UmTlolo Ebodeni

Ngokukhamba kwesikhathi, uBhelitjhatsari waba yikosi yeBhabhiloni. Kwathi ngobunye ubusuku wamema abantu abakhethekileko esidlweni. Wayala iinceku zakhe ukuthi zimlethele ibhigiri yegolide eyathathwa nguNebukadinetsari ethempelini lakaJehova. UBhelitjhatsari neemvakatjhi zakhezo basela iwayini ngebhigiri leyo, balotjha nabozimu babo. Nabathi mehlo suka, babona isandla ebodeni, sitlola amagama angazwisisekiko.

UBhelitjhatsari warhidlwa livalo. Wabiza amadoda ahlakaniphileko wawathembisa ukuthi: ‘Nakungaba nomuntu ongihlathululela umtlolo lo, ngizomenza umbusi wesithathu eBhabhiloni.’ Bebangena baphume abantu kodwana akekho namunye owakghona ukuhlathulula amezwi lawo. Indlovukazi kwanjesi yathi: ‘Kunendoda ebizwa ngoDanyela, beyinande ihlathululela uNebukadinetsari izinto. Nguye ongakuhlathululela umtlolo lo.’

UDanyela wafika ekosini. UBelitjhatsari wathi kuye: ‘Nawungangihlathululela amezwi la ngizokupha iketani yegolide ngikwenze nombusi wesithathu eBhabhiloni.’ UDanyela wathi: ‘Angizifuni izipho zakho kodwana ngizokuhlathululela ukuthi utjho ukuthini umtlolo lo. Uyihlo uNebukadinetsari bekazikhukhumeza, yeke uJehova wamthobisa. Kubhale sewazi okwenzeka kuye nawe wadelela uJehova wasela iwayini ngebhigiri lethempelini lakhe. Ngalokho-ke uZimu utlole amezwi la athi: Mene, Mene, Tekel Parsin. Amezwi la atjho ukuthi amaMede namaPheresiya azolihlula iBhabhiloni, wena angekhe usaba yikosi.’

Kubonakala ngasuthi bekungekho ongahlula iBhabhiloni. Phela idorobheli belikantjelwe ngamaboda amakhulu libhodwe namlambo otjhingako. Khona mhlokho ebusuku, amaMede namaPheresiya asahlela. IKosi yamaPheresiya uKoretjhi yaphungula amanzi womlambo bona amasotja angene emasangweni wedorobha. Nawafika lapho amasango bekavuliwe. Amasotja adumela woke umuntu abulala nekosakhona. UKoretjhi waba yikosi etja yeBhabhiloni.

Phakathi nonyaka loyo uKoretjhi wabikezela ukuthi: ‘UJehova uthe kimi ngilivuselele ithempeli lakhe eJerusalema. Nanyana ngubani ebantwini bakhe ofuna ukusiza angatjhaphuluka akhambe.’ Kwaba njengokutjho kwakaJehova, inengi lamaJuda labuyela emakhabo ngemva kweminyaka ema-70 iJerulalema libhujisiwe. UKoretjhi wawabuyisela womabili amabhigiri ngethempelini, bekungelegolide nelesiliva nezinye iimpahla zethempeli ezathathwa nguNebukadinetsari. Le yindlela uJehova asebenzisa ngayo uKoretjhi bona asize abantu bakhe.