Kulungele Ukubawa Isifundo SeBhayibhili
1. Kuhlanganisani ukuzalisa umyalo kaJesu oku Matewu 28:19, 20?
1 UJesu wasinikela umlayo wokobana ‘senze abafundi . . . , sibafundise.’ (Mat. 28:19, 20) Ngalokho, sifuna ukuhlala sikulungele ukubawa isifundo seBhayibhili ngaso soke isikhathi, ingasi kwaphela ngepelaveke ebekelwe ngokukhethekileko ukubawa isifundo seBhayibhili. Iinqophiso ezilandelako zingabalirhelebho.
2. Kufuze sibawe isifundo seBhayibhili kubani?
2 Bawa Isifundo seBhayibhili: Nasiragela phambili nokubawa isifundo seBhayibhili, kulapho sizosifuma khona. (Mtj. 11:6) Khewalinga ukusibawa ngendlela enqophileko? Ibandla elinye e-United States lenza umzamo omkhulu wokuberegisa indlela le inyanga yoke. Qala bona lathaba kangangani nelithoma iimfundo zeBhayibhili ezitja ezima-42! Ungacabangi bona abantu abanekaro oyakibo bayazi bonyana unikela ngesifundo seBhayibhili. Newubuyelako ngokulandelako kubayini ungabawi isifundo seBhayibhili? Nengabe abasamukeli, akutshwenyi. Ungaragela phambili nokusihlawulela. Khe wabuza abomakhelwana bakho, iinhlobo, abantu oberega nabo nofunda nabo bona bangathanda ukufunda iBhayibhili nawe? Ungabuza neemfundo zakho zeBhayibhili bona zinabo abangani namtjhana iinhlobo ezingathabela isifundo seBhayibhili.
3. Ngiliphi ithulusi elingasirhelebha ukuthoma iimfundo zeBhayibhili esinalo, begodu singaliberegisa nini?
3 Ithulusi Elingasirhelabha: Ithulisi eliqakathekileko lokuthoma isifundo seBhayibhili iphetjhana elithi Ungathabela Ukulazi Iqiniso? Ungalinikela abaninimuzi ngitjho nofana bamukela ezinye iincwadi namtjhana bangazamukeli. Lingaberegiswa nakwenziwa isimu yamabhizinisi, nasenza umberego wokutjhamayela endleleni, nasitlola iincwadi, nalokho senza amabuyelo. Singalitjhiya eemzini enganabantu. Kubayini ungakhambi nalo lokha newuberegisa iinthuthi zomphakathi, newuseentolo begodo nalokho usemberegweni? Ikhasi elingemva kwephetjhaneli ngokurhunyeziweko lihlathulula indlela isifundo seBhayibhili esihlelwe ngayo begodu lethula incwadi ethi Okufundiswa YiBhayibhili.
4. Singaliberegisa njani iphetjha elithi Yazi Iqiniso ukuthoma isifundo seBhayibhili?
4 Ngemva kokunikela umuntu iphetjhana, ungambonisa iimbuzo esekuthomeni kwekhasi begodu umbuze, “Ngimuphi eembuzweni le onekareko yokufuma ipendulo yawo?” Ngemva kwalokho cabangelani ipendulo efumaneka ephetjhaneni, begodu funda namtjhana ubuyekeze ikhasi elingemva, elihlathulula indlela isifundo seBhayibhili esihlelwe ngayo. Ngemva kwalokho, ungamtjengisa lapho imininingwana eemnengi ekhuluma ngendaba le ifumaneka khona encwadini ethi Okufundiswa YiBhayibhili, mnikele incwadi, begodu wenze amalungiselelo wokubuya niragele phambili nengcoco.
5. Kubayini kufuze sihlale sikulungele ukubawa isifundo seBhayibhili?
5 Isimu yethu inabantu abasafuna ukufunda ngalokho okufundiswa yiBhayibhili kwamambala. Ngokuhlala sikulungele ukubawa isifundo seBhayibhili, sizokuba namathuba amanengi wokuba nokuhlangabezanwenakho kokuthabela ukurhelebha abanye bakhambe endleleni yokuphila.—Mat. 7:13, 14.