokuthoma, elangeni le-14 lenyanga,+ ngamarhwaqela liPhasika+ lakaJehova.

6 “‘Ngelanga le-15 lenyanga le mNyanya kaJehova woBurotho obunganaSibiliso.+ Kufuze nidle uburotho obunganasibiliso amalanga alikhomba.+ 7 Ngelanga lokuthoma, kufuze nigidinge umhlangano ocwengileko.+ Akukafuzi nenze nanyana ngimuphi umsebenzi obudisi. 8 Amalanga alikhomba kufuze nenze umnikelo kuJehova owenziwe ngomlilo. Ngelanga lekhomba kuzokuba nomhlangano ocwengileko. Akukafuzi nenze nanyana ngimuphi umsebenzi obudisi.’”

9 UJehova waragela phambili wakhuluma noMosi wathi: 10 “Khuluma nama-Israyeli uthi kiwo, ‘Nanifika enarheni engininikela yona begodu nasele nivune isivuno senu, kufuze nilethe inyanda yesivuno senu sokuthoma+ kumphristi.+ 11 Uzokuphephezelisa inyanda leyo ayise emuva naphambili, phambi kwakaJehova bona namukeleke. Umphristi kufuze ayiphephezelise ngelanga elilandelako ngemva kweSabatha. 12 Ngelanga okuphephezeliswa ngalo inyanda, kufuze ninikele ngeramu eliphile kuhle elinomnyaka munye libe mnikelo otjhiswako oya kuJehova. 13 Umnikelo weenthoro uzokuba makhilogremu amabili weflowuru esefiweko evangwe namafutha bona ube mnikelo owenziwe ngomlilo oya kuJehova, iphunga elimnandi. Umnikelo wesiselo uzokuba lilitha linye lewayini. 14 Akukafuzi nidle nanyana ngibuphi uburotho, iinthoro ezikhanzingiweko namkha iinthoro ezitja bekube lilangeli, bekube kulapho niletha umnikelo kaZimenu. Lo mthetho ozokuhlala usebenza kizo zoke iinzukulwana zenu nanyana kukuphi lapha nihlala khona.

15 “‘Kufuze nibale amasabatha alikhomba kusukela ngelanga langemva kweSabatha, kusukela ngelanga eniletha ngalo inyanda yomnikelo ophephezeliswako.+ Kufuze abe ziimveke ezipheleleko. 16 Nizokubala amalanga ama-50+ bekube lilanga elingemva kweSabatha lekhomba, ngemva kwalokho kufuze nilethe umnikelo weenthoro ezitja kuJehova.+ 17 Kufuze nilethe uburotho obubili enibuthethe lapha nihlala khona bona bube mnikelo ophephezeliswako. Kufuze benziwe ngeflowuru esefiweko emakhilogremu amabili. Kufuze bubhagwe ngesibiliso,+ bube ziinthelo zokuthoma eziya kuJehova.+ 18 Naniletha uburothobu kufuze nilethe neemvana eziduna ezilikhomba eziphile kuhle, ngayinye ibe nomnyaka munye benilethe nekunzana yinye namaramu amabili.+ Koke lokhu kuzokuba mnikelo otjhiswako oya kuJehova nomnikelo weenthoro, umnikelo weenselo bona kube mnikelo owenziwe ngomlilo, iphunga elimnandi eliya kuJehova. 19 Kufuze ninikele imbuzana yinye bona ibe mnikelo wesono+ neemvana eziduna ezimbili, ezinomnyaka munye, bona zibe mhlatjelo wetjhebiswano.+ 20 Umphristi uzoziphephezelisa azise emuva naphambili noburotho beenthelo zokuthoma bona bube mnikelo ophephezeliswako phambi kwakaJehova neemvana eziduna ezimbili. Kufuze bube ngebomphristi,+ okucwengileko kuJehova. 21 Ngelangeli nizokwenza isimemezelo+ somhlanganwenu ocwengileko. Akukafuzi nenze nanyana ngimuphi umsebenzi obudisi. Lo mthetho ozokuhlala usebenza eenzukulwaneni zenu zoke, kizo zoke iindawo enihlala kizo.

22 “‘Lokha nanivunako esiminenu, akukafuzi nivune koke okungemaqadi+ begodu niburuje isivuno senu. Kufuze nitjhiyele umuntu otlhagileko+ nomuntu ovela kwenye inarha ohlala nani.+ NginguJehova uZimenu.’”

23 UJehova waragela phambili wakhuluma noMosi wathi: 24 “Tjela ama-Israyeli uthi, ‘Ngenyanga yekhomba, ngelanga lokuthoma lenyanga, kufuze niphumule kiyo yoke imisebenzenu, ilangeli lizokumenyezelwa ngokuvuthelwa kwebhorompita+ ukwenzela bona nikhumbule ukuthi mhlangano ocwengileko. 25 Ningenzi nanyana ngimuphi umsebenzi obudisi begodu nizokunikela umnikelo owenziwe ngomlilo oya kuJehova.’”

