Iinkhombiso Zencwajana Ethi IPilo NomSebenzi WobuKrestu IHlelo LomHlangano WeBandla
MEYI 6-12
AMAGUGU ASELIZWINI LAKAZIMU | 2 KORINTE 4-6
“Asipheli Amandla”
(2 Korinte 4:16) Nje-ke, asipheli amandla, kodwana nangabe umuntu esinguye ngaphandle uyonakala, ngokuqinisekileko umuntu esinguye ngaphakathi uyavuseleleka ilanga nelanga.
w04 8/15 25 ¶16-17
Siyadinwa Kodwana Asipheli Amandla
16 Eqinisweni, ukutlhogomela ubuhlobo bethu noZimu kuqakatheke khulu. Kungenzeka sidinwe emzimbeni kodwana nasinobuhlobo obutjhideleneko noJehova uZimu angekhe sidinwe ukumlotjha. UJehova nguye ‘omupha amandla odiniweko; aqinise khulu amandla waloyo obuthakathaka.’ (Isaya 40:28, 29) Umpostoli uPowula, wakubona ngokwakhe ukuba liqiniso kwamezwi la, watlola: “Nje-ke, asipheli amandla, kodwana nangabe umuntu esinguye ngaphandle uyonakala, ngokuqinisekileko umuntu esinguye ngaphakathi uyavuseleleka ilanga nelanga.”—2 Korinte 4:16.
17 Tjheja amezwi athi, “ilanga nelanga.” Lokho kutjho bona siwasebenzise ngokuzeleko amalungiselelo kaJehova ekuphileni kwethu kwaqobe lilanga. Isithunywa sevangeli esilotjhe ngokuthembeka iminyaka ema-43 saqalana nokudinwa emzimbeni isikhathi esithileko nokudana. Kodwana akhenge siphele amandla. Sithi: “Ngikwenze umukghwa ukuvuka ekuseni ngaphambi kobana ngithome nanyana ngimuphi umsebenzi, ukwenzela bona ngibe nesikhathi sokuthandaza kuJehova ngifunde neliZwi lakhe. Bekube nje, indlela le ingisizile ukuthi ngikghodlhelele.” Singathembela ngokupheleleko kuJehova bona asinikele amandla nange “ilanga nelanga,” sithandaza kuye begodu sizindla ngobuntu bakhe obuphakemeko neenthembiso zakhe.
(2 Korinte 4:17) Ngombana nanyana isizi lingelesikhatjhana begodu lilincani, liveza kithi iphazimulo ekulu khulu nengapheliko;
it-1 724-725
Ukukghodlhelela
Kuqakathekile ukuthi singalahlekelwa lithemba esinalo lobuKrestu, ukuphila okungapheliko okunganasono. Ngitjho nokufa ezandleni zabasihlunguphazako angeze kwasithathela ithembeli. (Rom 5:4, 5; 1Te 1:3; sAm 2:10) Isizi lanje lincancani khulu nasilimadanisa nokuzaliseka kwethemba elihle esiqale phambili kilo. (Ro 8:18-25) Nanyana ngezinye iinkhathi ukuphelelwa lithemba nobudisi kungazipha amandla, kufuze sikhumbule ukuthi ‘kungokwesikhatjhana begodu buncancani.’ (2Ko 4:16-18) Umuntu nakakhumbula ukuthi isizi aqalene nalo lingelesikhatjhana begodu abambelele ethembeni lobuKrestu, lokho kungamenza angapheli amandla nakaqalene nobudisi begodu athembeke kuJehova uZimu.
(2 Korinte 4:18) njengombana sidzimelelisa amehlwethu, ingasi ezintweni ezibonwako, kodwana ezintweni ezingabonwako. Ngombana izinto ezibonwako ngezesikhatjhana, kodwana izinto ezingabonwako zingezingapheliko.
Rhubhulula Ngezinto ZakaZimu Eziligugu
(2 Korinte 4:7) Nanyana kunjalo, sinegugweli ezitjeni zebumba, ukuze amandla angaphezu kajayelekileko abe ngavela kuZimu, ingasi kithi.
“Yenzani UJehova Athabe”
UDavid Splane wesiHlopha esiBusako wacoca ngomTlolo ekusekelwe kiwo isihlokwesi. (2 Korinte 4:7) Liyini igugu? Kghani lilwazi namkha kuhlakanipha? Isikhulumi sathi, “Awa.” “Igugu umpostoli uPowula akhuluma ngalo ‘limsebenzi’ ‘wokwenza iqiniso libonakale.’” (2 Korinte 4:1, 2, 5) UmFowethu Splane wakhumbuza abafundi ukuthi iinyanga ezihlanu abaziqede bafunda, bezibalungiselela isabelo esikhethekileko esimini. Isabelweso kufuze basithathele phezulu.
Isikhulumi sahlathulula ukuthi ‘izitja zebumba’ ziqalisele emizimbenethu yenyama. Wamadanisa isitja esenziwe ngebumba naleso esenziwe ngegolide. Izitja zegolide azisetjenziswa qobe. Ngakelinye ihlangothi, izitja ezenziwe ngebumba zenzelwe ukusetjenziswa. Nange singabeka igugu ngesitjeni segolide singadzimelela khulu esitjeni segolide kunokobana sinake lokho okungaphakathi kwaso. UmFowethu Splane wathi, “Nina bafundi ningazidoseli amehlo. Njengombana niziinthunywa zevangeli, kufuze ninqophise abantu kuJehova. Nizizitja zebumba ezithobekileko.”
