IVANGELI NGOKUKALUKASI
1 Abanengi balinge ukubuthelela umlando wamaqiniso esiwakholelwa khulu+ 2 njengombana adluliselwe kithi ngilabo ababe bofakazi bento abayibonileko+ neensebenzi ezimemezela umlayezo loyo kusukela ekuthomeni,+ 3 nami ngazimisela, bona ngizitlole ngokulandelana kwazo ngombana ngawulandela ngokunembileko umtlhala wazo zoke izinto kusukela ekuthomeni, Theyofilusi ohlonipheke khulu,+ 4 bona wazi kuhle iqiniso lezinto ozifundiswe ngomlomo.+
5 Emihleni kaHerode,*+ ikosi yeJudiya, bekunomphristi igama lakhe kunguZakariya, wesigaba saka-Abhiya.+ Umkakhe bekasizukulwana saka-Aroni, igama lakhe kungu-Elisabethi. 6 Bobabili bebalungile kuZimu, bebangasoleki, bakhamba ngokuvumelana nayo yoke imiyalo nemithetho kaJehova.* 7 Bebanganamntwana ngombana u-Elisabethi bekayinyumba, kanti bobabili besele baluphele.
8 Njengombana bekenza umsebenzakhe wobuphristi esabelweni sesigaba+ sakhe phambi kwakaZimu, 9 ngokwekambiso yabaphristi, kwafika isikhathi sakhe sokutjhisa ipepho+ nakangena endaweni ecwengileko kaJehova.*+ 10 Iwoma labantu belithandaza ngaphandle ngesikhathi sokutjhiswa kwepepho. 11 Wabona ingilozi kaJehova,* ijame ngesidleni se-aldara lepepho. 12 UZakariya watshwenyeka nakabona lokhu, wathukwa khulu. 13 Ingilozi yathi kuye: “Ungasabi Zakariya, isibawo sakho sizwakele, umkakho u-Elisabethi uzokubeletha indodana, kufuze uyithiye ngokuthi nguJwanisi.+ 14 Wena uzokuthaba khulu, nabantu abanengi bazokuthabela ukubelethwa kwayo,+ 15 izokuba yikulu phambi kwakaJehova.*+ Kodwana kufuze ingaseli iwayini namkha nanyana ngisiphi isiselo esidakako+ begodu uZimu uzoyinikela ummoya ocwengileko ngitjho nangaphambi kobana ibelethwe,+ 16 izokubuyisela abantwana bakwa-Israyeli abanengi kuZimabo uJehova.*+ 17 Godu, izomkhambela phambili ngommoya namandla anjengewaka-Eliya,+ izokutjhugulula iinhliziyo zaboyise zibe njengezabantwana,+ itjhugululele nabangalaleliko ekuhlakanipheni kwabalungileko bona ilungiselele uJehova* abantu abafanelekako.”+
18 UZakariya wathi engilozini: “Ngingaqiniseka njani ngalokhu? Ngombana sengimdala nomkami sekaluphele.” 19 Ingilozi yamphendula yathi: “NginguGabhariyeli,+ ojama phambi kwakaZimu,+ ngithunyelwe bona ngizokwazisa iindaba ezimnandezi. 20 Nje-ke uzokuba simumu bekube lilanga okuzokwenzeka ngalo izintwezi ngombana azange uwakholwe amezwami, azokwenzeka ngesikhathi sawo esibekiweko.” 21 Kwenzeka koke lokhu nje, abantu basolo balinde uZakariya, bararekile ukuthi kubayini ariyada kangaka ngethempelini. 22 Nakaphumako, bekangasakghoni ukubakhulumisa, yeke abantu balemuka ukuthi ubone umbono ngethempelini. Bekakhuluma nabo ngezandla kodwana waraga nokuba simumu. 23 Kuthe nakuphela idlhego lakhe lokwenza umsebenzi ocwengileko, watjhinga kwakhe.
24 Ngemva kwamalangana umkakhe u-Elisabethi waba sidisi, kodwana akhenge azihlanganise nabantu iinyanga ezihlanu, athi: 25 “Lokhu ngilokho uJehova* angenzele khona emihleni le. Ungitjhejile bona asuse ihlazo lami ebantwini.”+
26 Kuthe ngenyanga yesithandathu asidisi, uZimu wathuma ingilozi uGabhariyeli+ edorobheni leGalile elibizwa ngokuthi yiNazaretha, 27 entombini+ ebeyithembisene umtjhado nendoda okuthiwa nguJosefa wemndenini kaDavida, igama lentombi leyo bekunguMariya.+ 28 Nayingenako ingilozi yathi kuye: “Lotjha, wena othandwa khulu, uJehova* unawe.” 29 Warareka khulu ngamezwi wengilozi lawo, wazibuza ukuthi kazi kulotjhisa okunjani lokhu. 30 Ingilozi yathi kuye: “Ungathukwa Mariya ngombana ufumene umusa kuZimu. 31 Qala! Uzokuba sidisi ubelethe indodana,+ kufuze uyithiye ngokuthi nguJesu.+ 32 Yena uzokuba mkhulu,+ uzokubizwa ngokuthi yiNdodana yoPhezukoke+ begodu uJehova* uZimu uzomnikela isihlalo sobukhosi sakaDavida uyise,+ 33 uzokuba yiKosi phezu kwesizukulwana sakaJakopo ngokungapheliko begodu umBuswakhe angekhe uphele.”+
34 UMariya wathi engilozini: “Lokhu kuzokwenzeka njani, njengombana ngingakhenge ngiye emabhayini nendoda?”+ 35 Ingilozi yathi kuye: “Ummoya ocwengileko uzokuba nawe+ namandla woPhezukoke azokuba phezu kwakho. Ngebangelo umntwana ozombeletha kuzokuthiwa ucwengile,+ yiNdodana kaZimu.+ 36 U-Elisabethi isihlobo sakho naye uzithwele indodana nanyana sele aluphele begodu le yinyanga yesithandathu azithwele, umfazi ebekuthiwa uyinyumba; 37 ngombana akukho okungenzeki ngoZimu.”+ 38 UMariya wathi: “Ngiyincekukazi kaJehova!* Akwenzeke njengokutjho kwakho.” Khonokho ingilozi yakhamba.
39 Ngemva kwamalangana, uMariya wabhinca waya esifundeni esiziintaba, edorobheni leJudiya, 40 wangena ngendlini kaZakariya walotjhisa u-Elisabethi. 41 U-Elisabethi uthe nakezwa uMariya alotjhisa, umntwana weqayeqa ngesibelethweni sakhe, u-Elisabethi wazala ummoya ocwengileko 42 warhuwelela wathi: “Ubusisiwe wena ebafazini boke, ubusisiwe nomntwana ozombeletha! 43 Kazi bengiyini bona ngivakatjhelwe ngunina leKosami? 44 Ngithe nangikuzwa ulotjhisa, umntwana osesibelethweni sami wathaba khulu beweqayeqa. 45 Uyathaba nomfazi okholwe izintwezi. Izinto uJehova* amthembise zona zizokwenzeka.”
46 UMariya wathi: “Umphefumulwami* udumisa uJehova*+ 47 nommoyami uzokuhlala uthabile ngoZimu uMsindisami+ 48 ngombana ubone ukunyazeka kwencekukazakhe.+ Kusukela kwanjesi, zoke iinzukulwana zizongibiza ngokuthi ngingothabileko+ 49 ngombana onaMandla ungenzele izinto ezihle negama lakhe licwengile+ 50 begodu kusukela kwesinye isizukulwana ukuya kwesinye umusakhe ukilabo abamsabako.+ 51 Wenze imisebenzi yamandla ngesandla sakhe; uphadlhalalise boke abazikhakhazisako eenhliziyweni zabo.+ 52 Wehlise ababusi eenhlalweni zabo zobukhosi,+ waphakamisa abathobekileko;+ 53 usuthise abalambileko ngezinto ezihle,+ abanjingileko ubakhambise banganalitho. 54 Uyisizile incekwakhe u-Israyeli, wakhumbula umusakhe+ 55 njengombana akhuluma kibokhokho bethu, ku-Abrahama neenzukulwaneni zakhe”*+ ngokungapheliko. 56 UMariya wahlala no-Elisabethi pheze iinyanga ezintathu ngemva kwalokho wabuyela ekhaya.
57 Kwafika isikhathi sokobana u-Elisabethi abelethe, wabeletha indodana. 58 Abomakhelwana neenhlobo nabezwa bona uJehova* umenzele umusa omkhulu, bathaba naye.+ 59 Ngelanga lobunane beza bazokusoka umntwana+ begodu bebazomthiyelela ngoyise uZakariya. 60 Kodwana unina wathi: “Awa! Uzokubizwa ngokuthi nguJwanisi.” 61 Bathi kuye: “Akakho namunye eenhlotjeni zakho obizwa ngegameli.” 62 Babuza uyise benza amatshwayo ngezandla bona ufuna igama lomntwana kube ngubani. 63 Yeke wabawa bona bamlethele ilitje okutlolwa kilo watlola: “NguJwanisi igama lakhe.”+ Nabezwa lokhu boke barareka. 64 Khonokho umlomakhe wavuleka nelimu lakhe latjhaphuluka wathoma ukukhuluma,+ wadumisa uZimu. 65 Boke abomakhelwana bathukwa, bathoma ukukhuluma ngazo zoke izintwezi kiso soke isifunda esiziintaba seJudiya. 66 Boke abezwa lokho bebasolo bacabanga ngakho bazibuza, bathi: “Kazi umntwana lo uzokuba yini?” Ngombana kwamambala isandla sakaJehova* besinaye.
67 Uyise uZakariya wazala ummoya ocwengileko, waphorofida wathi: 68 “Akadunyiswe uJehova,* uZimu ka-Israyeli+ ngombana ubatjhejile abantu bakhe wabasindisa.+ 69 Usivusele umsindisi onamandla*+ ngendlini kaDavida incekwakhe+ 70 njengombana akhuluma asebenzisa abaphorofidi bakhe abacwengileko bekadeni+ 71 bona sizokusindiswa emanabenethu nezandleni zabo boke abasihloyako+ 72 bona arhawukele abokhokho bethu nokuthi akhumbule isivumelwano sakhe esicwengileko,+ 73 isifungo asenza ku-Abrahama ukhokhwethu,+ 74 sokusinikela ilungelo lokumenzela umsebenzi ocwengileko ngesibindi, ngemva kokobana sisindiswe ezandleni zamanaba 75 ngokuthembeka nangokulunga phambi kwakhe ukuphila kwethu koke. 76 Kodwana wena mntwana, uzokubizwa ngokuthi umphorofidi woPhezukoke ngombana uJehova* uzokuthuma bona ukhambe phambili uyokulungisa iindlela zakhe,+ 77 bona wazise abantu bakhe ukuthi yena uzobasindisa ngokubalibalela izono,+ 78 ngebanga lesirhawu sakaZimethu. Ngesirhawesi ukusa kuzosivakatjhela kuvela phezulu 79 bona anikele ukukhanya kilabo abasebumnyameni nethunzini lokufa+ begodu anqophise neenyawo zethu endleleni yokuthula.”
80 Umntwana wakhula waba namandla emmoyeni begodu waya emmangweni bekwaba lilanga azibonakalisa ngalo ku-Israyeli.
2 Emihleni leyo uKhesari Arhostosi wakhupha umyalo wokobana boke abantu ephasini bayokutloliswa. 2 (Ukutloliswa kokuthomokhu kwenzeka lokha uKureniyosi ambusi weSiriya.) 3 Boke abantu bakhamba bayokutloliswa, ngamunye edorobheni lekhabo, lapha abelethelwe khona. 4 UJosefa+ naye wasuka avela eGalile, edorobheni leNazaretha, waya eJudiya, edorobheni uDavida abelethelwa kilo, elibizwa ngokuthi yiBhetlehema+ ngombana alilunga lomndeni kaDavida. 5 Wakhamba noMariya ebesele atjhade naye+ nobekazokubeletha ingasikade, bayokutloliswa.+ 6 Nabalapho, kwafika isikhathi sokobana abelethe. 7 Wabeletha indodana, izibulo,+ wayiphuthela ngamatjhila wayilalisa ngemkhonjeni+ ngombana bekunganandawo ngekumbeni yeemvakatjhi.
8 Esifundeneso bekunabelusi abahlala ngaphandle bagade imihlambabo ebusuku. 9 Khonokho ingilozi kaJehova* yajama phambi kwabo, iphazimulo kaJehova* yabakhanyisa, bathukwa khulu 10 kodwana ingilozi yathi kibo: “Ningasabi ngombana nginilethele iindaba ezimnandi ezizokwenza bona abantu boke bathabe. 11 Ngebanga lokuthi namhlanjesi edorobheni uDavida abelethelwa kilo,+ nibelethelwe umsindisi,+ onguKrestu iKosi.+ 12 Nakhu enizombona ngakho: Nizokufumana isana liphuthelwe ngamatjhila, lilaliswe ngemkhonjeni.” 13 Khonokho kwabonakala ibutho lezulwini likunye nengilozi leyo,+ lidumisa uZimu lithi: 14 “Idumo kuZimu phezulu nokuthula ephasini ebantwini abamukelwa nguye.”
15 Kuthe iingilozi nazisuka kibo ziya ezulwini, abelusi bathoma ukuthi komunye nomunye: “Asikhambeni siye eBhetlehema siyokubona okwenzekileko, lokho uJehova* asitjele khona.” 16 Bakhamba msinyana, bafumana uMariya, uJosefa nesana lilaliswe ngemkhonjeni. 17 Kuthe nabalibonako, batjho umlayezo abatjelwe wona malungana nomntwana. 18 Boke abantu barareka nabezwa okutjhiwo belusaba 19 kodwana uMariya wakufaka ehliziyweni koke abakutjhoko, wacabangisisa ngakho ngehliziywenakhe.+ 20 Abelusi babuyela emuva, baphazimulisa begodu badumisa uZimu ngalokho abakuzwileko nabakubonileko njengombana ingilozi ibatjelile.
21 Ngemva kwamalanga abunane, nasele kusikhathi sokobana umntwana asokwe,+ wathiywa ngokuthi nguJesu, igama alinikelwa yingilozi ngaphambi kobana uMariya abe sidisi.+
22 Nakufika isikhathi sokuhlanjululwa ngokomThetho kaMosi,+ bamletha eJerusalema bona bayomveza kuJehova* 23 njengombana kutlolwe emThethweni kaJehova:* “Elinye nelinye izibulo eliduna* kufuze kuthiwe licwengile kuJehova.”*+ 24 Benza umhlatjelo ngokwalokho okutjhiwo mThetho kaJehova* othi: “Amajuba amabili wommango namkha amajuba amabili amancani afuywako.”+
25 Bekunendoda ethileko eJerusalema igama layo kunguSimiyoni, beyilungile begodu isaba uZimu, ilindele nesikhathi lapho uZimu azokuqinisa ngaso ama-Israyeli,+ ummoya ocwengileko bewuyinqophisa. 26 Yembulelwa nguZimu ngommoya ocwengileko bona angeze ife ingakaboni uKrestu kaJehova.* 27 Yaya ethempelini inqotjhiswa mummoya, kuthe lokha ababelethi nabaletha isana elinguJesu bona kwenziwe kilo lokho okutjhiwo mThetho,+ 28 uSimiyoni wathatha umntwana wamsingatha, wadumisa uZimu wathi: 29 “Nje-ke, Kosi ePhakemeko, incekwakho seyingafa ngokuthula,+ njengokutjho kwakho 30 ngombana amehlwami abone indlela ozokuletha ngayo isindiso+ 31 oyilungiselele bona ibonwe babantu boke,+ 32 umkhanyo+ wokususa ubumnyama obugubuzese iintjhaba+ nephazimulo yabantu bakho u-Israyeli.” 33 Uyise nonina lomntwana bebasolo bazibuza ngezinto ezikhulunywa ngomntwana lo. 34 USimiyoni wababusisa nabo wathi kuMariya unina lomntwana: “Ngebanga lakhe abanye kwa-Israyeli bazokuwa,+ abanye bazokuvuka+ kodwana abanengi bazokujamelana naye nanyana uZimu azokwenza amatshwayo atjengise abantu ukuthi unaye+ 35 (wena Mariya uzokuba lisizi ngasuthi uhlatjwe ngesabula ede),+ ukwenzela bona imicabango yabanengi yambulwe.”
36 Gade kunomphorofidikazi u-Ana indodakazi kaFanuweli, wekoro ka-Atjheri. Umfazi lo besele aluphele begodu wahlala nendodakhe iminyaka elikhomba kwaphela batjhadile,* 37 besele amhlolokazi oneminyaka ema-84. Bekangatshwili ethempelini, enza umsebenzi ocwengileko ubusuku nemini, azila ukudla begodu abawa uZimu ngehliziywakhe yoke. 38 Ngesikhathi uMariya noJosefa basethempelini watjhidela, wathoma ukuthokoza uZimu nokukhuluma ngomntwana kibo boke ebebalinde bona uZimu atjhaphulule iJerusalema.+
39 Ngemva kobana benze koke ngokuvumelana nomThetho kaJehova,*+ babuyela eGalile edorobheni langekhabo, eNazaretha.+ 40 Umntwana wakhula waqina, wahlakanipha nomusa kaZimu waraga njalo unaye.+
41 Qobe mnyaka ababelethi bakhe bebajayele ukuya eJerusalema emnyanyeni wePhasika.+ 42 Nakaneminyaka eli-12, baya emnyanyeni njengombana bebajayele ukwenza.+ 43 Kuthe nakuphela umnyanya babuyela ekhaya, umsana uJesu wasala emuva eJerusalema kodwana ababelethi bakhe akhenge bakutjheje lokho. 44 Bacabanga ukuthi usesiqhemeni abakhamba naso. Kuthe sebakhambe ilanga loke, bathoma ukumfuna hlangana neenhlobo nabangani. 45 Kodwana akhenge bamfumane, yeke babuyela eJerusalema bayomfunisisa kuhle. 46 Ngemva kwamalanga amathathu bamfumana ethempelini, ahlezi phakathi kwabafundisi, abalalele, ababuza neembuzo. 47 Boke ebebamlalele barareka khulu ngendlela azwisisa naphendula ngayo.+ 48 Ababelethi bakhe nabambonako, barareka, unina wathi kuye: “Mntwanami kubayini usenza into enje? Mina noyihlo besitshwenyekile ngawe sikhamba sifunana nawe.” 49 Kodwana wathi kibo: “Beningifunelani? Anazi ukuthi kufuze ngibe sendlini kaBaba?”+ 50 Nokho, akhenge bakuzwisise lokho abatjela khona.
51 Yeke wakhamba nabo babuyela eNazaretha, waragela phambili azithoba kibo.+ Unina wafaka woke amezwi la ehliziywenakhe.+ 52 UJesu waragela phambili athuthuka ngokuhlakanipha, akhula kuhle begodu athandwa nguZimu nabantu.
3 Ngomnyaka we-15 wokubusa kwakaTibheriyasi Khesari, lokha uPontiyasi Pilatu ambusi weJudiya, uHerode*+ bekambusi wesifunda* seGalile, uFlebhe umfowabo bekambusi wesifunda senarha ye-Ithuriya neyeTrakoniti begodu uLisaniya bekambusi wesifunda se-Abhileni, 2 emihleni yomphristi omkhulu u-Anasi noKhayafasi,+ ilizwi lakaZimu lafika kuJwanisi+ indodana kaZakariya emmangweni.+
3 Wakhamba inarha yoke ezombeleze iJordani, atjhumayela atjela abantu ukuthi babhajadiswe, batjengise bona batjhugulukile khona bazakulitjalelwa izono zabo+ 4 njengombana kutloliwe encwadini ka-Isaya umphorofidi nakathi: “Ilizwi lomuntu orhuwelela emmangweni lithi: ‘Lungisani indlela kaJehova!* Yenzani iindlela zakhe zinqophe.+ 5 Yoke imirhoba kufuze izaliswe, zoke iintaba nemibundu zilaliswe; iindlela ezimazombezombe zinqotjhiswe neendlela ezimigodigodi zilungisiwe 6 begodu boke abantu bazokubona isindiso kaZimu.’”+
7 UJwanisi wathi esiqubuthwini esiza kuye bona asibhabhadise: “Nina bantwana beenyoka, ngubani oniyelelise bona nibalekele ilaka elizako?+ 8 Thelani iinthelo ezitjengisa ukutjhuguluka. Ningazitjeli ukuthi, ‘Sinobaba u-Abrahama.’ Ngombana ngithi kini uZimu angavezela u-Abrahama abantwana ematjeni la. 9 Eqinisweni izembe selisemirajini yemithi. Ngalokho-ke, yoke imithi engatheli iinthelo ezihle izokuquntwa iphoselwe emlilweni.”+
10 Isiqubuthu sambuza sathi: “Alo-ke, kufuze senzeni?” 11 Wathi kiso: “Loyo onezambatho ezimbili akabelane nomuntu onganazo, onokudliwako naye enze okufanako.”+ 12 Nabathelisi beza bona bazokubhajadiswa,+ bathi kuye: “Mfundisi, kufuze senzeni?” 13 Wathi kibo: “Ningafuni okungaphezu kwesilinganiso somthelo esibekiweko.”+ 14 Ngitjho namasotja bekambuza athi: “Kufuze senzeni?” Wathi kiwo: “Ningatlhorisi muntu namkha nimangalele umuntu ngamala+ kodwana yaneliswani ngilokho enikufumanako.”
15 Njengombana abantu bebalinde uKrestu, boke bathoma ukuzibuza ngoJwanisi bathi, “Kghani kungenzeka bona nguKrestu?”+ 16 UJwanisi waphendula wathi kibo: “Mina nginibhabhadisa ngamanzi kodwana uyeza onamandla kunami, loyo engingafaneleki nokutjhaphulula imitja yamapatlagwanakhe.+ Yena uzonibhabhadisa ngommoya ocwengileko nangomlilo.+ 17 Uphethe into yokuhlukanisa ikoroyi namakhasi bona ahlwengise ngeselelweni sakhe bese abuthelele ikoroyi ngesilulwini sakhe kodwana amakhasi uzowatjhisa emlilweni ongacimekiko.”
18 Wabakhuthaza nangezinye izinto ezinengi, waraga nokutjhumayela iindaba ezimnandi ebantwini. 19 Kodwana uHerode umbusi wesifunda, asilingwe kukhalinywa nguJwanisi malungana nokuthatha uHerodiya umkamfowabo nangazo zoke izinto ezimbi uHerode azenzileko, 20 wenza obunye ubumbi: Wavalela uJwanisi ngejele.+
21 UJwanisi wabhabhadisa abantu abanengi, wabhabhadisa noJesu.+ Kuthe uJesu nakathandazako, izulu lavuleka+ 22 begodu ummoya ocwengileko onjengejuba wehlela kuye, kwazwakala ilizwi ezulwini lithi: “Wena uyiNdodanami, engiyithandako; ngikwamukele.”+
23 UJesu+ nakathoma umsebenzakhe, bekaneminyaka engaba ma-30 ubudala,+ abantu bebacabanga bona,
uyindodana kaJosefa,+
indodana kaHeli,
24 indodana kaMathati,
indodana kaLevi,
indodana kaMeliki,
indodana kaJanayi,
indodana kaJosefa,
25 indodana kaMatathiyasi,
indodana ka-Amosi,
indodana kaNarhume,
indodana ka-Esili,
indodana kaNagayi,
26 indodana kaMathi,
indodana kaMatathiyasi,
indodana kaSimeyini,
indodana kaJoserha,
indodana kaJoda,
27 indodana kaJowanani,
indodana kaResa,
indodana kaZerubhabheli,+
indodana kaTjheyalitiyeli,+
indodana kaNeri,
28 indodana kaMeliki,
indodana ka-Adi,
indodana kaKosamu,
indodana ka-Elimadamu,
indodana ka-Eri,
29 indodana kaJesu,
indodana ka-Eliyezeri,
indodana kaJorima,
indodana kaMathati,
indodana kaLevi,
30 indodana kaSimiyoni,
indodana kaJudasi,
indodana kaJosefa,
indodana kaJonamu,
indodana ka-Eliyakhimu,
31 indodana kaMeliya,
indodana kaMena,
indodana kaMatatha,
indodana kaNathani,+
indodana kaDavida,+
indodana ka-Obede,+
indodana kaBhowazi,+
indodana kaSalimoni,+
indodana kaNarhitjhoni,+
33 indodana ka-Aminadaba,
indodana ka-Areni,
indodana kaHezironi,
indodana kaPerezi,+
indodana kaJuda,+
indodana ka-Isaka,+
indodana ka-Abrahama,+
indodana kaThera,+
indodana kaNarhori,+
indodana kaRewu,+
indodana kaPelegi,+
indodana ka-Ebhere,+
indodana kaTjhela,+
36 indodana kaKhenani,
indodana ka-Aripakitjhadi,+
indodana kaTjhemu,+
indodana kaNowa,+
indodana kaLemeki,+
indodana ka-Inogo,
indodana kaJeredi,+
indodana kaMahalaleli,+
indodana kaKhenani,+
indodana kaSethi,+
indodana ka-Adamu,+
indodana kaZimu.
