UngaziLinganiseli—Hlula Amazizo WokungaFaneleki
1. Kubayini abanye bakubalekela ukubawa isifundo seBhayibhili?
1 Uyakubalekela ukubawa isifundo seBhayibhili ngombana awulithembi ikghono lakho lokusiraga ngokuphumelelako? Ngezinye iinkhathi, iinceku ezithembekileko zesikhathi esidlulileko, njengoMosisi noJeremiya, zazizwa zingazifanelekeli izabelo zazo. (Eks. 3:10, 11; 4:10; Jer. 1:4-6) Ngalokho, abanengi bazizwa njalo. Angahlulwa njani amazizo anjalo?
2. Kubayini kungakafuzi bona saneliswe kukwenza umsebenzi wokutjhumayela umuzi nomuzi bese sitjhiyela abanye umsebenzi wokuraga iimfundo zeBhayibhili?
2 Kufuze sikhumbule bona uJehova angeze asibawa bonyana senze into engaphezu kwamandlethu. (Rha. 103:14) Ngalokho isabelo sethu ‘kukwenza abafundi,’ ‘sibafundise,’ singakghona ukusenza. (Mat. 28:19, 20) Akusililungelo uJehova aliphe labo abanokuhlangabezanwe nakho kwaphela nofana abanekghono khulu hlangana nathi. (1 Kor. 1:26, 27) Ngalokho, akukafuzi bona saneliswe msebenzi wokutjhumayela umuzi nomuzi bese sitjhiyela abanye umsebenzi wokuraga iimfundo zeBhayibhili.
3. UJehova usenze njani bona sifanelekele umsebenzi wokuraga isifundo seBhayibhili?
3 UJehova Usenza SiFaneleke: Ukufanelekela kwethu ukwenza abafundi kuvela kuJehova. (2 Kor. 3:5) Ngehlanganwakhe usifundise amaqiniso weBhayibhili ngitjho nabantu abafunde khulu ephasineli abawazi. (1 Kor. 2:7, 8) Wasibulungela umlando weendlela zokufundisa zomFundisi omKhulu, uJesu, bona sizilingise begodu usinikela ibandulo eliragela phambili ngebandla. Ngaphezu kwalokho, uJehova akhenge akutjhiyele kithi bona sizibonele bonyana sizobafundisa njani abantu iBhayibhili. Usinikele amathulusu, anjengencwadi ethi, Okufundiswa YiBhayibhili, efundisa iqiniso ngendlela enengqondo nezwisiseka lula. Ukuraga isifundo seBhayibhili kungenzeka kungabi budisi kangako.
4. Kubayini singaqiniseka bona uJehova uzosisiza?
4 UMosisi noJeremiya bebakghona ukwenza izabelo zabo ngesizo lakaJehova. (Eks. 4:11, 12; Jer. 1:7, 8) Nathi singambawa uJehova bona asisize. Ngaphezu kwakho koke, nesiraga isifundo seBhayibhili, sifundisa othileko iqiniso ngoJehova, okuyinto ethabisako emehlweni kaZimu. (1 Jwa. 3:22) Ngalokho, kwenze umnqopho ukuhlanganyela emsebenzini wokuraga isifundo seBhayibhili, kube yinto ethabisako nezuzisako ekonzweni.