26 UJehova waraga wathi kuMosi: 27 “Kodwana ngelanga letjhumi layo inyanga yekhomba le, liLanga lokuLitjalelwa kweZono.+ Kufuze nigidinge umhlangano ocwengileko, kufuze nidane*+ ngebanga lezono zenu begodu nilethe umnikelo owenziwe ngomlilo oya kuJehova. 28 Ningenzi nanyana ngimuphi umsebenzi ngelangeli ngombana lilanga lokulitjalelwa kwezono+ zenu phambi kwakaJehova uZimenu. 29 Nanyana ngubani ongekhe adane* ngelangeli ngebanga lezono zakhe uzokubulawa.+ 30 Ngizokutjhabalalisa woke umuntu owenza nanyana ngimuphi umsebenzi ngelangeli. 31 Akukafuzi nenze nanyana ngimuphi umsebenzi. Lo mthetho ozokuhlala usebenza eenzukulwaneni zenu zoke nanyana kukuphi lapha nihlala khona. 32 Lisabatha, lilanga lokuphumula kwenu begodu kufuze nidane+ ngebanga lezono zenu ngelanga lethoba lenyanga ntambama. Kufuze nigidinge isabatha lenu kusukela ntambama bekube lilanga elilandelako ntambama.”

33 UJehova waraga wathi kuMosi: 34 “Tjela ama-Israyeli uthi, ‘Ngelanga le-15 lenyanga yekhomba le mNyanya wemiTlhatlhana wamalanga alikhomba wokudumisa uJehova.+ 35 Ngelanga lokuthoma kuzokuba nomhlangano ocwengileko begodu akukafuzi nenze nanyana ngimuphi umsebenzi obudisi. 36 Amalanga alikhomba kufuze nilethe kuJehova umnikelo owenziwe ngomlilo. Elangeni lobunane kufuze nigidinge umhlangano ocwengileko+ begodu kufuze nilethe umnikelo owenziwe ngomlilo kuJehova. Mhlangano okhethekileko. Nje-ke akukafuzi nenze nanyana ngimuphi umsebenzi obudisi.

37 “‘Le minyanya kaJehova egidingwa ngeenkhathi ezithileko zomnyaka+ ekufuze niyimemezele bona imihlangano ecwengileko+ yokunikela umnikelo owenziwe ngomlilo kuJehova:+ umnikelo otjhiswako, umnikelo weenthoro+ neminikelo yesiselo kuye ngokwalokho okutlhogeka ilanga nelanga.+ 38 Lezi zizinto ezingezelelwako kilokho enikunikela ngamasabatha kaJehova,+ ezingezelelwako eziphweni zenu,+ eminikelwenenu yesifungo+ neminikelwenenu esuka ehliziyweni+ okufuze nizinikele uJehova. 39 Ngelanga le-15 lenyanga yekhomba, nasele nibuthelele isivuno senarha, kufuze nigidinge umnyanya kaJehova amalanga alikhomba.+ Ilanga lokuthoma lilanga lokuphumula nelanga lobunane lilanga lokuphumula.+ 40 Ngelanga lokuthoma, nizokuthatha iinthelo zemithi ekhethekileko, amakari wemithi yesundu,+ iimpande zemithi enamakari amanengi nemithi ekhulela ngemirhobeni nizokuthaba+ phambi kwakaJehova uZimenu amalanga alikhomba.+ 41 Kufuze nigidinge umnyanya kaJehova amalanga alikhomba ngomnyaka.+ Lo mthetho ozokuhlala usebenza kizo zoke iinzukulwana zenu, kufuze niwugidinge ngenyanga yekhomba. 42 Kufuze nihlale emitlhatlhaneni amalanga alikhomba.+ Woke ama-Israyeli kufuze ahlale emitlhatlhaneni, 43 khona iinzukulwana zenu ezizako zizokwazi+ bona nganihlalisa emitlhatlhaneni nanginikhupha enarheni yeGibhide.+ NginguJehova uZimenu.’”

44 Nje-ke uMosi wakhuluma nama-Israyeli ngeminyanya kaJehova egidingwa ngeenkhathi ezithileko zomnyaka.

24 UJehova waraga wakhuluma noMosi wathi: 2 “Tjela ama-Israyeli akulethele amafutha we-oliva ahlwengileko weembani, ukwenzela bona iimbani zihlale zikhanya.+ 3 Ngaphandle kwerharideni lobuFakazi etendeni lokuhlangana, u-Aroni kufuze ahlele bona iimbani zikhanyiswe kusukela ntambama bekube sekuseni phambi kwakaJehova qobe. Lo mthetho ozokuhlala usebenza kini kizo zoke iinzukulwana zenu. 4 Qobe kufuze atlhogomele iimbani eziselithini lesibani+ elenziwe ngegolide elihlwengileko phambi kwaJehova.