4 Nje-ke uJesu azele ummoya ocwengileko wasuka eJordani, ummoya kaZimu wamnqophisa emmangweni+ 2 amalanga ama-40, alingwa nguDeveli.+ Akhenge adle litho amalanga lawo woke, yeke kuthe nakaphelako, walamba khulu. 3 UDeveli nakabona lokhu wathi kuye: “Nangabe uyindodana kaZimu, tjela amatje la bona abe burotho.” 4 Kodwana uJesu wathi kuye: “Kutloliwe ukuthi, ‘Umuntu akukafuzi aphile ngoburotho kwaphela.’”+
5 Wamusa endaweni ephakamileko wamtjengisa yoke imibuso yephasi ngokuphazima kwelihlo.+ 6 UDeveli wathi kuye: “Ngizokunikela amandla phezu kwayo yoke imibuso le nephazimulwayo ngombana yoke imibuso le ngeyami+ begodu ngiyinikela nanyana ngubani engifuna ukumnikela yona. 7 Ngalokho nawungakhothama ungilotjhe kanye kwaphela, izaba ngeyakho yoke.” 8 UJesu nakaphendulako wathi kuye: “Kutloliwe ukuthi, ‘Kufuze ulotjhe uJehova* uZimakho begodu nguye kwaphela okufuze umenzele umsebenzi ocwengileko.’”+
9 Ngemva kwalokho wamusa eJerusalema, wamjamisa esiqongolweni sethempeli wathi kuye: “Nangabe uyindodana kaZimu, ziphose phasi+ 10 ngombana kutloliwe ukuthi, ‘Uzokuyala iingilozi zakhe bona zikuvikele’ 11 begodu, ‘Zizokuthwala ngezandla zazo, ukwenzela bona inyawo lakho lingabetheki elitjeni.’”+ 12 UJesu wathi kuye: “Kuthiwa, ‘Ungamlingi uJehova* uZimakho.’”+ 13 UDeveli nasele aqede ukumlinga, wamtjhiya, walindela elinye ithuba elifaneleko.+
14 Nje-ke uJesu wabuyela eGalile anommoya kaZimu.+ Imibiko emihle ngaye yarhatjheka kizo zoke iindawo zalapho. 15 Wathoma ukufundisa emasinagogenabo begodu bekahlonitjhwa ngibo boke abantu.
16 Waya eNazaretha+ lapha akhulela khona, ngokujayelekileko ngelanga leSabatha wangena ngesinagogeni,+ wajama bona afunde. 17 Wanikelwa umsongo womphorofidi u-Isaya, wawuvula wafumana kunalapha kutlolwe ukuthi: 18 “Ummoya kaJehova* uphezu kwami ngombana ungizesile bona ngitjhumayele iindaba ezimnandi kwabatlhagileko. Ungithumele bona ngimemezele ukutjhatjhululwa kwabathunjiweko nokubona kwabangaboniko, ukutjhaphulula abagandelelekileko,+ 19 nokutjhumayela umnyaka wokwamukelwa nguJehova.”*+ 20 Yeke wasonga umsongo, wawubuyisela esisebenzini, wahlala phasi; amehlo wabo boke ebebangesinagogeni aqala poro kuye. 21 Wathi kibo: “Umtlolo eniqeda ukuwuzwa lo uzalisekile namhlanjesi.”+
22 Boke bathoma ukumkhuluma kuhle begodu bararwe mamezwi amnandi awakhulumileko,+ bathi: “Kghani le akusiyindodana kaJosefa?”+ 23 Wathi kibo: “Ngiyaqiniseka bona nizokuthi kimi, ‘Dorhodere, zilaphe. Izinto esizwe ukuthi uzenze eKapernawumi, zenze nendawenekhenu le.’”+ 24 Wathi: “Ngiqinisile ngithi kini, akakho umphorofidi owamukelwako endawenekhabo.+ 25 Ngokwesibonelo, nginitjela iqiniso ngithi: Bekunabahlolokazi abanengi kwa-Israyeli ngesikhathi saka-Eliya lokha izulu lingani iminyaka emithathu neenyanga ezisithandathu begodu kwaba nendlala ekulu enarheni yoke.+ 26 Kodwana u-Eliya akhenge athunyelwe ngitjho nakoyedwa wabafazaba, kunalokho wathunyelwa kumhlolokazi weZerafadi enarheni yeSidoni.+ 27 Godu bekunabantu abanengi kwa-Israyeli abanobulepheru* ngesikhathi saka-Elitjha umphorofidi kodwana akakho namunye owahlanjululwa,* ngaphandle kwakaNamani umSiriya.”+ 28 Nje-ke boke abezwa zoke izintwezi ngesinagogeni basilingeka khulu,+ 29 basikima bamdosela ngaphandle kwedorobho, bamusa esiqongolweni sentaba idorobho labo elakhelwe phezu kwayo bona bamsunduzele phasi abethe ngehloko. 30 Kodwana waphunyurha phakathi kwabo, wakhamba.+
31 Waya eKapernawumi, idorobho leGalile. Bekabafundisa kulilanga leSabatha,+ 32 abantu bararwa yindlelakhe yokufundisa+ ngombana akufundisako bekuvela kuZimu.* 33 Khonapho esinagogeni bekunendoda enedimoni, yarhuwelela ngelizwi elikhulu yathi:+ 34 “Usifunani, wena Jesu weNazaretha?+ Uzele ukuzosibhubhisa na? Ngazi kuhle ukuthi ungubani, ungoCwengileko kaZimu!”+ 35 Kodwana uJesu walikhalima wathi: “Thula, uphume kuye.” Ngemva kobana idimoneli liyidule phasi indoda leyo phakathi kwabo, laphuma ngaphandle kokuyilimaza. 36 Nababona lokhu, boke barareka bathi komunye nomunye: “Ukhuluma njani? Ngombana ngelawulo nangamandla uyala imimoya emimbi bona iphume begodu iyaphuma!” 37 Yeke iindaba ezimalungana naye zarhatjheka kizo zoke iindawo ezibhode inarha leyo.
38 Ngemva kobana asukile esinagogeni, wangena ngendlini kaSimoni. Umkhwekazi kaSimoni bekagula aphethwe mgomani onamandla, bambawa bona amsize.+ 39 UJesu watjhidela kuye, wayala umgomani bona umlise, waphola. Khonokho wavuka wathoma ukubenzela ukudla.
40 Kuthe nakutjhinga ilanga, kwalethwa kuye boke abantu abagulako abaphethwe malwele ahlukahlukeneko. Wabalapha ngokubeka izandla zakhe komunye nomunye wabo.+ 41 Amadimoni aphuma kwabanengi, arhuwelela athi: “UyiNdodana kaZimu.”+ Kodwana wawakhalima, wangawavumela bona akhulume+ ngombana bewamazi bona unguKrestu.*+
42 Kuthe nakusako wasuka lapho waya endaweni enganamizi.+ Isiqubuthu sathoma ukumzuma besafika lapho bekakhona, salinga ukumvimbela bona angakhambi endaweni leyo. 43 Kodwana wathi kiso: “Nakwamanye amadorobho kufuze ngitjhumayele iindaba ezimnandi zomBuso kaZimu ngombana ngithunyelwe lokho.”+ 44 Yeke wakhamba wayokutjhumayela emasinagogeni weJudiya.
5 Ngelinye ilanga isiqubuthu safuhluzela kuye bona silalele ilizwi lakaZimu, uJesu bekajame hlanu kwelitsha leGenezaretha.*+ 2 Wabona iinkepe ezimbili zijame magega nelitsha kodwana abathiyi beenhlambi bebahlikile kizo bayokuhlanza amanedabo.+ 3 Wakhwela kwesinye isikepe, ebekungesakaSimoni, wambawa bona angene kancani ngelitsheni. Ngemva kwalokho wahlala phasi, wathoma ukufundisa isiqubuthu asesikepeni. 4 Nakaqeda ukukhuluma, wathi kuSimoni: “Sunduzelani isikepe lapho kutjhingela ngakhona, niphosele amanedenu bona nibambe iinhlambi.” 5 Kodwana uSimoni wathi: “Mfundisi, sithiye ubusuku boke akhenge sibambe litho+ kodwana njengokutjho kwakho ngizowaphosela amanede.” 6 Kuthe bona benze njalo, babamba iinhlambi ezinengi. Amanedabo athoma ukurathuka.+ 7 Babiza abangani babo ebebathiya nabo ebebakwesinye isikepe bona bazobasiza, beza bazalisa iinkepe zombili, kangangobana zafuna ukucwila. 8 Abona lokhu, uSimoni Pitrosi waguqa eenyaweni zakaJesu, wathi: “Suka kimi Kosi ngombana ngiyindoda enesono.” 9 Yena nalabo ebebanaye barareka khulu ngeenhlambi ezinengi abazibambileko, 10 kwenzeka okufanako emadodaneni kaZebediya,+ uJakopo noJwanisi, ebebathiya iinhlambi noSimoni. Kodwana uJesu wathi kuSimoni: “Ungathukwa. Kusukela nje nizokubamba abantu baphila.”+ 11 Bakhuphela iinkepe zabo ehlabathini, batjhiya koke bamlandela.+
12 Kuthe ngelinye ilanga uJesu akwelinye lamadorobho, bekunendoda ezele ubulepheru. Nayibona uJesu yakhothama, yambawa yathi: “Kosi, nangabe uyathanda, ungangihlambulula.”+ 13 Ngalokho wathabulula isandla sakhe, wayikghwatha, wathi: “Ngiyathanda! Hlambuluka.” Khonokho ubulepheru basuka kiyo.+ 14 Wanikela indoda le umyalo wokobana ingatjeli muntu, wathi: “Khamba uyoziveza kumphristi, wenze umnikelo wokuhlanjululwa kwakho njengokutjho komthetho kaMosi,+ kube bufakazi kibo.”+ 15 Kodwana iindaba ezimalungana naye bezisolo zirhatjheka, isiqubuthu esikhulu besihlangana bona sizokulalela, silatjhwe nekuguleni kwaso.+ 16 Nokho, bephele aye eendaweni ezingahlali bantu bona ayokuthandaza.
17 Ngelinye ilanga bekafundisa abantu, abaFarisi nabafundisi bomThetho abavela kizo zoke izabelo zeGalile, zeJudiya nezeJerusalema nabo bebahlezi lapho. Bekanamandla kaJehova* wokulapha abantu.+ 18 Khonapho kweza amadoda athwele umuntu orholopheleko ngomkghadi,* alinga ukumngenisa ambeke phambi kwakaJesu.+ 19 Kodwana ngebanga lesiqubuthu bewangakghoni ukumngenisa, yeke akhwela phezu kwephahla avula itjhuba amehlisa ngomkghadi hlangana nabantu ebebaphambi kwakaJesu. 20 Nakabona ukukholwa kwawo, wathi: “Ndoda, izono zakho zilitjalelwe.”+ 21 Ngalokho abatloli nabaFarisi bacabanga bathi: “Ngubani lo ohlambalazako? Ngubani ongalibalela izono ngaphandle kwakaZimu kwaphela?”+ 22 Kodwana uJesu alemuka lokho abakucabangako, wathi kibo: “Nicabangani eenhliziyweni zenu? 23 Ngikuphi okulula ukuthi, ‘Izono zakho zilitjalelwe’ namkha ukuthi, ‘Vuka ukhambe’? 24 Kodwana bona nazi ukuthi iNdodana yomuntu inamandla wokulibalela izono ephasini,” wathi endodeni erholopheleko: “Ngithi kuwe, Vuka, uthathe umkghadakho, ukhambe uye ekhaya.”+ 25 Khonokho yasikima phambi kwabo, yathatha umkghadayo, yaya ekhaya, idumisa uZimu. 26 Ngemva kwalokho boke barareka khulu, bathukwa, bathoma ukudumisa uZimu, bathi: “Sibone izinto ezihle khulu namhlanjesi!”
27 Ngemva kwalokho, waya ngaphandle wabona umthelisi igama lakhe kunguLevi ahlezi e-ofisini lomthelo, wathi kuye: “Ngilandela.”+ 28 Watjhiya koke ngemva, wasikima wamlandela. 29 ULevi wenzela uJesu umnyanya omkhulu kwakhe, khonapho bekunesiqubuthu esikhulu sabathelisi nabanye badla nabo.+ 30 AbaFarisi nabatloli nababona lokhu bathoma ukunghonghoyila ebafundini bakhe, bathi: “Kubayini nidla benisele nabathelisi nezoni na?”+ 31 UJesu wabaphendula wathi: “Abaphilileko abamtlhogi udorhodere kodwana ngabagulako abamtlhogako.+ 32 Angikazeli ukubiza abantu abalungileko kodwana ngizele ukubiza izoni bona zitjhuguluke.”+
33 Bathi kuye: “Abafundi bakaJwanisi bazila ukudla qobe begodu bathandaza ngetjiseko, kunjalo nangabafundi babaFarisi kodwana bakho bayadla bebayasela.”+ 34 UJesu wathi kibo: “Angekhe nenza abangani bomkhwenyana bazile ukudla lokha umkhwenyana asesenabo, akusinjalo? 35 Kodwana kuzokufika isikhathi lapho umkhwenyana+ azokuthathwa kibo; bazokuzila-ke ngesikhatheso.”+
36 Godu wabenzela umfanekiso, wathi: “Akakho osika ipetjhi esambathweni esitjha ayithungele esambathweni esidala. Nakangenza njalo, ipetjhi etja izokurathula isambatho esidala begodu ipetjhi evela esambathweni esitjha ngekhe ifanelane nesidala.+ 37 Godu, akakho othela iwayini elitjha ngeenkhwanyeni* zewayini elidala. Nakangenza njalo, iwayini elitjha lizokurathula iinkhwamezo begodu lizokuthuluka, iinkhwama zewayini zonakale. 38 Kodwana iwayini elitjha kufuze lithelwe ngeenkhwanyeni ezitjha zewayini. 39 Akakho umuntu othi ngemva kokusela iwayini elidala athi ufuna elitjha ngombana uthi, ‘Elidala limnandi.’”
6 Nje-ke wadlula emasimini wekoroyi ngesabatha, abafundi bakhe bakha iinqwambi zekoroyi,+ bazihlikihla ngezandla,+ badla. 2 Abanye abaFarisi nababona lokho bathi: “Kubayini nenza into engakavumeleki ngeSabatha?”+ 3 UJesu wabaphendula wathi: “Akhenge nifunde na ukuthi uDavida wenzani lokha yena namadoda ebekakhamba nawo balambile?+ 4 Wangena ngendlini kaZimu, wanikelwa uburotho bomnikelo* wadla, wanikela namadoda akhamba nawo obunye babo. Ngokomthetho bekungakavumeleki bona nanyana ngubani abudle ngaphandle kwabaphristi kwaphela.”+ 5 Bese wathi kibo: “INdodana yomuntu iyiKosi yeSabatha.”+
6 Ngelinye isabatha+ wangena ngesinagogeni wathoma ukufundisa. Khonapho bekunendoda etjhwabene isandla sokudla.+ 7 Nje-ke abatloli nabaFarisi bamqalisisa uJesu bafuna ukubona ukuthi uzokulapha ngeSabatha na, khona bazakufumana into abangammangalela ngayo. 8 Kodwana yena bekazi ukuthi bacabangani,+ yeke wathi endodeni etjhwabene* isandla: “Sikima ujame phakathi nendawo.” Yasikima yajama khona. 9 Nje-ke uJesu wathi kibo: “Akhengibuze kini madoda, kuvumelekile na ukwenza okuhle, ukulimaza, ukusindisa ukuphila* namkha ukubulala ngeSabatha?”+ 10 Wabaqala boke, ngemva kwalokho wathi endodeni leyo: “Thabulula isandla sakho.” Yenza njalo, isandla sayo sathabuluka. 11 Kodwana basilingeka babibhelana, bathoma ukuhlanganisa iinhloko babonisana ngokuthi bangamenzani uJesu.
12 Ngelinye lamalanga lawo waphuma wayokuthandaza entabeni,+ wathandaza kuZimu ubusuku boke.+ 13 Kuthe nakusako, wabiza abafundi bakhe, wakhetha hlangana nabo abali-12, wababiza ngokuthi bapostoli:+ 14 BekunguSimoni, amthiya ngokuthi nguPitrosi, u-Andrisi umfowabo, uJakopo, uJwanisi, uFlebhe,+ uBhartholomewu, 15 uMatewu, uTomasi,+ uJakopo indodana ka-Alfiyosi, uSimoni obizwa ngokuthi “otjhisekako,” 16 uJudasi indodana kaJakopo noJudasi Iskariyodi owathengisa uJesu.
17 Wehla nabo wajama endaweni endlalekileko, lapho bekunesiqubuthu esikhulu sabafundi bakhe, nesiqubuthu esikhulu sabantu abavela kilo loke iJudiya neJerusalema nesifundeni esimagega nelwandle seTirosi neSidoni, abeza bazomlalela begodu balatjhwe ekuguleni kwabo. 18 Ngitjho nalabo ebebatshwenywa mimoya emimbi balatjhwa. 19 Soke isiqubuthu besifuna ukumkghwatha ngombana bekuphuma amandla kuye+ abalaphe boke.
20 Waphakamisa amehlo waqala abafundi bakhe wathi:
“Niyathaba nina enidududu ngombana umBuso kaZimu ngewenu.+
21 “Niyathaba nina enilambileko nje ngombana nizokusuthiswa.+
“Niyathaba nina enililako nje ngombana nizokuhleka.+
22 “Niyathaba abantu nabanihloyako,+ baninina,+ banithuka begodu bahlambalaza igama lenu ngebanga leNdodana yomuntu. 23 Mhlokho, thabani neqayeqe ngebanga lokuthi umvuzwenu mkhulu ezulwini ngombana lezi zizinto abokhokho babo abazenza ebaphorofidini.+
24 “Kodwana maye! Kini eninjingileko+ ngombana senibufumene boke ubumnandi benu.+
25 “Maye! Kini enisuthako nje ngombana nizokulamba.
“Maye! Nina enihlekako nje ngombana nizokulila.+
26 “Maye! Kini lokha boke abantu banikhuluma kuhle+ ngombana ngilokho abokhokho babo abakwenza ebaphorofidini bamala.
27 “Kodwana mina ngithi kini enilaleleko: Ragelani phambili nithanda amanabenu, nenze okuhle kilabo abanihloyako,+ 28 nibusise abaniqalekisako, nithandazele nalabo abanithukako.+ 29 Kiloyo okubetha komunye umhlathi, mnikele nomunye; kiloyo okuthathela isambatho sangaphandle, mvumele athathe nesangaphakathi.+ 30 Yipha woke umuntu okubawako,+ naloyo okuthathela izinto zakho, ungambawi bona azibuyise.
31 “Godu, lokho enifuna abantu bakwenze kini, nani kwenzeni kibo.+
32 “Ngombana nanithanda labo abanithandako, kunizuzisa ngani lokho? Phela nezoni zithanda labo abazithandako.+ 33 Kanti nanenza okuhle kwaphela kilabo abenza okuhle kini, kunizuzisa ngani lokho? Phela nezoni zenza okufanako. 34 Godu, naniboleka* kwaphela labo enilindele bona banibhadele, kunizuzisa ngani lokho?+ Phela nezoni ziboleka izoni bona zizokufumana lokho ezikubolekisileko. 35 Ngokuphambene nalokho, ragelani phambili nithanda izitha zenu, nenza okuhle begodu niboleka ningalindeli ukubuyiselwa litho;+ ngalokho umvuzwenu uzokuba mkhulu, nizokuba madodana woPhezukoke ngombana unomusa kwabangathokoziko nabangakalungi.+ 36 Ragelani phambili ninesirhawu njengombana noYihlo anesirhawu.+
37 “Ngaphezu kwalokho, lisani ukwahlulela, nani angekhe nahlulelwe;+ lisani ukusola abanye, nani angekhe nisolwe. Ragelani phambili nilibalela, nani nizokulitjalelwa.+ 38 Kwenzeni umukghwa ukupha, nani bazanipha.+ Bazakuthela eenkhwanyeni eziseemfubeni zenu* isilinganiso esihle, esigandelelweko, sakhuhluzwa begodu saphuphuma. Ngombana ngesilinganiso enilinganisa ngaso nani bazonilinganisela ngaso.”
39 Godu wabatjela omunye umfanekiso wathi: “Isiphofu angekhe sanqophisa isiphofu, akusinjalo? Angeze na zawela ngemgodini zombili?+ 40 Umfundi akasingaphezu komfundisakhe kodwana nanyana ngubani ofundiswe ngokupheleleko uzokuba njengomfundisakhe. 41 Nje-ke, kubayini uqala ilithi elingelihlweni lomfowenu kukulapho ungasiboni isigodokazi esingelihlweni lakho?+ 42 Ungatjho njani kumfowenu uthi, ‘Mfowethu, ngibawa ukukhupha ilithi elingelihlweni lakho,’ khisibe wena awusiboni isigodo esingelihlweni lakho? Mzenzisi! Thoma ngokukhupha isigodo esingelihlweni lakho, uzokubona kuhle ukuthi ungalikhupha njani ilithi elingelihlweni lomfowenu.
43 “Ngombana akunamuthi omuhle othela iinthelo ezibolileko, kanti nomuthi obolileko awutheli iinthelo ezihle.+ 44 Ngombana umuthi ngamunye waziwa ngeenthelo zawo.+ Ngokwesibonelo, abantu abavuni amafeyi namkha amadiribe emithini yameva. 45 Umuntu olungileko ukhupha okuhle ngemnothweni omuhle wehliziywakhe kodwana umuntu omumbi ukhupha okumbi emnothwenakhe omumbi ngombana umlomo ukhuluma lokho okuphuphuma ngehliziyweni.+
46 “Nje-ke, kubayini ningibiza ngokuthi ‘Kosi! Kosi!’ Kodwana ningenzi izinto engizitjhoko?+ 47 Woke umuntu oza kimi ezwe amezwami begodu awenze, ngizanitjengisa ukuthi unjengobani:+ 48 Unjengendoda eyathi nayakha indlu yemba yatjhinga phasi khulu yabeka isisekelo edwaleni. Ngebanga lalokho, kwathi nakufika iinrhurhula, umlambo wayibetha ngamandla indlu leyo kodwana azange ube namandla aneleko wokuyisikinya ngombana beyakhiwe kuhle.+ 49 Ngakwelinye ihlangothi, nanyana ngubani ozwako kodwana angenzi litho,+ unjengendoda eyakha indlu ehlabathini enganasisekelo. Umlambo wayibetha, yagirika msinyana, yawa yoke.”
