Kghani Bewazi?
Kubayini bekuyinto elungileko bona uJehova avumele ama-Israyeli ukuthi anikele ngemihlobo emibili yeenyoni?
NGAPHASI komThetho wama-Israyeli, amazuba wommango nafuywako bekamukeleka njengomnikelo kuJehova. Iinyoni ezimbilezi bekuhlale kukhulunywa ngazo emithethweni emalungana neminikelo begodu bezisetjenziswa zombili ngokufanako. (Lev. 1:14; 12:8; 14:30) Kubayini lokhu bekuzuzisa? Elinye ibanga lalokho kukuthi amazuba wommango bekangafumaneki bulula. Kubayini bekunjalo?
Izuba lommango
Amazuba wommango la bekangahlali isikhathi eside endaweni yinye, bewaba khona kwaphela nakutjhisako kwa-Israyeli. Qobe ngo-Oktoba, aphaphela eendaweni ezitjhisako ezisesewula, bese kuthi ngetwasahlobo abuyele kwa-Israyeli. (Ngom. 2:11, 12; Jor. 8; 7) Kwa-Israyeli wekadeni, bekubudisi ngabo bona banikele ngamazuba wommango la ebusika.
Izuba elifuywako
Ngakwelinye ihlangothi amazuba afuywako awathutheli kwezinye iindawo, yeke bekafumaneka bulula kwa-Israyeli. Okukarisako, kukuthi bebawafuya. (Madanisa noJwanisi 2:14, 16.) Ngokwencwadi ethi, Bible Plants and Animals “yoke imizana namadorobha we-Palestine beyiwafuyile amazuba la. Abanikazi bemizi yalapho bebanendawo la kuhlala khona amazuba la.”—Madanisa no-Isaya 60:8.
Izuba lisendlinayo
UJehova utjengise ukuthi uyabathanda begodu uyabacabangela ngokuthi amukele umnikelo weenyoni ebezibakhona kwa-Israyeli ngesikhatheso.