Funa Idorobho Elizokuhlala Likhona

1. UJesu wathi kuzokwenzekani ngeJerusalema langekhulu lokuthoma?

NGAPHAMBI kobana ahlongakale uJesu Krestu wanikela abalandeli bakhe isiphorofido. Isiphorofidwesi kokuthoma sazaliseka ngesikhathi kutjhatjalaliswa iJerusalema nethempeli lalo. Wathi ngelinye ilanga idorobho leJerusalema lizabe “libhodwe mabutho.” (Luk. 21:20) UJesu watjela abalandeli bakhe bona nababona amanababo, okumasotja weRoma bekufuze bakhambe eJudiya khonokho.—Luk. 21:​21, 22.

2. Umpostoli uPowula wawanikela siphi isiyeleliso amaKrestu amaHebheru ebewahlala eJudiya neJerusalema?

² Nakusele iminyaka embalwa ngaphambi kobana amasotja weRoma abhode iJerusalema, umpostoli uPowula watlola incwadi enomlayezo oqakathekileko. Encwadini le, uPowula wanikela amaKrestu weJudiya neweJerusalema isiyeleliso esiqakathekileko esizowasiza alungiselele okusezako. Khuyini ebeyizokwenzeka? IJerusalema belizokutjhatjalaliswa. AmaKrestu la nawazokusinda, bekufuze atjhiye amakhayawo namabhizinisawo. UPowula watlola ngeJerusalema wathi: “Asinalo idorobho elizokuhlala likhona.” Wangezelela ngokuthi: “Kodwana silifuna ngetjiseko lelo elizako.”—Heb. 13:14.

3. Liyini “idorobho elineensekelo zamambala” begodu kubayini silifuna?

³ Ngesikhathi amaKrestu akhamba eJerusalema neJudiya kungenzeka ahlekwa kodwana isiquntweso sasindisa ukuphila kwawo. Namhlanjesi siyahlekwa ngebanga lokungathembeli emalini bona isombulule imiraro yephasi. Kubayini senza njalo? Ngombana siyazi ukuthi ingasikade umBuso kaZimu uzokutjhabalalisa iphasi elikhohlakelekweli. Sifuna “idorobho elineensekelo,” “elizako” elimBuso kaZimu.a (Heb. 11:10; Mat. 6:33) Isihlokwana esinye nesinye esihlokwenesi sizokucoca ngokuthi: (1) Indlela isiyeleliso sakaPowula esasiza ngayo amaKrestu wangekhulu lokuthoma afuna “[idorobha] elizako.” (2) Indlela uPowula awalungiselela ngayo ngezinto ebezizokwenzeka, (3) nendlela iseluleko sakhe esisisiza ngayo namhlanjesi.

THEMBA UJEHOVA, ANGEZE AKULAHLA

4. Kubayini iJerusalema beliqakathekile emaKrestwini?

⁴ IJerusalema beliqakathekile emaKrestwini. Kulapho ibandla lobuKrestu elathoma khona ngo-33 C.E., nesihlopha sabo esibusako besinzinze khona. Ukungezelela kilokho, amaKrestu amanengi bewanezindlu begodu anezinto ezinengi lapho. Kodwana uJesu wathi abalandeli bakhe kufuze baphume eJerusalema, baphume neJudiya.—Mat. 24:16.

5. UPowula wawalungiselela njani amaKrestu izinto ebezisazokwenzeka?

⁵ Ngebanga lokuthi uPowula bekafuna ukulungiselela amaKrestu bona akhambe eJerusalema, wawasiza azwisisa ngcono ukuthi uJehova uzizwa njani ngedorobhelo. UPowula wakhumbuza amaKrestu bona ithempeli, ubuphristi nemihlatjelo eyenziwa lapho uJehova akayamukeli. (Heb. 8:13) Abantu abanengi edorobhenelo bala uMesiya. Abantu bebangasayi eJerusalema bona bayokulotjha uJehova khona. Kunalokho iJerusalema nethempeli lalo belizokutjhatjalaliswa.—Luk. 13:​34, 35.