7 Nakaqeda ukutjho lokho ekufuze akutjho ebantwini, wangena eKapernawumi. 2 Nje-ke bekunesisebenzi somphathi wamabutho ebesigulela ukufa.+ Umphathi wamabutho bekasithanda khulu. 3 Uthe nakezwa ngoJesu, wathumela abanye abadala bamaJuda ukuthi bayombawa bona eze azokulapha isisebenzi sakhe. 4 Baya kuJesu bamncenga khulu, bathi: “Umphathi lo uyafaneleka bona umenzele lokhu 5 ngombana uyasithanda isitjhaba sekhethu begodu nguye owasakhela isinagogo.” 6 UJesu wakhamba nabo. Uthe angasi kude nendlu leyo, umphathi wamabutho besekathume abangani bakhe bona bamhlangabeze bathi: “Mnumzana, ungazitshwenyi ngombana angifaneleki bona ungangena ngendlinami.+ 7 Kungebangelo ngingakhenge ngizibone ngifaneleka ukuza kuwe. Kodwana khuluma ilizwi, ulaphe isisebenzi sami. 8 Ngombana nami kunabantu abangilawulako begodu nginamasotja angaphasi kwami, ngithi kileli, ‘Khamba,’ likhambe; ngithi kwelinye, ‘Yizapha!’ Lize; ngithi esisebenzini sami, ‘Yenza lokhu!’ Sikwenze.” 9 UJesu nakezwa lokhu, wamangala, wajika waqala isiqubuthu esimlandelako, wathi: “Ngiyanitjela, ngitjho nakwa-Israyeli akhenge ngifumane ukukholwa okukhulu kangaka.”+ 10 Nje-ke boke labo ebebathunyiwe nababuyela ngendlini, bafumana isisebenzi siphile tswe!+
11 Msinyana ngemva kwalokho watjhinga edorobheni elibizwa ngokuthi yiNayini, abafundi bakhe nesiqubuthu esikhulu bebakhamba naye. 12 Nakatjhidela hlanu kwesango ledorobhelo, bekunendoda ehlongakeleko ebebayithwele iyokubulungwa. Beyiyindodana ebelethwe yodwa kunina,+ ngaphezu kwalokho, unina bekamhlolokazi. Isiqubuthu esikhulu esivela edorobhenelo besinaye. 13 Kuthe iKosi nayimbonako, yamrhawukela,+ yathi kuye: “Lisa ukulila.”+ 14 Ngalokho yatjhidela yathinta ihlaka lokuthwala isidumbu, abalithweleko bajama tsi! Wathi: “Sokana, ngithi kuwe vuka!”+ 15 Umufi wavuka wahlala, wathoma ukukhuluma, uJesu wamnikela unina.+ 16 Nje-ke boke bafikelwa kusaba, bathoma ukudumisa uZimu, bathi: “Kuvele umphorofidi omkhulu phakathi kwethu”+ begodu bathi “uZimu ubakhumbulile abantu bakhe.”+ 17 Iindaba zalokho akwenzileko zarhatjheka kiyo yoke iJudiya nakiyo yoke inarha eyibhodileko.
18 Nje-ke abafundi bakaJwanisi bambikela zoke izintwezi.+ 19 Ngalokho uJwanisi wabiza abafundi bakhe ababili, wabathumela eKosini bona bayoyibuza, bathi: “Kghani Nguwe Ozako+ namkha kufuze silindele omunye?” 20 Nakafika kuye, amadoda la athi: “UJwanisi umBhabhadisi usithume bona sizokubuza ukuthi, ‘Kghani Nguwe Ozako namkha kufuze silindele omunye?’” 21 Nge-iri lelo walapha abantu abanengi abagulako,+ abaphethwe malwele amambi khulu nabanemimoya emimbi, wanikela nabantu abanengi abaziimphofu isipho sokubona. 22 Wabaphendula wathi: “Khambani niyokubikela uJwanisi lokho enikubonileko nalokho enikuzwileko: Iimphofu ziyabona,+ iinrhole ziyakhamba, abanobulepheru bayahlanjululwa, abangezwako bayezwa,+ abahlongakeleko bayavuswa nabadududu batjelwa iindaba ezimnandi.+ 23 Uyathaba onganabanga lokuzaza ngami.”+
24 Ngemva kokukhamba kweenthunywa zakaJwanisi, uJesu wathoma ukukhuluma nesiqubuthu ngoJwanisi wathi: “Naphumela ukuyokubonani emmangweni? Umhlanga ophembethwa mumoya?+ 25 Alo-ke, naphumela ukubonani? Indoda embethe izambatho zakanokutjho?+ Phela, abambatha uburhanyarhanya nabaphila mabothobotho bangeendlini zamakhosi. 26 Kuhlekuhle, naphumela ukubonani? Umphorofidi? Iye, ngiyanitjela, okungcono khulu kunomphorofidi.+ 27 Nguye lo okwatlolwa ngaye kwathiwa: ‘Ngithumela isithunywa sami ngaphambi kwakho, esizokuhlahla indlelakho.’+ 28 Ngiyanitjela, kibo boke abantu abakhe babelethwa akekho omkhulu kunoJwanisi kodwana omncani emBusweni kaZimu mkhulu kunaye.”+ 29 (Boke abantu nabathelisi nabezwa lokho bamemezela ukulunga kwakaZimu ngombana bebabhajadiswe ngebhabhadiso lakaJwanisi.+ 30 Kodwana abaFarisi nezazi zomThetho badelela iseluleko* sakaZimu+ njengombana bangakhenge babhajadiswe nguye.)
31 “Nje-ke abantu besizukulwanesi ngingabamadanisa nobani namkha bafana nobani?+ 32 Bafana nabantwana abahlezi eendaweni zokuthengisela, abarhuwelelanako bathi: ‘Sinidlalele ifuludi, akhenge nijide; sarhidla isililo kodwana akhenge nilile.’ 33 Ngokunjalo, uJwanisi umBhabhadisi wafika angadli uburotho, angaseli iwayini+ kodwana nathi: ‘Unedimoni.’ 34 INdodana yomuntu ifike idla, isela kodwana nathi: ‘Naso-ke isirhiribideli esizinikele ewayinini, umngani wabathelisi nezoni!’+ 35 Koke kuyafana kodwana ukuhlakanipha kubonakala kulungile ngemiphumela yakhona.”+
36 Nje-ke omunye wabaFarisi bekasolo ambawa bona azokudla naye. Ngalokho wangena ngendlini yomFarisi loyo wahlala etafuleni. 37 Umfazi ebekaziwa ngokuthi sisoni edorobhenelo wezwa bona uJesu ungendlini yomFarisi uyadla, weza nomjekana wamafutha anuka kamnandi.+ 38 Waguqa eenyaweni zakhe, walila wamanzisa iinyawo zakaJesu ngeenyembezi, bewazisula ngeenhluthu zakhe. Godu wammanga iinyawo zakhe ngethando, wazizesa ngamafutha anuka kamnandi. 39 UmFarisi ommemileko nakabona lokhu, wacabanga wathi: “Ngathana indoda le beyimphorofidi kwamambala, beyizokwazi ukuthi ngubani nokuthi unjani umfazi oyikghwathako lo, ukuthi usisoni.”+ 40 Kodwana uJesu alemuka ukuthi ucabangani wathi kuye: “Simoni, kunento engifuna ukukutjela yona.” Yena wathi: “Khuyini Mfundisi?”
41 “Amadoda amabili bewakoloda umbolekisi othileko; enye beyikoloda abodenariyu* abama-500, enye ikoloda abama-50. 42 Bewanganalitho angambhadela ngalo, yeke wawalibalela ngokutjhaphulukileko womabili. Alo-ke, ngiyiphi hlangana nawo ezomthanda khulu?” 43 USimoni wathi: “Ngicabanga ukuthi ngileyo ebeyinesikolodo esikhulu.” Wathi kuye: “Wahlulele kuhle.” 44 UJesu wajika waqala umfazi loya, wathi kuSimoni: “Uyambona umfazi lo? Ngingene kwakho; akhenge unginikele amanzi wokuhlamba iinyawo. Kodwana yena umanzise iinyawo zami ngeenyembezi zakhe bewazisula ngeenhluthu zakhe. 45 Akhenge ungimmange kodwana umfazi lo, kusukela nge-iri engifike ngalo akhenge alise ukummanga iinyawo zami ngethando. 46 Akhenge uzese ihlokwami ngamafutha kodwana umfazi lo uzese iinyawo zami ngamafutha anuka kamnandi. 47 Ngebanga lalokhu ngiyakutjela, izono zakhe nanyana zizinengi zilitjalelwe+ ngombana uthande khulu, olitjalelwe okuncani, uthanda kancani.” 48 Ngalokho wathi kuye: “Izono zakho zilitjalelwe.”+ 49 Labo ebebahlezi naye etafuleni babuzana bodwa bathi: “Ngubani indoda le ekwazi nokulibalela izono?”+ 50 Kodwana wathi emfazini lo: “Ukukholwa kwakho kukusindisile;+ khamba ngokuthula.”
8 Msinyana ngemva kwalokho, wakhamba idorobho nedorobho, isabelo nesabelo, atjhumayela iindaba ezimnandi zomBuso kaZimu.+ AbaliTjhumi namBili bebanaye, 2 kuhlanganise nabafazi abathileko abalatjhwa emimoyeni emimbi nemalwelweni: UMariya obizwa ngokuthi nguMarhdalina, owakhutjhwa amadimoni alikhomba, 3 uJwana+ umkaKhuza, umphathi wendlu kaHerode, uSusana nabanye abafazi abanengi, ebebabatlhogomela ngezinto zabo.+
4 Nje-ke kuthe isiqubuthu esikhulu sisabuthene ndawonye kunye nalabo ebebeze kuye bakhamba naye idorobho nedorobho, wakhuluma nabo asebenzisa umfanekiso:+ 5 “Umtjali waphuma wayokutjala imbewakhe. Njengombana atjala, enye yayo yawela eqadi kwendlela yagadangwa, neenyoni zayidla.+ 6 Enye yawela edwaleni, kuthe nasele imilile, yatjhwaba ngombana bekomile.+ 7 Enye yawela emeveni, ameva akhula nayo ayiminyanisa.+ 8 Kodwana enye yawela ehlabathini ehle, nasele imilile, yathela ngokubuyelelwe nge-100.”+ Ngemva kokutjho koke lokhu, warhuwelela wathi: “Oneendlebe akezwe.”+
9 Abafundi bakhe bambuza ukuthi umfanekiso lo utjho ukuthini.+ 10 Wathi: “Nina uZimu unisize nazwisisa iimfihlo ezicwengileko zomBuso kaZimu kodwana abanengi batjelwa ngemifanekiso+ bona nanyana baqalile bangaboni nanyana bezwa, bangazwisisi.+ 11 Nje-ke nakhu okutjhiwo mfanekiso lo: Imbewu lilizwi lakaZimu.+ 12 Leyo engeqadi kwendlela ngilabo abezwileko, kwafika uDeveli wasusa ilizwi eenhliziyweni zabo ukwenzela bona bangakholwa begodu basindiswe.+ 13 Leyo esedwaleni, ngilabo abathi nabezwa ilizwi balamukele ngethabo kodwana abanamrabhu. Bakholwa isikhatjhana bese kuthi nakufika isikhathi sokulingwa balise.+ 14 Malungana naleya ewele hlangana nameva, laba ngilabo abezwileko kodwana bathikaziswa matshwenyeko, bunjinga+ nobumnandi bokuphilokhu+ baminyezeleka neenthelo zabo azivuthwa.+ 15 Leya ewele ehlabathini ehle, ngilabo okuthi ngemva kokuzwa ilizwi ngehliziyo ehle,+ banamathele kilo bathele iinthelo ngokukghodlhelela.+
16 “Akakho umuntu okhanyisa isibani asigubuzese ngesitja namkha asibeke ngaphasi kombhede kodwana usibeka endaweni ephakemeko ukwenzela bona abangenako babone ukukhanya.+ 17 Ngombana akukho okufihliweko okungekhe kubonakale namkha okufihlwe ngobuthakgha okungekhe kwaziwe begodu kwambulwe.+ 18 Ngalokho yelelani bona nilalela njani ngombana loyo onakho uzokunikelwa okunengi+ kodwana loyo onganakho, uzokumukwa ngitjho nalokho acabanga ukuthi unakho.”+
19 Kwafika unina nabafowabo+ beze kuye kodwana bebabhalelwa kutjhidela kuye ngebanga lesiqubuthu.+ 20 Ngalokho abantu bathi kuye: “Unyoko nabafowenu bajame ngaphandle, bafuna ukukubona.” 21 Wathi kibo: “Umma nabafowethu ngilaba abezwa ilizwi lakaZimu begodu balenze.”+
22 Ngelinye ilanga yena nabafundi bakhe bangena ngesikepeni, wathi kibo: “Asiyameleni ngaphetjheya kwelitsha.” Yeke bakhamba.+ 23 Nabasathayako, wabanjwa buthongo. Kwavuka isiwuruwuru esikhulu elitsheni, isikepe sathoma ukuzala amanzi, baba sengozini.+ 24 Bakhamba bayomvusa, bathi: “Mfundisi, Mfundisi, siyafa!” Khonokho wavuka wakhalima umoya namagagasi. Isiwuruwuru saphela, kwathula du!+ 25 Yeke wathi kibo: “Kuphi ukukholwa kwenu?” Kodwana bebathukiwe begodu bararekile, bakhuluma babodwa bathi: “Kuhlekuhle ngubani umuntu lo? Ngombana uyala umoya namanzi, kumlalele.”+
26 Bayamela esifundeni samaGerasene,+ esingaphetjheya kweGalile. 27 Njengombana uJesu ahlika ngesikepeni, wahlangana nendoda enedimoni ivela edorobhenelo. Besele kusikhathi eside ingambathi, ingahlali nangendlini kodwana ihlala emathuneni.+ 28 Kuthe nayibona uJesu, yarhuwelela yaguqa phambi kwakhe, yathi ngephimbo elikhulu: “Ungifunani Jesu, Ndodana kaZimu oPhezukoke? Ngibawa ungangitlhorisi.”+ 29 (Ngombana uJesu bekayala ummoya omumbi bona uphume endodeni le. Bewuyibambe amahlandla amanengi,+ ihlala ibotjhwe ngamaketani nangeensimbi begodu ihlala igadiwe kodwana beyiqhusula izinto ebotjhwe ngazo bese idimoni liyisa eendaweni ezinganabantu.) 30 UJesu wayibuza: “Ungubani igama lakho?” Yathi: “NginguLegiyoni”* ngombana beyingenwe madimoni amanengi. 31 Amadimoni lawo bewasolo amncenga ukuthi angawalayeli bona aye emgodini onganamkhawulo.+ 32 Bekunomhlambi omkhulu weemfarigi+ udla lapho entabeni, yeke amncenga bona awavumele angene eemfarigini, wawavumela.+ 33 Amadimoni aphuma endodeni leyo angena eemfarigini, umhlambi weemfarigi wagijimela ngeliweni wawela ngelitsheni wacwila. 34 Abelusi nababona okwenzekileko, babaleka bayokubika lokhu edorobheni neendaweni ezisemakhaya.
35 Abantu baphuma bayokubona okwenzekileko. Baya kuJesu bafumana indoda ekhitjhwe amadimoni yembethe, ibuyelwe mkhumbulo begodu ihlezi noJesu, abantu basaba khulu. 36 Labo abazibonele ngewabo babatjela ukuthi indoda ebeyinedimoni ipholiswe njani. 37 Nje-ke abantu abanengi abavela enarheni yamaGerasene babawa uJesu bona akhambe lapho ngombana bebathukwe khulu. Yeke wakhwela ngesikepeni wakhamba. 38 Indoda ekhutjhwe amadimoni beyisolo imrabhela bona akhambe nayo kodwana azange ayivumele, wathi:+ 39 “Buyela ekhaya, ubatjele ngalokho uZimu akwenzele khona.” Yakhamba, imemezela edorobheni loke ngalokho uJesu ayenzele khona.
40 UJesu nakabuyela esifundeni seGalile, isiqubuthu samamukela ngomusa ngombana soke besimlindele.+ 41 Kweza indoda ebizwa ngokuthi nguJayirosi; beyimphathi wesinagogo. Yaguqa eenyaweni zakaJesu yamncenga bona eze emzinakhe,+ 42 ngombana indodakazakhe okukuphela kwayo, ebeyineminyaka engaba li-12, beyigulela ukufa.
Njengombana uJesu aya khona, isiqubuthu besiminyezelana kuye. 43 Khonapho bekunomfazi obesekuminyaka eli-12 aphethwe bulwele bokuphopha iingazi,+ bekunganamuntu okghona ukumlapha.+ 44 Weza ngemva kwakaJesu wakghwatha umphetho wesambatho sakhe sangaphandle,+ khonokho ukuphopha kwakhe iingazi kwaphela. 45 Ngalokho uJesu wathi: “Ngubani ongikghwathileko?” Boke nabaphikako, uPitrosi wathi: “Mfundisi, isiqubuthu sikubungelele.”+ 46 UJesu wathi: “Kunomuntu ongikghwathileko ngombana ngiyazi ukuthi amandla+ aphumile kimi.” 47 Abona ukuthi angeze akwazi ukuzifihla, umfazi lo watjhidela ahlengezela waguqa phambi kwakaJesu wavuma phambi kwabo boke abantu ukuthi kubayini amkghwathile nokuthi uphole njani khonokho. 48 Kodwana wathi kuye: “Ndodakazi, ukukholwa kwakho kukupholisile. Khamba ngokuthula.”+
49 Kuthe asakhuluma, isithunywa esivela endlini yomphathi ongamele isinagogo safika sathi kuJayirosi: “Indodakazakho seyihlongakele; ungasamtshwenya uMfundisi.”+ 50 Nakezwa lokho, uJesu wathi: “Ungasabi, kholwa kwaphela, indodakazakho izokusindiswa.”+ 51 Nakafika endlini leyo, akhenge avumele muntu bona angene naye ngaphakathi ngaphandle kwakaPitrosi, uJwanisi, uJakopo nababelethi bomntazana loyo. 52 Kodwana boke abantu bebalila begodu bazibetha ngebanga lesizi. Ngalokho wathi: “Lisani ukulila+ ngombana akakahlongakali kodwana ulele.”+ 53 Nabezwa lokho bamhleka ubudlhadlha ngombana bebazi ukuthi uhlongakele. 54 Wambamba ngesandla wathi kuye: “Mntwana, vuka!”+ 55 Amandlakhe wokuphila+ abuya, wavuka khonokho,+ uJesu wathi bamnikele ukudla adle. 56 Ababelethi bakhe bathaba khulu kodwana wabayala bonyana bangatjeli muntu ngokwenzekileko.+
9 Ngemva kwalokho uJesu wabiza abaliTjhumi namBili, wabanikela amandla wokulapha amalwele+ namandla wokukhupha woke amadimoni.+ 2 Wabathuma bona bayokutjhumayela ngomBuso kaZimu nokuthi balaphe abagulako, 3 wathi kibo: “Ningaphathi litho ekhambweni lenu, ningaphathi idondolo, isikhwama sokudla, uburotho, nemali;* ngitjho nezinye izambatho.*+ 4 Kodwana kinanyana ngimuphi umuzi eningena kiwo, hlalani lapho bekufike isikhathi sokukhamba.+ 5 Nanyana kukuphi lapho abantu banganamukeli khona naniphuma edorobhenelo, thintithani ithuli eliseenyaweni zenu bona kube bufakazi kibo.”+ 6 Nje-ke bakhamba isabelo nesabelo, batjhumayela iindaba ezimnandi, balapha nabagulako yoke indawo.+
7 UHerode* umbusi* wesifunda wezwa ngakho koke ebekwenzeka, warareka khulu ngombana abanye bebathi uJwanisi uvusiwe kwabafileko+ 8 kodwana abanye bebathi kubonakale u-Eliya, godu abanye bathi kuvuke omunye wabaphorofidi bekadeni.+ 9 UHerode wathi: “UJwanisi ngamqunta ihloko.+ Alo-ke, ngubani lo engizwa bakhuluma ngaye?” Ngalokho walinga ukumbona.+
10 Abapostoli nababuyako, babikela uJesu koke abakwenzileko.+ Yeke wabathatha watjhinga nabo ngerhorhomejeni baya edorobheni elibizwa ngokuthi yiBhethesayida.+ 11 Kodwana isiqubuthu sithe singezwa ngalokho, samlandela. Wasamukela ngomusa bewathoma ukukhuluma naso ngomBuso kaZimu, wapholisa nabagulako.+ 12 Nje-ke ilanga beselizokutjhinga. AbaliTjhumi namBili beza kuye bathi: “Tjela abantwaba bakhambe, bona baye ezabelweni neendaweni zemaphandleni bazifumanele indawo yokulala nokudla, ngombana lapha sikude khulu nemizi.”+ 13 Kodwana wathi kibo: “Bapheni nina ukudla.”+ Bona bathi: “Sinoburotho obuhlanu neenhlambi ezimbili kwaphela, ngaphandle-ke kokuthi sikhambe siyobathengela boke ukudla.” 14 Kuhlekuhle, lapho bekunamadoda angaba zii-5 000. Kodwana uJesu wathi ebafundini bakhe: “Bahlaliseni phasi kube nabantu abama-50 esiqhemeni sinye.” 15 Benza njalo babahlalisa phasi boke. 16 Wathatha uburotho obuhlanu neenhlambi ezimbili, waqala ezulwini wathokoza uZimu. Ngemva kwalokho wabuhlephula, wabunikela abafundi ukuthi babunikele isiqubuthu. 17 Boke badla basutha, bebabuthelela neensalela zazala abomantji abali-12.+
18 Ngokukhamba kwesikhathi, uJesu wathi nakasathandaza ayedwa, abafundi beza kuye, wababuza wathi: “Isiqubuthu sithi ngingubani?”+ 19 Bamphendula bathi: “Sithi unguJwanisi uMbhabhadisi kodwana abanye bathi ungu-Eliya godu abanye bathi omunye wabaphorofidi bekadeni uvukile.”+ 20 Yeke wathi: “Alo-ke, nina nithi ngingubani?” UPitrosi wathi: “UnguKrestu kaZimu.”+ 21 Ngemva kwalokho wabatjela indlebe ukuzwa bona bangatjeli muntu ngalokhu,+ 22 wathi: “INdodana yomuntu kufuze iqalane namatshwenyeko amanengi begodu ininwe badala, baphristi abakhulu nabatloli beyibulawe+ bese ivuswe ngelanga lesithathu.”+
23 Waraga wathi kibo boke: “Nanyana ngubani ofuna ukungilandela, akazidele+ athathe isigodo sakhe sokuhlunguphazwa* angilandele qobe.+ 24 Ngombana nanyana ngubani ofuna ukusindisa ukuphila kwakhe kuzomlahlekela kodwana nanyana ngubani olahlekelwa kuphila kwakhe ngebanga lami nguye ozokusindisa.+ 25 Kuzomsiza ngani umuntu ukuzuza iphasi loke kodwana alahlekelwe kuphila kwakhe namkha konakale?+ 26 Nanyana ngubani oneenhloni ngami nangamezwami, iNdodana yomuntu izokuba neenhloni ngaye lokha nayiza ngephazimulwayo neyakaYise neyeengilozi ezicwengileko.+ 27 Kodwana nginitjela iqiniso, kunabanye abajame lapha abangekhe bafe bangakawuboni umBuso kaZimu.”+
28 Ngemva kwamalanga apheze abe bunane akhulume amezwi la, uJesu wathatha uPitrosi, uJwanisi noJakopo bakhuphuka intaba wayokuthandaza.+ 29 Kuthe nakasathandaza, ubuso bakhe batjhuguluka nezambatho zakhe zaba mhlophe zamanyazela. 30 Godu kwabonakala amadoda amabili akhuluma naye; bekunguMosi no-Eliya. 31 Bebaphazimula begodu bathoma ukukhuluma ngokukhamba kwakhe, ebesekuzokwenzeka eJerusalema.+ 32 UPitrosi nalabo egade banaye bebayenda, kodwana nabaphaphamako, babona iphazimulo kaJesu+ namadoda amabili ajame naye. 33 Kodwana njengombana amadoda amabili la besekazokusuka kuye, uPitrosi wathi kuJesu: “Mfundisi, kuhle ngathi ukuba lapha. Nje-ke sivumela sihlome amatende amathathu, elinye kube ngelakho, elinye kube ngelakaMosi bese elinye kube ngelaka-Eliya.” Kodwana bekangazizwa bona uthini. 34 Nakasatjho njalo, kwavela ilifu labagubuzesa. Ilifelo nalibagubuzesako, bathukwa khulu. 35 Ngemva kwalokho kwazwakala ilizwi+ livela elifinelo, lithi: “Le yiNdodanami ekhethiweko,+ yilaleleni.”+ 36 Ilizwi nalisaragako, uJesu wabonakala sekayedwa. Kodwana bebasolo bathulile begodu azange babikele muntu emihleni leyo ngalokho abakubonileko.+
37 Ngakusasa kwakhona nabehla entabeni, bahlangana nesiqubuthu esikhulu.+ 38 Khonapho esiqubuthwini kwarhuwelela indoda, ithi: “Mfundisi, ngiyakurabhela khewuzokuqala indodanami, ngombana kuphela komntwana enginaye.+ 39 Qobe idimoni nalimbambako, uyarhuwelela, isithunthwani simphosele phasi abhubhudlhe amagwebu bese limlisa kwaphela naselimlimazile. 40 Ngirabhele abafundi bakho bona balikhuphe kodwana babhalelwe.” 41 UJesu waphendula wathi: “Maye! Sizukulwana esingakholwako nesikhohlakeleko,+ kuzabe kube kunini nginani begodu nginibekezelela? Lethapha indodanakho.”+ 42 Kodwana ngitjho nalokha uJesu nakatjhidelako, idimoni layidula phasi, yaphathwa sithunthwani esimbi khulu. Yeke, uJesu wawukhalima ummoya omumbi loyo, walapha umsana wamnikela uyise. 43 Boke barareka khulu ngobukhulu bamandla kaZimu.
