Qalani Abaphorofidi Njengesibonelo—UHosiya
1. Ngimuphi umbuzo owakhe wazibuza wona?
1 ‘Ngikuphi ukuzidela engizimisele ukukwenzela uJehova?’ Mhlamunye wakhe wazibuza umbuzo lo newuzindla ngobuhle bakhe obukhulu nomusa. (Rhu. 103:2-4; 116:12) UHosiya ngokuzithandela wenza lokho uJehova amtjele bona akwenze, ngitjho nanyana lokho bekutlhoga ukuzidela komuntu mathupha. Singamlingisa njani uHosiya?
2. Singasilingisa njani isibonelo esihle sakaHosiya sokukghodlhelela emsebenzini wokutjhumayela?
2 Tjhumayela Ngeenkhathi Ezibudisi: Umlayezo kaHosiya ngokuyihloko gade unqotjhiswe eentjhabeni ezilitjhumi zombuso wakwa-Israyeli, lapho ukukhulekela kweqiniso besele kuzokutjhatjalaliswa. IKosi uJerobhowamu II yenza okumbi emehlweni kaJehova begodu yaragisela phambili ukukhulekelwa kwekonyana okwathonywa nguJerobhowamu I. (2 Kho. 14:23, 24) Amakhosi alandelako aragela phambili nokutjhabalalisa ingokomoya leentjhaba ezilitjhumi zombuso bekwaba kulapho ekugcineni utjhatjalaliswa ngo-740 B.C.E. Nokho, naphezu kokwanda kokukhulekela kwamala, uHosiya ngokuthembeka wakhonza njengomphorofidi pheze iminyaka ema-59. Ngokufanako nathi sizimisele na ukutjhumayela qobe mnyaka, ngitjho nanyana siqalene nokunganakwa nofana ukuphikiswa?—2 Thim. 4:2.
3. Ukuphila kwakaHosiya kuwufanekisela njani umusa kaJehova?
3 Dzimelela Emuseni KaJehova: UJehova walayela uHosiya bona atjhade “umfazi oyingwadla.” (Hos. 1:2) Nanyana umkakhe uGomere ambelethela indodana, kubonakala ngasuthi ngokukhamba kwesikhathi wabeletha amavezandlebe amabili. Ukuzimisela kwakaHosiya bona alibalele umkakhe kufanekisela umusa kaJehova omkhulu malungana nama-Israyeli angalaleli nekaphendukako. (Hos. 3:1; Rom. 9:22-26) Sizimisele na ukubekela ngeqadi esikuthandako bona senze umusa kaJehova waziwe kibo boke abantu?—1 Kor. 9:19-23.
4. Ngikuphi ukuzidela esingakwenzela uJehova?
4 Ezinye iinceku zakaJehova zidele imisebenzi ebhadelako bona zinikele ngesikhathi esingeziweko ekonzweni. Abanye bahlala bangakatjhadi nofana banganabantwana bona baphitjhekele iinkareko zomBuso. Nesizindla ngokuphila kwakaHosiya, singacabanga ngathi, ‘Bengeze ngikghone ukwenza lokho akwenzileko.’ Nokho, njengombana sikhula ekuthokozeni umusa ongakasifaneli kaJehova nokuthembela emoyenakhe ocwengileko bona usiphe amandla, singasetjenziswa nguye ngeendlela ebesingacabangi ngayo, njengoHosiya.—Mat. 19:26; Flp. 2:13.