Sizokufunda Incwadi ethi Sondela KuJehova Ukuthoma Ngeveke KaJanabari 6
1. Ukusukela ngeveke kaJanabari 6, ngiwaphi amathuba esizokuba nawo wokutjhidela kuJehova?
1 UJehova ufuna sitjhidele kuye. (Jak. 4:8) Ukusisiza senze njalo, kusukela ngeveke kaJanabari 6, sizokufunda incwadi ethi Sondela KuJehova esiFundweni seBhayibheli seBandla. Ngokuphathelene nehloso yencwadi le, ikhasi lokuthoma lithi: “Ukuzindla ngendlela uJehova atjengisa ngayo ngayinye yeemfanelo zakhe, ukubona indlela uJesu Krestu azitjengisa ngayo ngokupheleleko, nokuzwisisa indlela nathi esingazihlawulela ngayo kuzositjhideza kuZimu.” Esikhathini esidlulileko amabandla afunda incwadi le hlangana kwaka-2004 no-2005. Nanyana kunjalo, enengini labarhuweleli abangaba ziingidi eembili abafumana amaqiniso kusukela ngesikhatheso, leli kuzokuba lihlandla lokuthoma iimfanelo zakaJehova ezithandekako zidenjwa ngokuzeleko. Labo abayifundako ngaphambilini incwadi le, ukuyibuyekeza kuzobasiza badephise ukuthokozela kwabo iimfanelo zakaJehova.—Rhu. 119:14.
2. Izokufundwa njani incwadi ethi, Sondela KuJehova?
2 Indlela Ezokufundwa Ngayo: Umragi uzokuthoma ngesingeniso esifitjhani, mhlamunye umutjho munye namtjhana eembili. Incwadi le ayitjho bona ngimiphi imitlolo ekufuze ifundwe, ngalokho hlangana nesifundo umragi uzokukhetha imitlolo eyihloko bona ifundwe. Umbuzo munye namtjhana eembili ingabuzwa ekupheleni kwesifundo ngasinye bona kubuyekezwe. Nengabe indaba efundwako ihlanganisa nebhoksi elithi, “Imibuzo Yokuzindla” lizokusetjenziselwa ukubuyekeza. Nengabe isikhathi siyavuma, umragi angakhetha amanye wamavesi akhonjiweko ebhoksini bona afundwe ngemva kwalokho abuze imibuzo eseqadi ukwenzela bona abalaleli baphendule.
3. Njengombana incwadi le izokufundwa, khuyini ekufuze siyenze begodu kubayini?
3 Zuza Ngokuzeleko: Ilungiselele kusesengaphambili incwadi le ngitjho nanyana wayifunda esikhathini esidlulileko. Hlanganyela ngokuphendula, njengombana lokho kuzokuletha idumo kuJehova, kukusize ukhumbule okufundileko, begodu uzuzise abanye abakhona. (Rhu. 35:18; Heb. 10:24, 25) Njengombana uzindla ngeemfanelo zakaJehova ezingamadanisekiko, uzokutjhidela kuye. (Rhu. 77:11-13) Godu, uzozimisela khulu ukulalela imiyalwakhe begodu ukhuthazeke khudlwana ukutjela abanye ngaye.—Rhu. 150:1-6.