Basararwe ngizo zoke izinto azenzako, uJesu wathi ebafundini bakhe: 44 “Lalelisisani kuhle begodu nikhumbule amezwi la ngombana iNdodana yomuntu izokukghatjhelwa ezandleni zabantu.”+ 45 Kodwana akhenge bakuzwisise lokho akutjhoko. Eqinisweni, bekufihliwe kibo ukwenzela bona bangazwisisi, kanti bebasaba nokumbuza ngakho.
46 Ngemva kwalokho bathoma ukuphikisana bodwa ngokuthi ngubani omkhulu ukubadlula boke.+ 47 UJesu alemuka ukuthi bacabangani ngeenhliziyweni zabo, wathatha umntwana, wamjamisa hlanu kwakhe, 48 wathi kibo: “Nanyana ngubani owamukela umntwana lo ngebanga legama lami, uyangamukela nami begodu nanyana ngubani ongamukelako wamukela nongithumileko.+ Ngombana oziphatha njengomncani phakathi kwenu nguye omkhulu.”+
49 UJwanisi waphendula wathi: “Mfundisi, sibone umuntu aqotha amadimoni ngegama lakho, silinge ukumvimba ngombana akakulandeli kunye nathi.”+ 50 Kodwana uJesu wathi kuye: “Ningalingi ukumvimba ngombana nanyana ngubani ongaphikisani nani ungakini.”
51 Njengombana amalanga wokobana akhutjhulelwe ezulwini besekatjhidele,*+ wazimisela ukuya eJerusalema. 52 Ngalokho wathuma iinthunywa bona zimkhambele phambili. Zakhamba zangena esabelweni seSamariya bona ziyomlungiselela. 53 Kodwana akhenge bamamukele+ ngombana bekazimisele ukuya eJerusalema. 54 Abafundi uJakopo noJwanisi+ nababona lokhu, bathi: “Kosi, ungathanda sibize umlilo bona wehle usuka ezulwini ubarhayile?”+ 55 Kodwana wajika wabakhalima. 56 Nje-ke batjhinga kwesinye isabelo.
57 Kuthe basakhamba endleleni, omunye umuntu wathi kuye: “Ngizokulandela nanyana kukuphi lapho uya khona.” 58 UJesu wathi kuye: “Iimpungutjha zinemigodi neenyoni zineendleke kodwana iNdodana yomuntu ayinayo ngitjho nendawo yokufihla ihloko.”+ 59 Ngemva kwalokho wathi komunye: “Ngilandela.” Indoda leyo yathi: “Kosi, ngivumela ngiyokubulunga ubaba qangi.”+ 60 Kodwana wathi kiyo: “Lisa abahlongakeleko+ babulungane babodwa, wena ukhambe uyokutjhumayela ngomBuso kaZimu kiyo yoke indawo.”+ 61 Godu enye yathi: “Ngizokulandela Kosi kodwana ngivumela ngiyokulayelisa ngekhaya ntangi.” 62 UJesu wathi kiyo: “Umuntu othi sekabeke isandla sakhe eplurhwini bese arhedlule izinto ezingemuva+ akafaneleki emBusweni kaZimu.”+
10 Ngemva kwalokho, iKosi yakhetha abanye abama-70* yabathuma ngababili+ bona bayikhambele phambili, baye emadorobheni neendaweni yona ngokwayo ebeyisazokuya kizo. 2 Yathi kibo: “Kwamambala isivuno sikhulu kodwana iinsebenzi zimbalwa. Ngalokho-ke, bawani iKosi yesivuno bona ithumele iinsebenzi esivunweni sayo.+ 3 Khambani-ke! Tjhejani! Nginithuma njengezimvu hlangana neempisi.+ 4 Ningaphathi isipatjhi nesikhwama sokudla namkha amapatlagwana,+ ningalotjhisi muntu* endleleni. 5 Naningena ngendlini, thomani ngokuthi: ‘Kwanga indlu le ingaba nokuthula.’+ 6 Nangabe umngani wokuthula ukhona lapho, ukuthula kwenu kuzokuba kuye. Kodwana nangabe akekho, kuzokubuyela kini. 7 Hlalani ngendlini leyo,+ nidle benisele lokho abanipha khona+ ngombana isisebenzi sifanelwe mrholwaso.+ Ningasolo nigega indlu ngendlu.
8 “Godu, naningena edorobheni elithileko banamukele, yidlani lokho abanipha khona 9 nilaphe abagulako kilo benibatjele ukuthi: ‘UmBuso kaZimu sewutjhidele kini.’+ 10 Kodwana naningena edorobheni banganamukeli, phumani niye eendleleni zalo ezikulu nithi: 11 ‘Sisula ngitjho nethuli ledorobho lenu eenyaweni zethu+ bona kube bufakazi ngokujamelene nani. Nanyana kunjalo, nakhu ekufuze nikwazi, umBuso kaZimu utjhidele.’ 12 Ngiyanitjela ukuthi ngeLanga lesaHlulelo kuzokuba ngcono ngeSodoma kunedorobhenelo.+
13 “Maye! Kuwe Khorazini. Maye! Kuwe Bhethesayida. Ngathana imisebenzi yamandla eyenziwe kini yenziwa eTirosi neSidoni, ngakade abantu bakhona batjhuguluka, bambatha imigodla, bahlala emlotheni.+ 14 Yeke, kuzokuba ngcono ngeTirosi nangeSidoni ngesikhathi sesahlulelo kunani. 15 Wena-ke Kapernawumi, kghani uzokukhutjhulelwa ezulwini? Phasi eThuneni* kula uya khona!
16 “Loyo onilalelako uyangilalela nami.+ Naloyo onininako unina mina. Ngaphezu kwalokho, loyo ongininako unina naloyo ongithumileko.”+
17 Yeke abama-70* babuya bathabile, bathi: “Kosi, ngitjho namadimoni ayasilalela ngokusebenzisa igama lakho.”+ 18 Wathi kibo: “Ngibona uSathana sekawile+ njengombani ovela ezulwini. 19 Qalani! Ngininikele amandla wokugadanga iinyoka nabofezela newokuhlula woke amandla wesitha,+ akunalitho elizonilimaza. 20 Kodwana ningathatjiswa kukuthi imimoya iyanilalela, kunalokho thabani ngombana amagamenu atloliwe ezulwini.”+ 21 Ngesikhatheso ummoya ocwengileko wamthabisa khulu wathi: “Ngikudumisa tjhatjhalazi Baba, Kosi yezulu nephasi ngombana izintwezi uzifihle ngobuthakgha kwabahlakaniphileko nakibongqondongqondo,+ wazembulela abantwana abancani. Kunjalo Baba ngombana lokhu bekuvumelana nentandwakho.+ 22 UBaba unginikele zoke izinto begodu akekho owaziko ukuthi iNdodana ingubani ngaphandle kwakaBaba, akekho nowazi uBaba ngaphandle kweNdodana+ nalabo iNdodana efuna ukubambulela yena.”+
23 Ngemva kwalokho wakhuluma nabafundi bakhe sebabodwa wathi: “Ayathaba amehlo abona izinto enizibonakwezi.+ 24 Ngombana ngithi kini, abaphorofidi abanengi namakhosi bebafisa ukubona izinto enizibonako kodwana akhenge bazibone+ nokuzwa izinto enizizwako kodwana azange bazizwe.”
25 Yeke kwasikima indoda esisazi somThetho inqophe ukumlinga yathi: “Mfundisi, kufuze ngenzeni bona ngizuze ilifa lokuphila okungapheliko?”+ 26 Wathi kiyo: “Kutlolweni emThethweni? Ufunda njani?” 27 Yathi: “‘Kufuze uthande uJehova* uZimakho ngehliziywakho yoke nangomphefumulwakho* woke nangamandlakho woke nangomkhumbulwakho woke,’+ uthande ‘nomakhelwanakho njengombana uzithanda wena.’”+ 28 Wathi kiyo: “Uphendule kuhle; ragela phambili wenza lokho uzokufumana ukuphila.”+
29 Kodwana njengombana beyifuna ukuzibeka ebuhleni,+ indoda le yathi kuJesu: “Kuhlekuhle ngubani umakhelwanami?” 30 UJesu wayiphendula wathi: “Umuntu othileko bekehla asuka eJerusalema aya eJerikho, wahlangana nabadlelezeli, bamhlubulisa, bambetha, bamtjhiya lapho bacabanga ukuthi ufile. 31 Yeke kwenzeka bona kube nomphristi owehla ngayo indlela leyo kodwana wathi nakabona umuntu loyo, wamgegeda wakhamba ngelinye ihlangothi. 32 UmLevi naye nakafika lapho wambona, wamgegeda wakhamba ngelinye ihlangothi. 33 Kodwana umSamariya othileko+ obekakhamba endleleni leyo wafika kuye nakambonako, wamrhawukela. 34 Waya kuye wambopha amanceba, wawazesa ngamafutha newayini. Wamkhweza kudumbanakhe wamusa ngendlini yeenkhambi bona bamtlhogomele. 35 Ngakusasa kwakhona, wathatha abodenariyu* ababili wabanikela umnikazi wendlu yeenkhambi, wathi: ‘Ngibawa umtlhogomele, kuthi nanyana yini ozoyisebenzisa ngaphezu kwalokhu, ngizokubhadela nangibuyako.’ 36 Ucabanga ukuthi ngimuphi kilaba abathathu ozenze umakhelwana+ womuntu osahlelwe badlelezeli?” 37 Yathi: “Ngiloyo omenzele umusa.”+ UJesu wathi kiyo: “Nawe-ke khamba uyokwenza okufanako.”+
38 Njengombana bakhamba, wangena esabelweni esithileko. Lapho wamukelwa mfazi okuthiwa nguMarta+ bona abe sivakatjhi ngendlinakhe. 39 UMarta bekanodadwabo uMariya, yena owahlala eenyaweni zeKosi wasolo alalele lokho ekutjhoko. 40 NakunguMarta yena bekathikaziswa kukuba majadu ngezinto ezinengi. Nje-ke waya kuJesu wathi: “Kosi, akukutshwenyi na ukuthi udadwethu ungisukele ngedwa nezinto ezingaka ekufuze ngizenze? Ngibawa umtjele azongisiza.” 41 IKosi yaphendula yathi: “Marta, Marta, utshwenyeka begodu uthikaziswa zizinto ezinengi. 42 Kutlhogeka izinto ezimbalwa namkha yinye tere. UMariya ukhethe ingcenye ezidlula zoke*+ begodu angekhe athathelwe yona.”
11 Kwathi uJesu asendaweni ethileko athandaza, nakaqedako, omunye wabafundi bakhe wathi kuye: “Kosi, sifundisa ukuthandaza njengombana noJwanisi afundise abafundi bakhe.”
2 Wathi kibo: “Nanithandazako, nithi: ‘Baba, igama lakho alicwengiswe.*+ UmBuswakho awuze.+ 3 Usiphe uburotho bethu qobe langa ngokwalokho esikutlhoga ngemihla.+ 4 Usilibalele izono zethu+ njengombana nathi sibalibalela abasoneleko;*+ ungasingenisi esilingweni.’”+
5 Wathi kibo: “Akhesithi omunye wenu unomngani bese uya kuye phakathi kobusuku athi, ‘Mngani, yewungiboleke uburotho obuthathu 6 ngombana ngifikelwe ngomunye umnganami ovela kude, abe anginalitho engingamupha lona.’ 7 Kodwana loyo ongendlini wathi: ‘Lisa ukungitshwenya. Umnyango sewukhiyiwe begodu mina nabantwabami silele. Angeze ngivuke ngikunikele litho.’ 8 Ngiyanitjela, ngitjho nanyana bekangekhe avuke amnikele okuthileko ngombana amnganakhe ngebanga lokuthi akhenge alise,+ uzokuvuka amnikele nanyana yini ayitlhogako. 9 Yeke ngithi kini, ragelani phambili nibawa,+ nizakuphiwa; ragelani phambili nifuna, nizakufumana; ragelani phambili nikokoda, nizakuvulelwa.+ 10 Ngombana woke umuntu obawako uyaphiwa,+ woke umuntu ofunako uyafumana nawo woke umuntu okokodako, uzokuvulelwa. 11 Ngimuphi ubaba kini, ongathi indodanakhe imbawa ihlambi, ayinikele inyoka esikhundleni sehlambi?+ 12 Namkha nayibawa iqanda, ayinikele ufezela? 13 Ngalokho, nangabe nina, ngitjho nanyana nibambi, nikwazi ukupha abantwabenu izipho ezihle, uBaba osezulwini uzobanikela kangangani-ke ummoya ocwengileko labo abambawako!”+
14 Ngemva kwalokho waqotha idimoni egade lenza umuntu abe simumu.+ Kuthe nasele liphumile, umuntu loyo wakghona ukukhuluma, isiqubuthu sarareka.+ 15 Kodwana abanye babo bathi: “Uqotha amadimoni ngoBhelzabhulu,* umbusi wamadimoni.”+ 16 Abanye banqophe ukumlinga, bafuna ngekani bona abenzele isibonakaliso+ esivela ezulwini. 17 Alemuka ukuthi bacabangani,+ wathi kibo: “Woke umbuso ohlukene phakathi uyatjhabalala nomuzi ohlukene phakathi uyawa. 18 Nje-ke, nangabe noSathana uhlukene phakathi, umbuswakhe uzakujama njani? Ngombana nithi ngiqotha amadimoni ngoBhelzabhulu. 19 Nangabe ngiqotha amadimoni ngoBhelzabhulu, amadodanenu awaqotha ngobani? Kungebangelo azokuba bahluleli benu. 20 Kodwana nangabe ngiqotha amadimoni ngomuno kaZimu,+ umBuso kaZimu sewufikile kini.+ 21 Lokha indoda enamandla, ehlome ngokupheleleko igade indlwayo, ipahlayo iyavikeleka. 22 Kodwana nakufika onamandla kunayo ayihlule, uthatha zoke iinkhali zayo ebeyizithembileko bese uhlukanisa izinto ayithathele zona. 23 Nanyana ngubani ongasisehlangothini lami, ulwa nami begodu nanyana ngubani ongabutheleli nami, uyarhatjha.+
24 “Ummoya omumbi nawuphuma emuntwini udlula eendaweni ezinganamanzi ufuna indawo yokuphumula kodwana nawungayifumaniko uthi, ‘Ngizokubuyela emzinami lapha ngisuka khona.’+ 25 Nawufikako, ufumana indlu leyo ithanyeliwe begodu ikghatjisiwe. 26 Bese uyakhamba uyokuthatha eminye imimoya elikhomba emimbi khulu kunawo, ingene ngaphakathi ihlale. Ubujamo bamaswaphela bomuntu loyo buba bumbi khulu kunebokuthoma.”
27 Asakhuluma lokhu, umfazi othileko esiqubuthwini warhuwelela wathi: “Siyathaba isibeletho esakuthwalako namabele akumunyisako!”+ 28 Kodwana wathi: “Abathabako ngilabo abezwa ilizwi lakaZimu balenze!”+
29 Kuthe isiqubuthu nasibuthelana ndawonye, wathi: “Isizukulwanesi, sizukulwana esimbi; sifuna isibonakaliso kodwana akunasibonakaliso esizokunikelwa sona ngaphandle kwesibonakaliso sakaJona.+ 30 Njengombana uJona+ aba sibonakaliso ebantwini beNiniva, neNdodana yomuntu izokuba ngiso esizukulwanenesi. 31 Indlovukazi yesewula+ izokuvuswa nabantu besizukulwanesi ngesikhathi sesahlulelo begodu ibabone bamlandu ngombana yona yeza isuka emaphethelweni wephasi izokuzwa ukuhlakanipha kwakaSolomoni. Kodwana ngithi kini, omkhulu ukudlula uSolomoni sekakhona.+ 32 Abantu beNiniva bazokuvuka nesizukulwanesi ngesikhathi sesahlulelo begodu basibone simlandu ngombana bona batjhuguluka uJona nakatjhumayela kibo.+ Kodwana ngithi kini, omkhulu ukudlula uJona sekakhona. 33 Umuntu nakakhanyisa isibani akasibeki endaweni esithekileko namkha ngaphasi kwesitja kodwana usibeka endaweni ephakemeko+ ukwenzela bona abangenako babone ukukhanya. 34 Ilihlo lakho sibani somzimba. Nangabe ilihlo lakho lidzimelele entweni yinye, umzimbakho woke uyakhanya kodwana nangabe linomona,* umzimbakho umnyama.+ 35 Yeke tjheja bona ukukhanya okukuwe akusibumnyama. 36 Nangabe umzimbakho woke uyakhanya abukho nobumnyama nobuncani kiwo, uzokukhanya njengesibani esikukhanyiselako.”
37 Nakaqeda ukutjho lokhu, umFarisi othileko wammema bona azokudla naye. Yeke wangena wahlala etafuleni. 38 UmFarisi warareka nakabona uJesu angahlambi* izandla ngaphambi kobana adle.+ 39 Kodwana iKosi yathi kuye: “Nina baFarisi, nihlanza ingaphandle lekapho nesitja kodwana ngaphakathi nizele ukuba marhamaru nobumbi.+ 40 Ndlhadlha ndina! Loyo owenza ingaphandle wenza nengaphakathi, kghani akusinjalo? 41 Yiphani abatlhagako ngokusuka ehliziyweni,* nanenza njalo zoke izinto zizokuhlwengeka kini. 42 Maye! Kini baFarisi ngombana ninikela kwetjhumi kweminti neruwe neminye imirorho+ kodwana nidelela ubulungiswa nethando lakaZimu. Bekutlhogeka ninikele kwetjhumi kodwana lokho akutjho ukuthi kufuze ningabi nandaba nezinye izinto.+ 43 Maye! Kini baFarisi ngombana nithanda iinhlalo eziphambili emasinagogeni nokulotjhiswa eendaweni zokuthengisela.+ 44 Maye! Kini ngombana nifana namathuna* angabonakali* kuhle,+ abantu abakhamba phezu kwawo kodwana bangazi.”
45 Omunye wezazi zomThetho wathi kuye: “Mfundisi, ngokutjho kwakho lokhu, uthuka nathi.” 46 Wathi: “Maye! Nakini zazi zomThetho ngombana nidisibeza abantu ngemithwalo ebudisi ukuyithwala kodwana nina aniyithinti nangomunwenu.+
47 “Maye! Kini ngombana nakha amathuna wabaphorofidi kodwana abokhokho benu bababulala.+ 48 Nifakazela izenzo zabokhokho benu, nivumelana nabo ngombana babulala abaphorofidi+ kodwana nina nibakhela amathuna. 49 Kungebangelo ukuhlakanipha kwakaZimu kuthi: ‘Ngizokuthumela abaphorofidi nabapostoli kibo, bazobabulala bebahlunguphaze nabanye babo, 50 khona iingazi zabo boke abaphorofidi ezaphalaka kusukela ekuthomeni kwephasi zizokubizwa* esizukulwanenesi,+ 51 kusukela eengazini zaka-Abela+ kufikela eengazini zakaZakariya, owabulawa hlangana kwe-aldara nethempeli.’+ Ngiyanitjela zizokubizwa* esizukulwanenesi.
