Isifundo 6
Ipharadeyisi Litjhidele!
Iintwezimbi ezenzeka ephasini kwanjesi zitjengisa bonyana iPharadeyisi litjhidele. IBhayibhili yatjho bonyana sizakubona ngeenkhathi ezithusako ngaphambi kobanyana kufike iPharadeyisi. Siphila eenkhathini ezinjalo namhlanjesi! Nanzi ezinye izinto iBhayibhili eyathi zizakwenzeka:
Izipi ezikulu. “Imibuso izakuvukelana.” (Matewu 24:7) Isiphorofidwesi sizalisekile. Kusukela ngonyaka ka 1914, kwaba nezipi eembili ezikulu zephasi nezinye ezinengi ezincani. Kwahlongakala iingidi zabantu kizo.
Ukurhatjheka kwamalwelwe. Kuzakuba “nokugula kizo zoke iindawo.” (Luka 21:11) Kwazaliseka lokhu? Iye. Ikankere, ubulwelwe behliziyo, isifuba, imalariya, intumbantonga, namanye amalwelwe abulele iingidi zabantu.
Ukutlhogeka kokudla. Ephasini zombelele kunantu abanganakudla okwaneleko. Qobe nyaka kuneengidi zabantu ezibulawa yindlala. Leli ngelinye itshwayo lokobanyana iPharadeyisi lizakufika msinyana. IBhayibhili ithi: “Kuzaba nendlala.”—Markosi 13:8.
Ukusikinyeka kwephasi. “Kuzaba khona . . . nokuzamazama kwephasi kiyo yoke indawo.” (Matewu 24:7) Lokhu nakho kuzalisekile esikhathini sethu. Abantu abangaphezu kweengidi bahlongakele ekusikinyekeni kwephasi kusuka ngonyaka ka-1914.
Abantu abambi. “Abantu bayorhubhela ngeenkhwanyeni zabo, bayorhuluphalela imali.” Kuyokuba “nabathanda iinjabulo kunobanyana bathande uZimu.” Abantwana “banyaze abazali babo.” (2 kuThimothi 3:1-5) Awuvumi bonyana banengi abantu abanjengalaba namhlanje? Abamhloniphi uZimu, bababangela imiraro labo abalinga ukufunda ngoZimu.
Ubulelesi. “Kuzakuba kukwanda kokukhohlakala.” (Matewu 24:12) Ngokulindelekileko uzakuvuma bonyana ubulelesi bandile kunesikhathi esidlulileko. Abantu kizo zoke iindawo basengozini yokudlelezelwa, ukukhohliswa, namtjhana ukulinyazwa.
Zoke iintwezi zitjengisa bonyana uMbuso kaZimu utjhidele. IBhayibhili ithi: “Lokha nanibona izintwezi zisenzeka, nizakwazi bona umbuso kaZimu sewuzakwiza.” (Luka 21:31) Uyini uMbuso kaZimu? Ngurhulumende kaZimu wezulwini ozakuletha iPharadeyisi ephasineli. UMbuso kaZimu uzokususa aborhulumende babantu.—Danyela 2:44.