IiNdlela EziHlanu ZokuFumana IimFundo ZeBhayibhili
1. Nengabe sikufumana kubudisi ukuthola umuntu esingafunda naye iBhayibhili esiminethu, khuyini okufuze siyenze begodu kubayini?
1 Wakhe wakufumana kubudisi ukuthola umuntu ongafunda naye iBhayibhili? Ragela phambili ulinga. UJehova ubusisa labo abangaphelelwa mamandla ekwenzeni intando yakhe. (Gal. 6:9) Ngenzasi kuneemphakamiso ezihlanu ezingakusiza.
2. Singakusebenzisa njani ukubuza ngokunqophileko bona sithome isifundo?
2 Buza NgokuNqophileko: Abantu abanengi bayazi bona sikhambisa i-Sithalasokulinda ne-Phaphama!, kodwana kungenzeka abazi bona sibawa neemfundo zeBhayibhili. Kubayini ungalingi ukubuza ngokunqophileko nesingena umuzi nomuzi? Godu ungabuza abantu obavakatjhelako abanekareko bona bangasithabela isifundo seBhayibhili. Nebalako, ungaragela phambili ubatjhiyela iincwadi begodu uhlawulele ikareko. Omunye umzalwana wavakatjhela isibili esitjhadileko iminyaka eminengi enza umzila kamagazini. Ngemva kokusitjhiyela abomagazini bamva, walayelisa, kodwana msinyana kwafika emkhumbulwenakhe bona asibuze: “Ningasithabela isifundo seBhayibhili?” Angakalindeli baphendula bathi iye. Kwanje babhabhadisiwe.
3. Kghani kufuze siphethe ngokobana abeza emihlanganweni bafunda iBhayibhili nothileko? Hlathulula.
3 AbeZa EmiHlanganweni: Ungaphethi ngokobana labo abanekareko obabona emihlanganweni yebandla sele bafundelwa iBhayibhili. Omunye umzalwana uyabika: “Iimfundo ezingaphezu kwesiquntu egade nginazo ngazithoma ngokucoca nalabo abeza emihlanganweni.” Omunye udade wakhetha ukuya komunye umma oneenhloni amadodakazakhe abhabhadisiweko bekasebandleni. Umma lo besele aneemnyaka epheze ibe li-15 eza emihlanganweni neWolweni lomBuso afika nekuthoma umhlangano begodu akhambe msinyana newuphelako. Umma lo wavuma ukufunda begodu ekugcineni walamukela iqiniso. Udade uyatlola: “Ngizwa ubuhlungu ngokobana ngilinde iminyaka eli-15 bona ngimbuze bonyana angasithabela isifundo!”
4. Singasifumana njani isifundo ngokubuza ngabanye abantu?
4 UkuBuza NgabaNye AbaNtu: Omunye udade bekazimisela ukuphekelela abanye eemfundweni zabo zeBhayibhili. Ngemvume yomfundisi, ekuphetheni wabuza umfundi bona bakhona abaziko abangathabela ukuba nesifundo sabo. Newukhambisela othileko omvakatjheleko incwadi ethi Okufundiswa YiBhayibhili, ungambuza: “Kukhona omunye umuntu omaziko ongathabela incwadi le?” Ngezinye iinkhathi, ubujamo abubavumeli abarhuweleli namaphayona bona barage isifundo nomunye umuntu abahlangana naye esimini. Ngalokho yazisa abanye bona ungakghona ukuyokuraga isifundo seBhayibhili.
5. Kubayini singabuza abalingani abangakholwako bamalunga webandla bona bangathabela ukufunda?
5 UmLingani OngaKholwako: Bakhona abarhuweleli ebandleni lenu abatjhade nabalingani abangakholwako? Abanye abangakholwako abafuni ukukhuluma nabalingani babo abamaKrestu ngeBhayibhili kodwana bangasamukela isimemo sokufunda nomunye ongasingowomndeni. Kanengi kuhle ukuthintana nomlingani okholwako ngaphambi kobana uyokubuza umlingani ongakholwako.
6. Uqakatheke kangangani umthandazo nesilinga ukufumana isifundo?
6 UmThandazo: Unganyazi amandla womthandazo. (Jak. 5:16) UJehova uthembisa ukulalela iimbawo zethu nezivumelana nentando yakhe. (1 Jwa. 5:14) Omunye umzalwana ohlala amajadu wathoma ukuthandaza bona afumane isifundo seBhayibhili. Umkakhe bekazibuza bona uzokuba naso na isikhathi sokutlhogomela umfundi, khulukhulu nengabe umfundi unemiraro eminengi. Ngalokho wazisa uJehova ngokutshwenyeka kwakhe nekathandazela indodakwakhe bona ifumane isifundo. Imithandazwabo yaphendulwa, pheze ngemva kweemveke eembili iphayona ebandleni nelifumana isifundo esiyindoda laya kumzalwana lamnikela sona. Umkakhe uyatlola: “Kunanyana ngubani ocabanga bona ukuraga isifundo seBhayibhili kuzokuba mthwalo kuye, ngithi: Yitjho ngokunqophileko emthandazwenakho, begodu ungalisi ukuthandaza ngakho. Sibe nethabo elikhulu ngendlela engeze sayihlathulula.” Ngokuphikelela, nawe ungakghona ukufumana isifundo seBhayibhili begodu uzwe ithabo lokusiza othileko angene ‘ngesango eliya ekuphileni.’—Mat. 7:13, 14.