52 “Maye! Kini zazi zomThetho ngombana nisuse isilodlhelo somnyango welwazi. Nina ngokwenu akhenge ningene, nivimbela nalabo abalinga ukungena.”+
53 Nakasuka lapho, abatloli nabaFarisi bathoma ukumgandelela khulu nokumphosa ngemibuzo eminengi, 54 balindele ukumbamba kilokho angakutjho.+
12 Ngesikhatheso, bekubuthene iinkulungwana ezinengi zabantu kangangobana bebagadangana, uJesu wathoma ngokuthi ebafundini bakhe: “Tjhejani isibiliso sabaFarisi, sokuzenzisa.+ 2 Kodwana akukho okufihlwe ngobuthakgha okungekhe kwambulwe, akukho nokuyifihlo okungekhe kwaziwe.+ 3 Ngalokho, nanyana yini eniyikhuluma ebumnyameni izokuzwakala ekukhanyeni neniyihleba ngeenkumbeni ezisithekileko izokutjhunyayelwa phezu kwezindlu. 4 Ukungezelela kilokho, ngithi kini bangani bami,+ ningabasabi labo abanganibulala bese kuthi ngemva kwalokho bangakghoni ukwenza litho elinye.+ 5 Kodwana ngizonitjengisa bona ngubani ekufuze nimsabe: Sabani loyo onamandla wokuthi ngemva kokubulala aphosele eGehena.*+ Ngithi kini, sabani loyo.+ 6 Abotunwana* abahlanu abathengiswa na ngeempaparwana ezimbili zenani eliphasi?* Nanyana kunjalo uZimu akakhohlwa namunye wabo.+ 7 Kodwana ngitjho neenhluthu eziseenhloko zenu zibaliwe zoke.+ Ningasabi; nina niqakatheke khulu ukudlula abotunwana abanengi.+
8 “Ngithi kini, nanyana ngubani ongivumako phambi kwabantu+ neNdodana yomuntu izomvuma phambi kweengilozi zakaZimu.+ 9 Kodwana nanyana ngubani ongiphikako phambi kwabantu naye uzokuphikwa phambi kweengilozi zakaZimu.+ 10 Nanyana ngubani okhuluma kumbi ngeNdodana yomuntu, uzokulitjalelwa kodwana nanyana ngubani ohlambalaza ummoya ocwengileko angekhe alitjalelwe.+ 11 Nabanisa emihlanganweni yomphakathi,* eenkhulwini zombuso, nakwabaphetheko, ningatshwenyeki ngokuthi nizokuphendula njani namkha nizokuthini+ 12 ngombana ummoya ocwengileko uzonifundisa ngesikhatheso izinto ekufuze nizitjho.”+
13 Ngemva kwalokho umuntu othileko esiqubuthwini wathi kuye: “Mfundisi, tjela umfowethu ahlukaniselane nami ilifa.” 14 Wathi kuye: “Mntwabantu, ngubani ongibeke bona ngibe ngumahluleli namkha umlamuli hlangana nani nobabili?” 15 Wathi kibo: “Hlalani nivule amehlo, nitjheje yoke imihlobo yokuba marhamaru+ ngombana ngitjho nanyana umuntu anokunengi, ukuphila kwakhe akuveli ezintweni anazo.”+ 16 Kusesenjalo wabenzela umfanekiso, wathi: “Isimu yenjinga ethileko yathela kuhle. 17 Yacabangisisa iyodwa yathi, ‘Ngenzeni njengombana ngingasanandawo yokubuthelela isivuno sami?’ 18 Yeke yathi, ‘Nakhu engizokwenza:+ Ngizokugiriza iinlulu zami ngakhe ezikulu, lapho ngizokubuthelela khona zoke iinthoro zami nepahlami yoke, 19 ngizozitjela ngithi: “Mphefumulwami unezinto ezinengi ozibekele zona iminyaka eminengi; zigedle, udle, usele, uzithabise.”’ 20 Kodwana uZimu wathi kuye, ‘Sidlhadlha ndina! Ebusukwinobu uzokuhlongakala. Ngubani-ke, ozokufumana izinto ozibekele zona?’+ 21 Kunjalo-ke ngomuntu ozibekele umnotho kodwana angakanothi kuZimu.”+
22 Ngalokho wathi ebafundini bakhe: “Ngikho ngithi kini, lisani ukutshwenyeka ngokuphila kwenu malungana nokuthi nizokudlani namkha ngemizimbenu ukuthi nizokumbathani.+ 23 Ngombana ukuphila kuqakatheke khulu kunokudla nomzimba ukudlula izambatho. 24 Cabangani ngamagubulu: Awatjali begodu awavuni; awanaso isilulu; nanyana kunjalo uZimu uyawondla.+ Nina anikaqakatheki khulu na ukudlula iinyoni?+ 25 Ngubani kini ongathi ngokutshwenyeka angezelele kancani* ubude bokuphila kwakhe? 26 Yeke, nangabe nibhalelwa kukwenza into encani kangaka, kubayini-ke nitshwenyeka ngezinto eziseleko?+ 27 Cabangani ngendlela amathuthumbo akhula ngayo: Awasebenzi budisi namkha awaphothi kodwana ngiyanitjela bona ngitjho noSolomoni ebukhazikhazini bakhe bekangambathi njengamanye wamathuthumbo la.+ 28 Nje-ke nangabe uZimu uzembathisa njalo iintjalo zommango ezikhona namhlanjesi, kusasa ziphoselwe emlilweni, uzonembathisa kangangani-ke nina, eninokukholwa okuncani? 29 Ngalokho lisani ukutshwenyeka ngokuthi nizokudlani nokuthi nizokuselani, lisani nokutshwenyeka ngezinto eningaqiniseki ngazo;+ 30 ngombana koke lokhu zizinto abantu beentjhaba abazigijimisako kodwana uYihlo uyazi bona niyazitlhoga izintwezi.+ 31 Kunalokho, ragelani phambili nifuna umBuswakhe, yeke koke lokhu nizakuphiwa khona.+
32 “Ningasabi nina mhlambi omncani+ ngombana uYihlo uninikele umBuso.+ 33 Thengisani ipahlenu niphe abatlhagako.+ Zenzeleni iinkhwama zemali ezingekhe zonakale, umnotho ongapheliko ezulwini,+ lapho kungekhe kutjhidele khona isela neengogwana zidle khona. 34 Ngombana lapho umnothwenu ukhona, kulapho neenhliziyo zenu zizokuba khona.
35 “Mbathani, nizilungiselele+ begodu nikhanyise iimbani zenu,+ 36 nibe njengabantu abalindele ikosabo ukuthi ibuye+ emtjhadweni,+ ukuze kuthi nayifikako, ikokoda, bayivulele umnyango msinyazana. 37 Ziyathaba iinsebenzi okuzokuthi ikosi nayibuyako izifumane ziphapheme! Ngiqinisile ngithi kini, izokwembatha izambatho zokusebenza, izihlalise etafuleni bese iyazitlhogomela. 38 Zizakuthaba iinsebenzi okuthi ikosazo nayingafika ngomlindo wesibili* namkha wesithathu,* izifumane zilindile! 39 Kodwana yazini lokhu, ngathana umninimuzi bekazi bona isela lizokufika ngasiphi isikhathi, bekangekhe avumele umuzakhe ugqekezwe.+ 40 Nani-ke, hlalani nilindile ngombana iNdodana yomuntu izokufika ngesikhathi eningasicabangiko.”+
41 Ngalokho uPitrosi wathi: “Kosi, umfanekiso lo uwutjela thina kwaphela namkha woke umuntu?” 42 IKosi yathi: “Kuhlekuhle ngubani inceku ethembekileko, ehlakaniphileko, ikosayo eyibeke phezu kweensebenzi zayo bona ihlale izinikela ukudla okwaneleko ngesikhathi esifaneleko?+ 43 Iyathaba inceku leyo okuzokuthi ikosayo nayifikako iyifumane yenza njalo! 44 Nangambala ngiyanitjela, izoyibeka phezu kwakho koke okungokwayo. 45 Kodwana inceku leyo nakungenzeka ithi ehliziywenayo, ‘Ikosami iyariyada ukufika’ bese ithoma ukubetha iinsebenzi ezimadoda nezibafazi, idle, isele beyidakwe,+ 46 ikosi yenceku leyo izokufika ngelanga engakalilindeli ngalo nangesikhathi engasaziko, izoyijezisa kabuhlungu khulu, iyilahlele ebantwini abangakathembeki. 47 Ngalokho inceku ebeyazi kuhle ukuthi ikosayo ifuna yenzeni kodwana akhenge ihlale ilindile namkha yenze lokho etjelwe khona* izokurithwa kanengi.+ 48 Kodwana leyo ebeyingazi, yenza izinto ezenza ifanelwe kubethwa, izokurithwa kancani. Eqinisweni, woke umuntu onikelwe okunengi, kuzokufunwa okunengi kuye, naloyo ebekaphathiswe okunengi kuzokufunwa okungaphezu kokujayelekileko kuye.+
49 “Ngizele ukubasa umlilo ephasini kodwana nangabe sewubasiwe ngisafunani okhunye? 50 Eqinisweni, kunebhabhadiso ekufuze ngibhajadiswe ngalo, maye! Ngitshwenyeke kangangani bekube kulapho lidlula.+ 51 Nicabanga ukuthi ngizele ukuletha ukuthula ephasini? Awa, ngithi kini, ngilethe ukuhlukana.+ 52 Ngombana kusukela nje kuzokuba nabahlanu abahlukene phakathi emzini owodwa, abathathu baphikisane nababili, nababili baphikisane nabathathu. 53 Bazokuhlukana phakathi, ubaba aphikisane nendodana, indodana iphikisane noyise, umma aphikisane nendodakazi, indodakazi iphikisane nonina, unosokana aphikisane nomakoti, umakoti aphikisane nonosokana.”+
54 Godu wathi esiqubuthwini: “Nanibona ilifu likhuphuka ngetjingalanga, nithi, ‘Kuza isiwuruwuru,’ bese kuyenzeka. 55 Nanibona kuvunguza umoya wesewula, nithi, ‘Kuzokutjhisa khulu’ bese kuyenzeka. 56 Bazenzisi, niyakwazi ukubona ubujamo bephasi nomkayi kodwana kubayini nibhalelwa kuhlathulula okwenzekako esikhathinesi?+ 57 Kubayini ningaqunti nina ngokwenu bona ngikuphi okulungileko na? 58 Ngokwesibonelo, nawukhamba nomuntu okumangalelako niya kumbusi, nanisayako, sebenzela ukulungisa umraro naye bona angakusi kumahluleli, umahluleli akunikele kumphathi wekhotho, umphathi wekhotho yena akuphosele ejele.+ 59 Kwamambala ngithi kuwe, uzokuvalelwa lapho bewuyibhadele yoke imali.”
13 Ngesikhatheso abanye ebebalapho bambikela ngamaGalile athileko uPilatu awabuleleko wavanga iingazi zawo nemihlatjelwawo. 2 Wathi kibo: “Manje nicabanga bona amaGalile lawo bewazizoni khulu ukudlula woke amanye amaGalile ngombana avelelwe ngilokho? 3 Awa kodwana ngithi kini; ngaphandle kokuthi nitjhuguluke, nani noke nizokurhayilwa.+ 4 Namkha laba abali-18 abawelwa mbhotjhongo weSilowama wababulala, nicabanga ukuthi bebamlandu khulu ukudlula boke abanye abantu abahlala eJerusalema? 5 Awa kodwana ngithi kini; ngaphandle kokuthi nitjhuguluke, noke nizokurhayilwa njengabo.”
6 Waraga watjho nakhu umfanekiso: “Umuntu othileko obekanomuthi wamafeyi otjalwe esiminakhe yamadiribe, waya kiwo ayokufuna amafeyi kodwana azange afumane litho.+ 7 Yeke wathi kumtlhogomeli wesimu yamadiribe, ‘Sekuminyaka emithathu ngifunana namafeyi emthini lo kodwana angifumani litho. Uqunte! Kubayini kufuze wenze ihlabathi ingabi namsebenzi?’ 8 Wathi kuye, ‘Kosi, khuwulise umnyaka ube munye kwaphela bengembe magega nawo ngifake nomsuqwa. 9 Nawungathela ngemva kwalokho, kuhle lokho; kodwana wangatheli, ungawugawula-ke.’”+
10 Nje-ke bekafundisa kwelinye lamasinagogo ngeSabatha. 11 Khonapho bekunomfazi obesekuminyaka eli-18 anedimoni lokubogaboga;* bekagobene angakghoni ukujama rwe! 12 UJesu nakambonako, wathi kuye: “Mfazi, utjhatjhululiwe ekubogabogeni kwakho.”+ 13 Wabeka izandla zakhe phezu kwakhe, khonokho wathabuluka wathoma ukudumisa uZimu. 14 Kodwana umphathi owengamele isinagogo, asilingwe kukuthi uJesu ulaphe ngeSabatha, wathi esiqubuthwini: “Kunamalanga asithandathu ekufuze kusetjenzwe ngawo;+ yizani nizokulatjhwa ngamalanga lawo, ingasi ngelanga leSabatha.”+ 15 IKosi yamphendula yathi: “Bazenzisi,+ ngubani kini ongayitjhaphululi ikunzi namkha udumbanakhe ayomseza amanzi ngeSabatha?+ 16 Akukafuzi na bona umfazi lo oyindodakazi ka-Abrahama, uSathana ambophe iminyaka eli-18, atjhatjhululwe ekubotjhwenokhu ngelanga leSabatha?” 17 Nakatjho izintwezi, boke abaphikisi bakhe baphathwa ziinhloni kodwana isiqubuthu soke sathaba ngazo zoke izinto ezikarisako azenzileko.+
18 Waragela phambili wathi: “Ufana nani umBuso kaZimu namkha ngingawumadanisa nani? 19 Unjengembewu yemastedi eyathathwa mumuntu wayoyitjala esiminakhe, yakhula yaba mumuthi neenyoni zakha iindleke eempandeni zawo.”+
20 Godu wathi: “Ngingawumadanisa nani umBuso kaZimu? 21 Unjengesibiliso umfazi asithathako wasihlanganisa namajege amathathu* amakhulu azele iflowuru bekwaba kulapho sibilisa ihlama yoke.”+
22 Wakhamba idorobho nedorobho, isabelo nesabelo, afundisa njengombana araga nekhambo lakhe lokuya eJerusalema. 23 Nje-ke umuntu othileko wathi kuye: “Kosi, bambalwa na abasindiswako?” Wathi kibo: 24 “Sebenzani budisi bona ningene ngomnyango omncani+ ngombana ngiyanitjela ukuthi, abanengi bazokufuna ukungena kodwana angekhe bakghone. 25 Umninimuzi nakasikimako alodlhele umnyango, nizokujama ngaphandle nikokode, nithi, ‘Kosi, sivulela.’+ Kodwana izoniphendula ithi: ‘Angazi ukuthi nivelaphi.’ 26 Ngemva kwalokho nizokuthi, ‘Besidla begodu sisela phambi kwakho, wafundisa neendleleni zethu ezikulu.’+ 27 Kodwana izokuthi kini, ‘Angazi ukuthi nivelaphi. Sukani kimi, noke nina nsebenzi zokungalungi!’ 28 Kulapho-ke kuzokuba nokulila nokutjhayisana kwamazinyo nanibona u-Abrahama, u-Isaka, uJakopo, nabo boke abaphorofidi emBusweni kaZimu kodwana nina niphoselwe ngaphandle.+ 29 Ukungezelela kilokho, abantu bazokuza bavela epumalanga, etjingalanga, etlhagwini nesewula, bazokuhlala etafuleni emBusweni kaZimu. 30 Qalani, kunalabo abangebokugcina abazokuba ngebokuthoma, kube nalabo abangebokuthoma abazokuba ngebokugcina.”+
31 Ngesikhatheso abanye babaFarisi beza kuye bathi: “Khamba lapha ngombana uHerode ufuna ukukubulala.” 32 Wathi kibo: “Khambani niyokutjela ipungutjha leyo ukuthi, ‘Ngikhupha amadimoni, ngipholisa nabantu namhlanjesi nakusasa, bese ngelanga lesithathu ngizabe ngiqedile.’ 33 Nanyana kunjalo, kufuze ngirage nokwenza lokhu namhlanjesi, kusasa nangelanga elilandelako bese ngiyakhamba ngombana akukghonakali* bona umphorofidi abulawelwe ngaphandle kweJerusalema.+ 34 Jerusalema, Jerusalema, mbulali wabaphorofidi nomkghadlhi ngamatje walabo abathunyelwe kuwe,+ kunini ngifuna ukubuthelela abantwabakho njengesikhukhukazi nasibuthelela amadzinyanaso ngaphasi kwamaphikwaso! Kodwana akhenge nivume.+ 35 Nje-ke, indlwenu itjhiywa nani.+ Ngiyanitjela, angekhe nisangibona bekube kulapho nithi: ‘Ubusisiwe oza ngegama lakaJehova!’”*+
14 Ngelinye ilanga uJesu wayokudla ngendlini yomunye wabadosiphambili babaFarisi ngeSabatha kodwana bekatjhejwe ngelihlo elibukhali. 2 Phambi kwakhe bekunendoda ethileko egade inobulwele bokuvuvuka.* 3 Yeke uJesu wabuza izazi zomThetho nabaFarisi wathi: “Kuvumelekile na ukulapha ngeSabatha namkha akukavumeleki?”+ 4 Bathula. Wabamba indoda leyo wayilapha, wathi ikhambe. 5 Wathi kibo: “Ngubani kini ongathi indodanakhe namkha ikunzakhe iwele ngemthonjeni+ ngelanga leSabatha, angayikhuphi msinyana?”+ 6 Babhalelwa kumphendula.
7 Nakabona indlela abantu abamenyiweko abazikhethela ngayo iindawo eziphambili,+ wabenzela umfanekiso. Wathi kibo: 8 “Nawumenywe emtjhadweni, ungahlali endaweni ephambili.+ Kungenzeka kumenywe nomunye oqakatheke khulu kunawe. 9 Onimemileko uzokuza kuwe athi, ‘Akhusuke lapho utjhidele lo.’ Uzokuhlaziseka, ukhambe uyokuhlala endaweni enyazekako. 10 Kodwana nawumenyiweko, khamba uyokuhlala endaweni enyazekako, okumemileko uzokuthi kuwe nakafikako, ‘Mngani, iya eenhlalweni eziphambili.’ Yeke uzokuhlonitjhwa ngibo boke abamenyiweko.+ 11 Ngombana woke umuntu oziphakamisako uzokuthotjiswa nozithobako uzokuphakanyiswa.”+
12 Godu wathi endodeni emmemileko: “Nawenza isidlo semini namkha santambama, ungamemi abangani bakho namkha abafowenu namkha iinhlobo zakho namkha abomakhelwana bakho abanjingileko. Nawenza njalo, kungenzeka nabo bakumeme, lokho kuzokuba mvuzwakho. 13 Kodwana nawenza umnyanya, mema abatlhagileko, iinrhole, abangakwazi ukukhamba neemphofu;+ 14 nawenza njalo uzokuthaba ngombana abanalitho abangakubuyisela lona. Uzokufumana umvuzo nakuvuswa+ abalungileko.”
15 Nakezwa lokhu, omunye weemvakatjhi wathi kuye: “Uyathaba loyo ozokudla emBusweni kaZimu.”
16 UJesu wathi kuye: “Indoda ethileko beyenze umnyanya omkhulu,+ yamema abantu abanengi. 17 Ngesikhathi somnyanya yathumela isisebenzi sayo bona sithi kwabamenyiweko, ‘Yizani ngombana koke sekulungile.’ 18 Kodwana boke babeka amabanga.+ Wokuthoma wathi kiso, ‘Ngithenge isimu, ngitlhoga ukuyoyibona; ngibawa ungilibalele, angekhe ngiphumelele.’ 19 Omunye wathi, ‘Ngithenge iinkomo ezilitjhumi ezibotjhelwako, ngisayozibona ukuthi zisebenza njani; ngibawa ungilibalele, ngekhe ngiphumelele.’+ 20 Nomunye wathi, ‘Ngiqeda ukutjhada, ngalokho ngekhe ngiphumelele.’ 21 Yeke isisebenzi safika sizokubikela ikosaso ngezintwezi. Ikosi yasilingeka, yathi esisebenzini sayo, ‘Khamba msinyana uye eendleleni ezikulu nezincani zedorobho, ubize abantu abatlhagileko, iinrhole, iimphofu nabangakghoni ukukhamba.’ 22 Ngokukhamba kwesikhathi isisebenzi sathi, ‘Kosi, ngikwenzile othe ngikwenze kodwana kusese nendawo.’ 23 Ikosi yathi esisebenzini, ‘Khamba uye eendleleni neendledlaneni zemaphandleni ubakatelele bona beze, ukwenzela bona indlwami igcwale.+ 24 Ngombana ngithi kini, akakho namunye wabantu abamenyiwekwaba ozosinambitha isidlo sami santambama.’”+
25 Isiqubuthu esikhulu besikhamba naye, nje-ke wajikela ngakiso wathi: 26 “Nanyana ngubani oza kimi kodwana angahloyi* uyise, unina, umkakhe, abantwabakhe, abafowabo nabodadwabo, ngitjho nokuphila kwakhe,+ angeze aba mfundami.+ 27 Nanyana ngubani ongathwali isigodo sakhe sokuhlunguphazwa* angilandele angeze aba mfundami.+ 28 Ngokwesibonelo, ngubani kini ofuna ukwakha umbhotjhongo kodwana angathomi ngokuhlala phasi abale iindleko ukubona bonyana unemali eyaneleko yokuwuqeda na? 29 Nakungasinjalo angabeka isisekelo sawo kodwana angakghoni ukuwuqeda, boke abaqalileko bazomhleka, 30 bathi: ‘Indoda le ithome ukwakha kodwana akhenge ikghone ukuqeda.’ 31 Namkha ngiyiphi ikosi ephuma iyokulwa nenye ikosi kodwana ingathomi ihlale phasi, ifumane iseluleko sokobana ingakghona na ngamasotja azii-10 000 ukulwa nazii-20 000 ezako ukuzokulwa nayo? 32 Nangabe angekhe ikghone, izokuthi ikosi leya isesekude, yona ithumele abazenda bona bayokwenza ukuthula nayo. 33 Ngendlela efanako, ningaqiniseka ukuthi akakho namunye wenu ongalayelisi* kikho koke okungokwakhe ongaba mfundami.+
34 “Itswayi lilungile. Kodwana itswayi nalingaba duma, lizokunungwa ngani?+ 35 Alikayifaneli ihlabathi namkha umsuqwa. Abantu bayalilahla. Oneendlebe akezwe.”+
15 Nje-ke boke abathelisi nezoni bebasolo babuthanela kuye bona bamlalele.+ 2 AbaFarisi nabatloli bebanande babubula bathi: “Indoda le yamukela izoni begodu idla nazo.” 3 Yeke wabenzela nakhu umfanekiso: 4 “Ngiyiphi indoda phakathi kwenu enezimvu ezili-100, kuthi nayilahlekelwa ngeyodwa yazo, engekhe itjhiye ezima-99 emmangweni iyokufuna leyo elahlekileko bekube kulapho iyifumana?+ 5 Ithi ingayifumana, iyitjathe phezu kwamahlombayo itjho ngethabo. 6 Nayifika ekhaya, ibiza abangani bayo nabomakhelwana, ithi kibo, ‘Thabani nami ngombana ngiyifumene imvwami ebeyilahlekile.’+ 7 Ngiyanitjela ukuthi ngendlela efanako, kuzokuba nethabo elikhulu ezulwini ngesoni sinye esitjhugulukako,+ ukudlula labo abama-99 abalungileko, abangatlhogi ukutjhuguluka.
8 “Namkha ngimuphi umfazi oneempaparwana zesiliva* ezilitjhumi, othi nakalahlekelwa sipaparwana* sinye, angakhanyisi isibani, athanyele indlwakhe asifunisise kuhle bekasifumane? 9 Nakasifumanako, ubiza abangani bakhe nabomakhelwana, athi kibo, ‘Thabani nami ngombana ngisifumene isipaparwana sesiliva ebesingilahlekele.’ 10 Ngiyanitjela ukuthi ngendlela efanako, iingilozi zakaZimu ziyathaba ngesoni sinye esitjhugulukako.”+
11 Ngemva kwalokho wathi: “Indoda ethileko beyinamadodana amabili. 12 Encani yathi kuyise, ‘Baba, ngihlukanisela ipahla ekufuze kube ngeyami.’ Uyise wabahlukanisela ipahlakhe. 13 Ngemva kwamalangana, indodana encani yabutha koke okungokwayo, yatjhinga enarheni ekude, nayifika lapho yasaphaza ipahlayo ngokuziphilela umathanda. 14 Nasele iqede yoke ipahlayo, kwaba nendlala ekulu enarheni leyo, yathoma ukutlhaga. 15 Yakhamba yayoziqatjhisa esakhamuzini esithileko senarheni leyo, esayithumela esiminayo bona iyokulusa iimfarigi.+ 16 Yakhanuka nokugoma ukudla okudliwa ziimfarigi kodwana bekunganamuntu oyinikela khona.
17 “Ithe nayiqaqulukako, yathi, ‘Abantu abasebenzela ubaba banokudla okunengi kodwana mina ngibulawa yindlala lapha! 18 Ngizokuvuka ngiye kubaba ngithi kuye: “Baba, ngonile ezulwini nakuwe. 19 Angisafanelwa kubizwa ngokuthi ngiyindodanakho. Ngiqatjha njengomunye weensebenzi zakho.”’ 20 Ngalokho yavuka, yatjhinga kuyise. Ithe nayisesekude, uyise wayibona, wayirhawukela, wayigijimela, wayisingatha* bese wayimanga. 21 Nje-ke indodana yathi kuye, ‘Baba, ngonile ezulwini nakuwe.+ Angisafanelwa kubizwa bona ngiyindodanakho.’ 22 Kodwana uyise wathi eensebenzini zakhe, ‘Rhabani nilethe isambatho esihle khulu, nimembathise sona, nimfake idzilamunwana namapatlagwana. 23 Lethani nekonyana elinonileko, nilihlabe, sidle sigidinge, 24 ngombana indodanami le beyifile kodwana iyaphila godu;+ beyilahlekile seyitholakele.’ Bazithabisa-ke.