5 “Uzokuthatha iflowuru esefiweko, ubhage uburotho oboli-12 oburondo obuvuleke phakathi. Uburotho ngabunye uzobubhaga ngamakhilogremu amabili weflowuru. 6 Uzobubeka bube masedi amabili, kwenye isedi kube namalarha asithandathu+ nakwenye kube namalarha asithandathu phezu kwetafula eyenziwe ngegolide elihlwengileko phambi kwakaJehova.+ 7 Kufuze uthele ipepho emhlophe ehlwengileko esedini ngayinye, uzokutjhisela uJehova+ ipepho emhlophe bona akhumbule uburotho. 8 Ilanga elinye nelinye leSabatha, kufuze abeke uburotho obunjalo qobe phambi kwakaJehova.+ Lesi sivumelwano esizokuhlala sisebenza ema-Israyelini. 9 Sizokuba ngesaka-Aroni namadodanakhe+ begodu bazosidlela endaweni ecwengileko+ ngombana singokuthileko okucwengeke khulu okubuya eminikelweni kaJehova eyenziwe ngomlilo, lo mthetho ozokuhlala usebenza.”

10 Nje-ke hlangana nama-Israyeli bekunendodana yomfazi omIsrayeli kodwana uyise amGibhide,+ kwaba nepi phakathi kwayo nendoda emIsrayeli ekampeni. 11 Indodana yomfazi omIsrayeli yathoma ukudelela igama lakaZimu nokuliqalekisa.+ Nje-ke bayiletha kuMosi.+ Igama lakanina bekunguTjhelomithi indodakazi kaDibhiri wekoro yakwaDani. 12 Bayivalela bekwaba kulapho uJehova abazisa khona isiqunto sakhe.+

13 Nje-ke uJehova wathi kuMosi: 14 “Khuphelani ngaphandle kwekampa umuntu oqalekise igama lakaZimu loyo, boke abamzwileko kufuze babeke izandla zabo phezu kwehlokwakhe begodu ihlangano yoke imkghadlhe ngamatje.+ 15 Kufuze uthi kuma-Israyeli, ‘Nanyana ngubani oqalekisa uZimakhe uzoziphendulela ngesono sakhe. 16 Umuntu oqalekisa igama lakaJehova kufuze abulawe.+ Ihlangano yoke kufuze imkghadlhe ngamatje. Nanyana ngubani oqalekisa igama lakaZimu, kungaba mumuntu ovela kwenye inarha namkha umIsrayeli kufuze abulawe.

17 “‘Nange umuntu abulala omunye umuntu, kufuze abulawe.+ 18 Nangabe umuntu ubetha bekabulale isilwana esifuywako, kufuze ahlawule, ukuphila ngokuphila. 19 Nange umuntu alimaza omunye umuntu, lokho akwenzileko naye kufuze enziwe khona.+ 20 Nakaphule omunye, naye kufuze aphulwe, ilihlo ngelihlo, izinyo ngezinyo, umuntu kufuze ajeziswe ngokwalokho akwenze komunye.+ 21 Umuntu obetha isilwana bekasibulale kufuze ahlawule+ kodwana umuntu obetha omunye bekambulale naye kufuze abulawe.+

22 “‘Umthetho munye uzokusebenza kini, kungaba mIsrayeli namkha umuntu ovela kwenye inarha+ ngombana nginguJehova uZimenu.’”

23 Nje-ke uMosi wakhuluma nama-Israyeli, bamthatha umuntu oqalekise igama lakaZimu, bamkhuphela ngaphandle kwekampa, bamkghadlha ngamatje.+ Ama-Israyeli enza njengombana uJehova ayale uMosi.

25 UJehova wakhuluma noMosi entabeni yeSinayi, wathi: 2 “Khuluma nama-Israyeli uthi kiwo, ‘Nanifika enarheni engininikela yona,+ kufuze nilalele umthetho kaJehova+ omalungana nomnyaka wesabatha begodu inarhenu kufuze iphumule. 3 Iminyaka esithandathu kufuze utjale esiminakho, iminyaka esithandathu kufuze uthene imithakho yamadiribe begodu uzokubuthelela isivuno senarha.+ 4 Kodwana ngomnyaka wekhomba kufuze kube lisabatha lokuphumula kwenarha, isabatha lakaJehova. Akukafuzi utjale namkha uthene imithi yamadiribe. 5 Akukafuzi nivune ikoroyi ezimileleko keyasalako nanivuna ikoroyi begodu akukafuzi nibuthelele amadiribe wemithi engakathenwa. Kufuze kube mnyaka wokuphumula kwenarha. 6 Nanyana kunjalo ningadla ukudla okumila enarheni ngesikhathi sesabatha layo, nina, iingqila zenu eziduna nezisikazi, iinsebenzi zenu eziqatjhiweko nabantu abavela kwezinye iinarha abahlala hlangana nani bangakudla, 7 neenlwana ezifuywako nezommango ezisenarhenenu. Koke inarha ekukhiqizako kungadliwa.

