“Hlalani Niqaqulukile, Phaphamani!”

1. Khuyini uJesu ayitjela abafundi bakhe malungana nesikhathi sokuphela begodu wabanikela siphi isiyeleliso?

EMALANGENI ambalwa ngaphambi kokobana uJesu ahlongakale, abafundi bakhe abane bambuza bathi: ‘Sizokuba yini isibonakaliso . . . sokuphela kwephasi?’ (Mat. 24:3) Abafundi bakaJesu kungenzeka bebazibuza ukuthi bazokubona ngani nasekuzokurhayilwa iJerusalema nethempeli lalo. Nakabaphendulako, uJesu akhenge akhulume ngokutjhatjalaliswa kweJerusalema nethempeli lalo kwaphela kodwana ‘nangokuphela kwephasi’ esiphila kilweli. Nakakhuluma ngesikhathi sokuphela uJesu wathi: “Malungana nelangelo namkha i-iri akakho owaziko, ngitjho neengilozi ezulwini neNdodana kodwana nguBaba kwaphela owaziko.” Yeke wayelelisa abafundi bakhe wathi, “hlalani niphapheme” begodu “hlalani niqalile.”—Mar. 13:32-37.

2. Kubayini bekuqakathekile ngalabo ebebaphila eJerusalema bona bahlale baphapheme?

² AmaKrestu amaJuda wekhulu lokuthoma bekufuze ahlale aphapheme bona asindise ukuphila kwawo. UJesu watjela abafundi bakhe izinto ebekufuze baziqale nabazakubona ukuthi ukutjhatjalaliswa kweJerusalema sekutjhidele. Wathi: “Nanibona iJerusalema libhodwe mabutho, yazini ukuthi ukutjhatjalaliswa kwalo sekutjhidele.” Ngesikhatheso, bekufuze balalele isiyeleliso sakaJesu ‘babalekele eentabeni.’ (Luk. 21:20, 21) Labo abalalela isiyeleliso sakhe basinda lokha amaRoma nakatjhabalalisa iJerusalema.

3. Khuyini esizokucoca ngayo esihlokwenesi?

³ Namhlanjesi siphila esikhathini sokuphela kwephaseli. Yeke nathi kufuze sihlale siqaqulukile begodu siphapheme. Esihlokwenesi, sizokucoca ngokuthi singaba njani nombono olinganiselako khisibe ngapha siqale izinto ezenzeka ephasini, singazitjheja njani nokuthi singasisebenzisa njani isikhathi esiseleko.

YIBA NOMBONO OLINGANISELAKO NAWUQALA IZINTO EZENZEKA EPHASINI

4. Kubayini kufuze sibe nekareko endleleni izenzakalo zanje ezizalisekisa ngayo isiphorofido seBhayibheli?

⁴ Sinamabanga amahle wokuqala indlela izinto ezenzeka ephasini ezizalisa ngayo isiphorofido seBhayibheli. Ngokwesibonelo, uJesu wasitjela ngezinto ezizokwenzeka ezizokutjengisa ukuthi ukuphela kwephasi lakaSathana kutjhidele. (Mat. 24:3-14) Umpostoli uPowula wasikhuthaza ukuthi sitjheje ukuzaliseka kwesiphorofido nasizakuqinisa ukukholwa kwethu. (2 Pit. 1:19-21) Incwadi yokugcina yeBhayibheli ithoma ngamezwi athi: “Isambulo ngoJesu Krestu, asinikelwe nguZimu, ukutjengisa iinceku zakhe izinto ekufuze zenzeke msinyana.” (IsAm. 1:1) Yeke sinekareko ezenzakalweni zanje nokuthi zizosizalisekisa njani isiphorofido seBhayibheli. Kwanga singazimisela ukucoca ngezenzakalwezi nabanye.

5. Khuyini ekufuze siyibalekele kodwana khuyini ekufuze siyenze? (Qala neenthombe)

⁵ Nasicoca ngeemphorofido zeBhayibheli, kufuze sikubalekele ukuqagela ukuthi kuzokwenzekani. Kubayini? Ngombana asifuni ukutjho into ezokubangela ukuthi kungabi nobunye ebandleni. Ngokwesibonelo, singezwa abadosiphambili bakhuluma ngokuthi bangawurarulula njani umraro othileko balethe ukuthula nevikeleko. Kunokuqagela ukuthi amezwi la azalekisa amezwi akweyoku-1 kwebeThesalonika 5:3, kufuze sikhambisane nokuzwisisa kwamva nje okugadangisiweko. Nasisekela lokhu esikhuluma ngakho kilokhu ihlangano kaJehova ekugadangisileko, sisiza ibandla bona lihlale libumbene “emkhumbulweni nendleleni efanako yokucabanga.”—1 Kor. 1:10; 4:6.