6. Kubayini amaKrestu bekatlhoga iseluleko sakaPowula esikumaHebheru 13:​5, 6?

⁶ UPowula nakatlolela amaHebheru, abantu abanengi bebathabela ukuphila nokuvakatjhela iJerusalema. Umtloli omRoma wangesikhatheso wabiza iJerusalema ngokuthi, “lidorobha elidume ukuwadlula woke ePumalanga.” AmaJuda amanengi avela kezinye iinarha bekaya khona ayokugidinga umnyanya, lokho bekwenza umnotho uthuthuke. Ngebanga lalokho kungenzeka amanye amaKrestu enza imali enengi, mhlamunye kungebangelo awatlolela wathi: “Indlelenu yokuphila ayingabi nalo ithando lemali, kukulapho naneliseka ngezinto ezikhona.” Ngemva kwalokho wadzubhula amezwi anamandla afumaneka emiTlolweni, atjengisa indlela uJehova aqinisekisa ngayo umuntu ngamunye athi: “Angekhe nginitjhiye begodu angekhe nginilahle.” (Funda amaHebheru 13:​5, 6; Dut. 31:6; Rhu. 118:6) AmaKrestu ebewahlala eJerusalema neJudiya bewasitlhoga isiqinisekiswesi. Kubayini? Ngombana msinyana ngemva kokufumana incwadi le, bekuzokufuze atjhiye imizawo, amabhizinisi nezinye izinto zawo ezinengi. Nje-ke bekufuze ayokuthoma ukuphila okutjha kwenye indawo.

7. Kubayini kufuze siqinise ukuthembela kwethu kuJehova nje?

⁷ Esikufundako: Khuyini esiyilindeleko? Silindele ukuphela kwephasi elimbeli nokuthoma ‘kwesizi elikhulu.’ (Mat. 24:21) NjengamaKrestu weJerusalema, nathi kufuze sihlale sithembekile nje begodu sizilungiselele. (Luk. 21:​34-36) Ngesikhathi sesizi elikhulu, kungenzeka silahlekelwe makhaya nazo zoke izinto zethu. Ngesikhatheso kufuze sithembele ngokupheleleko kuJehova, siqiniseke ngokuthi angekhe asilahle. Nanje ngaphambi kokuthoma kwesizi elikhulu, sinethuba lokutjengisa ukuthi sithembelephi. Zibuze, ‘Kghani iinqunto zami nezinto engihlele ukuzenza esikhathini esizako ziyatjengisa ukuthi angikathembeli emalini, kunalokho ngithembele kuJehova bona uzongitlhogomela?’ (1 Thim. 6:17) Kuliqiniso, isibonelo samaKrestu wekadeni singasisiza sihlale sithembekile ngesikhathi ‘sesizi elikhulu’. Nanyana kunjalo, ‘isizi elikhulu’ lizokuba budisi khulu ukudlula nanyana yini eyakhe yabonwa maKrestu. Sizokwazi njani bona khuyini ekufuze siyenze nakuthoma isizelo?

LALELA LABO ABADOSA PHAMBILI

8. Abafundi bakaJesu bafumana ziphi iinqophiso?

⁸ Ngemva kweminyaka embalwa afumene incwadi uPowula ayitlolela amaHebheru, amaKrestu abona ibutho lamaRoma libhode idorobho leJerusalema. Lokho kwawatjengisa bona sekusikhathi sokubaleka, idorobho leJerusalema besele lizokutjhatjalaliswa. (Mat. 24:3; Luk. 21:​20, 24) Bekufuze babalekele kuphi? UJesu wase wathi: “AbaseJudiya ababalekele eentabeni.” (Luk. 21:21) Bekuneentaba ezinengi esifundeneso. Alo-ke, bebazi njani ukuthi ngiyiphi intaba ekufuze babalekele kiyo?

