Ibhoksi Lemibuzo

◼ Kghani kufuze abarhuweleli bajayelane nokutjhumayela nge-Inthanethi namkha bafunde nabantu abangabaziko abahlala kenye inarha?

Abanye abarhuweleli bebasebenzisa i-inthanethi ukufumana iimfundo zeBhayibheli kezinye iindawo lapho umsebenzethu uvinjelwe khona nofana lapho abarhuweleli bayindlala khona. Kobunye ubujamo, imiphumela beyibamihle. Nanyana kunjalo, iingozi zibakhona nange abarhuweleli bathumelelana iimphande nge-e-mail namkha nge-inthanethi bacocisane nabantu abangabaziko. (Qala iKonzwethu YomBuso kaJulayi 2007, k. 3.) I-inthanethi siyisebenzisela ukufikelela abantu abaneenhliziyo ezithembekileko bakwazi ukufumana umlayezo womBuso, kodwana iingcoco ezinjalo zingabuye zibangele ukuthi umzalwana nofana udade azifumane sele asemrarweni wokuzihlanganisa nabantu abambi, kuhlanganise neenhlubuki. (1 Kor. 1:19-25; Kol. 2:8) Ngaphezu kwalokho, eendaweni lapho umsebenzi wokutjhumayela ngomBuso uvinjelwe khona, lokho-ke kwenza ukuthi iimphathimandla zalapho zihlole imilayezo ethunyelwanako. Ukukhulumisana okunjalo kungafaka abazalwana nabodade bendawo leyo emrarweni. Yeke, abarhuweleli akukafuzi bangene ku-inthanethi bafune abantu bakezinye iinarha ukwenzela bona babelane nabo iindaba ezimnandi.

Ngaphandle kokuthi i-ofisi legatja lendawo yangekhenu likhuphe isinqophiso, nangabe sifakaza ngokungakahlelwa emntwini esingamaziko ovakatjhileko ovela kenye inarha, Akukafaneli sizame ukubasela ikarekwakhe ngemva kokuthi sekabuyele emva lapho ahlala khona. Kunalokho, singamtjengisa ukuthi i-jw.org angayisebenzisa njani ukwenzela kobana afumane imininingwana enabileko namkha angathintana njani ne-ofisi yegatja yangekhabo. Singamkhuthaza nokuthi avakatjhele eWolweni lomBuso elihlanu kwendawo yangekhabo. Kuyaziwa ukuthi kezinye iinarha amaWolo womBuso awekho. Nangabe ufisa ukuvakatjhelwa boFakazi bakaJehova endaweni yangekhabo, singamtjengisa indlela yokuzalisa iforomo elithi, Bawa Isifundo SeBhayibheli ku-jw.org. I-ofisi legatja elengamele umsebenzi enarheni yalapho kufunyenwe umuntu onekareko loyo, lijayelene nobujamo obuhluke njalo begodu ngilo elingakwazi ukusiza nasiza eendabeni ezingokomoya.—Qala iKonzwethu YomBuso kaJuni 2014, k. 7, neyakaNovemba 2011, k. 2.

Nangabe umuntu esimvakatjhelako sekathuthela kenye inarha nofana nangabe sifunda nomuntu iBhayibheli wakenye indawo esimazela ku-Inthanethi, kufuze silandele iinqophiso ezitlolwe ngehla. Yeke, singaragela phambili nokuthuthukisa ikareko yomuntu loyo bekube kulapho abarhuweleli bendaweni yangekhabo bamvakatjhela khona. Nanyana kunjalo, nangabe uhlala endaweni lapho umsebenzethu uvinjelwe namkha ulinganiselwe khona, kufuze kutjhejwe khulu nakusetjenziswa iingcoco zeBhayibheli ngokutlola incwadi, umtato, nofana isisetjenziswa se-elektroniki.—Mat. 10:16.