(2 Korinte 6:13) Yeke nangiphendulako—ngikhuluma ngasuthi ngikhuluma nabantwabami—nani vulani iinhliziyo zenu.
w09 11/15 21 ¶7
Ragelani Phambili Nithanda Abafowethu
7 Kuthiwani ngathi? ‘Singazivula njani iinhliziyo’ zethu ekuthandeni abafowethu? Kulula ngabantu abaseminyakeni efanako namkha abavela esitjhabeni esifanako bona bathandane. Bese kuthi labo abathanda izinto ezifanako zokuzithabisa kanengi baba nesikhathi esinengi bandawonye. Kodwana nange izinto esithanda ukuzenza namaKrestu athileko zisihlukanisa namanye, kufuze ‘sivule iinhliziyo zethu.’ Kungaba kuhlakanipha ukuthi sizibuze: ‘Kghani ngezinye iinkhathi ngiya esimini namkha ngizithabisa nabafowethu nabodadwethu abangasisesiqhemeni engikiso? NangiseWolweni lomBuso, kghani ngikhambela kude nabantu abasand’ ukuhlanganyela ngombana ngilindele bona kube ngibo abeza kimi? Kghani ngibalotjhisa boke abantu abadala nabancani ebandleni?’
Ukufundwa KweBhayibheli
(2 Korinte 4:1-15) Nje-ke, njengombana sinomsebenzi lo ngebanga lomusa esenzelwe wona, asipheli amandla. 2Kodwana silahle izinto eziphathisa iinhloni, nezinto ezenzelwa ngemsitheleni, akhenge sikhambe ngobuqili namkha sihlanekele ilizwi lakaZimu; kodwana ngokwenza iqiniso libonakale, siyazinyula kibonembeza babo boke abantu phambi kwakaZimu. 3 Eqinisweni, nangabe iindaba ezimnandi esizimemezelako zigutjuzesiwe, zigutjuzeswe hlangana nalabo abatjhabalalako, 4 kibo, uzimu wephaseli uphophaze imikhumbulo yabangakholwako, ukuze ukukhanya kweendaba ezimnandi eziphazimulako ezimalungana noKrestu, omfanekiso kaZimu, kungakhanyi. 5 Ngombana asitjhumayeli ngathi, kodwana sitjhumayela ngoJesu Krestu oyiKosi nangathi esiziingqila zenu ngebanga lakaJesu. 6 Ngombana uZimu nguye owathi: “Ukukhanya akukhanye ebumnyameni,” begodu yena ukhanye eenhliziyweni zenu bona abakhanyisele ngephazimulo yelwazi lakaZimu ngobuso bakaKrestu. 7 Nanyana kunjalo, sinegugweli ezitjeni zebumba, ukuze amandla angaphezu kajayelekileko abe ngavela kuZimu, ingasi kithi. 8 Sigandelelwe ngazo zoke iindlela, kodwana asikaminyaniswa kangangobana singakghoni ukusikinyeka; sirarekile, kodwana akutjho bona asinandlela yokuphuma; 9 siyahlunguphazwa, kodwana asilahlwa; sidulwa phasi, kodwana asitjhatjalaliswa. 10 Qobe emzimbenethu sikghodlhelela ukuphathwa ngendlela ebangela ukufa leyo uJesu aphathwa ngayo, ukuthi ukuphila kwakaJesu nakho kubonakaliswe emzimbenethu. 11 Ngombana thina senziwa siqalane poro nokufa ngebanga lakaJesu, ukuze ukuphila kwakaJesu kubonakaliswe enyamenethu efako. 12 Nje-ke ukufa kuyasebenza kithi, kodwana kini kusebenza ukuphila. 13 Ngombana sinommoya wokukholwa onjengalowo okutlolwe ngawo ukuthi: “Ngakholwa, ngalokho ngakhuluma”; nathi siyakholwa, ngalokho siyakhuluma, 14 siyazi ukuthi loyo owavusa uJesu uzosivusa nathi kunye noJesu begodu uzosethula sikunye nani. 15 Ngombana zoke izinto zingebanga lenu, ukuze ukwanda komusa omkhulu kube kunengi khudlwana ngombana abanye abanengi bayathokoza ephazimulweni kaZimu.
MEYI 13-19
AMAGUGU ASELIZWINI LAKAZIMU | 2 KORINTE 7-10
“Umsebenzethu Wokusiza”
(2 Korinte 8:1-3) Nje-ke bafowethu, sifuna nazi ngomusa omkhulu kaZimu owenzelwe amabandla weMasedoniya. 2 Ngesikhathi sokulingwa okukhulu ngaphasi komtlhago, ukuphuphuma kwethabo labo nobuchaka babo obukhulu benza ukunotha kokupha kwabo kwaphuphuma. 3 Ngombana benza ngokusemandlenabo, kuhlekuhle, ngiyafakaza ukuthi bekungaphezu kwamandlabo,
w98 11/1 25 ¶1
“UZimu Uthanda Umuphi Othabileko”
Kokuthoma, uPowula watjela abantu beKorinte ngabantu beMasedoniya, ababeka isibonelo esihle emsebenzini wokusiza. UPowula watlola, “ngesikhathi sokulingwa okukhulu ngaphasi komtlhago, ukuphuphuma kwethabo labo nobuchaka babo obukhulu benza ukunotha kokupha kwabo kwaphuphuma.” Abantu beMasedoniya bebangatlhogi ukutjelwa. Kunalokho, uPowula wathi, “kukulapho bona ngokwabo ngokuzisukela kibo basolo basirabhela kwamambala ukuthi babe nelungelo lokupha ngomusa, ukuze bahlanganyele emsebenzini wokusiza abacwengileko.” Ukupha kwabantu beMasedoniya kubabazeka khulu, khulukhulu nasicabanga ngokuthi nabo ‘bebangaphasi komtlhago.’—2 Korinte 8:2-4.
