Safunda KuMfundisethu Omkhulu Ukuphila Kwethu Koke

ISIBONELO ENGASIBEKELWA BABELETHI BAMI

Ekupheleni kwabo-1950, ababelethi bami bathutha e-Italy baya e-Kindersley, ese-Saskatchewan, e-Canada. Msinyana ngemva kwalokho, bafunda iqiniso begodu sathoma ukuphila ngalo. Nangisese mncani bengiba nesikhathi esinengi ngisesimini nomndenami, yeke bengijayele ukudlala ngithi “ngabaliphayona elisizako” ngineminyaka ebunane!

Ababelethi bami bebatlhaga, nanyana kunjalo basibekela isibonelo esihle sokuzidela ngebanga lakaJehova. Ngokwesibonelo, ngo-1963 bathengisa izinto zabo ezinengi bona bafumane imali yokuya emhlanganweni weentjhabatjhaba ebewuse-Pasadena, e-California, e-U.S.A. Ngo-1972 sathuthela e-Trail, British Columbia, e-Canada indawo ekude ngamakhilomitha ayi-1 000 bona siyokusiza ngokutjhumayela abantu ebebakhuluma isi-Italian endaweni leyo. Emsebenzini ubaba bekangunogada. Wafumana amathuba amanengi wemisebenzi ebhadela kuhle kodwana akhenge ayithathe imisebenzi leyo ngombana bekafuna ukudzimelela ekusebenzeleni uJehova.

Ngithokoza khulu ngesibonelo esihle ababelethi bami abangibekela sona mina nabantwana bekhaya abathathu. Isibonelo sabo sasibekela isisekelo esihle sokubandulelwa ukusebenzela uJehova begodu sangifundisa isifundo esiqakatheke khulu engizokuhlala ngisikhumbula ukuphila kwami koke: Nangibeka umBuso kaZimu qangi, uJehova uzongitlhogomela.—Mat. 6:33.

UKUTHOMA UKUSEBENZELA UJEHOVA ISIKHATHI ESIZELEKO

Ngo-1980, ngatjhada no-Debbie, udade omuhle obekadzimelele ekulotjheni uJehova. Besifuna ukusebenzela uJehova isikhathi esizeleko, nje-ke u-Debbie wathoma ukuphayona ngemva kweenyanga ezintathu sitjhadile. Ngemva komnyaka sitjhadile, sathuthela ebandleni elincani ebelinetlhogeko nami ngathoma ukuphayona.

Ngokukhamba kwesikhathi, saphelelwa mdlandla, safuna ukuthutha. Kokuthoma, sakhuluma nomjikelezi. Ngomusa wakhuluma nathi wathi: “Ngini enizenzela ukuphila kwenu kube budisi. Nidzimelela emirarweni eninayo. Kodwana naningaqala izinto ezakhakho nezikhuthazako nizozifumana.” Leso bekusiluleko ebesisitlhoga. (Rhu. 141:5) Sasisebenzisa msinyana begodu salemuka ukuthi zinengi izinto ezihle esingaziqala. Abantu abanengi ebandleni bebafuna ukusebenzela uJehova khudlwana, abasese batjha nabanye ebebatjhade nabantu abangasiboFakazi. Lesi bekusifundo esinamandla khulu. Safunda ukuqala izinto ezihle nokulinda uJehova bona alungise ubujamo ebebubonakala bumraro. (Mik. 7:7) Safumana ithabo godu nobujamo baba ngcono.

Abotitjhere bethu esikolweni samaphayona sokuthoma bebathuthele kwezinye iinarha bona bayokulotjha khona. Njengombana bebasitjengisa iinthombe begodu bakhuluma nangeentjhijilo ebebaqalana nazo neembusiso abazifumanako basenza saba nesifiso sokuba ziinthunywa zevangeli. Nje-ke saqunta ukuba ziinthunywa zevangeli.

Ngo-1984, sathuthela enarheni ekhuluma isi-French e-Quebec, indawo ekude ngamakhilomitha azii-4 000 ukusuka e-British Columbia. Lokho kwatjho uthoma phasi, ukufunda amasiko amatjha nelimi elitjha. Esinye isitjhijilo esaba naso kukuthi kanengi besingabi nemali eyaneleko. Khekwaba nesikhathi lapho besinganalitho, omunye umlimi bekasivumela bona siburuje amazambana emasiminakhe. U-Debbie bekapheka amazambana lawo ngeendlela ezinengi ezihlukahlukeneko. Naphezu kobudisi ebesiqalene nabo, sakghodlhelela ngethabo. Sabona ukuthi nguJehova obekasitlhogomela.—Rhu. 64:10.