8 “‘Nizokubala iminyaka yamasabatha alikhomba, iminyaka elikhomba ebuyelelwe kalikhomba begodu amalanga weminyaka yamasabatha alikhomba kuzokuba minyaka ema-49. 9 Nizokuvuthela iphondo lizwakale khulu ngenyanga yekhomba, ngelanga letjhumi lenyanga, ngeLanga lokuLitjalelwa kweZono.+ 10 Kufuze nicwengise umnyaka wama-50 begodu nimemezele itjhaphuluko enarheni kibo boke abahlali bakhona.+ Uzokuba liJubili kini, ngamunye wenu uzokubuyela endawenakhe begodu ngamunye kufuze abuyele emndeninakhe.+ 11 Iminyaka ema-50 izokuba liJubili kini. Akukafuzi nitjale namkha nivune ikoroyi ezimileleko keyasalako nanivuna ikoroyi namkha nibuthelele amadiribe wemithi engakathenwa.+ 12 Ngombana liJubili. Kufuze licwengeke kini. Ningadla kwaphela lokho okuzimilelako enarheni.+

13 “‘Ngomnyaka lo weJubili, ngamunye wenu kufuze abuyele endawenakhe.+ 14 Nangabe uthengisela omunye umuntu okuthileko namkha uthenge kuye, ningadlelezelani.+ 15 Nawuthenga inarha komunye umuntu, kufuze ubale iminyaka edlule ngemva kweJubili, inani azokuthengisela ngalo lizokuya ngokuthi kusele iminyaka emingaki yokuvuna.+ 16 Nangabe kusele iminyaka eminengi, angalikhuphula inani akuthengisela ngalo begodu nangabe kusele iminyaka embalwa, kufuze alehlise ngombana ukuthengisela inani lalokho okusazokuvunwa. 17 Akakho namunye kini okufuze adlelezele omunye umuntu,+ kufuze nisabe uZimenu+ ngombana nginguJehova uZimenu.+ 18 Nanilalela imithetho nemiyalwami, nizokuhlala ngokuvikeleka enarheni.+ 19 Inarha izokuthela+ begodu nizokudla benisuthe nihlale lapho ngokuvikeleka.+

20 “‘Kodwana nange nithi: “Sizokudlani ngomnyaka wekhomba nangabe asizukutjala namkha sibuthelele esikuvunileko?”+ 21 Ngomnyaka wesithandathu ngizonithumela isibusiso begodu inarha izokukhiqiza isivuno esilingene iminyaka emithathu.+ 22 Ngitjho nanyana nitjala ngomnyaka wobunane nizokuragela phambili nidla esivunweni somnyaka wesithandathu bekube mnyaka wethoba. Nizokuragela phambili nidla okuvuniweko bekube sivuno esilandelako.

23 “‘Akukafuzi nithengisele omunye umuntu inarha bona ayithathe unomphela+ ngombana ngeyami.+ Nina kimi nibabantu abavela kwenye inarha endaweni le.+ 24 Kiyo yoke inarhenu, woke umuntu othengise inarha kufuze abe nelungelo lokuyithenga godu ibuye ibe ngeyakhe.

25 “‘Nangabe umfowenu uyatlhaga begodu athengise inarhakhe, isihlobo sakhe sizokuthenga lokho umfowabo akuthengisileko.+ 26 Nange umuntu anganamhlengi kodwana anemali eyaneleko yokobana angayithenga, 27 kufuze abale iminyaka edlulileko kusukela ngesikhathi ayithengise ngaso. Uzokunikela umuntu loyo imali eseleko ngaphambi kobana kube mnyaka weJubili. Ngemva kwalokho, uzokubuyela endawenakhe.+

28 “‘Nange anganamali eyaneleko yokuyithenga ibe ngeyakhe godu, izokuhlala ibe ngeyomuntu oyithengileko bekube mnyaka weJubili;+ izokubuyela kuye ngeJubili begodu uzokubuyela endawenakhe.+

29 “‘Nange umuntu athengisa indlu edorobheni elivikelwe ngemithangala, ilungelo lakhe lokuyithengisa godu lizokuragela phambili bekube sekupheleni komnyaka kusukela ngesikhathi aqede ngaso ukuthengisa; ilungelo lakhe lokuyithenga+ godu lizokuhlala likhona umnyaka woke. 30 Kodwana nange ingathengwa godu bekuphele umnyaka, indlu esedorobheni elivikelwe ngemithangala izokuba ngeyomuntu oyithengileko unomphela kizo zoke iinzukulwana zakhe. Akukafuzi itjhatjhululwe ngeJubili. 31 Izindlu ezisemadorobheni angakavikelwa ngomthangala kufuze ziqalwe njengenarha evulekileko. Ilungelo lokuzithenga godu kufuze lirage begodu kufuze zitjhatjhululwe ngeJubili.

32 “‘Izindlu zamaLevi ezisemadorobhenawo,+ amaLevi azokuhlala anelungelo lokuzithenga godu. 33 Nangabe izindlu zamaLevi azithengwa godu, indlu yawo ethengiswe edorobheni izokutjhatjhululwa ngeJubili,+ ngombana izindlu ezisemadorobheni wamaLevi zizindlu zawo ezihlangana nama-Israyeli.+ 34 Amadlelo+ abhode amadorobhawo akukafuzi athengiswe ngombana azokuhlala angewawo.