9. Kubayini kungenzeka amanye amaKrestu azibuza ukuthi kufuze abalekele kiyiphi intaba? (Qala umebhe.)

⁹ Cabanga ngezinye iintaba amaKrestu ebewangabalekela kizo: Iintaba zeSamariya, iintaba zeGalile, iNtaba iRhermoni, iintaba zeLebhanoni neentaba ezingakelinye ihlangothi lomlambo iJordani. (Qala umebhe.) Amanye amadorobho ebewasendaweni ezizintaba kungenzeka bewabonakala aziindawo eziphephileko. Ngokwesibonelo, idorobho le-Gamla, belisendaweni ephezulu entabeni begodu bekubudisi khulu ukufika kilo. Amanye amaJuda bewaqala idorobhelo njengendawo ephephileko angabalekela kiyo. Nanyana kunjalo, amaRoma ahlasela i-Gamla begodu abulala abantu abanengi endaweni leyo.b

10-11. (a) Kungenzeka uJehova wawanqophisa njani amaKrestu? (Hebheru 13:​7, 17) (b) AmaKrestu azuza njani ngokulalela abadosa phambili? (Qala nesithombe.)

¹⁰ Kubonakala ngasuthi uJehova wanqophisa amaKrestu ngokusebenzisa labo ebebadosa phambili ebandleni. Omunye usomlando u-Eusebius owatlola ngesikhatheso wathi: “UZimu wambulela abanye abafowethu eJerusalema bona amaKrestu kufuze akhambe eJerusalema aye, edorobheni lePereya endaweni ebizwa ngokuthi yiPhela.” Idorobho lePhela belibonakala liyindawo amaKrestu ebewangabalekela kiyo. Belingasikude neJerusalema begodu bekulula ukufika khona. Abantu bePhela bebangasimaJuda begodu bebangalwi namaRoma.—Qala umebhe.

¹¹ AmaKrestu abalekela eentabeni alalela isiyeleliso sakaPowula esithi, “Lalelani labo abadosa phambili” ebandleni. (Funda amaHebheru 13:​7, 17.) Abantu bakaZimu balalela begodu basinda. Umlando utjengisa ukuthi uZimu akhenge abalahle labo ‘abalinda idorobho elineensekelo zamambala’ okumBuswakhe.—Heb. 11:10.

12-13. UJehova ubanqophise njani abantu bakhe hlangana neenkhathi ezibudisi?

¹² Esikufundako: UJehova usebenzisa abadosa phambili bona banikele abantu bakhe isinqophiso abasitlhogako. EBhayibhelini kuneembonelo ezinengi zeendlela uJehova asebenzisa ngazo amadoda athembekileko bona anqophise abantu bakhe eenkhathini ezibudisi. (Dut. 31:23; Rhu. 77:20) Nathi namhlanjesi, sibubonile ubufakazi obunengi obutjengisa ukuthi uJehova uyabasebenzisa abadosa phambili bona anqophise abantu bakhe.

¹³ Ngokwesibonelo, nakuthoma isindabelaphi i-COVID-19, “abadosa phambili” banikela amabandla iinqophiso ezitlhogekako. Abadala bafumana iinqophiso zokuraga imihlangano yebandla bona abafowabo nabodadwabo barage nokulotjha uJehova. Ngemva kweenyanga ezimbalwa kuthome isindabelaphi, sabamba imihlangano yesifunda ngamalimi angaphezu kwama-500. Abafowethu nabodadwethu bawubukela ku-inthanethi, e-TV bawulalela nemrhatjhweni. Ngesikhathi sesindabelaphi, saraga nokufumana iinqophiso esizitlhogako ezivela kuJehova. Lokho kwasisiza sahlala sibumbene. Singaqiniseka ngokuthi nanyana singaqalana naziphi iintjhijilo esikhathini esizako, uJehova uzokusiza abadosa phambili bona bathathe iinqunto ezivuthiweko. Ngaphandle kokuthembela kuJehova nokulalela imiyalwakhe, ngiziphi ezinye iimfanelo ezizosisiza sizilungiselele isizi elikhulu bona sikghone ukwenza ngokuhlakanipha ngesikhathi esibudiseso?