Ikonzo Yokuhlangula
KUSEMINYAKENI yabo-46, njengombana iJudiya lidosa emhlweni. Abafundi bakaKrestu abamaJuda baqalene neembila zithutha, izinto aziduri zibuya nomuntu phasi. Iphapha ngomswani, indlala nayo ithi ngimi nani esitikini. Kodwana naso isivikelo esivela kuJehova phezu kwabo, abafundaba bazokubona into engazange kheyibonwe ngamanye amaKrestu ngaphambili. Kazi yini leyo?
(2 Korinte 8:4) kukulapho bona ngokwabo ngokuzisukela kibo basolo basirabhela kwamambala ukuthi babe nelungelo lokupha ngomusa, ukuze bahlanganyele emsebenzini wokusiza abacwengileko.
Ikonzo Yokuhlangula
4 Encwadinakhe yesibili ayitlolela beKorinte, uPowula wahlathulula ukuthi amaKretsu anekonzo ekabili. Nanyana incwadi kaPowula le beyiqalisele emaKrestwini azesiweko, namhlanjesi amezwi lawo sekasebenza ‘nakwezinye izimvu.’ (Jwa. 10:16) Ihlandla lokuthoma lekonzwethu, ‘yikonzo yokubuyisana,’ okumsebenzethu wokutjhumayela nokufundisa. (2 Kor. 5:18-20; 1 Thim. 2:3-6) Bese kuthi ihlandla lesibili lekonzo yethu kube yindlela esibasiza ngayo abazalwana esikhonza nabo. Leyo-ke yikonzo uPowula akhuluma ngayo nakathi “ukufaka isandla ekusizeni amakholwa.” (2 Kor. 8:4) Emutjhweni othi, “ikonzo yokubuyisana” nothi “ekusizeni amakholwa” kunebizo elithi, “ikonzo” nelithi, ‘isizo’ womabili atjhugululwe kususelwa ebizweni lesiGirigi elithi, di·a·ko·niʹa. Kubayini lokhu kuphawuleka kangaka?
5 Ngokusebenzisa kwakhe ibizo lesiGirigeli kiyo yomibili imisebenzi le, uPowula bekalumbanisa umsebenzi wokuhlangula neminye imisebenzi yekonzo eyenziwa ebandleni lobuKrestu. Wakhe watjho nekuthomeni ukuthi: “Kunemisebenzi eyahlukahlukeneko yezipho, kodwana ngeKosi yinye. Kunokusebenza okuhlukahlukeneko, . . . [Begodu] koke lokhu kumsebenzi kaMoya munye.” (1 Kor. 12:4-6, 11) Ekhabolakhona, la uPowula uyihlobanisa nekonzo “ecwengileko,” imisebenzi ehlukahlukeneko eyenziwa ebandleni lobuKrestu. (Rom. 12:1, 6-8) Ngikho akubona kufanele ukuzipha isikhathi ‘sokuyokusiza abacwengileko’!—Rom. 15:25, 26.
6 UPowula walemukisa beKorinte ukuthi umsebenzi wokuhlangula nawo uyikonzo yabo yokulotjha uJehova. Khewumuzwe ukuthi ubonisana nabo uthini nakathi: Ikonzo yokuhlangula le, amaKrestu ayenziswa kukuthi ‘ayazithoba . . . evangelini lakaKrestu.’ (2 Kor. 9:13) Okwenza amaKrestu asize labo akholwa nabo kukuthi asuke atjhukunyiswe kukwenza ngokuvumelana namezwi kaKrestu. Ngikho uPowula athi isirhawu abanaso ngabanakwabo sibufakazi obupheleleko ‘bomusa omkhulu uZimu abaphe wona.’ (2 Kor. 9:14; 1 Pit. 4:10) NesiThala sakaDisemba 1, 1975 sakhe sakhuluma ngendaba yokukhonza abafowethu ngomsebenzi wokuhlangula, sathi: “Akukafaneli nakancani sibilayele bona uJehova uZimu neNdodanakhe uJesu Krestu bawuqala njengoqakatheke kangangani umsebenzi lo.” Yeke, singatjho ngokungananazi ukuthi umsebenzi wokuhlangula uyikonzo ecwengileko.—Rom. 12:1, 7; 2 Kor. 8:7; Heb. 13:16.
(2 Korinte 9:7) Omunye nomunye akenze njengombana aquntile ehliziywenakhe, ingasi ngokuzikhuja namkha ngokukatelelwa, ngombana uZimu uthanda umuphi othabileko.