35 “‘Nangabe umfowenu uyatlhaga begodu akasakghoni ukuzitlhogomela, kufuze umtlhogomele+ njengalokha nawutlhogomela umuntu ovela kwenye inarha+ bona aragele phambili aphila. 36 Ungathathi inzalo namkha wenze inzuzo ngaye.+ Kufuze wesabe uZimakho+ begodu umfowenu uzokuragela phambili aphila. 37 Akukafuzi umboleke imali begodu ulindele inzalo+ namkha umthengisele ukudla bona ufumane inzalo. 38 NginguJehova uZimenu owanikhupha enarheni yeGibhide+ bona ngininikele inarha yeKanana, nginitjengise bona nginguZimenu.+

39 “‘Nange umfowenu atlhaga begodu kutlhogeke bona azithengise kuwe,+ akukafuzi umkatelele bona enze umsebenzi wesigqila.+ 40 Kufuze umphathe njengesisebenzi,+ njengomuntu ovela kwenye inarha. Kufuze akusebenzele bekube mnyaka weJubili. 41 Ngemva kwalokho uzokukhamba nabantwabakhe abuyele emndeninakhe. Kufuze abuyele endaweni yabokhokho bakhe.+ 42 Ngombana ama-Israyeli aziingqila zami engazikhupha enarheni yeGibhide.+ Akukafuzi azithengise ngendlela isigqila esithengiswa ngayo. 43 Akukafuzi umgandelele,+ kufuze usabe uZimakho.+ 44 Nanifuna isigqila kungaba ngesiduna namkha esisikazi eentjhabeni ezinibhodileko, ningazithenga kizo. 45 Ningathenga iingqila emadodaneni wabantu abavela kwezinye iinarha abahlala hlangana nani+ nemindenini abanayo enarhenenu. Ningawathenga abe ziingqila zenu. 46 Iingqilezo ningazidlulisela ebantwaneni benu zibe lilifa labo begodu zizokuragela phambili ziziingqila zabo. Zinganisebenzela kodwana akukafuzi nigandelele abafowenu abama-Israyeli.+

47 “‘Nange umuntu ovela kwenye inarha anjinga begodu umfowenu atlhaga kutlhogeke bona azithengise kuye namkha kwelinye ilunga lomndeni womuntu ovela kwenye inarha, 48 uzokuragela phambili anelungelo lokuthengwa godu ngemva kobana azithengisile. Omunye wabafowabo angamthenga ambuyise,+ 49 namkha usorhulwakhe namkha usonghwanakhe, umzawakhe namkha isihlobo, omunye womndenakhe angamthenga godu.

“‘Namkha nange anjinga angazithenga godu.+ 50 Yena nomuntu omthengileko kufuze babale kusukela ngomnyaka azithengise ngawo bekube mnyaka weJubili+ begodu imali athengiswa ngayo izokuya ngokweminyaka leyo.+ Imali yamalangakhe wokusebenza hlangana nesikhatheso izokubalwa ngokwalokho isisebenzi esibhadelwa khona.+ 51 Nangabe kusasele iminyaka eminengi, kufuze abuyise imali athengwe ngayo, kuye ngokweminyaka esaseleko. 52 Nangabe kusele iminyaka embalwa kwaphela ngaphambi kobana kube mnyaka weJubili, kufuze abale bekabhadele imali elingana neminyaka eseleko bona atjhatjhululwe. 53 Nakasasebenzela umphathakhe kufuze aphathwe njengesisebenzi begodu akukafuzi agandelelwe.+ 54 Kodwana nakangakghoni ukuzithenga ngokweendlela ezibaliwekwezi, uzokutjhatjhululwa ngomnyaka weJubili,+ yena nabantwabakhe.

55 “‘Ngombana ama-Israyeli aziingqila zami. Aziingqila zami engazikhupha enarheni yeGibhide.+ NginguJehova uZimenu.

26 “‘Akukafuzi nizenzele abozimu abangasizi ngalitho+ begodu akukafuzi nenze isithombe esibaziweko+ namkha nizenzele isika ecwengileko+ begodu akukafuzi nibeke ilitje enarhenenu ukwenzela bona nilikhothamele;+ ngombana nginguJehova uZimenu. 2 Kufuze nigidinge amasabathami, nihloniphe nendawami ecwengileko. NginguJehova.

