Ingcenye 9

Ama-Israyeli Abawa Bona Abe NeKosi

Ikosi yokuthoma yakwa-Israyeli, uSawula, ayithembeki. Ulandelwa nguDavidi, loyo uZimu enza naye isivumelwano sombuso ongapheliko

NGEMVA kokufa kwakaSamsoni, uSamuweli waba mphorofidi nomahluleli kwa-Israyeli. Ama-Israyeli gade alokhu amtjela bonyana afuna ukufana nezinye iintjhaba nawo abe nekosi. Namtjhana isibaweso samzwisa ubuhlungu uJehova, watjela uSamuweli bona avumelane naso. UZimu wakhetha indoda ethobekileko uSawula bonyana abe yikosi. Kodwana ngokukhamba kwesikhathi, iKosi uSawula yakhukhumala begodu yangathembeka. UJehova khenge asafuna bona uSawula aragele phambili njengekosi begodu watjela uSamuweli bonyana akhethe enye indoda eseseyitja—uDavidi. Kuzokuthatha iminyaka nokho, ngamphambi kobanyana uDavidi abe yikosi.

Lokha uDavidi asesemutjha, wakweriyela abanakwabo agade basebuthweni lepi lakaSawula. Loke ibutho belithuselwa lijoni elilodwa eliyinaba, ikakaramba enguGoliyadi, ogade alokhu alitererha begodu atererha noZimu walo. UDavidi akwatile, wamukela iselele yokulwa nekakaramba leyo. Ahlome ngesarayi namatjana ambalwa kwaphela, indoda eseseyitja leyo, yaphuma yayokuqalana nenaba layo egade limamitha amathathu ubude. Lokha uGoliyadi nakamtshimako, uDavidi watjela ikakaramba leyo bona yena uhlome bhedere, ngombana bekazokulwa naye ngebizo lakaJehova uZimu! UDavide wamdula phasi uGoliyadi ngelitje elilodwa, begodu wayiqunta ihloko ngesabulayo ikakaramba leyo. Lithukiwe, ibutho lamaFilisti ladla phasi.

Ekuthomeni uSawula wakarwa sibindi sakaDavidi begodu wamenza umdosi phambili webutho lakhe. Kodwana ukuphumelela kwakaDavidi kwenza uSawula waba nomona omumbi. Kwafuneka bona uDavidi abaleke asindise ukuphila kwakhe begodu aphile njengombaleki iminyaka eminengi. Namtjhana kunjalo, uDavidi waragela phambili athembekile ekosini ebeyifuna ukumbulala, athi iKosi uSawula ikhethwe nguJehova uZimu. Ekugcineni, uSawula wafela epini. Msinyana ngemva kwalokho, uDavidi waba yikosi njengombana uJehova athembisa.

Njengekosi, uDavidi wakhanuka ukwakhela uJehova itempeli. Kodwana uJehova watjela uDavidi bonyana omunye wenzalo yakhe nguye ozokwenza lokho. Kwaba yindodana kaDavidi uSolomoni. Kodwana uZimu wamtjhudubaza uDavidi ngokwenza isivumelwano esikarisako naye: Ngokungafani namanye amakhosi, emndenini kaDavidi bekayokuba nobukhosi obungapheliko. Emaswapheleni, bebuzokuveza uMtjhaphululi, namtjhana iNzalo eyathenjiswa e-Edeni. Loyo bekuzokuba nguMesiya, okutjho bona “Ozesiweko,” okhethwe nguZimu. UJehova wathi uMesiya bekazokuba Mbusi karhulumende, namtjhana uMbuso ozokuhlala ngokungapheliko.

Azele ithabo, uDavidi wabuthelela izinto ezinengi zokwakha itempeli, ezihlanganisa isiliva nerhawuda. Begodu watlola amaRhalani amanengi aphefumulelweko. Neselazokufa, uDavidi wavuma: “Umoya kaJehova wasebenzisa mina, ilizwi lakhe beliselimini lami.”—2 Samuweli 23:2.

—Isekelwe ku 1 no-2 kaSamuweli; 1 Imilando; Isaya 9:7; Matewu 21:9; Luka 1:32; Jwanisi 7:42.

◼ Kubayini uJehova asusa iKosi uSawula wabeka uDavidi?

◼ Ngiziphi iimfanelo uDavidi azitjengisa ngitjho nangaphambi kokobana abe yikosi?

◼ Ngubani iNzalo eyathenjiswako, namtjhana uMtjhaphululi, okwabikezelwa bonyana izokuvela emndenini kaDavidi?

[Umkhangiso osekhasini 12]

“Ngizokujamisa isihlalo sobukhosi sombuso wakhe ngokuqinileko ngokungapheliko.”—2 Samuweli 7:13

[Itjhadi ekhasini 12]

Genesisi

Eksodosi

Lefitikosi

Numeri

Duteronomi

Joshuwa

Abahluleli

Rude

● 1 Samuweli

● 2 Samuweli

1 Amakhosi

2 Amakhosi

● 1 Imilando

2 Imilando

Ezra

Nehemiya

Esta

Jobhi

AmaRhalani

Iziyema

Umtjhumayeli

Irhubo lamarhubo

Isaya

Jeremiya

Hagayi

Zakariya

Malaki

Matewu

Markosi

Luka

Jwanisi

IZenzo

KwebeRoma

1 KwebeKorinte

2 KwebeKorinte

KwebeGalatiya

Kwebe-Efesu

KwebeFilipi

KwebeKholose

1 KwebeTesalonika

2 KwebeTesalonika

1 kuThimothi

2 kuThimothi

KuTitosi

KuFilimoni

KumaHebheru

KaJakobosi

1 KaPitrosi

2 KaPitrosi

1 KaJwanisi

2 KaJwanisi

3 KaJwanisi

KaJuda

ISambulo