25 “Indodana ekulu beyisesimini, ithe nayibuyako itjhidela hlanu kwendlu, yezwa umbhino nokugida. 26 Yabiza esinye seensebenzi, yasibuza ukuthi kwenzekani. 27 Sathi kuye, ‘Umfowenu ubuyile, ubabakho uhlabe nekonyana elinonileko ngombana umfumene aphile kuhle.’* 28 Kodwana yasilingeka khulu, yabhala nokungena. Uyise waphuma wayirabhela bona ingene. 29 Yathi kuyise, ‘Yoke iminyaka le ngakusebenzela njengesigqila, akhenge kwenzeke ngingalaleli iinlayezo zakho kodwana mina azange khewungiphe ngitjho nembuzana bona ngizithabise nabangani bami. 30 Kodwana kuthe nakubuya indodanakho le esaphaze ipahlakho neengwadla, wayihlabela ikonyana elinonileko.’* 31 Ngalokho wathi kiyo, ‘Ndodanami, bewusolo unami begodu koke okungokwami kungokwakho. 32 Kodwana bekufuze sigidinge, sizithabise ngombana umfowenu bekahlongakele kodwana sekayaphila; bekalahlekile sekatholakele.’”
16 Godu wathi ebafundini: “Injinga ethileko beyinesisebenzi* esamangalelwa ngokudlala ngepahlayo. 2 Nje-ke injinga leyo yasibiza yathi: ‘Manikelela wani engiwezwa ngawe? Tlola umbiko ngomsebenzakho, unginikele wona ngombana angekhe usaba mphathi wendlu.’ 3 Yeke isisebenzi sakhuluma sodwa sathi: ‘Ngizokwenzani nakunje njengombana ikosami ingithathela ubuphathi? Anginawo amandla wokwemba begodu ngineenhloni zokubawa. 4 Ngiyazi ukuthi ngizokwenzani, ukwenzela bona abantu bangamukele emizinabo nangisuswako esikhundleni sami.’ 5 Nje-ke sabiza ngamunye walabo abakoloda ikosaso, sathi kewokuthoma, ‘Uyikoloda okungangani ikosami?’ 6 Wathi, ‘Amagagogo* alikhulu wamafutha we-oliva.’ Sathi kuye, ‘Thatha incwadakho yesikolodo, hlala phasi, utlole ngokurhabako ukuthi ama-50.’ 7 Ngokulandelako sathi komunye, ‘Wena-ke, ukoloda okungangani?’ Wathi, ‘Imigodla* elikhulu yekoroyi.’ Sathi kuye, ‘Thatha incwadakho yesikolodo utlole ukuthi ema-80.’ 8 Ikosaso yasibuka isisebenzesi ngombana ngitjho nanyana singakalungi, senza ngokuhlakanipha* ngombana amadodana wephaseli ahlakaniphile esizukulwaneni sawo kunamadodana wokukhanya.+
9 “Godu, ngithi kini: Zenzeleni abangani ngobunjinga obungakalungi,+ ukwenzela ukuthi nabungaphela, banamukele eendaweni zabo zokuhlala zaphakade.+ 10 Umuntu othembekileko kokuncani uthembekile nakokukhulu nomuntu ongakalungi kokuncani akakalungi nakokukhulu. 11 Nje-ke, nangabe azange nithembeke ngokuphathelene nobunjinga obungakalungi, ngubani ozoniphathisa okungekwamambala? 12 Kanti nangabe azange nithembeke kilokho okungekomunye, ngubani ozoninikela okungekwenu?+ 13 Akunasisebenzi esingaba sigqila samakhosi amabili ngombana sizokuhloya enye sithande enye namkha sizokunamathela kwenye sidelele enye. Angekhe naba ziingqila zakaZimu nezobuNjinga.”+
14 Nabezwa koke lokho, abaFarisi bathoma ukumnyefula ngombana bebathanda imali.+ 15 UJesu wathi kibo: “Nina nizenza abalungileko phambi kwabantu+ kodwana uZimu uyazazi iinhliziyo zenu.+ Lokho abantu abakuthathela phezulu kuyanyenyisa phambi kwakaZimu.+
16 “UmThetho nabaPhorofidi kwaraga bekwafika uJwanisi. Kusukela lapho, umBuso kaZimu uziindaba ezimnandi ezitjhunyayelwako begodu yoke imihlobo yabantu igijimela kiwo.+ 17 Kwamambala, kulula ngezulu nephasi bona kudlule kunokobana iledere linye lomThetho lingazaliseki.+
18 “Nanyana ngubani otlhala umkakhe atjhade nomunye, uyafeba* naloyo otjhada umfazi otlhalwe yindodakhe, uyafeba.+
19 “Bekunomuntu othileko oyinjinga obekambatha izambatho ezisipiridzana nelineni, azithabisa ngomnothwakhe qobe langa. 20 Kodwana isikhombeli esithileko igama laso nguLazaru besibekwa esangweni laso, sineenlonda ezigcwele umzimba woke 21 begodu sarhalela ukuyokudla iintshutshuru eziwa etafuleni yenjinga le. Bekufika ngitjho nezinja zikhothe iinlonda zaso. 22 Ngokukhamba kwesikhathi, isikhombelesi sahlongakala sathathwa ziingilozi saya esifubeni saka-Abrahama.
“Godu nenjinga leyo yahlongakala yabulungwa. 23 Yathi iseThuneni* ihlunguphazeka yaphakamisa amehlwayo, yabona u-Abrahama akude noLazaru asesifubeni sakhe. 24 Yarhuwelela yathi, ‘Baba Abrahama, ngirhawukela, uthumele uLazaru bona ayokufaka ipente yomunwakhe ngemanzini apholise ilimu lami ngombana ngisebuhlungwini obukhulu, emlilweni otjhisa bhe!’ 25 U-Abrahama wathi, ‘Mntwanami, khumbula bona wazifumana zoke izinto ezihle usaphila kodwana uLazaru wafumana ezimbi. Nje, yena uyaduduzwa, wena usebuhlungwini. 26 Ngaphandle kwalokho, kunerharha elikhulu phakathi kwenu nathi, ukwenzela bona labo abafuna ukusuka kithi beze kini bangakghoni, nalabo abafuna ukuyamela ngakithi basuka kini bangakghoni.’ 27 Yathi, ‘Nangabe kunjalo baba, ngibawa umthumele endlini kababa, 28 ngombana nginabafowethu abahlanu, ukuthi ayobanikela ubufakazi obupheleleko khona bangazokwiza endaweni yokuhlunguphazwa le.’ 29 U-Abrahama wathi, ‘Banemitlolo kaMosi neyabaPhorofidi; abalalele yona.’+ 30 Yathi, ‘Baba Abrahama, angekhe babalalele kodwana nakungavuka umuntu kwabafileko aye kibo, bazokutjhuguluka.’ 31 Wathi kiyo, ‘Nabangalaleli uMosi+ nabaPhorofidi, angekhe bakholwe nanyana kungavuka umuntu kwabafileko.’”
17 Ngemva kwalokho wathi ebafundini bakhe: “Iinqabo zizokuba khona nanyana kunjani. Nokho, maye! Kiloyo eziza ngaye. 2 Bekuzokuba ngcono nakungabotjhelwa ilitje lokusila entanyenakhe bese aphoselwe elwandle kunokobana abangele omunye wabancanaba bona awe.+ 3 Zitjhejeni. Nangabe umfowenu wenza isono mkhalime,+ nakangatjhuguluka mlibalele.+ 4 Ngitjho nanyana angakonela amahlandla alikhomba ngelanga bese ubuya amahlandla alikhomba athi, ‘Ngiyatjhuguluka,’ kufuze umlibalele.”+
5 Nje-ke abapostoli bathi eKosini: “Sipha ukukholwa okungeziweko.”+ 6 Ngemva kwalokho iKosi yathi: “Ngathana beninokukholwa okulingana nembewu yemastedi, beningathi emthini womurubheyi onzima lo, ‘Ruthuka, utjaleke ngelwandle!’ Bewuzonilalela.+
7 “Ngubani kinapha onesisebenzi esilimako namkha esilusako ongathi kiso nasibuya esimini, ‘Iza etafulenapha uzokudla’? 8 Kunalokho, bekangekhe na athi kiso, ‘Ngilungiselela ukudla kwantambama, umbathe ifasikoti, ungitende bengiqede ukudla nokusela bese ngemva kwalokho ungadla bewusele’? 9 Angekhe athokoze isisebenzeso ngombana senze lokho egade sabelwe khona, akusinjalo? 10 Ngokufanako, nanenze koke enabelwe khona, kufuze nithi: ‘Siziinsebenzi ezingasizi ngalitho. Senze ebekufuze sikwenze.’”+
11 UJesu nakaya eJerusalema, wadlula hlangana neSamariya neGalile. 12 Uthe nakangena esabelweni esithileko, wahlangana namadoda alitjhumi anobulepheru kodwana ajamela kudanyana naye.+ 13 Arhuwelela khulu athi: “Jesu, Mfundisi, sirhawukela!” 14 Nakawabonako, uJesu wathi: “Khambani niyoziveza ebaphristini.”+ Nakasatjhinga khona, ahlanjululwa.+ 15 Omunye wawo nakabona ukuthi upholile wajika, wadumisa uZimu ngelizwi elikhulu. 16 Wakhothama eenyaweni zakaJesu, wamthokoza. Ukungezelela kilokho, bekamSamariya.+ 17 UJesu wathi: “Wolitjhumi ahlanjululiwe, kghani akusinjalo? Nje-ke, akuphi amanye alithoba? 18 Akekho omunye na ojikileko bona azokudumisa uZimu ngaphandle kwendoda le yakwenye inarha?” 19 Yeke wathi kiyo: “Sikima ukhambe, ukukholwa kwakho kukupholisile.”+
20 AbaFarisi nabambuza ukuthi umBuso kaZimu uza nini,+ wathi kibo: “UmBuso kaZimu nawuzako angekhe ubonakale kibo boke 21 nabantu angekhe bathi, ‘Qalani nakhu!’ Namkha ‘Nakuya!’ Ngombana umBuso kaZimu uhlangana nani.”+
22 Ngemva kwalokho uJesu wathi ebafundini: “Kuzokufika amalanga lapho nizokukhanuka ukubona elinye lamalanga weNdodana yomuntu kodwana angekhe nilibone. 23 Abantu bazokuthi kini, ‘Qalani nasiya!’ Namkha ‘Qalani nasi!’ Ningayi namkha nigijime ngemva kwabo.+ 24 Njengombana umbani uphazima kwelinye ihlangothi lezulu uya kwelinye ihlangothi lezulu neNdodana yomuntu+ izokuba njalo ngelanga layo.+ 25 Nanyana kunjalo, kufuze ithome ngokuqalana namatshwenyeko amanengi begodu ininwe nasizukulwanesi.+ 26 Ngaphezu kwalokho njengombana kwenzeka emihleni kaNowa,+ kuzokuba njalo nangemihla yeNdodana yomuntu:+ 27 bebadla, basela, amadoda athatha, abafazi bendiswa bekwaba lilanga uNowa angena ngalo ngemkhunjini,+ kwafika uMthwalela wabatjhabalalisa boke.+ 28 Ngokufanako njengombana kwenzeka emihleni kaLoti:+ bebadla, basela, bathenga, bathengisa, batjala begodu bakha. 29 Ngelanga uLoti aphuma ngalo eSodoma, kwana umlilo nesibabuli kuvela ezulwini kwabatjhabalalisa boke.+ 30 Kuzokwenzeka okufanako ngelanga iNdodana yomuntu ezokwambulwa ngalo.+
31 “Ngelangelo umuntu ophezu kwendlu kodwana ipahlakhe ingendlini, angahliki ayoyithatha nomuntu osesimini, angabuyeli ezintweni azitjhiyileko. 32 Khumbulani umkaLoti.+ 33 Nanyana ngubani ofuna ukusindisa ukuphila kwakhe kuzomlahlekela kodwana nanyana ngubani olahlekelwa ngikho uzokusindisa.+ 34 Ngiyanitjela, ngobusukobo abantu ababili bazabe basembhedeni munye; omunye uzokuthathwa, omunye uzokutjhiywa.+ 35 Kuzokuba nabafazi ababili abasila elitjeni linye; omunye uzokuthathwa, omunye uzokutjhiywa.”36* —— 37 Ngalokho abafundi bathi kuye: “Kuphi Kosi?” Wathi kibo: “Lapho kunesidumbu khona, kulapho namadlanga azokubuthana khona.”+
18 Waragela phambili wabatjela umfanekiso omalungana nokuthi kutlhogeka bahlale bathandaza, bangapheli amandla,+ 2 wathi: “Edorobheni elithileko bekunomahluleli ogade angamsabi uZimu begodu angahloniphi muntu. 3 Godu bekunomhlolokazi edorobhenelo obekasolo aya kuye athi, ‘Qinisekisa bona ngifumana ubulungiswa kongimangalelako.’ 4 Besele kusikhathi eside angafuni ukumsiza kodwana ngemva kwalokho wathi ehliziywenakhe, ‘Ngitjho nanyana ngingamsabi uZimu namkha ngingahloniphi muntu, 5 ngombana umhlolokazi lo uhlalele ukungitshwenya, ngizokwenza bona afumane ubulungiswa ukwenzela ukuthi angasolo eza azongifundekela ngesibawo sakhe.’”+ 6 Yeke iKosi yathi: “Nimzwile umahluleli utheni ngitjho nanyana angakalungi! 7 Alo-ke, uZimu angeze na abangela abakhethiweko bakhe abamlilela imini nobusuku bona benzelwe ubulungiswa,+ ngitjho nanyana ababekezelela?+ 8 Ngiyanitjela, uzokubangela bona ubulungiswa benzeke kibo msinyana. Nanyana kunjalo, iNdodana yomuntu nayifikako, izokufumana na ukukholwa okunje ephasini?”
9 Godu wenza umfanekiso nakhu kwabanye ebebathembela ekulungeni kwabo, baqalela abanye phasi: 10 “Amadoda amabili aya ethempelini ayokuthandaza, enye bekumFarisi enye kumthelisi. 11 UmFarisi wajama wathoma ukutjho lokhu emthandazwenakhe, ‘Zimu, ngiyakuthokoza ngombana angifani nabanye abantu, abadlelezeli, abangakalungi, iimfebe* ngitjho nomthelisi lo. 12 Ngizila ukudla kabili ngeveke; nginikela kwetjhumi kwakho koke engikufumanako.’+ 13 Umthelisi bekajamele kudanyana, angafuni nokuqala ezulwini kodwana asolo azibetha esifubeni, athi, ‘Zimu, ngirhawukela, mina soni.’+ 14 Ngiyanitjela, indoda le yabuyela ekhaya ibonakala ilunge khulu kunomFarisi loya.+ Ngombana woke umuntu oziphakamisako uzokuthotjiswa kodwana ozithobako uzokuphakanyiswa.”+
15 Nje-ke abantu basolo baletha amasanabo bona awathinte kodwana abafundi nababona lokhu, babakhalimela.+ 16 UJesu wayala bona kulethwe amasana kuye, wathi: “Vumelani abantwana beze kimi, ningalingi ukubavimba ngombana umBuso kaZimu ungewabanjalo.+ 17 Kwamambala ngithi kini nanyana ngubani ongamukeli umBuso kaZimu njengomntwana omncani angekhe angene kiwo.”+
18 Omunye wababusi wambuza wathi: “Mfundisi omuhle, kufuze ngenzeni bona ngizuze ilifa lokuphila okungapheliko?”+ 19 UJesu wathi kuye: “Ungibizelani ngokuthi ngimuhle? Akunamuntu omuhle ngaphandle kwakaZimu kwaphela.+ 20 Uyayazi imiyalo ethi: ‘Ungafebi,*+ ungabulali,+ ungebi,+ ungafakazi amala,+ hlonipha uyihlo nonyoko.’”+ 21 Wathi: “Ngiyilalele yoke imiyalo le kusukela ebutjheni.” 22 UJesu nakezwa lokho, wathi kuye, “Kusesenokhunye okutlhayelako ngawe: Thengisa koke onakho, wabele abatlhagako imali leyo, uzokuba nomnotho ezulwini bese uyeza ungilandele.”+ 23 Nakezwa lokhu watlhuwa khulu ngombana bekanjinge khulu.+
24 UJesu wamqala wathi: “Qalani ukuthi kuzokuba budisi kangangani ngalabo abanemali ukungena emBusweni kaZimu!+ 25 Eqinisweni, kubulula ngekamela ukungena entunjeni yenalidi kunomuntu onjingileko bona angene emBusweni kaZimu.”+ 26 Boke abezwa lokhu bathi: “Nakunjalo, ngubani ongasindiswa?”+ 27 Wathi: “Izinto ezingenzekiko ngabantu ziyenzeka ngoZimu.”+ 28 Kodwana uPitrosi wathi: “Qala! Sitjhiye izinto zethu sakulandela.”+ 29 Wathi kibo: “Ngiqinisile ngithi kini, akakho otjhiye indlu namkha umfazi namkha abafowabo namkha ababelethi namkha abantwana ngebanga lomBuso kaZimu+ 30 ongeze akufumana ngokubuyelelwe kanengi esikhathinesi begodu ephasini elizako, ukuphila okungapheliko.”+
31 Wabizela abaliTjhumi namBili ngeqadi wathi kibo: “Lalelani! Siya eJerusalema, zoke izinto ezitlolwe kusetjenziswa abaphorofidi malungana neNdodana yomuntu zizokuzaliseka.+ 32 Ngokwesibonelo, izokunikelwa ebantwini beentjhaba+ begodu bazokuhlekisa ngayo,+ bayithuke, bebayikhafulele.+ 33 Ngemva kokuyibetha, bazoyibulala+ kodwana ngelanga lesithathu izokuvuka.”+ 34 Akhenge bakuzwisise koke lokhu ngombana amezwi la bekafihlekile kibo, azange bazizwisise izinto azitjhoko.
35 Nje-ke njengombana uJesu bekatjhidela eduze neJerikho, indoda ethileko esiphofu beyihlezi eqadi kwendlela ibawa.+ 36 Yathi nayizwa isiqubuthu sidlula, yabuza ukuthi kwenzakalani. 37 Bathi kiyo: “UJesu umNazaretha uyadlula!” 38 Khonokho yarhuwelela yathi: “Jesu, Ndodana kaDavida, ngirhawukela!” 39 Labo ebebangaphambili bayikhalima, bayitjela ukuthi ithule kodwana yarhuwelela khulu yathi: “Ndodana kaDavida, ngirhawukela!” 40 UJesu wajama, wayala bona indoda leyo ilethwe kuye. Kuthe nasele itjhidele, uJesu wayibuza: 41 “Ufuna ngikwenzeleni?” Yathi: “Kosi, ngenza ngibone godu.” 42 UJesu wathi kiyo: “Bona godu; ukukholwa kwakho kukupholisile.”+ 43 Khonokho yabona godu, yathoma ukumlandela,+ idumisa uZimu. Nabantu boke nababona lokhu, badumisa uZimu.+
19 Wangena eJerikho kodwana bekadlula. 2 Lapho bekunendoda ekuthiwa nguZakewu, beyimthelisi omkhulu begodu injingile. 3 Beyifuna ukubona ukuthi uJesu lo ngubani kodwana beyingakghoni ukumbona ngebanga lesiqubuthu ngombana beyiyifitjhani. 4 Yeke yagijimela phambili yakhwela emthini wamafeyi wommango* bona ikghone ukumbona ngombana bekazokudlula ngendlela leyo. 5 UJesu nakafika lapho, waqala phezulu emthini wathi kiyo: “Zakewu, hlika msinyana lapho, namhlanjesi kufuze ngihlale endlinakho.” 6 Nakezwa lokho wahlika msinyana wamamukela ngethabo waba sivakatjhi. 7 Nababona lokhu, boke baguguneka bathi: “Uvakatjhe emzini womuntu osisoni.”+ 8 Kodwana uZakewu wasikima wathi eKosini: “Kosi, ingcenye yezinto zami ngiyipha abadududu, kanti nanyana yini engiyidlelezele* umuntu, ngiyibuyisela seyiphindwe kane.”+ 9 Nakezwa lokho uJesu wathi kuye: “Namhlanjesi isindiso ifikile emzini lo ngombana naye uyindodana ka-Abrahama. 10 INdodana yomuntu izele ukuzokufuna nokusindisa ebekulahlekile.”+
11 Nabasalalele lokho, watjho omunye umfanekiso ngombana bekaseduze neJerusalema begodu bebacabanga ukuthi umBuso kaZimu uzokuvela khonokho.+ 12 Yeke wathi: “Umuntu othileko obelethwa ebukhosini waya enarheni ekude+ ayozithathela ubukhosi bese abuye. 13 Wabiza iinsebenzi zakhe ezilitjhumi, wazinikela abomina* abalitjhumi wathi kizo, ‘Rhwebani ngabo bengibuye.’+ 14 Kodwana izakhamuzi zakhe bezimhloya bezathumela abazenda bona bamlandele bathi, ‘Asifuni umuntu lo abe yikosethu.’
15 “Kwathi nakabuyako ngemva kokuzifumanela ubukhosi, wabiza iinsebenzi azinikele imali,* ukuhlolisisa ukuthi zizuzeni ekurhwebeni kwazo.+ 16 Sokuthoma seza phambili sathi, ‘Kosi, umina wakho uzuze abomina abalitjhumi.’+ 17 Wathi kiso, ‘Wenze kuhle, sisebenzi esilungileko! Ngombana utjengise ukuthi uthembekile entweni encani khulu, busa amadorobho alitjhumi.’+ 18 Sesibili naso seza, sathi, ‘Kosi, umina wakho uzuze abomina abahlanu.’+ 19 Nakileso wathi, ‘Nawe busa amadorobho amahlanu.’ 20 Kodwana kweza esinye sathi, ‘Kosi, nangu umina wakho ebengiwufihlile ngawuphuthela ngetjhila. 21 Qala, bengikusaba ngombana uyindoda ebukhali, uthatha lokho ongazange ukubeke, uvune lapho ungakatjali khona.’+ 22 Wathi kiso, ‘Ngizokugweba ngamezwakho, sisebenzi esimbi. Angithi bewazi ukuthi ngiyindoda ebukhali, ethatha lapho ingakabeki khona nevuna lapho ingakatjali khona?+ 23 Alo-ke kubayini ungazange ufake imalami* ngebulungelweni? Bekuzakuthi nangibuyako, ngiyifumane inamakonyana.’
24 “Bese wathi kilabo abajame lapho, ‘Thathani umina wakhe nimnikele lowo onabomina abalitjhumi.’+ 25 Kodwana bathi kuye, ‘Kosi, angithi unabomina abalitjhumi!’ 26 ‘Ngithi kini nanyana ngubani onakho, uzokunikelwa okungeziweko kodwana loyo onganakho, uzokumukwa ngitjho nalokho anakho.+ 27 Godu, lethani amanabami lawa ebewangafuni ngibe yikosawo, niwabulale phambi kwami.’”
