Bobani Abenza Intando KaJehova Namhlanjesi?
1. Sizokuthoma nini ukufunda incwajana ethi, Bobani Abenza Intando KaJehova Namhlanjesi? begodu lokhu kuzosizuzisa njani?
1 Ekuthomeni kweveke ka-Oktoba 28, esiFundweni seBhayibheli seBandla kuzokufundwa incwajana ethi, Bobani Abenza Intando KaJehova Namhlanjesi? Incwajana etja le, yatjhatjhululwa emHlanganweni wesiGodi othi, “Tjheja Ihliziyo Yakho!” yenzelwe ukunqophisa abafundi beBhayibheli ehlanganweni. Akusikufunda kwaphela incwajana le okuzokuthuthukisa ukuthabela kwethu ukuba yingcenye yehlangano kaJehova kodwana godu kuzosisiza bona silazi kuhle ithulusi eliqakathekilekweli lekonzweni.—Rhu. 48:13.
2. Izokufundwa njani incwajana le ebandleni?
2 Indlela Ezokufundwa Ngayo: Oraga isifundo kutlhogeka bona ahlele isikhathi sakhe ukwenzela bona abe nesikhathi esaneleko sokuhlanganisa isifundo ngasinye. Uzokwethula isifundo ngasinye kezima-28 ngokufunda umbuzo osihloko. Ngemva kwalokho, uzokubawa ofundako bona afunde isethulo sesigaba. Ngokulandelako, oraga isifundo uzokubuza abalaleli umbuzo awulungiseleleko esethulweni. Ngalokho, ingcenye ngayinye ethoma ngamagama atlolwe ngokubonakalako kufuze afundwe begodu kucocwe ngawo awodwa. Ngemva kokobana ingcenye ifundiwe, oragako uzokubawa batjho bona ingcenye leyo iwuphendula njani umbuzo wesihloko sesifundweso. Godu incwajana le ineenthombe ezinengi ezingakhulunyelwa. Imitlolo eyihloko kufuze ifundwe nengabe isikhathi siyavuma. Ngaphambi kokudlulela esifundweni esilandelako, oraga isifundo uzokubuyekeza ngokubuza imibuzo engenzasi kwekhasi. Nengabe kunebhoksi elithi “Fumana Okungeziweko,” lizokufundwa, bese ubawa abalaleli batjho indlela umfundi weBhayibheli angazuza ngayo esiphakamisweni esilandelako. Nengabe isikhathi siyavuma ekupheleni kwesifundo, oragako angasebenzisa iinhloko zeemfundo njengemibuzo yokubuyekeza. Khumbula bona le akusiyikambiso yokuraga isifundo seBhayibheli sekhaya.
3. Singazuza njani ngokuzeleko ngokufunda incwajana le?
3 Bona uzuze ngokuzeleko, iza emhlanganweni ulungiselele kuhle. Yenza umzamo bona uhlanganyele ekuphenduleni. Hlangana nengcoco, cabanga ngokobana lokho kungabasiza njani abafundi beBhayibheli. Kwanga ukufunda kwethu incwajana etja le kungasenza sikwazi ukusiza abanye bahlanganyele nathi ekwenzeni intando kaZimu bona nabo babe nethemba lokuhlala unomphela.—1 Jwa. 2:17.