Isifundo 15

Abangani BakaZimu Benza Okulungileko

Newunomngani okukarako nomhloniphako, ulinga ukufana naye. “UJehova muhle ulungile,” kutjho iBhayibhili. (AmaRhalani 25:8) Nesizakuba bangani bakaZimu, kufuneka sibe babantu abahle nabalungileko. IBhayibhili ithi: “Njengombana nibantwana abathandekako bakaZimu, kufanele bona nibe njengaye, ipilo yenu ifanele ibuswe lithando.” (Kwebe-Efesu 5:1, 2) Nanzi ezinye iindlela zokwenza lokho:

Iba lirhelebho kwabanye. “Asenze okulungileko kibo boke.”—KwebeGalatiya 6:10.

Berega nzima. “Owebako akalise ukweba, enze imisebenzi emihle ngezandla zakhe.”—Kwebe-Efesu 4:28.

Bulunga ukuhlanzeka emzimbeni nekuziphatheni. ‘Asizihlanze kikho koke okusilapheleko emzimbeni nemoyeni, siphile ipilo ecwengileko sisesaba uZimu.’—2 kwebeKorinte 7:1.

Phatha amalungu womndenakho ngethando nangehlonipho. “Ngileyo naleyondoda ayithande umkayo njengombana izithanda yona, kodwana umfazi ahloniphe indoda yakhe. Bantwana, thobelani abazali benu.”—Kwebe-Efesu 5:33–6:1.

Tjengisa ithando kwabanye. “Asithandaneni, ngombana ithando livela kuZimu.”—1 KaJwanisi 4:7.

Thobela imithetho yenarha. “Ngiloyo naloyo akathobele umbuso . . . Banikeleni okubafaneleko, khuphani umthelo kofanele umthelo.”—KwebeRoma 13:1, 7.