28 Ngemva kokutjho izintwezi, waraga nekhambo, wakhuphukela eJerusalema. 29 Kuthe nakatjhidela eBhethifage neBhethaniya entabeni ebizwa ngokuthi yiNtaba yama-Oliva,+ wathuma abafundi ababili,+ 30 wathi, “Iyani esabelweni lesa enisiqalileko, nizakuthi ningangena kiso, nifumane udumbanyana abotjhiwe, ongazange akhwelwe mumuntu. Mtjhaphululeni nimlethe lapha. 31 Nakungaba nonibuzako athi, ‘Nimtjhaphululelani udumbana loyo?’ Nithi, ‘IKosi iyamtlhoga.’” 32 Nje-ke abafundi abathunyiweko bakhamba bafumana kunjengombana abatjelile.+ 33 Kuthe basatjhaphulula udumbana, abanikazi bakhe bathi kibo: “Nimtjhaphululelani udumbana loyo?” 34 Bathi: “IKosi iyamtlhoga.” 35 Bathatha udumbana bamusa kuJesu, babeka izambatho zabo phezu kwakhe, uJesu wahlala phezu kwakhe.+
36 Njengombana akhamba, bebaqhisa izambatho zabo endleleni.+ 37 Kuthe angatjhidela endleleni ethoma ukwehla eNtabeni yama-Oliva, soke isiqubuthu sabafundi sathaba, sadumisa uZimu ngephimbo elikhulu ngebanga layo yoke imisebenzi yamandla esiyibonileko, 38 sithi: “Ubusisiwe oza njengeKosi ngegama lakaJehova!* Ukuthula ezulwini nephazimulo kosezulwini!”+ 39 Kodwana abanye babaFarisi ebebasesiqubuthwini bathi: “Mfundisi, khewukhalime abafundi bakho.”+ 40 Wathi kibo: “Ngiyanitjela ngithi, laba nabangathula, amatje azokurhuwelela.”
41 Nakatjhidela eduze waliqala idorobho, walililela,+ 42 wathi: “Ngathana wena, ngitjho wena, bewuzilemukile ngelangeli izinto eziphathelene nokuthula kodwana nje zifihliwe emehlwenakho.+ 43 Isikhathi siyeza lapho izitha zakho zizokukampela ngeengodo ezihlabako begodu zikubhode, zikuragelele* mahlangothi woke.+ 44 Zizokurhayila wena nabantwabakho ziniphose phasi,+ angekhe zitjhiye ilitje phezu kwelinye+ kuwe ngombana azange usilemuke isikhathi sokuhlolwa kwakho.”
45 Wangena ngethempelini waqotha abathengisako,+ 46 wathi kibo: “Kutloliwe ukuthi, ‘Indlwami izokuba yindlu yokuthandaza’+ kodwana nina niyenze irholo labadlelezeli.”+
47 Waraga afundisa ethempelini qobe langa kodwana abaphristi abakhulu, abatloli nabarholi babantu bebafuna ukumbulala+ 48 kodwana azange bafumane indlela yokwenza lokho ngombana abantu bebasolo bambungelele bafuna ukumuzwa.+
20 Kwathi ngelinye ilanga uJesu asafundisa abantu ngethempelini amemezela neendaba ezimnandi, kweza abaphristi abakhulu, abatloli nabadala 2 bathi kuye: “Sitjela, uzenza ngamaphi amandla izintwezi? Namkha ngubani okunikele amandla la?”+ 3 Wabaphendula wathi: “Nami ngizonibuza umbuzo, ningiphendule: 4 Ibhabhadiso lakaJwanisi belivela ezulwini namkha ebantwini?” 5 Bazenzela iimphetho babodwa, bathi: “Nasingathi, ‘Ezulwini,’ uzokuthi, ‘Kubayini-ke ningakhenge nimkholwe?’ 6 Kodwana nasingathi, ‘Ebantwini,’ boke abantu bazosikghadlha ngamatje ngombana bakholelwa ukuthi uJwanisi bekamphorofidi.”+ 7 Ngalokho bathi abazi ukuthi belivelaphi. 8 UJesu wathi kibo: “Nami angekhe nginitjele ukuthi ngizenza ngamaphi amandla izintwezi.”
9 Ngemva kwalokho watjela abantu umfanekiso nakhu: “Indoda ethileko yatjala isimu yamadiribe+ yayiqatjhisela abalimi, yona yaya kwenye inarha isikhathi eside.+ 10 Ngesikhathi sokuvunwa kwamadiribe, yathumela isisebenzi kubalimi bona siyoyithathela ezinye zeenthelo zayo zesivuno. Kodwana abalimi basidula, basibuyisela emuva singakaphathi litho.+ 11 Godu yathumela esinye isisebenzi. Naso basidula bebasihlazisa basibuyisela emuva singakaphathi litho. 12 Yathumela sesithathu; naso basilimaza bebasiphosela ngaphandle. 13 Nje-ke umnikazi wesimu yamadiribe wathi, ‘Khuyini ekufuze ngiyenze? Ngizokuthumela indodanami, engiyithandako.+ Kungenzeka bazoyihlonipha.’ 14 Abalimi nabayibonako, babonisana bodwa, bathi, ‘Le yindlalifa. Asiyibulaleni, ilifa layo libe ngelethu.’ 15 Ngalokho bayiphosela ngaphandle kwesimu yamadiribe bayibulala.+ Khuyini-ke, umnikazi wesimu yamadiribe azoyenza kibo? 16 Uzokuza abulale abalimaba bese anikele abanye isimu yamadiribe leyo.”
Abantu nabezwa lokhu, bathi: “Awa akungabi njalo!” 17 Kodwana wabaqala wathi: “Alo-ke, kutjho ukuthini lapho kutlolwe ukuthi: ‘Ilitje abakhi abalininako, libe lilitje eliqakatheke ukuwadlula woke’?*+ 18 Woke umuntu owela elitjenelo uzokuphahlazeka.+ Kuthi eliwela phezu kwakhe, lizomtshidlha.”
19 Abatloli nabaphristi abakhulu bafuna ukumbamba khonokho kodwana basaba abantu ngombana bebalemuka ukuthi ukhuluma ngabo emfanekisweni lo.+ 20 Ngemva kokumbeka ilihlo elibukhali, bathumela abantu ababaqatjhe ngemsitheleni ukuthi bazenze abalungileko bona bambambe ngamezwakhe,+ khona bazomnikela kurhulumende nembusweni. 21 Bambuza bathi: “Mfundisi, siyazi bona ukhuluma begodu ufundisa kuhle, awukhethi kodwana ufundisa indlela kaZimu ngeqiniso: 22 Kulungile na ngathi bona sibhadele umthelo kuKhesari namkha awa?” 23 Wawalemuka amaqhingabo wathi kibo: 24 “Ngitjengisani udenariyu.* Unomfanekiso nomtlolo kabani?” Bathi: “KaKhesari.” 25 Wathi kibo: “Ngalokho, buyiselani izinto zakaKhesari kuKhesari+ kodwana izinto zakaZimu, kuZimu.”+ 26 Nje-ke babhalelwa kumbamba kilokho ebekakutjho phambi kwabantu kodwana bararwe yipendulwakhe, bathula du!
27 Nokho, abanye babaSadusi, abathi abafileko angekhe bavuswe,+ beza kuye bambuza bathi:+ 28 “Mfundisi, uMosi wasitlolela wathi, ‘Nangabe indoda iyahlongakala, itjhiye umkayo kodwana inganamntwana, umfowabo kufuze athathe umfazi loyo abelethele umfowabo abantwana.’+ 29 Nje-ke bekunamadoda alikhomba abantwana bomuntu. Yokuthoma yathatha umfazi kodwana yahlongakala inganamntwana. 30 Ngokufanako neyesibili 31 neyesithathu yatjhada naye. Wolikhomba atjhada naye; kodwana ahlongakala anganabantwana. 32 Emaswapheleni umfazi loyo wahlongakala. 33 Alo-ke ekuvusweni kwabafileko, uzokuba mkabani? Ngombana wolikhomba bewatjhade naye.”
34 UJesu wathi kibo: “Abantwana bephaseli bayatjhada begodu bendiswe 35 kodwana labo abazakufunyanwa balungele ukufumana ukuphila kwesikhathi esizako nokuvuka kwabahlongakeleko, abatjhadi begodu abendiswa.+ 36 Eqinisweni, angekhe basahlongakala ngombana banjengeengilozi begodu babantwana bakaZimu ngokuba bantwana bevuko. 37 Kodwana ukuthi abafileko bayavuswa, ngitjho noMosi wakwambula endabeni yomuthi wameva, nakabiza uJehova* ngokuthi, ‘nguZimu ka-Abrahama noZimu ka-Isaka noZimu kaJakopo.’+ 38 AkasinguZimu wabafileko kodwana ungewabaphilako ngombana boke bayaphila kuye.”*+ 39 Abanye babatloli bathi: “Mfundisi, ukhulume kuhle.” 40 Ngombana azange basaba nesibindi sokumbuza ngitjho nombuzo munye tere.
41 Yena wababuza wathi: “Kuza njani bathi uKrestu uyindodana kaDavida?+ 42 Ngombana encwadini yamaRhubo uDavida ngokwakhe uthi, ‘UJehova* wathi eKosinami: “Hlala ngesidleni sami 43 bekube kulapho ngibeka amanabakho bona abe ngaphasi kweenyawo zakho.”’+ 44 Ngalokho uDavida umbiza ngokuthi Kosi; yeke kuza njani ayindodanakhe?”
45 Kuthe boke abantu basalalele, uJesu wathi ebafundini bakhe: 46 “Yelelani abatloli abathanda ukukhambakhamba bambethe iimphuraphura, abathanda ukulotjhiswa eendaweni zokuthengisela nokuhlala eenhlalweni eziphambili ngemasinagogeni neendaweni ezikhethekileko eminyanyeni,+ 47 abadlelezela izindlu zabahlolokazi,* benza imithandazo emide bona babukwe. Laba bazokufumana isigwebo esikhulu khulu.”
21 Njengombana uJesu aqale amabhoksi womnikelo, wabona abantu abanjingileko baphosela iminikelwabo kiwo.+ 2 Wabona nomhlolokazi otlhagileko aphosela iimpaparwana ezimbili zenani eliphasi khulu,*+ 3 wathi: “Ngiqinisile ngithi kini, umhlolokazi otlhagileko lo uphosele ukubadlula boke.+ 4 Ngombana boke banikele banghwatha emnothwenabo kodwana yena, ekutlhageni kwakhe, unikele ngakho koke ebekangaphila ngakho.”+
5 Ngokukhamba kwesikhathi abanye nabakhuluma ngethempeli, indlela ebelikghatjiswe ngayo ngamatje amahle nangezinto ezinikelwe kuZimu,+ 6 wathi: “Malungana nezinto enizibonakwezi, kuzokufika isikhathi lapho kungeze kwatjhiywa ilitje phezu kwelinye lingagirizelwa phasi.”+ 7 Bambuza bathi: “Mfundisi, zizokwenzeka nini izintwezi nokuthi sizokuba yini isibonakaliso sesikhathi izintwezi ezizokwenzeka ngaso?”+ 8 Wathi: “Yelelani bona ningadurhiswa+ ngombana abanengi bazokuza ngegama lami bathi, ‘Nginguye’ begodu ‘Isikhathi sesifikile.’ Ningabalandeli.+ 9 Godu nanizwa ngezipi nangemiguruguru, ningasabi. Ngombana izintwezi kufuze zenzeke qangi kodwana ukuphela kuzabe kungakafiki.”+
10 Wathi kibo: “Isitjhaba sizokulwa nesitjhaba,+ umbuso ulwe nombuso.+ 11 Kuzokuba nokusikinyeka kwephasi okukhulu, nokutlhayela kokudla nezifo ezibulalako eendaweni ngeendawo;+ kuzokuba nemibono esabekako neembonakaliso ezikulu ezivela ezulwini.
12 “Kodwana ngaphambi kobana koke lokhu kwenzeke, abantu bazonibamba banihlunguphaze,+ banise emasinagogeni nemajele. Nizokusiwa phambi kwamakhosi nababusi ngebanga legama lami.+ 13 Lokho kuzoninikela ithuba lokobana nifakaze. 14 Yeke, kubekeni eenhliziyweni zenu ukuthi ningahleli kusese nesikhathi ukuthi nizozivikela njani,+ 15 ngombana ngizoninikela amezwi nokuhlakanipha abaphikisi benu boke abangekhe bakghone ukuwaphikisa.+ 16 Ukungezelela kilokho, nizokukghatjhelwa ngitjho nababelethi benu, abafowenu, iinhlobo nabangani begodu bazokubulala abanye benu,+ 17 nizokuhloywa babantu boke ngebanga legama lami.+ 18 Kodwana asikho nasinye isihluthu seenhloko zenu esizokutjhabalala.+ 19 Ngokukghodlhelela kwenu nizokusindisa ukuphila kwenu.+
20 “Nanibona iJerusalema libhodwe mabutho,+ yazini ukuthi ukutjhatjalaliswa kwalo sekutjhidele.+ 21 AbaseJudiya ababalekele eentabeni,+ abaphakathi kwalo abakhambe nabasemaphandleni abangangeni kilo 22 ngombana lesi sikhathi sokuletha ubulungiswa* ukwenzela bona zoke izinto ezitloliweko zizaliseke. 23 Maye! Ebafazini abasidisi nabamunyisako ngesikhatheso!+ Kuzokuba nesizi elikhulu enarheni nesijeziso ebantwinaba. 24 Bazokuwa ngobukhali besabula bathunjelwe eentjhabeni zoke;+ iJerusalema lizokugadangelwa phasi ziintjhaba* bekube kulapho iinkhathi ezibekiweko zeentjhaba* sezizalisekile.+
25 “Godu kuzokuba neembonakaliso elangeni,+ enyangeni neenkwekwezini nephasini kuzokuba nesizi leentjhaba zingazi indlela yokuphuma ngebanga lokubhodla kwelwandle nokusilingeka kwalo. 26 Abantu bazokuyatha ngebanga lokusaba nokulindela lokho okuzokwehlakalela iphasi ngombana amandla wezulwini azokusikinywa. 27 Ngemva kwalokho bazokubona iNdodana yomuntu+ iza ngelifu inamandla nephazimulo ekulu.+ 28 Kodwana izintwezi nazithoma ukwenzeka, jamani rwe niphakamise iinhloko zenu ngombana ukutjhatjhululwa kwenu kutjhidele.”
29 Ngalokho wabenzela umfanekiso wathi: “Qalani umuthi wamafeyi nayo yoke eminye imithi.+ 30 Nayitlhurhako, niyabona begodu niyazi ukuthi ihlobo selitjhidele. 31 Nani, nanibona izintwezi zenzeka, yazini ukuthi umBuso kaZimu useduze. 32 Ngiqinisile ngithi kini, isizukulwanesi angekhe sidlule zingakenzeki zoke izintwezi.+ 33 Izulu nephasi kuzokudlula kodwana amezwami angekhe adlule.+
34 “Tjhejani bona iinhliziyo zenu zingadisibezwa kukudla khulu,+ kusela khulu namatshwenyeko wokuphila,+ ilangelo linifikele ningakalindeli 35 njengesifu.+ Ngombana lizokufikela boke abahlala ephasini loke. 36 Nje-ke, hlalani niphapheme,+ ngaso soke isikhathi nibawe+ bona niphumelele ekubalekeleni zoke izintwezi okufuze zenzeke nekujameni phambi kweNdodana yomuntu.”+
37 Emini bekafundisa ethempelini, ebusuku ayokuphumula entabeni ebizwa ngokuthi yiNtaba yama-Oliva. 38 Boke abantu bebeza kuye ekuseni bona bazomlalela ethempelini.
22 Nje-ke umNyanya woBurotho obunganaSibiliso, obizwa ngokuthi yiPhasika,+ bewutjhidela.+ 2 Abaphristi abakhulu nabatloli bebafuna indlela engcono yokumbulala+ ngombana bebasaba abantu.+ 3 Yeke uSathana wangena kuJudasi, okuthiwa ngu-Iskariyodi, obekangomunye wabaliTjhumi namBili,+ 4 yena wakhamba wayokukhulumisana nabaphristi abakhulu nabaphathi bethempeli ngokuthi angamthengisa njani kibo.+ 5 Nabezwa lokho bathaba bebavuma ukumnikela imali yesiliva.+ 6 Naye wavuma, wathoma nokufuna ithuba elihle lokumthengisa kibo, isiqubuthu singekho.
7 Lafika ilanga lomnyanya woBurotho obunganaSibiliso, okulilanga okufuze kwenziwe ngalo umhlatjelo wePhasika;+ 8 uJesu wathuma uPitrosi noJwanisi, wathi: “Khambani niyosilungiselela ukudla iPhasika.”+ 9 Bathi kuye: “Ufuna siyolilungiselela kuphi?” 10 Wathi: “Naningena edorobheni, nizokuhlangana nomuntu ophethe umjeka wamanzi. Mlandeleni ningene ngendlini angena kiyo.+ 11 Nithi kumnikazi wendlu leyo, ‘uMfundisi uthi kuwe: “Ikuphi ikumba yeemvakatjhi engingadlela kiyo iPhasika nabafundi bami?”’ 12 Umuntu loyo uzonitjengisa ikumba ekulu, ephezulu enezinto ezitlhogekako. Lilungiseleni lapho.” 13 Bakhamba bafumana kunjengombana atjhwile, balungiselela iPhasika.
14 Kwathi nakufika isikhatheso, wahlala etafuleni nabapostoli.+ 15 Wathi kibo: “Bengifisa khulu ukudla iPhasikeli nani ngaphambi kobana ngitlhage; 16 ngombana ngiyanitjela, angekhe ngisalidla bekube kulapho lizaliseka emBusweni kaZimu.” 17 Wamukela ikapho, wathokoza uZimu bese wathi: “Thathani lokhu nidluliselane khona 18 ngombana ngithi kini, kusukela nje, angekhe ngisasela iwayini bekufike umBuso kaZimu.”
19 Wabuye wathatha uburotho+ wathokoza uZimu, wabuhlephula, wabanikela bona wathi: “Lokhu kutjho umzimbami,+ ozokunikelwa ngebanga lenu.+ Hlalani nikwenza lokhu bona ningikhumbule.”+ 20 Wenza okufanako nangekapho ngemva kokudla isidlo santambama, wathi: “Ikapho le itjho isivumelwano esitjha+ esiqinisekiswa ngeengazi zami,+ ezizokuphalazwa ngebanga lenu.+
21 “Kodwana qalani, isandla saloyo ongithengisako sinami etafuleni.+ 22 Kwamambala iNdodana yomuntu iyakhamba njengombana kubikezelwe+ nanyana kunjalo, maye! Ngomuntu ezokuthengiswa ngaye.”+ 23 Bathoma ukudemba indaba le babodwa ukuthi kuhlekuhle kungaba ngubani hlangana nabo ozokwenza lokhu.+
24 Godu kwavuka ipikiswano evuthako phakathi kwabo ngokuthi ngubani ongomkhulu kibo boke.+ 25 Kodwana wathi kibo: “Ababusi beentjhaba bakatelela ubukhosi babo phezu kweentjhaba begodu labo abanelawulo phezu kwazo babizwa ngamagama akhethekileko.*+ 26 Nina-ke akukafaneli nibe njalo.+ Omkhulu kini kufuze abe ngomncani kunani noke+ naloyo omrholi wenu abe sisebenzi senu. 27 Ngubani omkhulu, ngiloyo ohlezi etafuleni namkha ngiloyo ophakululako? Akusingiloyo ohlezi etafuleni na? Kodwana mina ngingophakululako phakathi kwenu.+
28 “Nokho, nina nikghodlhelele nami+ ekulingweni kwami;+ 29 yeke ngenza isivumelwano nani njengombana noBaba enze isivumelwano sombuso nami+ 30 bona nidle, nisele etafulenami emBuswenami,+ nihlale neenhlalweni zobukhosi+ nahlulele iinkoro ezili-12 zakwa-Israyeli.+
31 “Simoni, Simoni, qala, uSathana unifuna noke bona anihlunge njengekoroyi.+ 32 Nanyana kunjalo ngikubawele bona ukukholwa kwakho kungapheli+ kodwana wena nawubuyako, uqinise abafowenu.”+ 33 Wathi kuye: “Kosi, ngikulungele ukuya nawe ejele nekufeni.”+ 34 UJesu wathi kuye: “Ngiyakutjela Pitrosi, umkukurumbu angekhe ulile namhlanjesi bekube kulapho sewungiphike kathathu.”+
35 Godu wathi kibo: “Lokha nanginithuma ninganasikhwama semali, somphako namapatlagwana+ azange nitlhoge litho, akusinjalo?” Bathi: “Kunjalo!” 36 Wathi kibo: “Kodwana nje, loyo onesikhwama semali akasithathe nonesikhwama somphako akasithathe, kanti loyo onganasabula akathengise isambatho sakhe ayithenge. 37 Ngiyanitjela bona lokho okutloliweko kufuze kuzaliseke kimi, ukuthi, ‘Wabalwa nabanganamthetho.’+ Ngombana lokho kuyazaliseka malungana nami.”+ 38 Yeke bathi: “Kosi, siphethe iinsabula ezimbili.” Wathi kibo: “Zanele.”
39 Nakasuka lapho, waya eNtabeni yama-Oliva njengombana bekajayele ukwenza njalo, nabafundi bamlandela.+ 40 Nakafika lapho, wathi kibo: “Ragelani phambili nithandaza bona ningangeni esilingweni.”+ 41 Wasuka kibo waya ebangeni elingaba kuphoswa kwelitje, waguqa wathandaza, 42 wathi: “Baba, nangabe uyafuna, susa ikapho le kimi. Nanyana kunjalo, akungenzeki intandwami kodwana akwenzeke yakho.”+ 43 Yeke wabona ingilozi evela ezulwini yamqinisa.+ 44 Kodwana bekatlhuwe khulu kangangobana waragela phambili athandaza ngokudephileko+ nengurumelakhe yaba njengamathosi weengazi awela ehlabathini. 45 Nakaqeda ukuthandaza waya ebafundini bakhe, wabafumana balele, badiniwe ngebanga lesizi.+ 46 Wathi kibo: “Nilaleleni? Vukani niragele phambili nithandaza bona ningangeni esilingweni.”+
47 Asakhuluma, kweza isiqubuthu sidoswa phambili nguJudasi, ongomunye wabaliTjhumi namBili, waya kuJesu wammanga.+ 48 Kodwana uJesu wathi kuye: “Judasi, uthengisa iNdodana yomuntu ngokuyimanga?” 49 Labo ebebanaye nababona ebekuzokwenzeka, bathi: “Kosi, sibarharhabule ngesabula na?” 50 Omunye wabo warharhabula isisebenzi somphristi ophakemeko, wasiqunta indlebe yangesidleni.+ 51 Kodwana uJesu wathi: “Kwanele.” Wathinta indlebaso wayipholisa. 52 Ngemva kwalokho uJesu wathi ebaphristini abakhulu nebaphathini bethempeli nabadala ebebazele ukuzombamba: “Alo-ke, bekufanele nize niphethe iinsabula neembhuku ngathi nizokubamba isilelesi?+ 53 Ngesikhathi nginani ethempelini mihla namalanga,+ akhenge ningibambe.+ Kodwana lesi sikhathi senu namandla wobumnyama.”+
54 Bambopha bakhamba naye,+ bamusa emzini womphristi ophakemeko; kodwana uPitrosi bekalandela akudanyana.+ 55 Babasa umlilo ngaphakathi kwesirhodlo bahlala phasi ndawonye noPitrosi bekahlangana nabo.+ 56 Umntazana osisebenzi wambona njengombana ahlezi ngemkhanyweni womlilo, wamqalisisa wathi: “Indoda le nayo beyinaye.” 57 Kodwana waphika, wathi: “Mfazi, angimazi umuntu loyo.” 58 Ngemva kwesikhatjhana omunye umuntu wambona wathi: “Nawe ungomunye wabo.” UPitrosi wathi: “Mfo, angisinguye.”+ 59 Ngemva kwe-iri, omunye umuntu watjho bewagandelela athi: “Kwamambala indoda le beyinaye ngombana eqinisweni, imGalile!” 60 UPitrosi wathi: “Mfo, angiyazi into okhuluma ngayo le.” Asakhuluma, umkukurumbu walila. 61 IKosi yajika yaqala uPitrosi, uPitrosi wakhumbula amezwi weKosi nayithi kuye: “Ngaphambi kobana umkukurumbu ulile namhlanjesi, uzabe ungiphike kathathu.”+ 62 Waphumela ngaphandle wakhihla isililo esibuhlungu.
