Ingcenye 10

USolomoni Uyikosi Ehlakaniphileko

UJehova unikela iKosi uSolomoni ukuhlakanipha; ama-Israyeli athabela ukuthula begodu nepumelelo phakathi nokubusa kwakaSolomoni

UKUPHILA bekuzokuba njani lokha soke isitjhaba begodu nekosi yaso balalela uJehova njengoMbusi wabo begodu nemithetho Yakhe? Ipendulo yavela phakathi neminyaka eyi-40 yokubusa kweKosi uSolomoni.

Ngaphambi kokobana uDavidi afe, wakhetha indodanakhe uSolomoni bona ibuse ngemva kwakhe. Ngebhudango, uZimu watjela uSolomoni bona enze isibawo. USolomoni wabawa ukuhlakanipha nelwazi lokwahlulela abantu ngendlela elungileko begodu nangokuhlakanipha. Lokho kwamthabisa uJehova, begodu wanikela uSolomoni ukuhlakanipha. UJehova wamthembisa noburego, idumo, begodu nepilo ede nekazokuhlala athembekile.

Iingwebo ezihlakaniphileko zakaSolomoni, zamenza waba nedumo. Kwesinye isehlakalo, bekunabafazi ababili ababanga umntwana womsana, bobabili bebathi umntwana ngewabo. USolomoni walayeza bona umntwana loyo aphadlhulwe phakathi begodu omunye nomunye athathe ingcenye. Umfazi wokuthoma wavuma, kodwana umma wamambala womntwana wavele wabawa bona umntwana anikelwe umfazi omunye lo. USolomoni wabona bona umfazi onesirhawu gade kunguye umma womntwana begodu wamnikela umntwanakhe. Msinyana woke u-Israyeli wezwa ngesigwebeso, begodu boke abantu bayelela bona ukuhlakanipha kwakaZimu gade kukuSolomoni.

Enye yepumelelo ekulu yakaSolomoni gade kukukwakhiwa kwetempeli lakaJehova—umakhiwo obabazekako eJerusalema egade uzokuba yindawo eqakathekileko yokukhulekela kwa-Israyeli. Lokha nekunikelwa itempeli, uSolomoni wathandaza: “Qala! Amazulu, iye, izulu lamazulu, ngokwawo akakwazi ukukuthwala; kangangani-ke ngendlu le engiyakhileko!”—1 Amakhosi 8:27.

Izenzo zakaSolomoni zarhatjheka kwezinye iinarha, bekuyokufika eSheba, e-Arabhiya. Indlovukazi yeSheba yeza yazokubona ukuphazima kwakaSolomoni, uburego begodu izokuhlahluba nokuhlakanipha kwakhe. Indlovukazi yakareka kwamambala ngokuhlakanipha kwakaSolomoni begodu nokuphumelela kwaka-Israyeli beyadumisa uJehova ngokubeka ikosi ehlakanipheleko leyo esihlalweni sobukhosi. Kwamambala, ngokutjhudubazwa nguJehova, ukubusa kwakaSolomoni kwaba ngokuphumeleleko begodu nokunokuthula kunayo yoke emlandweni ka-Israyeli.

Ngokudanisako, uSolomoni wabhalelwa ukuragela phambili enza ngokuvumelana nokuhlakanipha kwakaJehova. Khenge ayilalele imilayo kaZimu, wathatha abafazi abanengi, kuhlanganise nabanengi abakhulekela abanye abozimu. Kancani kancani abafazi bakhe bamtjhidisela kude noJehova bona akhulekele iinthombe. UJehova watjela uSolomoni bona ingcenye yombuswakhe beyizokuthathwa kuye. UZimu wathi, yingcenye kwaphela ezokusala emndeninakhe, ngebanga lesivumelwana asenza noyise uDavidi. Namtjhana uSolomoni ahlahlatha, uJehova wahlala athembekile esivumelwaneni soMbuso asenza noDavidi.

—Isekelwe ku 1 Amakhosi, izahluko 1 ukuya ku-11; 2 Imilando, izahluko 1 ukuya ku-9; Duteronomi 17:17.

◼ Khuyini uZimu ayenza ukuphendula isibawo sakaSolomoni?

◼ Wakubonisa njani uSolomoni ukuhlakanipha kwakhe?

◼ Khuyini eyenza uSolomoni bona ahlahlathe kuJehova, begodu kwa

ba namiphi imiphumela?

[Itjhadi ekhasini 13]

Genesisi

Eksodosi

Lefitikosi

Numeri

Duteronomi

Joshuwa

Abahluleli

Rude

1 Samuweli

2 Samuweli

1 Amakhosi ●

2 Amakhosi

1 Imilando

2 Imilando ●

Ezra

Nehemiya

Esta

Jobhi

AmaRhalani

Iziyema

Umtjhumayeli

Irhubo lamarhubo

Isaya

Jeremiya

Isililo

Ezekiyeli

Danyela

Hosiya

Juweli

Amosi

Obadiya

Jona

Mika

Nahumi

Habakuki

Zefaniya

Hagayi

Zakariya