Indlela Umsebenzi WomBuso Osekelwa Ngayo Ngeemali
10 Kokuthoma, sinikela ngokuzithandela ngombana siyamthanda uJehova begodu sifuna ukwenza “okumthokozisako.” (1 Jwa. 3:22) UJehova uyamthanda umuntu opha ngokusuka ehliziyweni. Nje-ke akhesihlole amezwi kaPowula akhuluma ngomKrestu ophako. (Funda yesi-2 kwebeKorinte 9:7.) UmKrestu wamambala akatsitsili namkha azizwe akatelelekile nakufuze anikele. Kunalokho, unikela “njengokuzibekela kwakhe ehliziyweni.” Lokhu kutjho bona umuntu unikela ngokwendlela ahlele ukuthi uzokwenza ngayo. UJehova umthanda kwamambala umuphi onjalo, ngombana “uZimu uyamthanda loyo onikela ngethabo.” Enye iBhayibheli iyibeka bunje: “UZimu uyabathanda abantu abathanda ukupha.”
Rhubhulula Ngezinto ZakaZimu Eziligugu
(2 Korinte 9:15) Akathokozwe uZimu ngesipho sakhe sesihle esingahlathululekiko.
Vumela UZimu Akurage “Ngesipho Sakhe [Sesihle] Esingahlathululekiko”
2 UPowula bekazi kuhle bona umhlatjelo kaJesu usiqinisekiso sokuthi zoke iinthembiso zakaZimu zizokufezeka. (Funda yesi-2 kwebeKorinte 1:20.) Lokho kutjho ukuthi ‘isipho sakaZimu [sesihle] nesingahlathululekikwesi!’ sihlanganisa nomhlatjelo kaJesu, godu sihlanganisa boke ubuhle nethando lamambala uJehova asitjengisa lona. Kungakho singeze sakghona nokusihlathulula, ukuze sisizwisise kuhle. Yeke kufuze sizizwe njani ngesipho esiqakathekilekwesi? Begodu kufuze sisikhuthaze njani isiphwesi njengombana silungiselela isiKhumbuzo sokufa kwakaKrestu, esizokuba ngeLesithathu, ngoMatjhi 23, 2016?
(2 Korinte 10:17) “Kodwana loyo ozikhakhazisako, akazikhakhazise ngoJehova.”
g99 7/8 20-21
Kumbi Na Ukuzikhakhazisa?
EmiTlolweni YamaKrestu YesiGirigi, isenzo esithi, kau·khaʹo·mai esitjhugululwe ngokuthi, “zikhakhazise, thaba,” zisetjenziswe ukuveza imiqondo emibili omuhle nomumbi. Ngokwesibonelo, uPowula uthi, “asithabeni, ngesisekelo sethemba lephazimulo kaZimu.” Godu ukhuthaza uthi: “Kodwana loyo ozikhakhazisako, akazikhakhazise ngoJehova.” (Roma 5:2; 2 Korinte 10:17) Lokho kutjho bona ukuzikhakhazisa ngoJehova uZimethu kusisenzo esingasenza bona sithabe ngebanga lebizo nedumela lakhe elihle.
Ukufundwa KweBhayibheli
(2 Korinte 7:1-12) Nje-ke njengombana sineenthembiswezi, bathandekako, asizihlambululeni kikho koke ukusilaphala kwenyama nokommoya, siphelelise ukucwengeka ekusabeni uZimu. 2 Senzelani indawo eenhliziyweni zenu. Asikoni muntu, asikonakalisi muntu, asikasizakali ngamuntu. 3 Angitjho lokhu bona nginigwebe. Ngombana ngitjhwile phambilini ukuthi niseenhliziyweni zethu bona sife ndawonye begodu siphile ndawonye. 4 Nginetjhaphuluko ekulu yokukhuluma kini. Ngizikhakhazisa khulu ngani. Ngizele induduzo; ngiphuphuma ithabo kikho koke ukutlhaga kwethu. 5 Eqinisweni, nasifika eMasedoniya, imizimbethu khenge ikufumane ukuphumula, kodwana saragela phambili nokutlhaga ngazo zoke iindlela—bekunokulwa ngaphandle, kunokusaba ngaphakathi. 6 Kodwana uZimu, oduduza abadanileko, usiduduzile ngokuba khona kwakaTitosi; 7 ingasi ngokuba khona kwakhe kwaphela kodwana nangenduduzo ayifumene ngebanga lenu, njengombana asibikele ngendlela eningihlulukele ngayo, isizi lenu, ukutshwenyeka kwenu ngami; nje-ke ngathaba ngokungeziweko. 8 Ngitjho nanyana nganidanisa ngencwadami, angizisoli. Ngitjho nanyana ngazisola ekuthomeni (ngiyabona ukuthi incwadi leya inidanisile, nanyana bekungekwesikhatjhana kwaphela), 9 nje ngiyathaba, ingasi ngombana benidanile, kodwana ngombana ukudana kwenze bona nitjhuguluke. Benidane ngendlela ethabisa uZimu, ukuze ningalimali ngebanga lethu. 10 Ngombana ukudana ngendlela ethabisa uZimu kuveza ukutjhuguluka okurholela esindisweni, kukutjhiya ungazisoli; kodwana ukudana kwephasi kuveza ukufa. 11 Ngombana qalani bona ukudana ngendlela ethabisa uZimu kuveze ukuzinikela ngetjiseko kangangani kini, kuveze nokuzihlwengisa, itukuthelo, ukwesaba, isifiso esinamandla, itjiseko, ukulungisa okungakalungi! Kikho koke lokhu nizibonakalise nicwengile endabeni le. 12 Nanyana nganitlolela, akhenge ngitlole ngebanga laloyo owenze okumbi, namkha ngebanga laloyo owoniweko, kodwana ukuze itjisekwenu ngathi yenziwe ibonakale hlangana nani phambi kwakaZimu.
