Ukuhlanganiswa​—Kwamasondo Kghani Yindlela KaZimu?

NOKHO, abasekela ukuhlanganiswa kwamasondo, baqala indaba le ngendlela ehlukileko. U-Eboo Patel umthomi we-Interfaith Youth Core wathi: “Ayikho ikolo enganandaba ngokutjengisa isirhawu . . . , enganandaba nokutlhogonyelwa kwendawo . . . , enganandaba nokuba nobuntu.”

Kwamambala, amaBuddha, amaKhatholiki, amaPhrothestani, amaHindu, amaMuslim, namanye amasondo amanengi asebenza ndawonye bona alwisane nokutlhaga, alwele amalungelo wabantu, aqede amabhomu agujelwa ehlabathini, nokuvikelwa kweemvelo. Amasondo ahlukahlukeneko ahlangana bona akhulumisane ngeendlela zokuthuthukisa ubunye hlangana nawo begodu akhuthazane. Agidinga ukuhlukahluka kwawo ngokukhanyisa amakhandlela eminyanyeni, emigidini, embhinweni, emithandazweni nakokhunye.

Ukuhlanganiswa kwamasondo kghani kuyindlela yokuqeda ukungezwani hlangana kwamasondo? Kghani yindlela kaZimu yokuletha iphasi elingcono?

UBUNYE—BUZOKUFUMANEKA NJANI?

Enye yeenhlangano ezikulu zokuhlanganiswa kwamasondo yazivikela ngokuthi inamalunga ewajameleko emasondweni ahlukahlukeneko angaphezu kwama-200 eenarheni ezima-76. Ihloso yayo “kuthuthukisa ukukghodlhelela, ukusebenzisana kwaqobe kokuhlangana kwamasondo.” Nokho, lokho kwabonakala kulula ukukutjho kunokukwenza. Ngokwesibonelo, abanqophisi behlangano le bathi kwatlhogeka bona amaphephabo wesivumelwano atlolwe ngendlela engeze iwaphathe kumbi amanye amasondo neenqhema ezinengi ezatlikitla iphephelo. Kubayini? Omunye unobangela kukobana bekuphikiswana ngokuthi kufuze kufakwe ibizo lakaZimu esivumelwaneneso namkha awa. Ngalokho, ibizo lakaZimu khenge lifakwe kiso.

Nangabe akekho uZimu emaphephenabo, kusiza ngani ukukholelwa kuye? Ngaphezu kwalokho, ihlangano yokuhlanganiswa kwamasondo ihluke bunjani kezinye iinhlangano eziphisana ngezinto? Kungebangelo, isihlopha sokuhlanganiswa kwamasondo ekukhulunywe ngaso ngaphambilini sizihlathulula sona, ingasi njengekolo kodwana “njengehlangano eyakha ubunye.”

KGHANI UKUTHUTHUKISA UBUHLE—KWANELE?

UDalai Lama umlandeli odumileko wokuhlanganiswa kwamasondo uthi, “Woke amasondo akhuthaza into efanako: ithando, isirhawu, nokulibalelana.” Wangezelela ngokuthi: “Okuqakatheke khulu kukobana iimfanelwezi kufuze zibe yingcenye yepilwethu yangamalanga.”

Kuliqiniso bona iimfanelo ezinjengethando, izwela nokulibalela ziqakatheke khulu. Kilokho egade kubizwa ngokuthi mThetho weGolide, uJesu wathi: “Yeke kikho koke, yenza kabanye lokho ongathanda bonyana bakwenze kuwe.” (Matewu 7:12) Kghani ukukholwa kweqiniso kutjho ukwenza izinto ezihle kwaphela?

