Abantu Obathandako Bangaphila Godu!

Ukufa kubangela ubuhlungu obukhulu. Kungebangelo iBhayibheli libiza ukufa ngokuthi sisitha. (1 Korinte 15:26) EsiFundweni 27 ufundile ukuthi uJehova uzosihlula isitheso. Kuzokwenzekani ebantwini esele bahlongakele? Esifundwenesi uzokufunda ngesinye isithembiso sakaJehova esithabisako, sokuthi uzokuvusa iingidigidi zabantu zithabele ukuphila ngokungapheliko. Uzobavusa! Kghani lokho kungenzeka kwamambala? Kghani bazokuvuselwa ukuphila ezulwini namkha ephasini?

1. UJehova ufuna ukubenzelani abantu esibathandako esele bahlongakele?

UJehova ufuna ukubavusa. Indoda ethembekileko uJobho beyiqiniseka ngokuthi uZimu angekhe ayikhohlwe nayihlongakalako. Yathi kuZimu: “Uzokubiza, mina ngizokuphendula [ngiseThuneni].”—Funda uJobho 14:13-15.

2. Sazi njani ukuthi abahlongakeleko bazokuvuswa?

Lokha uJesu nakasephasini, uZimu wamnikela amandla wokuvusa abantu. UJesu wavusa umntazanyana oneminyaka eli-12 nendodana yomhlolokazi. (Markosi 5:41, 42; Lukasi 7:12-15) Ngokukhamba kwesikhathi, umngani kaJesu uLazaru wahlongakala. Nanyana uLazaru besele ahlongakele begodu sekumalanga amane abulungiwe uJesu wamvusa. Ngemva kokuthandaza kuZimu, uJesu wathi: “Lazaru, phuma! Umuntu obekahlongakele waphuma” aphila! (Jwanisi 11:43, 44) Akhucabange ukuthi umndeni kaLazaru nabangani bakhe bebathabe kangangani nabambonako!

3. Ngiliphi ithemba esinalo ngabahlongakeleko?

IBhayibheli lithembisa ukuthi “kuzokuvuswa abafileko.” (IzEnzo 24:15) Labo uJesu abavusako nakasephasini akhenge baye ezulwini. (Jwanisi 3:13) Wabavusa baphila khona ephasinapha begodu bakuthabela lokho. Ngokufanako, kungasikade uJesu uzokuvusa iingidigidi zabantu bona zithabele ukuphila ngokungapheliko ephasini eliyipharadesi. Wathi, “Boke abasemathuneni,” ngitjho nalabo okubonakala ngasuthi balibalekile uZimu uyabakhumbula, uzobavusa.—Jwanisi 5:28, 29.

FUNDA NGOKUNGENELELEKO

4. UJesu watjengisa ukuthi uyakghona ukuvusa abahlongakeleko

Funda okungeziweko ngalokho uJesu akwenzela umnganakhe uLazaru. Funda uJwanisi 11:14, 38-44, bese nicoca ngemibuzo le:

• Sazi njani bona uLazaru bekahlongakele kwamambala? —Funda ivesi 39.

• Nangabe uLazaru waya ezulwini, ucabanga bona uJesu bekazomvusa abuye aphile ephasini?

Dlala IVIDIYO.

IVIDIYO: UJesu Uvusa ULazaru (1:16)

5. Banengi abazokuvuswa!

Funda IRhubo 37:29, bese nicoca ngombuzo lo:

• Iingidigidi zabantu ezizokuvuswa zizokuphila kuphi?

UJesu uzokuvusa abantu abanengi, angeze avuse ebebalotjha uJehova kwaphela. Funda IzEnzo 24:15, bese nicoca ngombuzo lo:

• Ngubani ongathabela ukumbona avuswa?

Cabanga ngalokhu: UJesu angavusa umuntu lula, njengalokha ubaba nakavusa umntwanakhe ebuthongweni

6. Indaba yokuvuswa kwabahlongakeleko ingakududuza beyikunikele nethemba

Indaba eseBhayibhelini yomntazanyana kaJayirosi iduduze beyakhuthaza abanengi ebebezwa ubuhlungu. Funda indaba eliqiniso leyo kuLukasi 8:40-42, 49-56.

Ngaphambi kobana uJesu avuse indodakazi kaJayirosi watjela uyise wathi: “Ungasabi, kholwa kwaphela.” (Funda ivesi 50.) Ithemba lokuvuswa lingakusiza njani . . .

• lokha nawuhlongakalelwe mumuntu omthandako?

• lokha ukuphila kwakho nakusengozini?

Dlala IVIDIYO, bese nicoca ngombuzo olandelako.

IVIDIYO: Ukuvuswa Kwabafileko Kusiqinisa Isibindi—Njani? (3:21)

• Ithemba lokuvuswa kwabahlongakeleko labaduduza belabakhuthaza njani ababelethi bakaPhelicity?

ISIRHUNYEZO

IBhayibheli lithembisa ukuthi iingidigidi zabantu abahlongakeleko zizokuvuswa. UJehova ufuna baphile godu, unikele uJesu amandla wokubavusa.

Buyekeza

• UJehova noJesu bazizwa njani ngokuvusa abahlongakeleko?

• Iingidigidi zabantu abavusiweko, zizokuphila ezulwini namkha ephasini? Kubayini utjho njalo?

• Khuyini ekwenza uqiniseke ngokuthi abahlongakeleko bazokuphila godu?

HLOLA OKUNGENZASI

Iinkambisolawulo zeBhayibheli zingamsiza na umuntu ozwa ubuhlungu bokuhlongakalelwa?

Lokha Nakuhlongakala Umuntu Omthandako (5:06)

Abantwana bangaqalana njani nokuhlongakalelwa mumuntu abamthandako?

Isihlengo (2:07)

Kghani bakhona abazokuvuselwa ezulwini? Bobani abangekhe bavuswe?

“Khuyini Ukuvuswa Kwabahlongakeleko?” (Isihloko esiku-jw.org)