MEYI 20-26
AMAGUGU ASELIZWINI LAKAZIMU | 2 KORINTE 11-13
“UPowula ‘Uneliva Enyameni’ ”
(2 Korinte 12:7) ngebanga lokufumana imibono engakajayeleki kwaphela.
Ukuze ngingaziphakamisi ngokudluleleko, nganikelwa iliva enyameni, ingilozi kaSathana, bona isolo ingiwahla ngepama, bona ngingaziphakamisi ngokudluleleko.
w08 6/15 3-4
Sinamandla Naphezu Kokubogaboga
Esinye isikhonzi esithembekileko sabawa uJehova bona asuse ‘iliva enyamenaso’ ebekuyinto emtshwenyako. Umpostoli uPowula wabawa uZimu kathathu bona amtjhaphulule esitjhijilwenesi. Nanyana bekuyini, kodwana bekufana neliva elitshwenyako begodu belingenza uPowula angakuthabeli ukusebenzela uJehova. UPowula walifanisa nokubethwa ngepama. UJehova nakamphendulako wathi: “Umusami omkhulu ukwanele, ngombana amandlami enziwa aphelele ekubogabogeni.” UJehova akhenge alisuse ilivelo enyameni. Kwafuze bona uPowula aphile nalo, yeke wathi: “Ngombana nangibogabogako, kulapho-ke nginamandla khona.” (2 Kor. 12:7-10) Bekatjho ukuthini?
(2 Korinte 12:8, 9) Ngarabhela iKosi amahlandla amathathu ngalokhu, bona lisuke kimi. 9 Kodwana yathi kimi: “Umusami omkhulu ukwanele, ngombana amandlami enziwa aphelele ekubogabogeni.” Ngalokho-ke, ngethabo elikhulu ngizozikhakhazisa ngokubogaboga kwami, ukuze amandla kaKrestu ahlale phezu kwami njengetende.
w06 12/15 24 ¶17-18
UJehova Ubanikela “Ummoya Ocwengileko Labo Abawubawa Kuye”
17 UZimu waphendula umthandazo kaPowula wathi: “Umusami omkhulu ukwanele, ngombana amandlami enziwa aphelele ekubogabogeni.” UPowula wathi: “Ngalokho-ke, ngethabo elikhulu ngizozikhakhazisa ngokubogaboga kwami, ukuze amandla kaKrestu ahlale phezu kwami njengetende.” (2 Korinte 12:9; IRhubo 147:5) Ngalokho-ke uPowula wakubona lokho ngoKrestu, ukuthi amandla kaZimu avikelako aba phezu kwakhe njengetende. Nanamhlanjesi, uJehova uyiphendula ngendlela efanako imithandazwethu. Isivikelo sakhe sinjengetende eencekwini zakhe.
18 Iye khona, itende alilivimbi izulu namkha ummoya, nanyana kunjalo liyasivikela ngendlela ethileko ezintwenezi. Ngendlela efanako, itende ‘elimamandla kaKrestu’ alizivimbi iintjhijilo bona zingasehleli namkha iinkhathi ezibudisi ukuthi zingasifikeli. Kodwana liyasivikela ezintweni ezilimazako zephaseli kunye nekuhlaseleni kombusalo uSathana. (IsAmbulo 7:9, 15, 16) Yeke, ngitjho nanyana uqalene nesilingo ‘esingafuni ukusuka,’ ungaqiniseka ngokuthi uJehova uyasibona isilingo oqalene naso begodu sele ‘asizwile isililo sakho.’ (Isaya 30:19; 2 Korinte 1:3, 4) UPowula watlola wathi: “UZimu uthembekile, begodu ngekhe avume nilingwe ngokungaphezu kwalokho eningakuthwala, kodwana nakufika isilingweso uzokwenza nendlela yokuphuma kiso ukuze nikghone ukusikghodlhelela.”—1 Korinte 10:13; Filipi 4:6, 7.
(2 Korinte 12:10) Ngalokho ngiyathaba ngokubogaboga, ngokuthukwa, ngeenkhathi zokutlhoga, ngokuhlunguphazwa nangobudisi, ngebanga lakaKrestu. Ngombana nangibogabogako, kulapho-ke nginamandla khona.
“Odiniweko Umupha Amandla”
8 Funda u-Isaya 40:30. Kungakhathaliseki bona sinamakghono angangani, kunezinto esingekhe sakghona ukuzenza ngamandlethu. Soke kufuze sikufunde lokho. UPowula bekanekghono lokwenza izinto ezinengi, kodwana zikhona izinto ebengeze akghona ukuzenza ngitjho nanyana afuna. Watjela uZimu ukuthi uzizwa njani. UZimu wamphendula wathi: “Amandlami enziwa aphelele ekubogabogeni.” UPowula wakuzwisisa kuhle khulu lokho, kungebangelo athi: “Nangibogabogako, kulapho-ke nginamandla khona.” (2 Kor. 12:7-10) Bekatjho ukuthini kuhlekuhle uPowula?
