Ingcenye 25

Iinluleko Ezimalungana Nekholo, Ukuziphatha Begodu Nethando

UJakobosi, uPitrosi, uJwanisi begodu noJuda batlola iincwadi ezikhuthaza amanye amaKrestu

UJAKOBOSI noJuda bebabafowabo lakaJesu. UPitrosi noJwanisi gade bangabanye babapostoli abayi-12. Amadoda amane layo atlola iincwadi ezilikhomba ezifumaneka eMitlolweni yamaKrestu yesiGirigi. Incwadi enye nenye ithiyelelwe ngebizo lomtloli wayo. Iinluleko eziphefumulelweko eziseencwadinezi bezihloselwe ukurhelebha amaKrestu bona adzimelele kuJehova neeMbuswenakhe.

AmaKrestu kufuneka abonakalise ikholo. Ukutjho ngomlomo kwaphela bona unekholo akukakaneli. Ikholo leqiniso kufuneka likhambisane nezenzo. UJakobosi watlola wathi: ‘Ngokunjalo ikholo nelinganazo izenzo lifile.’ (KaJakobosi 2:26) Ukubonisa ikholo nesiqalene neenlingo kwakha ukukghodlhelela. Nekazakuphumelela umKrestu kufuneka abawe ukuhlakanipha kuZimu anekholo bona uZimu uzomupha khona. Ukukghodlhelela kubangela bona simukeleke kuZimu. (KaJakobosi 1:2-6, 12) Lokha umkhulekeli nakadzimeleleko ekholweni, uJehova uZimu uzomurhelebha. UJakobosi uthi: “Tjhidelani kuZimu, naye uzatjhidela kini.”—KaJakobosi 4:8.

UmKrestu nekazakwazi ukujamelana neenlingo nemikghwa emimbi yokuziphatha kufuneka ikholo lakhe liqine ngokwaneleko. Ukwanda kokuziphatha okumbi kwakatelela uJuda bona abawe amakholwa akunye nawo bona “alilwele budisi ikholo lawo.”—Juda 3. NW.

AmaKrestu kufuneka abonise imikghwa emihle yokuziphatha. UJehova ulindele bona abakhulekeli bakhe bacwengeke, okutjho bona, ukuziphatha kuhle kizo zoke izinto. UPitrosi utlola uthi: “Yibani ngabacwengileko, ngombana nami ngicwengile.’” (1 KaPitrosi 1:15, 16) AmaKrestu anesibonelo esifanelekako angasilingisa. UPitrosi uthi, “UKrestu naye watlayiswa ngebanga lenu, wanitjhiya nesibonelo bona nimlandele.” (1 KaPitrosi 2:21) Namtjhana amaKrestu angatlhaga ngebanga lokuphila ngemithetho kaZimu, babulunga ‘isazelo esimsulwa.’ (1 KaPitrosi 3:16, 17) UPitrosi ubawa amaKrestu bona abonakalise imikghwa ecwengileko, begodu nezenzo ezitjengisa ukuzinikela kuZimu njengombana balindele ilanga lakaZimu lesahlulelo begodu nephasi elitjha elithenjisiweko lapho “kuyobusa khona ukulunga.”—2 KaPitrosi 3:11-13.

AmaKrestu kufuneka abonise ithando kwabanye begodu nakuJehova. UJwanisi uyatlola uthi: “UZimu ulithando.” Umpostoli ubonisa bona uZimu wabonakalisa ithando lakhe ngokuthumela indodanakhe uJesu bona ibe “yihlawulo yezono zethu.” AmaKrestu kufuneka asabele bunjani? UJwanisi uyahlathulula: “Bazalwane, nengabe uZimu wasithanda ngokunjalo, nathi sifanele sithandane.” (1 Jwanisi 4:8-11) Enye indlela yokutjengisa ithando elinjalo kukwamukela esikholwa kunye nabo emizini yethu.—3 Jwanisi 5-8.

Kodwana-ke, abakhulekeli bakaJehova bangakwazi njani ukutjengisa ithando labo kuye? UJwanisi uyaphendula uthi: “Ithando leli engikhuluma ngalo litjho bona sithobele imilayo kaZimu. Imilayo yakhe ayisibudisi kithi.” (1 Jwanisi 5:3; 2 Jwanisi 6) Labo abalalela uZimu baqinisekiswa bona bazokuragela phambili bathandwa nguZimu ‘banombono wokuphila okungapheliko.’—Juda 21.

—Isekelwe kuJakobosi; 1 begodu no 2 KaPitrosi; 1, 2 begodu 3 KaJwanisi; KaJuda.

◼ UmKristu angalitjengisa njani ikholo?

◼ Ngimiphi imikghwa yokuziphatha uZimu ayilindele kubakhulekeli bakhe?

◼ Umuntu angatjengisa bunjani bonyana uyamthanda kwamambala uZimu?

[Umkhangiso osekhasini 29]

“Tjhidelani kuZimu, naye uzatjhidela kini.”—KaJakobosi 4:8

[Itjhadi ekhasini 29]

Genesisi

Eksodosi

Lefitikosi

Numeri

Duteronomi

Joshuwa

Abahluleli

Rude

1 Samuweli

2 Samuweli

1 Amakhosi

2 Amakhosi

1 Imilando

2 Imilando

Ezra

Nehemiya

Esta

Jobhi

AmaRhalani

Iziyema

Umtjhumayeli

Irhubo lamarhubo

Isaya

Jeremiya

Isililo

Ezekiyeli

Danyela

Zakariya

Malaki

Matewu

Markosi

Luka

Jwanisi

IZenzo

KwebeRoma

1 KwebeKorinte

2 KwebeKorinte

KwebeGalatiya

Kwebe-Efesu

KwebeFilipi

KwebeKholose

1 KwebeTesalonika

2 KwebeTesalonika

1 kuThimothi

2 kuThimothi

KuTitosi

KuFilimoni

KumaHebheru

KaJakobosi ●

1 KaPitrosi ●

2 KaPitrosi ●

1 KaJwanisi ●

2 KaJwanisi ●

3 KaJwanisi ●

KaJuda ●

ISambulo