Singayifumana Njani Ipilo Engcono Kunale Esiyiphilako?

IPILO ayisingendlela uZimu ebakafuna ibe ngayo. Iphasi bekufuze lizale ngabantu abahlonipha ukubusa koMdali, bathabele ukunqotjhiswa nguye begodu babe nobuntu bakhe. Bekufuze basebenzisane kuhle, bathabile bakhulise imindenabo, bafunde izinto ezitjha, benze iphaseli loke nje libe yipharadesi.

UZIMU UTHEMBISA UKUTJHUGULULA IPHASI LIBE NGENDLELA EBEKAFUNA LIBE NGAYO

• “Uthulisa izipi ephasini loke.” —IRhubo 46:10.

• ‘kwafika isikhathi esibekiweko lapho kuzokwahlulelwa abafileko.’ —IsAmbulo 11:18.

• “Akunamhlali . . . ozakuthi: ‘Ngiyagula.’” —Isaya 33:24.

• “Abakhethiweko bami bazazikholisa mndundu ngomsebenzi wezandla zabo.” —Isaya 65:22.

Iimphorofidwezi zizokuzaliseka njani? UZimu ubeke iNdodanakhe uJesu bona ibe yiKosi yombuso opheleleko begodu uzokubusa ezulwini nephasini. IBhayibheli iwubiza ngokuthi mBuso kaZimu. (Danyela 2:44) IBhayibheli nayikhuluma ngoJesu ithi: “uZimu uzomnikela isihlalo sobukhosi . . . , uzokuba yiKosi.” —Lukasi 1:32, 33.

Ngesikhathi uJesu asephasinapha wenza iimangaliso ezinengi ukutjengisa ukuthi nasele abusa abantu, uzokwenza ipilwabo ibe ngcono kunesikhathi esiphilakiswesi.

UJESU WATJENGISA IZINTO EZIHLE AZOZENZELA ABANTU ABALALELAKO

• Welapha yoke imihlobo yokugula, ngobunjalo atjengisa ukuthi uzokuqeda koke ukugula okuphethe abantu. —Matewu 9:35.

• Wathulisa ilwandle, atjengisa ukuthi uzobavikela njani abantu ngokuthi alawule indalo. —Markosi 4:36-39.

• Wanikela iinkulungwana zabantu ukudla, atjengisa ukuthi nakabusako uzokunikela abantu izinto abazitlhogako. —Markosi 6:41-44.

• Waphendula amanzi waba yiwayini emtjhadweni, atjengisa ukuthi uzokusiza abantu bathabele ukuphila. —Jwanisi 2:7-11.

Ungakufumana njani ukuphila uZimu akuhlelela abantu abamthandako? ‘Kunendlela’ okufuze ukhambe ngayo. IBhayibheli liyihlathulula ngokuthi yindlela etjhingisa ekuphileni, begodu “bambalwa abayifumanako.” —Matewu 7:14.

UKUFUMANA INDLELA ETJHINGISA EKUPHILENI OKUNGCONO

Ngiyiphi indlela etjhingisa ekuphileni? UZimu uthi: Mina Jehova “nginguZimakho okufundisako ukuze kukukhambele kuhle lokha nangikuhlahlako endleleni ekufanele uyikhambe.” (Isaya 48:17) Nawungalandela isinqophisweso, ukuphila kwakho kuzokuba ngcono.

UJesu wathi: “Ngiyindlela neqiniso nokuphila.” (Jwanisi 14:6) Nawenza lokho uJesu akutjhoko bese ulingisa isibonelo sakhe, uzokuthabisa uZimu begodu ukuphila kwakho kuzokuba ngcono.

Ungayifumana njani indlela etjhinga ekuphileni? Zinengi iinkolo namhlanjesi, kodwana uJesu wathi: “Akusingiwo woke umuntu othi kimi, ‘Kosi, Kosi,’ ozokungena emBusweni wezulu, kodwana kuzokungena kwaphela loyo owenza intando kaBaba osezulwini.” (Matewu 7:21) Wabuye wathi: “Nizobabona ngeenthelo zabo.” (Matewu 7:16) IBhayibheli ingakusiza ubone ikolo elotjha uZimu ngeqiniso. —Jwanisi 17:17.

Ungathoma njani ukukhamba endleleni etjhingisa ekuphileni? Kufuze uthome ngokwazi uMthomisi wokuphila: Ungubani? Ngubani ibizo lakhe? Unjani? Usenzelani? Khuyini afuna thina siyenze?a

UZimu bekafuna abantu benze okungaphezu kokusebenza, badle, bathabele ipilo nokuthi bandise umndenabo. Kuyakghonakala ukuthi sazi uMdalethu nokuthi sibe bangani bakhe. Singatjengisa ukuthi siyamthanda ngokuthi senze intandwakhe. UJesu wathi: “Lokhu kutjho ukuphila okungapheliko, bona bakwazi wena, okunguwe wedwa uZimu weqiniso.” —Jwanisi 17:3.

UKUTHATHA IGADANGO LOKUTHOMA

Nasifunda ukuthi khuyini uZimu ayifunako kungatlhogeka ukuthi senze amatjhuguluko. Kungaba budisi ukwenza njalo. Kodwana lokho kutjho ukuthi ukuphila kwethu kuzokuba ngcono. AboFakazi bakaJehova bafuna ukukusiza ufunde iBhayibheli bona bakusize ufumane iimpendulo zemibuzo ngoZimu, lokho bazimisele ukukwenza endaweni nangesikhathi esikhethwa nguwe. Ungakghona ukuthintana nathi ngokuthi usebenzise izinzolwazi lethu i-www.jw.org.