9 UPowula walemuka ukuthi zimbalwa khulu izinto angazenza ngamandlakhe. Kodwana ummoya kaZimu ngiwo ebewungamupha amandla awatlhogako. Bewungamsiza enze imisebenzi ebengeze avuka ayenzile ngewakhe amandla. Kungenzeka lokho nakithi. Nange uJehova angasipha amandlakhe, nakanjani sizokuqina!
Rhubhulula Ngezinto ZakaZimu Eziligugu
(2 Korinte 12:2-4) Ngazi umuntu othileko omunye noKrestu, okwathi eminyakeni eli-14 edlulileko—ukuthi bekasemzimbeni namkha ngaphandle komzimba, angazi; kwazi uZimu—wathathwa wasiwa ezulwini lesithathu. 3 Iye, ngiyamazi umuntu onjalo—ukuthi bekasemzimbeni namkha ngaphandle komzimba, angazi; kwazi uZimu— 4 owathathwa wasiwa epharadesi wezwa amezwi angakhulumekiko begodu okungakavumeleki bona umuntu awatjho.
Imibuzo Evela Ebafundini
‘Izulu lesithathu’ ekukhulunywa ngalo emtlolweni wesi-2 kwebeKorinte 12:2 kungenzeka mBuso kaMesiya ozabe udoswe phambili nguKrestu nabakhambisani bakhe abazii-144 000 ‘okulizulu elitjha.’—2 Pit. 3:13.
‘Lizulu lesithathu’ ngombana litjengisa ukuthi umBuso kaZimu mkhulu kangangani nawumadaniswa nemibuso yabantu.
‘Ipharadesi’ uPowula ‘asiwa kilo’ kungenzeka litjho (1) iPharadesi elizokuba khona ephasina, (2) ipharadesi elizokuba khona esikhathini esizako, okuzokuba lipharadesi elikhulu ukudlula leli esinalo namhlanjesi, (3) ‘ipharadesi lakaZimu’ elizokuba sezulwini nephasini elitjha.
(2 Korinte 13:12) Lotjhisanani ngokumangana okucwengileko.
it-2 177
Ukumanga
‘Ukumangana okucwengileko.’ AmaKrestu wangaphambili bewalotjhisana “ngokumangana okucwengileko” (Rom 16:16; 1Ko 16:20; 2Ko 13:12; 1Te 5:26) namkha ‘ukumangana kwethando’ (1Pt 5:14), lokho bekwenzeka ebantwini bobulili obufanako. Indlela yokulotjhisana yamaKrestu wangaphambili le beyifana nendlela yamaHebheru wekadeni yokulotjhisana ngokumangana. Nanyana imiTlolo ingasinikeli imininingwana, ‘ukumangana okucwengileko’ namkha ‘ukumangana kwethando’ bekutjengisa ithando elipheleleko nobunye ebebusebandleni lobuKrestu.—Jwa 13:34, 35.
Ukufundwa KweBhayibheli
(2 Korinte 11:1-15) Ngifisa ngasuthi ningangibekezelela ekungabini nengqondo kwami okuncani. Kodwana eqinisweni, niyangibekezelela! 2 Nginesikhwele esinjengesakaZimu ngani, ngombana nganithembisa ukunendisa endodeni yinye bona nginethule kuKrestu njengentombi emsulwa. 3 Kodwana ngiyasaba bona ngendlela ethileko, njengombana inyoka yayenga u-Eva ngobuqili bayo, iingqondo zenu zingonakaliswa zisuswe ekuthembekeni nebumsulweni obufanele uKrestu. 4 Kwanje, nangabe kuza umuntu begodu atjhumayele omunye uJesu ngaphandle kwaloyo esatjhumayela ngaye, namkha nangabe namukela omunye ummoya ngaphandle kwaloyo enawamukelako, namkha ezinye iindaba ezimnandi ngaphandle kwalezi enazamukelako, nimbekezelela lula. 5 Ngombana ngicabanga ukuthi akhenge nakweyodwa into ngizibonakalise ngimncani ebapostolini benu abazitjhaya abalungileko. 6 Kodwana ngitjho nanyana ngingasisikghwari ekukhulumeni, ngokuqinisekileko ngingiso elwazini; sikwenze kwabonakala lokho kini ngazo zoke iindlela nakizo zoke izinto. 7 Kghani ngenze isono ngokuzithoba ukuze niphakanyiswe, ngombana ngazitjhumayela ngethabo iindaba ezimnandi zakaZimu kini ngesihle? 8 Amanye amabandla ngawadlelezela ngokwamukela isekelo ukuze ngenzele nina. 9 Kodwana ngesikhathi nginani ngitlhoga okuthileko, akhenge ngibe mthwalo nakoyedwa, ngombana abafowethu abavela eMasedoniya bangisekela ngakho koke engikutlhogako. Ngazo zoke iindlela ngalwela ukuhlala ngingasimthwalo kini begodu ngizokuragela phambili nokwenza njalo. 10 Njengombana iqiniso lakaKrestu likimi, angeze ngilise ukuzikhakhazisokhu eemfundeni ze-Akhaya. 11 Kubayini? Ngombana nginganithandi? UZimu uyazi ukuthi ngiyanithanda. 12 Kodwana engikwenzako ngizokuragela phambili ngikwenza, ukuze ngisuse ibanga lalabo abafuna isisekelo sokufunyanwa balingana nathi ezintweni abazikhakhazisa ngazo. 13 Ngombana abantu abanjalo babapostoli bamala, baziinsebenzi ezikhohlisako, bazenza ngasuthi babapostoli bakaKrestu. 14 Akurari lokho, ngombana uSathana ngokwakhe usolo azenza ngasuthi uyingilozi yokukhanya. 15 Yeke akusiyinto ekulu neensebenzi zakhe nazisolo zizenza ngasuthi ziinsebenzi zokulunga. Kodwana ukuphela kwazo kuzokuba njengeemsebenzazo.
