UZimu Wadala Izulu Nephasi

UJehova uZimu unguMdalethu. Wadala zoke izinto esizibonako nesingaziboniko. Ngaphambi kobana enze izinto esizibonakwezi, wathoma ngokudala iingilozi ezinengi tle! Kodwana uyazi bona ziyini iingilozi? Iingilozi zibabantu abadalwa nguJehova abafana naye. Angekhe sakghona ukuzibona njengombana noZimu singeze sambona. Ingilozi yokuthoma eyadalwa nguJehova ngiyo ebeyimsiza. Yasiza uJehova ngesikhathi adala iinkwekwezi, amaplanethi nazo zoke ezinye izinto. Enye yamaplanethi la, yiphasi eliyikhaya lethu elihle.

Ngemva kwalokho, uJehova walungisa iphasi ukuthi iinlwana nabantu bahlale kilo. Wenza ilanga bona likhanyise iphasi. Wenza iintaba, amalwandle nemilambo.

Kwalandelani-ke ngemva kwalokho? UJehova wathi: ‘Iphasi aliveze utjani, iintjalo nemithi.’ Imihlobohlobo yeenthelo, imirorho namabhlomu kwathoma ukumila. Ngemva kwalokho, uJehova wadala zoke iinlwana wadala eziphaphako, eziphila ngemanzini, nezirhurhubako. Wadala ezincani njengemiqasa nezikulu njengeendlovu. Wena-ke ngisiphi isilwana osithandako?

UJehova wathi engilozini yokuthoma: “Asenze umuntu.” Abantu bengekhe bafane neenlwana. Bona bebazokukghona ukuzenzela izinto. Bebazokukhuluma, bahleke bebathandaze. Bebazokwazi nokutlhogomela iphasi neenlwana. Nje-ke, uyamazi na umuntu wokuthoma ukuthi ngubani? Akhe sibone.