Malungana nabanengi bangesikhathi sakhe egade bathi bamakholwa, umpostoli uPowula wathi: ‘Ngingafakaza bonyana banetjisakalo ngoZimu, kodwana abanawo umkhanyo.’ Umraro bekuyini? UPowula wathi, “Ngokungayeleli kwawo ukulunga okuvela kuZimu, afuna ukuzenzela kwawo.” (Roma 10:2, 3) Ngebanga lokungabi nelwazi elinembileko lalokho uZimu ebekafuna bakwenze, itjiseko nekholo labo bekulilize.—Matewu 7:21-23.

UMBONO WEBHAYIBHELI NGOKUHLANGANISA IINKOLO

UJesu wathi, “Babusisiwe abalamulako.” (Matewu 5:9) UJesu wenza lokhu agade akufundisa ngokuthuthukisa ukuthula nokuletha umlayezo wokuthula ebantwini beenkolo nebeendawo ezihlukahlukeneko. (Matewu 26:52) Labo abasabelako bazifumanela ithando elingapheliko. (Kolose 3:14) Kghani ihloso kaJesu bekukukwakha ibhrorho hlangana nabantu bemihlobo ehlukahlukaneko bona bazwane ngokuthula? Wahlanganyela na nabanye endlelenabo yokukhulekela?

Abadosi phambili beenkolo beenqhema zabaFarisi nabaSadusi baphikisa kumbi uJesu—balinga nokumbulala. Wasabela njani? UJesu wayala abafundi bakhe: “Baliseni, babahlahli abaphopheleko.” (Matewu 15:14) UJesu akhange akhe ubudlelwane obungokomoya nabantu abanjalo.

Ngokukhamba kwesikhathi, kwakhiwa ibandla lamaKrestu eKorinte, eGrisi—idorobho elaziwa ngokuba nabantu beenzinda ezihlukahlukeneko neenkolo ezinengi. AmaKrestu walapho bekufuze aziphathe njani endaweni enjalo? Umpostoli uPowula wawatlolela: “Ningazihlanganisi nabangakholwako.” Kubayini? UPowula wahlathulula: “Unasivumelwano bani uKrestu noBheliyara na? Namkha yini ikholwa elingayabelana nomuntu ongakholwako na?” Bese wanikela isilulekwesi: “Ngalokho-ke, phumani phakathi kwabo.”—2 Korinte 6:14, 15, 17.

Kuyakhanya, bona iBhayibheli ayivumelani nokuhlanganiswa kwamasondo. Kodwana ungazibuza, ‘Bungaba khona njani ubunye beqiniso?’

UKWAKHA UBUNYE BAMAMBALA

I-International Space Station—umtjhini omkhulu osemkayini—mphumela wemizamo yokuhlanganisa iintjhaba ezili-15 ezisebenza ngokubambisana. Ucabanga bona umsebenzi lo bewuzokuphumelela ngathana iintjhaba ezinengcenye zange ziyivume iplani ezokusetjenziswa?

Kwamambala, lobo bujamo besikhathi sanje sokuhlanganiswa kweenkolo. Ngitjho nanyana ihlonipho nokusebenzisana kukhangiswa, ayikho indlela yokubambisana ekukholweni ezivumelana ngayo. Ngebanga lalokho, iindaba zokuziphatha neemfundiso zekolo ziragela phambili zibangela ukuhlukana.

IBhayibheli ineenkambiso zakaZimu, ezinjengeplani. Singaphila ngokuvumelana nelikutjhoko. Labo abalisebenzisako bahlula ukubandlulula kobuhlanga nebekolo begodu bafunde ukusebenza ndawonye ngobunye nangokuthula. Abikezela lokhu uZimu wathi: “Yeke ngizakuhlambulula iimbena zabantu ukuze boke babize ibizo lakaSomnini, bamlotjhe babambisene.” Ubunye bubizela ‘elimini elihlwengileko’ okuyikambiso kaZimu yokukhulekela.—Zefaniya 3:9; Isaya 2:2-4.

Uyamenywa bona ube khona eWolweni lomBuso laboFakazi bakaJehova bona uzozibonela wena ukuthula nobunye oburarako obukhona phakathi kwabo.—IRhubo 133:1.