INDLELA YOKUHLULA IHLOYO

2 | Ungazibuyiseleli

IBhayibheli Ithi:

“Ningabuyiseli okumbi ngokumbi kunanyana ngubani. . . . Nakukghonekako, ngokusemandlenenu, yibani nokuthula nabantu boke. Ningazibuyiseleli, . . . ngombana kutloliwe ukuthi: ‘“Ngekwami ukuzibuyiselela; ngizokubuyisela,” kutjho uJehova.’”—ROMA 12:17-19.

Lokho Kutjho Ukuthini:

Nanyana kujayelekile ukuthi sikwate lokha umuntu nakasitjhapheleko, uZimu akafuni sizibuyiselele. Kunalokho, usikhuthaza bona simlinde ngombana msinyana uzokulungisa yoke imitjhapho.—IRhubo 37:7, 10.

Lokho Ongakwenza:

Lokha abantu abanesono nabazibuyiselelako, lokho kubangela bona kube nehloyo enengi. Nje-ke, nangabe kunomuntu okutjhapheleko namkha okuzwise ubuhlungu, ungazibuyiseleli. Linga ukuphendula ngommoya ophasi begodu uzibambe. Kobunye ubujamo, kungaba kuhle ukuthi sikudlulise okwenzekileko. (IzAga 19:11) Ngezinye iinkhathi, kungafaneleka ukuthi sikubike okwenzekileko. Ngokwesibonelo, kobunye ubujamo ungaba ngungazimbi wobulelesi, ungakhetha ukuthi uyokubika ubulelesobo emapholiseni namkha eenkhulwini.

Ukuzibuyiselela kuzilimaza

Ungenza njani nangabe kubonakala ngasuthi ayikho indlela yokulungisa umraro lo ngokuthula? Namkha kuthiwani nangabe ulinge koke okusemandlenakho bona uyisombulule ngokuthula? Ungazibuyiseleli. Lokhu kungenza ubujamo bube bumbi khulu. Kunalokho, nawungazibuyiseleli kuzokusiza bona ihloyo ingarhagali. Ungafunda ukuthembela endleleni kaZimu yokusombulula imiraro. “Thembela kuye, yena uzokuthatha igadango.”—IRhubo 37:3-5.

Indaba Eyenzekileko—U-ADRIÁN

Wahlula Isifiso Sokufuna Ukuzibuyiselela

Nakasakhulako, u-Adrián bekathanda ukulwa begodu athanda nokuzibuyiselela. Uthi: “Kanengi nasilwako, besidubulana begodu iinkhathi ezimbadlwana bengizithola ngilele phasi endleleni ngibhudabhudeka eengazini.”

U-Adrián wathoma ukufunda iBhayibheli nakaneminyaka eli-16. Uthi: “Njengombana bengithuthuka nangifunda iBhayibheli, ngabona kutlhogeka ukuthi ngenze amatjhuguluko ekuphileni kwami.” Bekutlhogeka bona alise ihloyo begodu alise nenturhu. Wazuza khulu ngalokho akufunda encwadini yebeRoma 12:17-19 ngokungazibuyiseleli. Uthi: “Ngathoma ukulemuka ukuthi uJehova uzokuletha ubulungiswa ngendlelakhe nangesikhathi sakhe. Kancanikancani, ngakulisa ukuba nenturhu.”

Ngobunye ubusuku, u-Adrián wasahlelwa siqhema samadoda ebakajayele ukulwa naye ngaphambi kokuthi afunde iBhayibheli. Umdosiphambili wesiqhema warhuwelela wathi: “Zilwele!” U-Adrián uyavuma uthi: “Bengifuna ukulwa.” Kunokuthi enze njalo, wenza umthandazo omncani kuJehova bese wasuka lapho.

U-Adrián uraga nokuthi: “Ngelanga elilandelako ngahlangana nomdosiphambili wesiqhema akhamba yedwa. Nangimbonako, ngakwata bengafuna ukulwa kodwana godu ngathandaza ngehliziyo ngabawa uJehova bona angisize ngizibambe. Bengicabanga ukuthi naye ukwatile kodwana wangirara nakatjhidela kimi bese wathi: ‘Ngibawa ungilibalele ngalokhu okwenzeke izolo. Kuhlekuhle, nami ngifuna ukuba njengawe. Ngifuna ukufunda iBhayibheli.’ Kwangithabisa khulu ukuthi ngakghona ukulawula ukukwata kwami! Ngebanga lalokho, sathoma ukufunda iBhayibheli.”