3 “‘Naniragela phambili nikhamba ngemithethwami benilalele imiyalwami,+ 4 ngizokunisa izulu ngesikhathi esifaneleko,+ inarha izokuthela+ nemithi yeenthelo izokuthela. 5 Isikhathi sokubhula sizokunaba bekufike isikhathi sokuvunwa kwamadiribe nesikhathi sokuvunwa kwamadiribe sizokunaba bekufike isikhathi sokutjala. Nizokudla uburotho benu benisuthe nihlale ngokuvikeleka enarhenenu.+ 6 Ngizokuletha ukuthula enarheni,+ nizokulala kunganamuntu ozonithusa,+ ngizokususa iimbandana eziyingozi enarheni begodu akunamuntu ozonisahlela ngesabula. 7 Nizokugijimisa amanabenu beniwahlule ngesabula. 8 Abahlanu kini bazokugijimisa amanaba ali-100 begodu abali-100 bazokugijimisa azii-10 000, nizokuhlula amanabenu ngesabula.+

9 “‘Ngizonibusisa nginenze nibe nabantwana abanengi,+ nginandise begodu ngizakuhlala esivumelwaneni sami engasenza nani.+ 10 Nanisadla isivuno sakade somnyaka odlulileko, kuzokutlhogeka ukuthi nikhuphe esidala ukwenzela bona ningenise esitjha. 11 Ngizokubeka ithaberinakeli lami hlangana nani,+ angekhe nginilahle. 12 Ngizokukhamba hlangana nani ngibe nguZimenu,+ nina nizokuba babantu bami.+ 13 NginguJehova uZimenu owanikhupha enarheni yeGibhide bona ningasaba ziingqila zabo begodu ngaphula ijogi lenu lokugqilazwa, khona nizakukhamba ngokuzithemba.

14 “‘Nanyana kunjalo, nangabe aningilaleli namkha nilalele yoke imiyalo le,+ 15 namkha nale imithethwami+ nayo yoke imiyalwami beniphule isivumelwano sami,+ 16 Mina ngizokwenza okulandelako kini: Ngizonijezisa ngamatshwenyeko, ngokugula kwamaphaphu, ngomgomani omumbi ngokwenza amehlwenu afiphale nangokunenza niphelelwe mamandla. Imbewenu nizoyitjalela ilize ngombana amanabenu azokudla iintjalo zenu.+ 17 Ngizokujamelana nani, amanabenu azonihlula,+ labo abanihloyako bazonigandelela+ begodu nizokubaleka kungekho umuntu onigijimisako.+

18 “‘Nangabe nalokhu akunenzi bona ningilalele, ngizonijezisa amahlandla alikhomba ngebanga lezono zenu. 19 Ngizokwenza bona nilise ukuba nekani nokuzikhukhumeza, ngizokwenza izulu*+ lingasani enarhenenu,* ngenze inarhenu ingasatheli. 20 Nizokusebenzisela amandlenu ilize ngombana inarhenu angekhe ithele+ nemithi esenarheni angekhe ithele iinthelo.

21 “‘Kodwana naniragela phambili nijamelene nami begodu ningafuni ukungilalela ngizonijezisa kalikhomba ngebanga lezono zenu. 22 Ngizokuthumela iimbandana hlangana nani,+ zizokutjhabalalisa abantwana benu+ neenlwana zenu ezifuywako, kuzokusala abambalwa kini, akunamuntu ozokukhamba eendleleni zenu.+

23 “‘Ngaphezu kwalokho, nanisolo nibhala ukuthi nginikhalime+ begodu niragela phambili nijamelene nami, 24 nami ngizokujamelana nani begodu ngizonijezisa kalikhomba ngebanga lezono zenu. 25 Ngizokwenza amanabenu anisahlele ngesabula bona nginijezise ngebanga lokuphula isivumelwano.+ Nange nibalekela emadorobhenenu, ngizokuthumela ukugula hlangana nani+ begodu nizokunikelwa esandleni senaba.+ 26 Ngizokuphula iindawo* enibeka kizo uburotho,*+ okuseleko kuzokuba kuncani bona kungabhagwa, abafazi abalitjhumi bazokutlhoga i-ondo eyodwa bazokulinganisa uburotho benu+ begodu baniphakele kancani, nizokudla kodwana ningasuthi.+

27 “‘Ngaphezu kwalokho nanisolo nibhala ukungilalela begodu niragele phambili nijamelene nami, 28 ngizokujamelana nani khulu+ begodu ngizonijezisa kalikhomba ngebanga lezono zenu. 29 Nje-ke kuzokufuze bona nidle inyama yamadodanenu neyamadodakazenu.+ 30 Ngizokutjhabalalisa iindawo zenu eziphakemeko ezicwengileko,+ ngiphadlhe ama-aldarenu wepepho, ngizokubeka iindumbu zenu phezu kweenthombe zenu ezingaphiliko ezinyenyisako*+ begodu ngizonifulathela ngombana niyanginyenyisa.+ 31 Ngizokutjhabalalisa amadorobhenu ngesabula,+ ngenze iindawo zenu ezicwengileko zingasabi nabantu, angekhe ngilizwe iphunga elimnandi lemihlatjelwenu. 32 Ngizokwenza inarhenu ingasabi nabantu+ begodu amanabenu ahlala kiyo azokurareka ngebanga lalokho okwenzeke enarheni.+ 33 Ngizokubangela bona nirhatjheke hlangana neentjhaba,+ ngenze amanabenu bona eze azokulwa nani ngesabula,+ enarhenenu angekhe kusaba nabantu+ begodu amadorobhenu azokutjhatjalaliswa.