Ngelinye ilanga, safowunelwa mumuntu singakalindeli. Bekusimemo sokuthi siye eBethel ye-Canada. Phambilini besifake isibawo sokuya esiKolweni seGiliyadi, nje-ke besihlangahlangene ukuthi sizokwenzanjani ngesimemo esisifumeneko se-Bethel. Sasamukela isimemwesi. Nasifika e-Bethel, sabuza uMfowethu u-Kenneth Little, obekalilunga leKomidi yeGatja, “Kuzokwenzekani ngesibawo sethu sokuya eGiliyadi?” Wasiphendula wathi, “Indaba leyo sizayibona ekukhambeni kwesikhathi nangabe bayanibiza.”

Ngemuva kweveke, sino-Debbie safumana isimemo sokuya eGiliyadi. Bekufuze sithathe isiqunto. UMfowethu u-Little wathi kithi: “Kinanyana yini enizoyikhetha, kamanye amalanga nizokufisa ukuthi ngathana nakhetha ngenye indlela. Asikho isiqunto esingcono, uJehova uzonibusisa kinanyana ngisiphi enisikhethako.” Sasamukela isimemo sokuya eGiliyadi, njengombana iminyaka ikhamba sakubona ukuba liqiniso kweseluleko sakaMfowethu u-Little. Kanengi besidzubhula amezwakhe nasikhuluma nabanye ekufuze bakhethe phakathi kwezabelo.

UKUPHILA KOKUBA ZIINTHUNYWA ZEVANGELI

Sakuthabela khulu ukuba hlangana nabafundi abama-24 ebebaseklasini lama-83 labafundi beGiliyadi, ebelise-Brooklyn, e-New York, ngo-Apreli 1987. Abotitjhere bethu bekungu Mfowethu u-Ulysses Glass no-Jack Redford. Iinyanga ezihlanu zaphela, sathweswa iziqu ngoSeptemba 6, 1987. Sabelwa ukuya e-Haiti, sakhamba no-John no-Marie Goode.

Ngo-1962, eHaiti kwaqotjhwa iinthunywa zevangeli begodu ngemva kwalokho akhenge kusathunyelwa ezinye. Ngemva kweemveke ezintathu sithweswe iziqu, sathoma ukuhlanganyela ebandleni elincani, elinabarhuweleli abama-35 endaweni eseentabeni e-Haiti. Besisese bancani begodu bekunezinto ezinengi ebekusafuze sizifunde, besihlala sisodwa endaweni ehlala iinthunywa zevangeli. Abantu abanengi bendaweni le bebatlhaga khulu begodu inengi labo belingakghoni ukufunda. Nasisahlezi lapho, abantu bendaweni babanga umguruguru ngebanga lezepolotiki, bebalwa norhulumende, batjhagala begodu bekuneenkhukhula.

Safunda okunengi kubafowethu nabodadwethu be-Haiti bebathabile begodu bebabambelele. Ukuphila kwabanengi bekubudisi, nanyana kunjalo bebamthanda uJehova, bathanda nokutjhumayela. Omunye udadwethu olupheleko bekangakghoni ukufunda kodwana bekazi imitlolo eli-150 ngehloko. Imiraro yendaweni le yasenza safuna ukutjela abantu abanengi khulu ngomBuso kaZimu ukuthi ngiwo ozokuqeda imiraro yabantu. Kwasithabisa khulu ukubona abantu ebesibafundela iBhayibheli babamaphayona wesikhathi esizeleko, amaphayona akhethekileko nabadala.

Nasisese se-Haiti, ngahlangana no-Trevor, isokana ebelaziwa ngokuthi yi-Mormon missionary, amahlandla ambalwa saba nethuba lokucoca ngemitlolo. Ngemva kweminyaka embalwa, wangitlolela incwadi ebengingakayilindeli. Wathi: “Emhlanganweni ozako wesifunda ngiyokubhajadiswa. Ngifuna ukubuyela e-Haiti ngiyokuba liphayona elikhethekileko endaweni ebengitjhumayela kiyo lokha nangisasondako.” Ngilokho abakwenzako banomkakhe iminyaka eminengi.