6. Khuyini esingayifunda kweyesi-2 kaPitrosi 3:11-13?

⁶ Funda yesi-2 kaPitrosi 3:11-13. Umpostoli uPowula usisiza sibe nombono olinganiselako lokha nasicabanga ngesiphorofido seBhayibheli. Usikhuthaza ukuthi ‘sihlale sikhumbula ukuba khona kwelanga lakaJehova.’ Kubayini? Ingasi ngombana sifuna ukwazi ‘ilanga ne-iri’ uJehova azokuletha ngalo i-Arimagedoni kodwana ngombana sifuna ukusebenzisa isikhathi esiseleko bona sihlanganyele “ezenzweni ezicwengileko zokuziphatha nezenzweni zokuzinikela kuZimu.” (Mat. 24:36; Luk. 12:40) Ngamanye amezwi, sifuna ukuziphatha ngendlela efaneleko begodu siqiniseke ngokuthi koke esikwenzela uJehova sikwenza ngombana simthanda. Bona sikghone ukukwenza lokho kufuze sizitjheje.

KUTJHO UKUTHINI UKUZITJHEJA?

7. Sitjengisa njani ukuthi siyazitjheja? (Lukasi 21:34)

⁷ UJesu watjela abafundi bakhe ukuthi bangatjheji izinto ezenzeka ephasini kwaphela kodwana bazitjheje nabo. Iphuzwelo likhanya kuhle esiyelelisweni esikuLukasi 21:34. (Ifunde.) Encwadini le uJesu wathi: “Tjhejani.” Umuntu ozitjhejako, utjheja nananyana ngiziphi iingozi ezingalimaza ubuhlobo bakhe noJehova begodu uthatha amagadango bona azibalekele. Ngendlela le, uyaqiniseka bona uhlala athandwa nguZimu.—IzA. 22:3; Jud. 20, 21.

8. Ngisiphi isiyalo umpostoli uPowula asinikela amaKrestu?

⁸ Umpostoli uPowula wayala amaKrestu ukuthi azitjheje. Ngokwesibonelo, watjela amaKrestu we-Efesu ukuthi: “Tjhejisisani bona indlela enikhamba ngayo ayisinjengeyabantu abangakahlakaniphi kodwana injengeyabahlakaniphileko.” (Efe. 5:15, 16) Ubuhlobo bethu noJehova bungaphasi kokusahlelwa, yeke iBhayibheli lithi, “ragelani phambili nilemuka lokho okuyintando kaJehova, nasenza njalo sizozivikela kinanyana ngikuphi ukusahlelwa.—Efe. 5:17.

9. Siyizwisisa njani intando kaJehova ngathi?

⁹ IBhayibheli alisitjeli ngazo zoke iingozi ezingalimaza ubuhlobo bethu noJehova. Kanengi kufuze sizenzele iinqunto endabeni imiTlolo engakhulumi ngazo ngokunqophileko. Bona senze iinqunto ezihlakaniphileko, sitlhoga ukuzwisisa “okuyintando kaJehova.” Lokho singakwenza ngokuthi sifundisise iliZwi lakaZimu qobe besicabangisise ngalo. Lokha nasizwisisa intando kaJehova besilwele ukwazi “umkhumbulo kaKrestu,” sizokukghona ukukhamba ‘njengabahlakaniphileko’, ngitjho nanyana singanayo imithetho enqophileko esitjela bona senzeni. (1 Kor. 2:14-16) Ezinye iingozi kulula ukuzibona kodwana ezinye akusilula.

10. Ngiziphi ezinye iingozi ekufuze sizibalekele?

¹⁰ Ezinye iingozi ekufuze sizibalekele zifaka phakathi ukuganukeja, ukusela khulu, ukudla khulu, ikulumo elimazako kunye nokubukela zokuzithabisa ezinenturhu, iinthombe zomseme ezisilapheleko nezinto ezifana nalezi. (Rhu. 101:3) Inaba lethu, uDeveli, lihlala lifuna amathuba wokulimaza ubuhlobo bethu noJehova. (1 Pit. 5:8) Nasingatjhejiko, uSathana angatjala emkhumbulwenethu nehliziyweni imbewu yomona, ukungathembeki, ukubamarhamaru, ihloyo, ukuzikhakhazisa nelaka. (Gal. 5:19-21) Ekuthomeni, izintwezi zingabonakala ngathi azisiyingozi. Kodwana nasingathathi amagadango wokuthi msinyana sizisuse, zizokuragela phambili zikhula njengomuthi oyitjhefu zibange umonakalo.—Jak. 1:14, 15.

