Incwadi Evela ESihlopheni Esibusako
BoFakazi BakaJehova Abathandekako Esikunye Nabo:
Kulithabo elikhulu ukunitlolela nina nceku zakaJehova ezithembekileko nezithandekako, kwanje enibalelwa eengidini ezingaphezu kwezilikhomba. Newuhlangana nekholwa okunye nalo lakenye ingcenye yephasi, msinyana uzizwa unobuhlobo bethando obukhethekileko nalo. (Jwa. 13:34, 35) Akunakuzaza bona njengombana ufunda INcwadi YoMnyaka, ukulandisa okuvusa amadlharuma kwekholo nokuthembeka kwabanakwethu nabodade beenarheni ezihlukahlukeneko godu kuzokwenza uzwe ubuhlobo obukhethekilekobo.
Iimbiko evela ephasini mazombe itjengisa bona inani elikhulu lenu likuqala njengokuqakathekileko ukuKhulekela Komndeni kwaqobe. Labo abanabantwana abancani basebenzise ubukghwari obukhulu ukubamba nokubulunga ikareko yabantwababo. (Efe. 6:4) Abatjhadileko batjhidelana ngokungeziweko ngebanga lokuqinisana okungokomoya abakunikelwa lihlelweli. (Efe. 5:28-33) Kwamambala, abantu ngabanye neemndeni bayazuza elungiselelweneli lokufunda ngokudephileko iLizwi lakaZimu.—Josh. 1:8, 9.
Silila kunye nani noke enalahlekelwako ngebanga leenhlekelele zemvelo zamva nje. Sisebenzisa ithubeli ukuthokoza abanengi, abahlanganyele ngaphandle kokuzaza ejimeni lokuhlangula ngeenkhathi zehlekelele ezinjalo. (IZe. 11:28-30; Gal. 6:9, 10) Ukungezelela, ebandleni ngalinye, kunabanye benu abalemuke iintlhogo ezingokwenyama zabanakwethu begodu ngesidu bathatha amagadango wokuzitlhogomela. NjengoDorkasi wekadeni, ‘nizinikele ekwenzeni okulungileko’ okunengi. (IZe. 9:36) Qinisekani bona uJehova uyakubona lokhu begodu uzonivuza.—Mat. 6:3, 4.
Kezinye iinarha, amalungelwenu aqalelwa phasi ngilabo abenza umthetho uvumelane nabo khona ‘bazokuhlela umraro ngesiqunto somthetho.’ (Rha. 94:20-22) Nilemuka bona uJesu wakubikezela ukutjhutjhiswa okunjalo, nikghodlhelela ngesibindi begodu niqala kuJehova njengesiphephelo senu. (Jwa. 15:19, 20) Qinisekani bona sinifaka qobe emthandazwenethu njengombana niragela phambili ‘niphendula loyo onibuza ngethemba eninalo.’—1 Pit. 3:13-15.
Sizibuka kwamambala iingidigidi zenu ezihlala zihlwengile ngokokuziphatha umnyaka nomnyaka naphezu kokobana uSathana akalisi ukunisahlela ngokuziphatha okumbi nangeendlela zakhe zobuqili zokuburhatjha. Esikhathini lapho iinkambisolawulo zokuziphatha zehla ngezinga elingakhange khelibonwe, ‘niqina eKosini nemandleni wayo amakhulu.’ (Efe. 6:10) ‘Nihlome ngazo zoke iinhlabano zakaZimu,’ begodu nijame naqina nakwazi ukujamelana ‘noSathana nanihlaselako ngamaqhinga wakhe.’ (Efe. 6:11, 12) Kufuze nazi bona uJehova usebenzisa isibonelo senu ukunikela loyo omthukako, uSathana, ipendulo enamandla!—Iziy. 27:11.
Sathaba ukuzwa bona ngo-2011, kwaba nabazi-19 374 737 eSikhumbuzweni sokufa kweKosi yethu. Inani elikarisakwelo lababa khona ngokwengcenye limphumela wokusabela kwenu okukhulu esimememweni sokuba maphayona wesigiyani ngo-Apreli ogadungileko. Iingidi zezakhamuzi zephasi zezwa itjhada lobunye lokudumisa uJehova livela kiboFakazi bakhe abathembekileko! (Rom. 10:18) Kungakhathaliseki bona bewungomunye waba-2 657 377 abakhonza njengamaphayona wesigiyani inyanga leyo namtjhana wazimisela ukwandisa ikonzwakho ngendlela ethileko, noke nisithabise khulu ngomoya wenu wokuzimisela nokutjhisekela umsebenzi.—Rha. 110:3; Khol. 3:23.
Ngomnyaka ogadungileko, abazi-263 131 batjengisa ukuzinikela kwabo kuJehova. Siyamthokoza uJehova ngalokho, begodu sinithokoza noke ngokuhlanganyela nathi ekudluliseni isimemo esithi: “‘Yiza!’ Nozwako lokhu akatjho athi: ‘Yiza!’ Nowomileko akeze; othandako akathathe amanzi wokuphila ngesihle.” (ISam. 22:17) Khulukhulu ngemva kokucabangela iingcenye zoMbuso kaZimu obusako eemhlanganwenethu yesigodi yango-2011, sitjho ngetjiseko ekulu kunanini ngaphambili ukuthi, “Awuze UMbuso KaZimu!” Sitjhukunyiswa siqinisekiso sakaJesu esithi ‘ngiyeza msinyana,’ ngehliziyo yoke sihlanganyela nompostoli uJwanisi ekusabeleni ngokuthi: “Ameni, akube njalo! Yewize, Kosi Jesu!”—ISam. 22:20.
Njengombana nihlala nilindele isenzakalo esithabisakwesi, sibawa niqiniseke bona sithanda omunye nomunye wenu banakwethu nabodadwethu abathandekako, enitjengisa bona nithanda uJehova ‘kwamambala nangezenzo’!—1 Jwa. 3:18.
Abanakwenu,
ISihlopha Esibusako SaboFakazi BakaJehova