34 “‘Lokha inarha nayinganabantu begodu nina nanisenarheni yamanabenu, inarha izokubhadela amasabathayo. Ngesikhatheso inarha izokuphumula ngombana kufuze igidinge amasabatha engakhenge iwagidinge.+ 35 Woke amalanga ezabe inganabantu ngawo, izokuphumula ngombana akhenge iphumule hlangana namasabathenu lokha nanisahlala kiyo.

36 “‘Ngizokubangela abanye benu+ abaseenarheni zamanabenu bona basabe, bazokusaba khulu kangangobana nekari eliphetjhulwa mumoya lizobenza babaleke, bazokubaleka ngasuthi bagijinyiswa mumuntu ngesabula begodu bazokuwa.+ 37 Bazokugijima, bawisane ngasuthi bagijinyiswa mumuntu ophethe isabula, ngitjho nanyana kunganamuntu obagijimisako. Angekhe nikghone ukujamelana namanabenu.+ 38 Nizokutjhabalala hlangana neentjhaba,+ nizokutjhabalala enarheni yamanabenu. 39 Abanye benu abaseleko bazokubolela eenarheni zamanabenu+ ngebanga lomtjhaphwenu. Bazokubola ngebanga lemitjhapho yaboyise.+ 40 Bazokuvuma umtjhaphwabo,+ bavume umtjhapho nokungathembeki kwaboyise begodu bavume bona baziphethe ngokungathembeki ngokujamelene nami.+ 41 Nje-ke nami ngajamelana nabo+ ngabaletha enarheni yamanababo.+

“‘Mhlamunye bazakulisa ukuba nekani bathobeke+ bebabhadele imitjhaphwabo. 42 Ngizosikhumbula isivumelwano sami noJakopo,+ isivumelwano sami no-Isaka+ nesivumelwano sami engasenza no-Abrahama+ begodu angekhe ngayikhohlwa inarha engathembisa ukuninikela yona. 43 Lokha nabakhambileko, inarha beyibhadala amasabathayo,+ kunganamuntu ohlala kiyo, bebabhadela umtjhaphwabo, ngombana bale imithethwami banyenya nemiyalwami.+ 44 Naphezu kwakho koke lokho, lokha nabasesesenarheni yamanababo angeze ngabala unomphela+ namkha ngibalahle bekufikele ezingeni lokuthi ngibatjhabalalise, nangingenza njalo ngizabe ngiphule isivumelwano+ engasenza nabo, nginguJehova uZimabo. 45 Ngebanga labo ngizokukhumbula isivumelwano engasenza nabokhokho babo+ engabakhupha enarheni yeGibhide iintjhaba zibaqalile+ ukwenzela bona ngibatjengise ukuthi nginguZimabo. NginguJehova.’”

46 Lezi ziinqophiso, imithetho nemiyalo uJehova ayinikela ama-Israyeli ngoMosi entabeni yeSinayi.+

27 UJehova waraga wakhuluma noMosi, wathi: 2 “Khuluma nama-Israyeli uthi kiwo, ‘Nange umuntu enza isifungo esikhethekileko+ bona anikele ngomuntu kuJehova, okutjho bona abhadele imali umuntu loyo abekelwe yona, 3 inani elisilinganiso somuntu wembaji ohlangana neminyaka ema-20 ukuya kwema-60 kuzokuba matjhekeli* ama-50 wesiliva ngokwesilinganiso setjhekeli lendawo ecwengileko. 4 Kodwana nangabe mumuntu wengubo isilinganiso sizokuba matjhekeli ama-30. 5 Nangabe umuntu loyo uneminyaka emi-5 ukuya kwema-20, isilinganiso sendoda sizokuba matjhekeli ama-20, somuntu wengubo sibe matjhekeli ali-10. 6 Nangabe anenyanga yinye ukuya eminyakeni emihlanu ubudala, isilinganiso somsana sizokuba matjhekeli amahlanu wesiliva, isilinganiso somntazana sibe matjhekeli amathathu wesiliva.

7 “Nangabe uneminyaka ema-60 namkha ukuya ngaphezulu isilinganiso seqhegu kuzokuba matjhekeli ali-15, isilinganiso sesilukazi sibe matjhekeli ali-10. 8 Kodwana nangabe utlhage khulu begodu angeze akghone ukubhadela isilinganiso esibekiweko,+ uzokujama phambi komphristi, uzombekela isilinganiso esifaneleko. Umphristi uzokubekela umuntu owenza isifungo lo isilinganiso azokukghona ukusibhadela.+

9 “‘Nangabe isifungo sihlanganisa isilwana esifanele umnikelo oya kuJehova, nanyana yini enikelwa kuJehova kufuze icwengeke. 10 Akukafuzi ajamiselele namkha atjhugulule isilwana esiphile kuhle ngesingakaphili kuhle namkha esingakaphili kuhle ngesiphile kuhle. Kodwana nange atjhugulule esinye isilwana asijamiselele ngesinye, sokuthoma naleso okutjhugululwe ngaso zombili zizokucwengeka. 11 Nange kusilwana esingakahlwengeki,+ engeze kwanikelwa ngaso kuJehova uzokujamisa isilwaneso phambi komphristi. 12 Ngemva kwalokho, umphristi uzokubeka isilinganiso saso, kuye ngokuthi siphile kuhle namkha asikaphili kuhle. Isilinganiso esizokubekwa mphristi sizokuhlala sinjalo. 13 Kodwana nange afuna ukusithenga sibuye kube ngesakhe, kufuze abhadele isilinganiso esibekiweko, angezelele nengcenye yesihlanu yesilinganisweso.+