63 Abantu ebebabambe uJesu bathoma ukuhlekisa ngaye,+ bambetha;+ 64 bamgubuzesa ubuso, basolo bathi kuye: “Phorofida! Ngubani okubethileko?” 65 Bamhlambalaza nangokutjho ezinye izinto ezinengi.
66 Nakusako, umkhandlu wamadoda amadala wesitjhaba, ohlanganisa abaphristi abakhulu nabatloli, wabuthana ndawonye,+ wamusa ewolweni lawo leSanhedrini wathi: 67 “Nangabe unguKrestu, sitjela.”+ Kodwana wathi kibo: “Ngitjho nanyana nginganitjela, angekhe nikholwe. 68 Godu nanginganibuza, angekhe niphendule. 69 Nokho, kusukela nje iNdodana yomuntu+ izabe ihlezi esandleni sokudla sakaZimu esinamandla.”+ 70 Nabezwa lokho boke bathi: “Alo-ke, uyiNdodana kaZimu na?” Wathi kibo: “Nina ngokwenu niyatjho ukuthi ngingiyo.” 71 Bathi: “Sisabufunelani obunye ubufakazi? Ngombana sizizwele akutjho ngomlomakhe.”+
23 Ngalokho isiqubuthu sasikima soke, samusa kuPilatu.+ 2 Sambeka umlandu,+ sathi: “Sifumene umuntu lo adurhisa isitjhaba sethu, angavumi bona abantu babhadele umthelo kuKhesari+ begodu athi yena unguKrestu ikosi.”+ 3 UPilatu wambuza wathi: “UyiKosi yamaJuda na?” Wamphendula wathi: “Wena ngokwakho uyatjho.”+ 4 UPilatu wathi ebaphristini abakhulu nesiqubuthwini: “Umuntu lo akanamlandu.”+ 5 Kodwana baphikelela bathi: “Uhlangahlanganisa abantu ngokufundisa kiyo yoke iJudiya, uthome eGalile bewafika nalapha.” 6 Nakezwa lokho, uPilatu wabuza ukuthi umuntu lo umGalile na. 7 Ngemva kokuqinisekisa bona bekangaphasi kwesifunda esibuswa nguHerode,+ wamthumela kuHerode naye obekaseJerusalema ngesikhatheso.
8 UHerode nakabona uJesu, wathaba khulu. Besele kusikhathi eside afuna ukubona uJesu ngombana ezwe okunengi ngaye+ begodu bekanethemba lokubona eminye yemikarisomraro eyenziwa nguye. 9 Wamphenya ngemibuzo eminengi kodwana akhenge amphendule.+ 10 Abaphristi abakhulu nabatloli bebasolo basikima baphikelela ngekani bambeka umlandu. 11 UHerode namasotjakhe akhenge bamphathe ngehlonipho+ begodu wahlekisa ngaye+ ngokumbathisa isambatho esihle bese wambuyisela kuPilatu. 12 Kusukela ngelangelo uHerode noPilatu bathoma ukuba bangani ngombana ngaphambilini bebamanaba.
13 Yeke uPilatu wabizela ndawonye abaphristi abakhulu, ababusi nabantu 14 wathi kibo: “Nilethe umuntu lo kimi nithi uhlohlozela abantu bona bavukele umbuso. Ngimphenyisise phambi kwenu kodwana ngangafumana iinsekelo zemilandu enimbeka yona.+ 15 Kuhlekuhle noHerode akhenge amfumane amlandu ngombana umbuyisele kithi; akakenzi litho elimenza afanelwe kukufa. 16 Yeke ngizomjezisa+ bese ngiyamtjhaphulula.” 17 *—— 18 Kodwana soke isiqubuthu sarhuwelela sathi: “Qeda ngomuntu lo, usitjhaphululele uBharabhasi!”+ 19 (Indoda le yavalelwa ejele ngebanga lokuvukela umbuso okwenzeke ngedorobheni nokubulala.) 20 UPilatu wakhuluma naso godu ngombana bekafuna ukutjhaphulula uJesu.+ 21 Sathoma ukurhuwelela, sathi: “Akabulawelwe esigodweni! Akabulawelwe esigodweni!”+ 22 UPilatu wathi kiso kwesithathu: “Kubayini? Ngibuphi ubumbi obenziwe mumuntu lo? Angikafumani litho kuye elimenza afanelwe kukufa; ngalokho ngizomjezisa bese ngimtjhaphulule.” 23 Isiqubuthu nasizwa lokho sarhagala ngokurhuwelela khulu sakatelela ukuthi abulawe,* besakuthola esikufunako.+ 24 Nje-ke uPilatu wenza isiqunto sokuthi senzelwe esikufunako. 25 Watjhaphulula umuntu obekafunwa ngiso, obekavalelwe ngejele ngebanga lokuvukela umbuso nokubulala kodwana wasinikela uJesu bona senze esikufunako.
26 Nasisakhamba naye, sabamba uSimoni othileko weSirene, obekavela endaweni yemakhaya, sabeka isigodo sokuhlunguphazwa* kuye bona asithwale ngemva kwakaJesu.+ 27 Bekunesiqubuthu sabantu ebesimlandela, nabafazi ebebalokhu batlhuwile begodu bamlilela. 28 UJesu wajika waqala abafazaba wathi: “Madodakazi weJerusalema, lisani ukungililela. Kunalokho zilileleni nina nabantwabenu+ 29 ngombana isikhathi siyeza lapho abantu bazokuthi khona, ‘Bayathaba abafazi abaziinyumba, iimbeletho ezingakhenge zibelethe namabele angakhenge amunyise!’+ 30 Bazokuthoma bathi eentabeni, ‘Welani phezu kwethu!’ Nemibundwini bathi, ‘Sigubuzesani!’+ 31 Nangabe benza izintwezi lokha umuthi nawuhlaza, kuzokwenzekani nasele utjhwabile?”
32 Amanye amadoda amabili aziinlelesi, nawo bewaragwa bona ayokubulawa naye.+ 33 Nabafika endaweni ekuthiwa yiKhakhayi,+ bambethela esigodweni aphahlwe ziinlelesi, esinye ngesidleni esinye ngesinceleni.+ 34 Kodwana uJesu bekathi: “Baba, balibalele ngombana abakwazi abakwenzako.” Ngaphezu kwalokho, bahlukaniselana izambatho zakhe ngefumbe.+ 35 Abantu bebajamile babukele. Kodwana ababusi bebahlekisa ngaye bathi: “Abanye wabasindisa; akazisindise nangabe unguKrestu kaZimu, oKhethiweko.”+ 36 Ngitjho namasotja bekahlekisa ngaye, aya kuye afuna nokumnikela iwayini elimunyu+ 37 athi: “Nangabe uyiKosi yamaJuda, zisindise.” 38 Godu ngehla kwakhe bekunomtlolo othi: “Le yiKosi yamaJuda.”+
39 Esinye seenlelesi ebesilenga lapho sathoma ukukhuluma kumbi kuye,+ sathi: “UnguKrestu, akusinjalo? Zisindise-ke, usindise nathi!” 40 Esinye sasikhalima sathi: “Awumsabi nakancani uZimu na njengombana nawe ufumene isigwebo esifanako? 41 Thina sisifanele ngombana sifumana lokho okusifaneleko ngebanga lezinto esizenzileko kodwana indoda le akunalitho elimbi elenzileko.” 42 Ngemva kwalokho sathi: “Jesu, ungikhumbule nawufika emBuswenakho.”+ 43 Wathi kiso: “Ngiqinisile ngithi kuwe namhlanjesi, uzokuba nami ePharadesi.”+
44 Besele kuyisimbi ye-12 ngamadina,* inarha yoke yagubuzeswa bumnyama bekwaba yisimbi yesithathu ntambama*+ 45 ngombana ukukhanya kwelanga kwafiphala; ngemva kwalokho irharideni lethempeli+ latleruka phakathi.+ 46 UJesu warhuwelela ngelizwi elikhulu wathi: “Baba, ngibeka ummoyami ezandleni zakho.”+ Ngemva kokutjho lokhu, wahlongakala.*+ 47 Nakabona lokhu okwenzekileko, umphathi wamabutho wathoma ukudumisa uZimu, wathi: “Kwamambala, indoda le beyilungile.”+ 48 Soke isiqubuthu ebesibuthene lapho sizokubukela, nasibona izinto ezenzekileko, sabuyela emakhaya sizibetha eemfubeni ngebanga lokuba lisizi. 49 Boke abajayelene naye bebajamele kudanyana. Nabafazi ebebamphekelele ukusuka eGalile bebalapho babona izintwezi.+
50 Khonapho bekunendoda ekuthiwa nguJosefa, elilunga loMkhandlu, bekuyindoda enomusa nelungileko.+ 51 (Indoda le akhenge ivowudele ukusekela iqhinga nezenzo zabo.) Beyivela e-Arimathiya, idorobho lamaJudiya begodu beyilindele umBuso kaZimu. 52 Indoda le yaya kuPilatu yabawa isidumbu sakaJesu. 53 Yasehlisa,+ yasiphuthela ngetjhila lelineni esezingeni eliphezulu, yasilalisa ethuneni eligobhodlhwe edwaleni,+ ekungakhenge kulaliswe muntu kilo. 54 Bekulilanga lokuLungiselela+ begodu iSabatha+ beselizokuthoma. 55 Abafazi abasuke naye eGalile nabo balandela baqala ngethuneni babona ukuthi isidumbu sakhe silaliswe njani,+ 56 babuyela emuva bayokulungiselela iinthako namafutha anuka kamnandi. Kodwana baphumula ngeSabatha+ ngokuvumelana nomthetho.
24 Ngelanga lokuthoma leveke, baya ethuneni ekuseni khulu, baphethe amakha abawahlanganisileko.+ 2 Kodwana bafumana ilitje lisusiwe ethuneni,+ 3 nabangenako akhenge basifumane isidumbu seKosi uJesu.+ 4 Nabasararwe ngilokho, amadoda amabili ambethe izambatho eziphazimulako ajama hlanu kwabo. 5 Abafazabo bathukwa basolo baqale phasi, yeke amadoda lawo athi kibo: “Kubayini nifuna ophilako hlangana nabafileko?+ 6 Akakho lapha, uvusiwe. Khumbulani bona wathini kini nakaseGalile, 7 nakathi iNdodana yomuntu kufuze inikelwe ebantwini abazizoni bese ibulawelwe esigodweni, ivuswe ngelanga lesithathu.”+ 8 Bawakhumbula amezwakhe,+ 9 nababuya ethuneni babikela abali-11 nabanye koke okwenzekileko.+ 10 BekunguMariya Marhdalina, uJwana, uMariya unina kaJakopo nabanye abafazi ebebanabo bebatjela abapostoli okwenzekileko. 11 Akhenge babakholwe abafazaba. Bacabanga ukuthi bayazithomela.
12 UPitrosi wasikima wagijimela ethuneni wakhothama, waqala ngaphakathi, wabona amatjhila welineni kwaphela. Wakhamba, azibuza ukuthi kwenzekeni.
13 Khona mhlokho ababili babo bebakhamba baya endaweni ebizwa ngokuthi yi-Emawusi, engaba makhilomitha ali-11* ukusuka eJerusalema, 14 bebacoca ngazo zoke izinto ezenzekileko.
15 Njengombana bacoca, bakhuluma ngezintwezi, uJesu watjhidela wakhambisana nabo, 16 kodwana akhenge bakghone ukubona ukuthi nguye.+ 17 Wathi kibo: “Niphikisana ngani njengombana nikhamba nje?” Bajama rwe! Badanile. 18 Nakaphendulako omunye okuthiwa nguKleyopasi wathi kuye: “Kghani umumuntu ovela kwenye inarha ohlala yedwa eJerusalema, awazi* nezinto ezenzeke amalanga la?” 19 Wababuza wathi: “Ziphi izinto?” Bathi kuye: “Izinto eziphathelene noJesu umNazaretha,+ ebekamphorofidi onamandla ngezenzo nangamezwi phambi kwakaZimu nakibo boke abantu,+ 20 nendlela abaphristi abakhulu nababusi abamnikela ngayo bona agwetjelwe ukufa,+ bebambethela esigodweni. 21 Kodwana besinethemba lokobana indoda le ngiyo ezokutjhaphulula u-Israyeli.+ Nangaphezu kwalokho, sekulilanga lesithathu lokhu kwenzekile. 22 Abanye abafazi hlangana nathi basirarile ngombana baye ethuneni ekuseni+ 23 bafumana isidumbu sakhe singekho, babuya bathi babone iingilozi ezithe uyaphila. 24 Abanye ebebanathi bayile ethuneni,+ bafumana kunjengombana abafazaba batjhwile kodwana akhenge bambone.”
25 Wathi kibo: “Nina eninganangqondo nenibuthaka eenhliziyweni bona nikholelwe zoke izinto abaphorofidi abazikhulumako! 26 Bekungatlhogeki na ngoKrestu ukutlhaga ngazo zoke izintwezi+ bese angene ephazimulwenakhe?”+ 27 Athoma ngoMosi nangabo boke abaPhorofidi,+ wabahlathululela bona kwathiwani ngaye kiyo yoke imiTlolo.
28 Emaswapheleni bafika eduze nendawo ebebaya kiyo, wenza ngasuthi uyadlula. 29 Kodwana bamrabhela bona angakhambi, bathi: “Hlala nathi ngombana nelanga selizokutjhinga.” Yeke wangena wahlala nabo. 30 Njengombana ahlezi nabo etafuleni, wathatha uburotho, wabubusisa, wabuhlephula, wabanikela bona.+ 31 Khonokho amehlwabo avuleka babona ukuthi ungubani kodwana wanyamalala.+ 32 Bathi komunye nomunye: “Kungebangelo amezwakhe asithinta iinhliziyo kangaka nakakhuluma nathi endleleni njengombana bekasihlathululela kuhle* imiTlolo!” 33 Basikima khonokho babuyela eJerusalema, bafumana abali-11 nalabo ebebanabo bahlangene ndawonye, 34 bathi: “Kwamambala iKosi ivusiwe begodu ibonakele kuSimoni!”+ 35 Yeke batjho izenzakalo ezenzeke endleleni nokuthi balemuke njani ukuthi nguye nakahlephula uburotho.+
36 Nabasakhuluma izintwezi, uJesu wajama phakathi kwabo wathi: “Ukuthula akube nani.”+ 37 Ngombana bebathukiwe, bacabanga ukuthi babona isibunjwa sommoya. 38 Wathi kibo: “Kubayini nitshwenyekile begodu kubayini ningabaza eenhliziyweni zenu? 39 Qalani izandla neenyawo zami, ngimi; ngikghwathani nizizwele ngombana isibunjwa sommoya asinanyama namathambo njengombana ningibona.” 40 Nakatjho lokhu, wabakhombisa izandla neenyawo zakhe. 41 Bangakholwa ngebanga lethabo nokurareka, wathi kibo: “Ninokudliwako na?” 42 Bamnikela isiqetjhana sehlambi ebasiweko, 43 wasithatha wasidla phambi kwabo.
44 Wathi kibo: “La mamezwi engawatjho kini lokha ngisesenani,+ ukuthi zoke izinto ezitlolwe ngami emThethweni kaMosi nakubaPhorofidi namaRhubo kufuze zizaliseke.”+ 45 Wavula imikhumbulwabo ngokuzeleko bona bazwisise lokho okutjhiwo miTlolo,+ 46 wathi kibo, “Lokhu ngilokho okutloliweko: ukuthi uKrestu uzokutlhaga, avuswe kwabahlongakeleko ngelanga lesithathu+ 47 begodu ngesisekelo segama lakhe, umlayezo wokutjhuguluka ngokulitjalelwa kwezono+ uzokutjhunyayelwa kizo zoke iintjhaba,+ ukusuka eJerusalema.+ 48 Nizokuba bofakazi balokhu.+ 49 Qalani, nginithumela lokho uBaba akuthembisileko. Yeke hlalani edorobheni bekube kulapho nifumana amandla avela phezulu.”+
50 Wabadosa phambili wakhamba nabo bebayokufika eBhethaniya, waphakamisa izandla zakhe wababusisa. 51 Njengombana ababusisa, wasuswa kibo wakhutjhulelwa ezulwini.+ 52 Bamkhothamela babuyela eJerusalema bathabe khulu.+ 53 Bebasolo basethempelini, badumisa uZimu.+
Qala Ihlathululo.
Qala Isith. A5.
Qala Isith. A5.
Qala Isith. A5.
Qala Isith. A5.
Qala Isith. A5.
Qala Isith. A5.
Qala Isith. A5.
Qala Isith. A5.
Qala Isith. A5.
Qala Isith. A5.
Qala Isith. A5.
Qala Ihlathululo.
Qala Isith. A5.
NgesiGirigi, “nenzalwenakhe.”
Qala Isith. A5.
Qala Isith. A5.
Qala Isith. A5.
Namkha “iphondo lephuluso.” Qala Ihlathululo, “Iphondo.”
Qala Isith. A5.
Qala Isith. A5.
Qala Isith. A5.
Qala Isith. A5.
Qala Isith. A5.
Qala Isith. A5.
NgesiGirigi, “Elinye nelinye iduna elivula isibeletho.”
Qala Isith. A5.
Qala Isith. A5.
Qala Isith. A5.
NgesiGirigi, “kusukela ebuntombini bakhe.”
Qala Isith. A5.
Kutjho uHerode Antiphasi. Qala Ihlathululo.
NgesiGirigi, “umtetrarerhesi.”
Qala Isith. A5.
Qala Isith. A5.
Qala Isith. A5.
Qala Isith. A5.
Qala Isith. A5.
Qala Ihlathululo.
Namkha “owalatjhwa.”
NgesiHebheru, “bekakhuluma njengomuntu onelungelo lokulawula.”
Namkha kungenzeka “bewamazi ukuthi ungubani.”
“Ilitsha leGenezaretha” bekungelinye igama “lelwandle leGalile.”
Qala Isith. A5.
Namkha “ngehlaka, ngesitretjhara.”
Imigodlana le beyenziwa ngesikhumba.
Namkha “uburotho bombukiso.”
Namkha “erholophele.”
Namkha “umphefumulo.”
Kutjho ukubolekisa ungalindeli amakonyana.
Abantu bangeenkhathezo bebenza isikhwama eemfubeni zabo ngokusonga isambatho sabo. Bebamukela begodu bathwale izinto ngaso.
Namkha “isinqophiso.”
Qala Isith. B14.
Qala umtlolo waphasi kuMatewu 26:53.
NgesiGirigi, “nesiliva.”
NgesiHebheru, “ngitjho nezambatho ezimbili.”
Kutjho uHerode Antiphasi. Qala Ihlathululo.
NgesiGirigi, “umtetrarerhesi.” Ikosana yesifunda sombusi weRoma.
Qala Ihlathululo.
NgesiGirigi, “besekazokuzaliseka.”
Eminye imitlolo yakade ithi “abama-72.”
Namkha “ningasingathi muntu nanilotjhisako.”
NgesiGirigi, “eHayidesi.”
Eminye imitlolo yakade ithi “abama-72.”
Qala Isith. A5.
Qala Ihlathululo.
Qala Isith. B14.
Namkha “ingcenye ehle.”
Namkha “aliphathwe ngokucwengeka.”
NgesiGirigi, “abasikolodako.”
Igameli liqaliselwe kuSathana.
NgesiGirigi, “limbi.”
Kutjho ukuhlamba ngokwesiko.
Qala Ihlathululo.
Namkha “namathuna asikhumbuzo.”
Namkha “angakatlolwa.”
Namkha “zizokufunwa.”
Namkha “zizokufunwa.”
Qala Ihlathululo.
Utunwana yinyoni encani khulu, waziwa nangokuthi nguncede.
NgesiGirigi, “ngama-asariyoni amabili.” Qala Isith. B14.
Namkha “emasinagogeni.”
NgesiGirigi, “ngekhubhithi yinye,” isilinganiso esingalingana nobude bomkhono womuntu. Qala Isith. B14.
Kusukela pheze ngesimbi ye-9 ebusuku ukuya phakathi nobusuku.
Kusukela phakathi nobusuku ukuya pheze ngesimbi yesi-3 ekuseni.
Namkha “yenze ngokuvumelana nentandwayo.”
Namkha “elirholophazako.”
NgesiGirigi, “neenlinganiso zamaseya.” Iseya belilingana namalitha ayi-7.33. Qala Isith. B14.
Namkha “akucabangeki.”
Qala Isith. A5.
NgesiNgisi kuthiwa yi-dropsy namkha yi-edema, ukugcwala kwamanzi emzimbeni.
Namkha “angathandi kancani.”
Qala Ihlathululo.
Namkha “ongatjhiyi.”
NgesiGirigi, “oneenhlamvu zedrakma.” Iinhlamvezo bezilingana nomrholo wamalanga alitjhumi. Qala Isith. B14.
Qala Isith. B14.
NgesiGirigi, “wawela entanyenayo.”
Namkha “aphephile.”
NgesiGirigi, “elinonisiweko.”
Namkha “beyinomphathi wendlu.”
Igagogo linye belimalitha ama-22. Qala Isith. B14.
Umgodla munye bewumakhilogremu ali-170. Qala Isith. B14.
Namkha “ngobuqili.”
NgesiGirigi kusetjenziswe ibizo eliqalisela emuntwini otjhadileko oya emabhayini nomuntu angakatjhadi naye.
NgesiGirigi, “iHayidesi.” Qala Ihlathululo.
Qala App. A3.
NgesiGirigi kusetjenziswe ibizo eliqalisela emuntwini otjhadileko oya emabhayini nomuntu angakatjhadi naye.
NgesiHebheru, kusetjenziswe ibizo eliqalisela emuntwini otjhadileko oya emabhayini nomuntu angakatjhadi naye.
Namkha “wesikhamore.”
Namkha “engiyidlelezele ngokumangalela ngamanga.”
Umina wamaGirigi bewumagremu ama-340 begodu bewulingana pheze nomrholo weenyanga ezintathu (pheze amadrakma ali-100.) Qala Isith. B14.
NgesiGirigi, “isiliva.”
NgesiGirigi, “isiliva lami.”
Qala Isith. A5.
Namkha “zikugandelele.”
NgesiGirigi, “ilitje eliyihloko yekhona.” Ilitjeli libekwa phezulu ekhoneni ukuhlanganisa amaboda amabili bona aqine.
Qala Isith. B14.
Qala Isith. A5.
Namkha “ngokombonwakhe.”
Qala Isith. A5.
Namkha “ipahla yabahlolokazi.”
NgesiGirigi, “ama-lepta amabili.” Ama-lepta amabili bekamrholo owufumana nawenze umsebenzi wemizuzu engaba li-10. Qala Isith. B14.
Namkha “amalanga wepindiselo.”
Namkha “ngabangasimaJuda.”
Namkha “zabangasimaJuda.”
Amagama akhethekileko la aqalisele eziqwini zokuhlonipha lezo abantu abazinikela labo abenzela abanye izinto.
Qala App. A3.
Namkha “akabulawelwe esigodweni.”
Qala Ihlathululo.
NgesiGirigi, “bekuyisimbi yesithandathu.” Nawubala kusukela ekuphumeni kwelanga.
NgesiGirigi, “bekwaba yisimbi yethoba.” Nawubala kusukela ekuphumeni kwelanga.
Namkha “wadosa umoya kwamaswaphela.”
Ibanga elingaba mamayela alikhomba. NgesiGirigi, “amastadiyu angaba ma-60.” Qala Isith. B14.
Namkha kungenzeka “Inga-kghani nguwe kwaphela isivakatjhi eJerusalema esingaziko?”
Namkha “bekasivulela.”