UmBuso Ofaniswa Nomuthi Omkhulu

Kwathi ngobunye ubusuku uNebukadinetsari wabhudanga kabuhlungu kukhulu. Wabiza amadoda ahlakaniphileko bonyana amhlathululele ibhudangwelo. Akakho namunye kiwo owakwazi ukulihlathulula. Emaswapheleni ikosi yakhuluma noDanyela.

UNebukadinetsari watjela uDanyela wathi: ‘Ngibhudange umuthi. Umuthi lo wakhula bewayokufika emkayini, bewubonakala kizo zoke ingcenye zephasi. Bewunamakari amahle neenthelo ezinengi. Iimbandana beziphumula emthunzinawo neenyoni zakhe iindleke zazo eempandeni zawo. Ngemva kwalokho kwafika ingilozi ivela izulwini, yafese yathi: “Quntula umuthi lowo bese uqoba neempande zawo. Isidindi sawo usilise nemirabho yakhona ehlabathini, bese usibophe ngebhande lekoporo. Ihliziywawo izokutjhuguluka keyomuntu ifane nesilwana bekudlule iminyaka ebuyelelwe kalikhomba. Ngalokho-ke woke umuntu uzokwazi ukuthi uZimu uMbusi nokuthi anganikela nanyana ngubani amfunako umbuso loyo.”’

UJehova wembulela uDanyela bonyana ibhudangwelo belitjho ukuthini. Wathi nakazwisisa ihlathululo yebhudango wangenwa mamanzi emadolweni uDanyela. Ngikho athi: ‘Kosami ngathana ibhudangweli belitjho amanabakho, kodwana litjho wena. Nomuthi oquntiweko loya bewutjho wena. Umbuswakho uzokuphela, ngemva kwalapho uzokuhlala emmangweni udle utjani njengesibandana sommango. Kodwana ngebanga lesidindi ingilozi eyathi siliswe nemirabhwaso, lokho-ke kutjho ukuthi uzakubuye ube yikosi godu.’

Nakuphela unyaka, uNebukadinetsari bekakhambakhamba emfulelweni wendlwakhe, azikhakhazisa ngeBhabhiloni. Athi: ‘Akhuqale ubukhazikhazi bedorobha engilakhe ngezami izandla. Ngimkhulu ngiyasabeka tle!’ Asakhuluma yedwa njalo, kwezwakala ilizwi livela ezulwini lathi: ‘Nebukadinetsari! Kufuze wazi ukuthi umbuswakho sewuphelile.’

Khonokho uNebukadinetsari wahlanganyelwa yihloko wafana nesibandana sommango. Besele kufanele akhambe esigodlweni sakhe ayokuhlala neembandana emmangweni. Iinhluthu zakhe zakhula zalingana neensiba zekhozi, iinzipho zakhe nazo zaba zide njengezenyoni.

Ngemva kweminyaka elikhomba, uNebukadinetsari wabuyelwa mkhumbulo, uJehova wamenza ikosi yeBhabhiloni. Wathi: ‘Ngidumisa uJehova, iKosi yamazulu. Nje-ke sengazi kuhle ukuthi uJehova nguye oMbusi. Uthobisa abazikhakhazisako, nombuswakhe angawunikela nanyana ngubani amthandako.’