MEYI 27–JUNI 2
AMAGUGU ASELIZWINI LAKAZIMU | GALATIYA 1-3
“Ngaphikisana Naye Ubuso Nobuso”
(Galatiya 2:11-13) Nanyana kunjalo, uKhefasi nakeza e-Anthiyokiya, ngaphikisana naye ubuso nobuso, ngombana bekusemtarini ukuthi utjhaphile. 12 Ngaphambi kobana kufike abantu abathileko abavela kuJakopo, bekajayele ukudla nabantu beentjhaba; kodwana kuthe nabafikako, walisa ukwenza lokhu, wazihlukanisa, asaba labo besigaba esisokileko. 13 Woke amanye amaJuda nawo ahlanganyela naye ekuzenzisenokhu, kangangobana noBharinabhasi wadoselwa bona ahlanganyele nabo ekuzenziseni kwabo.
Uyamlingisa Na UJehova Ngokuthi Ube Nobulungiswa?
16 Funda kwebeGalatiya 2:11-14. UPitrosi wavumela ukusaba abantu kwamliya. (IzA. 29:25) Nanyana bekawazi umbono kaJehova ngendaba le, kodwana wasaba umbono wamaJuda asokiweko angewebandla leJerusalema. UPowula naye bekakhona emhlanganweni weJerusalema wangomnyaka ka-49, ngikho nabase-Anthiyorhiya aveza ubuzenzisi bakaPitrosi baba sebaleni. (IzE. 15:12; Gal. 2:13) Alo amaKrestu wakosoBantu azizwa njani ngomtjhapho wokungabi nobulungiswa owenziwa nguPitrosi? Kghani bebazokuvumela ukukhubeka kudlale ngabo? Kghani uPitrosi yena bekazakulahlekelwa malungelwakhe ngebanga lomtjhaphwakhe?
(Galatiya 2:14) Kodwana nangilemuka ukuthi bebangakhambi ngokuvumelana neqiniso leendaba ezimnandi, phambi kwabo boke ngathi kuKhefasi: “Nangabe wena, nanyana umJuda nje, uphila njengabantu beentjhaba begodu ungaphili njengamaJuda, kubayini ukatelela abantu beentjhaba bona baphile ngokuvumelana nesiko lamaJuda?”
Kilabo AbaThanda UJehova, “AkunasiKhubekiso”
12 UPitrosi watjengisa ukusaba abantu, okwamenza wakhutjwa kabuhlungu ngezinye iinkhathi; kodwana wahlala athembekile kuJesu nakuJehova. Ngokwesibonelo, waphika iKosakhe tjhatjhalazi, ingasi kanye, kodwana kathathu. (Luka 22:54-62) Ngokukhamba kwesikhathi, uPitrosi wabhalelwa kuziphatha ngendlela yobuKrestu, waphatha amakholwa angasimaJuda njengokungathi angaphasi kwamaKrestu amaJuda asokiweko. Nokho, umpostoli uPowula wayibona kuhle indaba le—ibandla alisiyindawo yokuqalela abanye phasi. Ukucabanga kwakaPitrosi bekukumbi. Ngaphambi kobana ukucabanga kwakhe konakalise ibandla lobuKrestu, uPowula wamluleka ngokunqophileko, wamtjela emehlweni. (Gal. 2:11-14) Inga-kghani uPitrosi ngokuzikhukhumeza, wezwa ubuhlungu kangangobana walisa ukugijima emjarhweni wokuphila? Awa. Wacabangisisa ngokudephileko ngesiluleko sakaPowula, wasisebenzisa, waragela phambili nomjarho.
Rhubhulula Ngezinto ZakaZimu Eziligugu
(Galatiya 2:20) Ngibethelwe esigodweni kunye noKrestu. Akusesengimi ophilako, kodwana nguKrestu ophila ebunyeni nami. Eqinisweni, ukuphila engikuphilako nje enyameni, ngikuphila ngokukholelwa eNdodaneni kaZimu, eyangithanda, yazinikela ngebanga lami.
Khonza UZimu Ngokwethembeka Nanyana Uqalene ‘Nobunzima Obunengi’
20 Ngiyiphi enye indlela esingaqalana ngayo nokusahlelwa okukhamba phasi njengokudana? Enye yeendlela kuzindla ngesihlengo sakaJesu. Ngilokho uPowula ebekakwenza. Bekazi kuhle bona kwesinye isikhathi uyadana. Kodwana bekazi nokuthi uKrestu wafa, ingasi ngebanga labantu abapheleleko kodwana wafela izoni. NoPowula bekangomunye wazo. Bewatlola wathi: “Ipilo engiyiphila emzimbeni lo, ngiyiphila ngokukholwa eNdodaneni kaZimu eyangithandako beyanikela ipilwayo ngebanga lami.” (Gal. 2:20) UPowula wasamukela isihlengo. Wazwisisa nokuthi isihlengwesi besisebenza kuye ngokwakhe.
