Isifundo 3

Kufuneka Ufunde NgoZimu

Newuzakuba mngani kaZimu, kufuneka ufunde ngaye. Abangani bakho bayalazi ibizo lakho, bayaliberegisa? Iye bayalazi, bayaliberegisa. NoZimu ufuna wazi bewuberegise ibizo lakhe. Ibizo lakaZimu nguJehova. (AmaRhalani 83:18; Matewu 6:9) Kufuneka godu ufunde bonyana uthandani nokuthi uhloyani. Kufuneka godu wazi bonyana bobani abangani bakhe nokobanyana bobani amanabakhe. Kuthatha isikhathi ukwazi umuntu. IBhayibhili ithi kukuhlakanipha ukubekela eqadi isikhathi sokufunda ngoJehova.—kwebe-Efesu 5:15, 16.

Abangani bakaZimu benza okumthabisako. Cabanga ngabangani bakho. Newubaphatha kumbi wenza nezinto abazihloyileko, bangaragela phambili babangani bakho? Ngeze! Ngendlela efanako, newufuna ukuba mngani kaZimu, kufuneka wenze okumthabisako.—Jwanisi 4:24.

Akusizo zoke iinkolo ezidosela ebunganini noZimu. UJesu, oyirhara nomncamo noZimu, wakhuluma ngeendlela eembili. Enye ibanzi beyizele abantu. Indlela leyo iyisa ekutjhatjalalisweni. Enye indlela incancani, begodu nabantu abakhamba kiyo bancancani. Indlela leyo iyisa ekuphileni okungapheliko. Lokhu kutjho bonyana newufuna ukuba nobungani noZimu, kufuneka ufunde indlela elungileko yokumkhulekela.—Matewu 7:13, 14.