11. Ngiyiphi enye ingozi esithekileko ekufuze siyibalekele begodu kubayini?

¹¹ Enye ingozi esithekileko, kuzihlanganisa nabangani abambi. Akhesiqale napu ubujamo. Emsebenzini wokuziphilisa usebenza nomuntu ongasi nguFakazi kaJehova. Ufuna umuntu osebenza naye abaqale kuhle aboFakazi bakaJehova, yeke ubanomusa ubelisizo. Ngezinye iinkhathi nidla ndawonye isidlo semini. Ingasikade, uzifumana sele udla naye qobe. Umuntu lo unande akhuluma izinto ezingakahlwengeki, ekuthomeni ulinga ukungazinaki izintwezo. Ekukhambeni kwesikhathi, uthoma ukuyijayela indlela akhuluma ngayo begodu ayisakuphathi kumbi. Ngelinye ilanga, nanitjhayisa emsebenzini ukubawa bona niyokuthola okuselwako begodu uyavuma. Ekugcineni, uthoma ukucabanga njengaye. Kuzokuthatha isikhathi esingangani bona uthome ukuziphatha njengomuntu osebenza naye lo? Kuliqiniso ukuthi sinomusa begodu sihlonipha boke abantu kodwana kufuze sikhumbule ukuthi ekugcineni sizokufana nalabo esikhetha ukuzihlanganisa nabo. (1 Kor. 15:33) Nasizitjhejisisako, njengombana uJesu asikhuthaza, sizokubalekela ukuzihlanganisa nabantu abangaphili ngeenkambisolawulo zakaJehova. (2 Kor. 6:15) Sizokubona ingozi besiyibalekele.

SISEBENZISE KUHLE ISIKHATHI SAKHO

12. Khuyini abalandeli bakaJesu ebekufuze bayenze nabalinde ukuphela kwephasi?

¹² UJesu bekafuna abafundi bakhe babemajadu nabasalinde ukuphela kwephasi. Wabanikela umsebenzi ebekufuze bawenze. Wabayala bona batjhumayele iindaba ezimnandi “eJerusalema, kiyo yoke iJudiya neSamariya, neendaweni ezikude khulu zephasi.” (IzE. 1:6-8) Loyo msebenzi omkhulu abalandeli bakaJesu abawufumanako! Ngokwenza koke abangakwenza ngokutjhumayeza abantu, basisebenzisa kuhle isikhathi sabo.

13. Kubayini kutlhogeka sisisebenzise kuhle isikhathi sethu? (Kolose 4:5)

¹³ Funda kwebeKolose 4:5. Bona sizitjheje, sitlhoga ukuhlolisisa indlela esisebenzisa ngayo isikhathi sethu. ‘Izehlakalo ezingakalindeleki’ zingasifikela soke. (UMtj. 9:11) Singahlongakala kungakalindeleki.

14-15. Singasisebenzisa njani kuhle isikhathi sethu? (Hebheru 6:11, 12) (Qala nesithombe)

¹⁴ Singasisebenzisa kuhle isikhathi sethu ngokwenza intando kaJehova nokuqinisa ubuhlobo bethu naye. (Jwa. 14:21) Sitlhoga ‘ukudzimelela, singasikinyeki, sihlale sinokunengi kokukwenza emsebenzini weKosi.’ (1 Kor. 15:58) Lokha nakufika ukuphela—kungaba kuphela kokuphila kwethu namkha kwephasi elimbeli, ngekhe safisa ngathana senzele uJehova okunengi.—Mat. 24:13; Rom. 14:8.

¹⁵ Namhlanjesi, uJesu usaragela phambili nokunqophisa abafundi bakhe njengombana batjhumayela ngomBuso kaZimu iphasi loke. Uyidlalile indimakhe. Ngehlangano kaJehova, uJesu uyasibandula ukuthi sitjhumayele njani begodu usinikele namathulusi esiwatlhogako bona sirhatjhe iindaba ezimnandi. (Mat. 28:18-20) Sidlala indimethu ngokuthi sikhuthale emsebenzinethu wokutjhumayela nokufundisa nangokuhlala siphapheme njengombana silindele uJehova bona aphelise iphaseli. Ngokusebenzisa iseluleko esifumaneka kumaHebheru 6:11, 12, sizokukakarela ethembeni lethu “bekube sekupheleni.”—Funda.

16. Khuyini esizimisele ukuyenza?

¹⁶ UJehova ubeke i-iri nelanga azokuphelisa ngalo iphasi lakaSathana. Nakufika ilangelo, siyaqiniseka ukuthi uJehova uzokuzalisekisa zoke iimphorofido eziseliZwini lakhe. Ngezinye iinkhathi, singabona ngasuthi ukuphela kwephaseli kuyariyada. Nanyana kunjalo, ilanga lakaJehova ngekhe ‘liriyade!’ (Rhab. 2:3) Kwanga singazimisela ‘ukuqala kuJehova’ sitjengise ‘ukumlinda ngesineke uZimu wesindiswethu.’—Mik. 7:7.