Iinyeleliso ZeBhayibheli Zisaqakathekile Namhlanjesi?

ABANYE BATHI AWA. Udorhodere othileko uqathanisa ukusebenzisa iinluleko zeBhayibheli nokusebenzisa incwadi yesayensi yango-1920 bona afundise ikhemistri eklasini. Umnyefuli angabuza ukuthi ungayisebenzisa na incwadi yakade ye-khomphyutha bona ikuyelelise ngokusebenzisa ikhomphyutha yanje? Abanye baqala iBhayibheli njengencwadi yakade engasenalo ithemba.

Ukhona na ongasebenzisa incwadi yakade bona imyelelise esikhathini sanamhlanjesi setheknoloji? Amazinzolwazi amanengi athumela umlayezo oneenyeleliso. Amahlelo we-TV athatha iinluleko kibosaziwako abanelemuko, abadorhodere bezomkhumbulo, ababhali beencwadi nabaluleki bezepilo. Iintolo ezithengisa iincwadi zigadangisa iincwadi ezineenyeleliso ezikhuluma ngepilo yomuntu ezifikelela iingidi zabantu kezamarhwebo.

Ngaphezu kwelwazi esinalweli, singabuyela na encwadini eyabhalwa eminyakeni pheze ibe zi-2 000 ezadlulako? Abanyefulaba baqinisile na nabathi ukufuna iinyeleliso eBhayibhelini kufana nokusebenzisa incwadi ephelelwe sikhathi yekhemistri namkha yekhomphyutha? Indlela abacabanga ngayo ayikalungi ngombana isayensi netheknoloji ziyatjhuguluka kodwana imvelaphi yomuntu ayitjhuguluki. Abantu basalinga ukuthola umnqopho wokuphila, ukuba nethabo nevikeleko, ubuhlobo obuhle bomndeni nabangani bamambala.

Nanyana ingeyakade nje, iBhayibheli iyayelelisa ngeendaba ezinjengalezi nezinye. Iyincwadi ephefumulelwe nguZimu. Inikela iinqophiso eengcenyeni zoke zokuphila beyisisize bona siqalane neentjhijilo zokuphila. (2 Thimothi 3:16, 17) Inikela iseluleko esingaphelelwa sikhathi nesingekhe sajanyiselelwa ngenye incwadi. IBhayibheli lithi: “Ilizwi lakaZimu liyaphila.”—Hebheru 4:12.

Inga-kghani iBhayibheli lineqiniso? Liphelelwe sikhathi namkha lineenyeleliso ezihle neziqakathekileko njengencwadi ephilako? Umnqopho wesiThalesi kuthoma umlandelande weenhloko ezikhethekileko ezizokusiza uthole iimpendulo zemibuzo le.