ISIHLOKO ESINGAPHANDLE | IINGILOZI—ZIKHONA NA? KUBAYINI KUQAKATHEKILE UKWAZI?
Iqiniso Ngeengilozi
Uyafuna na ukwazi iqiniso ngeengilozi? Ukuthi zibobani, zaba khona njani, nokuthi uyini umsebenzazo? Ayikho indawo lapho ungafumana khona ipendulo engcono njengaseliZwini lakaZimu eliphefumulelweko iBhayibheli. (2 Thimothi 3:16) Lithini iBhayibheli?
UZimu umummoya, neengilozi nazo azibonakali, ‘azinanyama namathambo.’ Iingilozi ezithembekileko zihlala ezulwini begodu ziyakghona ukuya lapho uZimu ahlala khona ezulwini.—Lukasi 24:39; Matewu 18:10; Jwanisi 4:24.
Ngezinye iinkhathi iingilozi bezizitjhugugula zibe babantu benyama, bona zenze umsebenzi uZimu azinikele wona ephasini, bese ngemva kokwenza umsebenzi loyo, zibuyele emizimbenazo.—AbaKhokheli 6:11-23; 13:15-20.
EBhayibhelini iingilozi zikhulunyelwa njengamadoda kodwana iqiniso kukuthi iingilozi azisimadoda begodu azisibafazi. Iingilozi azitjhadi abe azibi nabantwana. Ukungezelela kilokho, uZimu khenge azidalele ephasini njengabantu, njengokuthi zibe masana, bantwana namkha abantu abadala. Ngombana zidalwe nguJehova, ngikho iBhayibheli lizibiza ngokuthi: “madodana kaZimu.”—Jobho 1:6; IRhubo 148:2, 5.
IBhayibheli likhuluma “ngamalimi wabantu namkha weengilozi,” okuhlathulula ukuthi abantu bommoya nabo bayakhuluma. UZimu wakhe wasebenzisa iingilozi bona zikhulume nabantu kodwana akafuni abantu bazilotjhe namkha bathandaze kizo.—1 Korinte 13:1; IsAmbulo 22:8, 9.
Kuneengidigidi neenkulungwana ngeenkulungwana zeengilozi, kungenzeka nazibalwako zingaba mabhiliyoni.—Danyela 7:10; IsAmbulo 5:11.
Iingilozi “zinamandla” ukudlula abantu, nokuhlakanipha kwazo kudlula kwabantu. Ubufakazi butjengisa bona zikghona ukukhamba ngebelo elikhulu tle, engekhe salazi.—IRhubo 103:20; Danyela 9:20-23.
Ngitjho nanyana iingilozi zikghona ukwenza izinto ezinengi kangaka, kodwana kunezinto ezingakghoni ukuzenza begodu kubuye kube nezinto ezingazaziko.—Matewu 24:36; 1 Pitrosi 1:12.
Iingilozi zidalwe zaba nobuntu obuthileko, ubuntu obunjengebakaZimu, begodu nazo zinelungelo lokuzikhethela. Njengabantu, nazo zinelungelo lokuthi zikhethe ukwenza izinto ezilungileko namkha ukwenza izinto ezingakalungi. Kuyadanisa ukwazi ukuthi ezinye iingilozi zakhetha ukuhlubuka, zakhetha ukungalaleli uZimu.—Juda 6.