21 Nesingaba nombono onjalo wokuqala isihlengo njengesisebenza kithi ngokwethu, singasizeka kwamambala. Lokho akutjho bona ukudana kuzokuphela. Abanye bethu kungenzeka balibambe litjhisa bekube sephasini elitjha. Kodwana khumbula ukuthi mumuntu okghodlhelelako kwaphela othumba unongorwana. Phela sesiseduze nelanga lapho umBuso kaZimu uzokuletha ukuthula, wenze nabathembekileko babe babantu abapheleleko. Yeke, zimisele ungena emBusweni loyo—ungene ngobunzima obunengi.
(Galatiya 3:1) Maye maGalatiya anganangqondo! Ngubani onilethe ngaphasi komthelela omumbi lo, nina ebeninoJesu Krestu owabonakaliswa phambi kwenu tjhatjhalazi njengobethelwe esigodweni?
it-1 880
Incwadi Eya KwebeGalatiya
Ukubabaza kwakaPowula nakathi, “Maye maGalatiya anganangqondo,” akasibufakazi bokuthi bekaqalisele ebantwini bobuhlanga obuthileko bekoro yamaGallic ebeba hlala etlhagwini yeGalatiya. (Gal 3:1) Kunalokho, uPowula bekakhalima abathileko emabandleni abavumela ukuhlohlozelwa yifundiso yamaJuda, phakathi kwabo bekunamaJuda ebekalinga ukuzithomela ilungiselelo labo lokulunga baqalisela emThethweni kaMosi ‘wokulunga ngebanga lokukholwa’ olethwa sivumelwano esitjha. (2:15–3:14; 4:9, 10) Ngokobutjhaba, “amabandla weGalatiya” (1:2) uPowula awatlolela bewayihlanganisela yamaJuda nabangasiwo amaJuda, kuhlanganise namaphroselite asokiweko nabeentjhaba abangakasokwa, kunye nabanye abayikoro yamaCeltic. (IzE 13:14, 43; 16:1; Gal 5:2) Sele baboke, bebathathwa njengamaKrestu weGalatiya ngombana endaweni ebebahlala kiyo bekuyiGalatiya. Umlayezo wencwadi uPowula ayitlolako bewuqalisele ebantwini abajayeleko abahlala ngesewula yesifundeni seRoma, ingasi abantu angabaziko abangetlhagwini, okukula angakhenge avakatjhele khona.
Ukufundwa KweBhayibheli
(Galatiya 2:11-21) Nanyana kunjalo, uKhefasi nakeza e-Anthiyokiya, ngaphikisana naye ubuso nobuso, ngombana bekusemtarini ukuthi utjhaphile. 12 Ngaphambi kobana kufike abantu abathileko abavela kuJakopo, bekajayele ukudla nabantu beentjhaba; kodwana kuthe nabafikako, walisa ukwenza lokhu, wazihlukanisa, asaba labo besigaba esisokileko. 13 Woke amanye amaJuda nawo ahlanganyela naye ekuzenzisenokhu, kangangobana noBharinabhasi wadoselwa bona ahlanganyele nabo ekuzenziseni kwabo. 14 Kodwana nangilemuka ukuthi bebangakhambi ngokuvumelana neqiniso leendaba ezimnandi, phambi kwabo boke ngathi kuKhefasi: “Nangabe wena, nanyana umJuda nje, uphila njengabantu beentjhaba begodu ungaphili njengamaJuda, kubayini ukatelela abantu beentjhaba bona baphile ngokuvumelana nesiko lamaJuda?” 15 Thina esimaJuda ngokubelethwa, esingasizizoni ezivela eentjhabeni, 16 siyalemuka ukuthi umuntu kuthiwa ulungile, ingasi ngemisebenzi yomthetho, kodwana ngokukholwa kuJesu Krestu kwaphela. Nje-ke sibeke ukukholwa kwethu kuKrestu Jesu, ukuze kuthiwe silungile ngokukholwa kuKrestu, ingasi ngemisebenzi yomthetho, ngombana akakho okuzokuthiwa ulungile ngemisebenzi yomthetho. 17 Nje-ke nangabe sifunyenwe sizizoni kukulapho sifuna kuthiwe silungile ngoKrestu, alo-ke uKrestu usisebenzi sesono na? Awa akusinjalo! 18 Nangabe zona kanye izinto engazigirizako ngiyazakha godu, ngitjengisa ukuthi ngisiseqamthetho. 19 Ngombana ngomthetho ngafa ngokuphathelene nomthetho, ukuze ngiphile ngakuZimu. 20 Ngibethelwe esigodweni kunye noKrestu. Akusesengimi ophilako, kodwana nguKrestu ophila ebunyeni nami. Eqinisweni, ukuphila engikuphilako nje enyameni, ngikuphila ngokukholelwa eNdodaneni kaZimu, eyangithanda, yazinikela ngebanga lami. 21 Angiwali umusa omkhulu kaZimu, ngombana nangabe ukulunga kufumaneka ngomthetho, eqinisweni-ke uKrestu wafela ilize.