THANDA ABAFOWENU, WAMUKELE IIMVAKATJHI

14. NgokwamaHebheru 13:​1-3, ngibuphi ubuntu amaKrestu ebekufuze abutjengise ngaphambi kokubhujiswa kweJerusalema?

¹⁴ Nakuthoma isizi elikhulu, kufuze sithandane khulu ukudlula phambilini. Ngesikhatheso, kufuze silingise isibonelo samaKrestu ebewahlala eJerusalema neJudiya. Athandana khulu. (Heb. 10:​32-34) Eminyakeni yangaphambi kokubhujiswa kweJerusalema, amaKrestu bekufuze ‘athandane njengamalunga womndeni,’ ‘amukele iimvakatjhi’ begodu athandane khulu.c (Funda amaHebheru 13:​1-3.) Nathi kufuze senze okufanako sibathande khulu abafowethu nabodadwethu ngaphambi kokuphela kwephaseli.

15. Kubayini amaKrestu amaHebheru bekufuze athandane njengamalunga womndeni begodu amukele iimvakatjhi ngemva kobana abaleke?

¹⁵ Ibutho lamaRoma labhoda iJerusalema begodu lasuka msinyana, amaKrestu abaleka nezinto zawo ezimbalwa. (Mat. 24:​17, 18) Nje-ke bekufuze asizane njengombana bewabalekela eentabeni begodu athoma ukuphila okutjha lapho. AmaKrestu amanengi bewatlhoga ukudla, izambatho nendawo yokuhlala. Nje-ke ngokwamukela iimvakatjhi, ngokusekelana nangokusizana, amaKrestu atjengisa indlela athanda ngayo abafowabo.—Tit. 3:14.

16. Singatjengisa njani ukuthi siyabathanda abafowethu nabodadwethu abatlhoga isizo? (Qala nesithombe.)

¹⁶ Esikufundako: Nasithanda abafowethu nabodadwethu, sizobasiza nabatlhoga isizo. Abantu bakaZimu bahlala bazimisele ukusiza abafowabo nabodadwabo ababaleke eenarheni zemakhabo ngebanga lepi neenhlekelele zemvelo. Basiza abafowabo ngezinto abazitlhogako, babakhuthaza bona barage nokulotjha uJehova. Udadwethu we-Ukraine owatjhiya umuzakhe uthi: “Salizwa ithando lakaJehova nesinqophiso sakhe nakasisiza ngokusebenzisa abafowethu. Basamukela begodu basisiza khulu e-Ukraine, e-Hungary nalapha e-Germany.” Labo abamukela abafowabo nabodadwabo emizinabo bebabatlhogomele basetjenziswa nguJehova.—IzA. 19:17; 2 Kor. 1:​3, 4.

17. Kubayini kuqakathekile ukufunda ukuthanda nokwamukela abafowethu nje?

¹⁷ Ngesikhathi sesizi elikhulu, sizokutlhoga ukusizana khulu ukudlula nje. (Rhab. 3:​16-18) UJehova usibandula nje bona sibathande khulu abafowethu nabodadwethu begodu samukele neemvakatjhi, ubuntobo sizobutlhoga khulu esikhathini esizako.

KUZOKWENZEKANI KUNGASIKADE?

18. Singawalingisa njani amaKrestu abaleka eJerusalema?

¹⁸ AmaKrestu alalelako begodu abalekela eentabeni asinda nakubhujiswa iJerusalema. Alitjhiya idorobho kodwana uJehova akhenge awalahle. Kuthiwani ngathi? Asikwazi koke okuzokwenzeka esikhathini esizako. Kodwana sinesiyeleliso sakaJesu sokuhlala sizilungiselele. (Luk. 12:40) Sineseluleko uPowula asitlolela amaHebheru, sisasebenza nakithi njengombana sasebenza nekadeni. Sinesiqinisekiso esivela kuJehova sokuthi uzositlhogomela nokuthi angekhe asitjhiye namkha asilahle. (Heb. 13:​5, 6) Kwangathi soke singazimisela ukuhlala sifuna idorobho elizokuhlala likhona, umBuso kaZimu begodu sithabele iimbusiso ezingapheliko ezizokulethwa ngiwo.—Mat. 25:34.