INdlela OngaZuza Ngayo EsiQhemeni SeKonzo YeSimini
1. Ngiziphi iinzuzo zelungiselelo lesiFundo seNcwadi seBandla ezisafumaneka ngesiqhema sethu sekonzo yesimini?
1 Zikhona iingcenye zesiFundo seNcwadi seBandla ozikhumbulako? Iinqhema gade zizincani begodu zitjhaphuluke khudlwana. Lokhu bekwenza kube lula ukwakha ubungani ebebumthombo wesekelo elingokomoya. (IzA. 18:24) Umbonisi wesifundo sencwadi uyabazi ubujamo bethu obuhlukahlukeneko begodu anganikela nesikhuthazo kumuntu mathupha. (IzA. 27:23; 1 Pit. 5:2, 3) Iinzuzwezi zisafumaneka ngesiqhema sethu sekonzo yesimini.
2. Singalithatha njani igadango lokuthuthukisa ubungani obumthombo wesekelo elingokomoya esiqhemeni sethu sekonzo yesimini?
2 Thatha IGadango: Iinqhema zekonzo yesimini zisalingana neenqhema zesifundo sencwadi zangaphambilini. Ngokusebenza ekonzweni “ndawonye” nabanye, kuba nobungani obuseduze. (Fil. 1:27) Bangaki esiqhemeni sakho owakhe wasebenza nabo? Ungakghona ‘ukukhulisa ithando’ lakho malungana nalokhu? (2 Kor. 6:13) Ngaphezu kwalokho, ngezinye iinkhathi singamema othileko esiqhemeni sethu bona ahlanganyele nathi ekuKhulekeleni kwethu komNdeni nofana esidlweni santambama. Kwamanye amabandla, iinqhema zekonzo yesimini ziyatjhentjhana ukulungiselela isikhulumi esivakatjhileko ukudla. Ngeveke esabelwe ngayo, isiqhema siyahlangana bona sizokudla ndawonye begodu sikhuthazane ngitjho nanyana isikhulumi singeze sibe khona.
3. Ngimaphi amanye amathuba wokufumana ukwaluswa esiqhemeni sethu sekonzo yesimini?
3 Nanyana ibandla lihlangana ndawonye kabili ngeveke, lokhu akutjho bona abarhuweleli kufuze bafumane ukwaluswa okuncani. Ababonisi beenqhema babekwe esiqhemeni ngasinye bona banikele umuntu ngamunye isikhuthazo nokubandulelwa ikonzo. Nengabe umbonisi wesiqhema akakasenzi isikhathi bona asebenze nawe ekonzweni, kubayini ungambawi ukusebenza naye? Ngaphezu kwalokho, umbonisi wekonzo uhlanganyela ekonzweni nesiqhema esihlukileko kanye ngeveke qobe nyanga. Emabandleni amancani la kuneenqhema zekonzo yesimini ezimbalwa kwaphela, angahlela ukuvakatjhela isiqhema ngasinye kabili ngomnyaka. Uyahlela bona ube khona ekonzweni nekakhonza isiqhema senu?
4. (a) Ihlelwa njani imihlangano yekonzo? (b) Kubayini kufuze sikucabangele ukuvula imizethu bona kubanjelwe kiyo imihlangano yekonzo yesimini?
4 Ngokuvamileko kuyasiza bona isiqhema ngasinye sihlangane sisodwa ukuya ekonzweni yesimini ngeempelaveke. Ukuba neendawo ezinengi zokubambela umhlangano wekonzo ngesikhathi esifanako kungenza kube lula ngabarhuweleli ukuya emhlanganweni wekonzo mhlamunye nesimini. Abarhuweleli bangahlelwa msinyana begodu banqophiswe esimini ngaphandle kokuriyada. Godu kuba lula ngombonisi wesiqhema ukutlhogomela labo abasesiqhemeni sakhe. Nokho, ubujamo bungenza kufaneleke ngeenqhema eembili nofana ezingeziweko bona zihlanganiswe. Nengabe ibandla lihlangana loke ukubamba umhlangano wekonzo ngoMgqibelo wokuthoma wenyanga namtjhana ngemva kwesiFundo se-Sithalasokulinda, kanengi kuyazuzisa ngesiqhema ngasinye ukuhlala ndawonye nokobana umbonisi wesiqhema anikelwe imizuzu embalwa ahlele isiqhema sakhe ngaphambi kokuphetha umhlangano wekonzo yesimini ngomthandazo.—Qala ibhoksi elithi, “UngaKghona UkuVula UmZakho?”
5. Nanyana ilungiselelo lesiFundo seNcwadi seBandla lapheliswa, singaqiniseka ngani?
5 Nanyana ilungiselelo lesiFundo seNcwadi seBandla lapheliswa, uJehova uragela phambili bona asinikele koke esikutlhogako ukwenza intandwakhe. (Heb. 13:20, 21) Ngaphasi kokutlhogomela kwakaJehova, asitlhogi litho. (Rha. 23:1) Iimbusiso ezinengi zifumaneka ngesiqhema sethu sekonzo yesimini. Nesithatha igadango begodu ‘sitjala khulu,’ “sizakuvuna khulu.”—2 Kor. 9:6.
[Ibhoksi elisekhasini 6]
UngaKghona UkuVula UmZakho?
Amanye amabandla ahlanganisa iinqhema bona ziye ekonzweni ngepelaveke ngombana ingasiminengi imizi ekungahlanganyelwa kiyo. Imihlangano yekonzo yesimini lilungiselelo elingeziweko lebandla, ngalokho ukuvumela bona imihlangano le ibanjelwe emzinakho kulilungelo lamambala. Ungenza umzakho ufumaneke? Ungali ngombana umzakho uphasi. Abadala bazoyicabangela indawo yomzakho nezinye izinto ezifana nalezo ezicatjangelwako nekukhethwa indawo yesifundo sencwadi. Newungathanda ukuvula umzakho, yazisa umbonisi wesiqhema sakho.