14 “‘Nange umuntu anikela ngendlu kuJehova bona ibe ngokuthileko okucwengileko, umphristi uzokubeka isilinganiso sayo, kuye ngokwalokho akubonako endlini leyo. Indlu leyo izokuthengiswa ngesilinganiso esibekwe mphristi.+ 15 Nange ocwengisa indlu afuna ukuyithenga ibe ngeyakhe godu, kufuze abhadele isilinganiso esibekiweko bekangezelele ingcenye yesihlanu yaso, ngemva kwalokho izokuba ngeyakhe.

16 “‘Nange umuntu acwengisa isimakhe kuJehova, isilinganiso sayo sizokulinganiswa ngokuthi kutlhogeka imbewu engangani bona kutjalwe. Ihomere* yembewu yebhali izokuba matjhekeli wesiliva ama-50. 17 Nangabe ucwengisa isimakhe kusukela ngomnyaka weJubili,+ isilinganiso esibekiweko sizokuhlala sinjalo. 18 Nangabe ucwengisa isimakhe ngemva kweJubili, umphristi uzombalela imali azoyibhadela kuye ngeminyaka eseleko ngaphambi kobana kube mnyaka weJubili elilandelako, ngemva kwalokho abeke isilinganiso esiphasi.+ 19 Nangabe oyicwengisileko uyayithenga godu, kufuze abhadele imali yesilinganiso esibekiweko angezelele nengcenye yesihlanu begodu izokuhlala ingeyakhe. 20 Nangabe akayithengi godu, ithengwe ngomunye umuntu, angekhe kusakghoneka bona ayithenge ibe ngeyakhe godu. 21 Lokha isimu nayitjhatjhululwako ngeJubili izokuba ngokucwengileko okuya kuJehova, izokuba yisimu enikelwe yena. Izokuba ngeyabaphristi.+

22 “‘Nange umuntu acwengisa kuJehova isimu ayithengileko engasiyingcenye yelifa lakhe,+ 23 umphristi uzokubala imali okufuze ayibhadele kuye ngeminyaka eseleko bekube liJubili, umuntu loyo uzokubhadela isilinganiso esibekiweko ngelangelo.+ Imali leyo icwengile kuJehova. 24 Ngomnyaka weJubili isimu leyo izokubuyela emuntwini ayithenge kuye, umnikazi wesimu.+

25 “‘Esinye nesinye isilinganiso kufuze sibekwe ngokwetjhekeli lendawo ecwengileko. Itjhekeli kufuze libe magera* ama-20.

26 “‘Akunamuntu okufuze acwengise izibulo lesilwana ngombana izibulo ngelakaJehova,+ kungaba likonyana namkha imvana ngombana ngelakaJehova.+ 27 Nangabe sihlangana neenlwana ezingakahlwengeki angasihlenga, ngokuya ngokwesilinganiso esibekiweko bekangezelele nengcenye yesihlanu+ kodwana nangabe akasithengi godu, sizokuthengiswa ngokuya ngokwesilinganiso esibekiweko.

28 “‘Akunanto enikelwe kuJehova bona itjhatjalaliswe, umuntu angayithengisa namkha ayithenge godu kungaba mumuntu, isilwana namkha isimakhe. Koke okunikelwe bona kutjhatjalaliswe kungokucwengeke khulu kuJehova.+ 29 Godu umuntu onikelwe bona atjhatjalaliswe akukafuzi ahlengwe.+ Kufuze abulawe.+

30 “‘Koke kwetjhumi+ kwenarha, kungaba sivuno namkha iinthelo zemithi kungekwakaJehova, kungokuthileko okucwengileko kwakaJehova. 31 Nange umuntu afuna ukuthenga godu nanyana yini yengcenyakhe yetjhumi, kufuze angezelele ingcenye yesihlanu. 32 Kwetjhumi komhlambi weenkomo namkha umhlambi wezimvu kufuze akunikele kuZimu. Lokha nakabala iinlwana,* umelusi kufuze abekele ngeqadi kwetjhumi okuya kuZimu. Koke kwetjhumi kweenlwana kungokuthileko okucwengileko kuJehova. 33 Akukafuzi ahlole bona isilwana siphile kuhle namkha asikaphili kuhle begodu akukafuzi asitjhentjhe. Nakangalinga ukusitjhugulula, zombili, sokuthoma naleso okutjhugululwa ngaso kufuze zibe ngokuthileko okucwengileko.+ Akukafuzi zithengwe godu.’”

34 Le miyalo uJehova ayinikela uMosi eNtabeni iSinayi+ bona ayidlulisele kuma-Israyeli.