Isifundo 18
Yiba Mngani KaZimu Ngokungapheliko!
Kufuna umzamo ukwenza ubungani; kufuna umzamo ukubulunga ubungani. Umzamo wakho wokuba begodu nokubulunga ubungani noZimu uzakubusiswa khulu. UJesu wathi kilabo abakholelwa kuye: “Iqiniso lizanitjhaphulula.” (KaJwanisi 8:32) Kutjho ukuthini lokho?
Ungathabela itjhaphuluko kwanje. Ungatjhaphuluka eemfundisweni zamanga begodu nemangeni arhatjhwe nguSathana. Ungatjhaphuluka ekungabini nethemba okuzalise amaphilo weengidi zabantu abangamaziko uJehova. (KwebeRoma 8:22) Abangani bakaZimu batjhaphulukile ‘ekusabeni ukufa.’—KumaHebheru 2:14, 15.
Ungathabela itjhaphuluko ephasini lakaZimu elitjha. Itjhaphuluko ekarisa kangangani ongayithabela esikhathini esizako! EPharadeyisini ephasini, kuzakuba netjhaphuluko epini, ekuguleni, begodu nebulelesini. Itjhaphuluko ebuqhakeni nendlaleni. Itjhaphuluko ekuluphaleni nekuhlongakaleni. Itjhaphuluko ekusabeni, ekugandelelweni, begodu nekungalungini. IBhayibhili ithi ngoZimu: “Uvula isandla sakho wanelise isifiso sakho koke okuphilako.”—AmaRhalani 145:16.
Abangani bakaZimu bazokuphila ngokungapheliko. Ukuphila okungapheliko sisipho esiyigugu uZimu azosinikela boke labo abafuna ukuba bangani bakhe. (KwebeRoma 6:23) Akhese ucabange bonyana ukuphila okungapheliko kuzakutjho ukuthini kuwe!
Uzakuba nesikhathi sokwenza izinto ezinengi. Mhlomunye uzakuthanda ukwazi ukudlala iinliliswa zombhino. Namtjhana uzakuthanda ukufunda ukupenda iinthombe nokuba ngukapentara. Kungenzeka ungathanda ukufunda ngeembandana begodu neentjalo. Mhlomunye ungathanda ukukhamba nokubona amazwe ahlukahlukeneko nabantu. Ukuba nokuphila okungapheliko kuzokwenza zoke iintwezi zikwazi ukwenzeka!
Uzakuba nesikhathi sokwenza abangani abanengi. Ukuphila okungapheliko kungenza ukghone ukwazi abanye abanengi asele babangani bakaZimu. Uzokwazi ubukghoni babo neemfanelo zabo ezihle, begodu bazakuba bangani bakho. Uzobathanda, nabo bazokuthanda. (1 kwebeKorinte 13:8) Ukuba nokuphila okungapheliko kuzakunikela isikhathi sokwenza ubungani nawo woke umuntu ephasini! Okukarisa kunakho koke, ubungani bakho noJehova buzakudzimelela njengombana amakhulu weminyaka adlula. Senga ungaba mngani kaZimu ngokungapheliko!