SASUKA EUROPE SATJHINGA E-AFRIKA

Sabelwa ukuyokusiza kezinye iingcenye ze-Europe lapho umsebenzethu ebesele uvumeleke khona. Ngo-1992 safika e-Ljubljana, e-Slovenia, hlanukwala ababelethi bami abakhulelela khona ngaphambi kokufudukela e-Italy. Bekusese nezipi e-Yugoslavia yekade. Igatja le-Vienna, le-Austria, nama-ofisi we-Zagreb, e-Croatia ne-Belgrade, e-Serbia, belitlhogomela umsebenzi wokutjhumeyela endaweni le. Nje indawo ngayinye besele izokuba ne-Bethel yayo.

Lokho bekutjho ukujayela elinye ilimi nesiko. Abantu bendaweni le bebathi, “Jezik je težek,” okutjho ukuthi “Ilimeli libudisi.” Kwamambala bebaqinisile vele belibudisi! Siyababuka abafowethu nabodadwethu abahlala bakulungele ukwamukela amatjhuguluko wehlangano begodu babona indlela uJehova ababusisa ngayo. Nangesikhathesi, sibonile ukuthi uJehova uhlala alungisa izinto ngethando nangesikhathi esifaneleko. Iminyaka esaba nayo e-Slovenia yasiqinisekisa ngezinto ezinengi esazifundako beyasifundisa nezinto ezitjha.

Kodwana bekusese namatjhuguluko amanengi ebekasazokwenzeka. Ngo-2000 sabelwa ukuyokusiza e-Côte d’Ivoire, eTjingalanga ye-Afrika. Ngebanga lepi, kwafuze sifudukele e-Sierra Leone ngo-Novemba 2002. Lapho bekuqeda ukuphela ipi eyathatha iminyaka eli-11. Bekubudisi ukukhamba e-Côte d’Ivoire. Nanyana kunjalo, iimfundo esazifundako zasisiza sahlala sithabile.

Sadzimelela ebantwini abanengi abafuna ukufunda ngoZimu nakubafowethu nabodadwethu abanethando, abakghodlhelela iminyaka yepi. Bebanganazinto ezinengi kodwana bebafuna ukwabelana nathi abanakho. Omunye udade wapha u-Debbie izambatho. U-Debbie nakasaba ukuzithatha, udadwethu wathi akazithathe, wathi: “Ngesikhathi sepi, abafowethu bakwezinye iinarha basisekela. Nje lithuba lethu lokusiza.” Besifuna ukulingisa isibonelo sabo.

Ngokukhamba kwesikhathi sabuyela e-Côte d’Ivoire kodwana imiraro yezepolotiki yabanga inturhu godu. Yeke ngoNovemba 2004, safuduswa ngesiphaphamtjhini, ngamunye wethu bekaphethe isikhwama esingaba makhilogremu ali-10. Ebusuku bamhlokho salala phasi lapho kuhlala khona amasotja ama-French, sathunyelwa e-Switzerland ngelanga elilandelako. Safika e-ofisini legatja phakathi nobusuku, iKomiti yeGatja nabafundisi be-Ministerial Training School kuhlanganise nabomkabo basamukela ngefudumalo, basisingatha, basipha ukudla okumnandi ne-Swiss chocolate enengi. Lokho kwasithinta iinhliziyo.

Sabelwa ukuyokusiza e-Ghana kwesikhatjhana, ngemva kwalokho sabuyela e-Côte d’Ivoire nasele ipi iphungukile. Umusa wabafowethu wasisiza sakghodlhelelela ukufuduswa ebekugandelela nezabelo zesikhatjhana. Sino-Debbie savumelana ngokuthi ngitjho nanyana ithando labafowethu liyinto ejayelekileko ehlanganweni kaJehova kodwana asifuni ukulithatha kancani. Kuhlekuhle, ngokukhamba kwesikhathi salemuka ukuthi iinkhathi ezibudiseza zasiza ekusibanduleni.

SATJHINGA E-MIDDLE EAST

Ngo-2006 safumana incwadi evela emzimkhulu ebeyisazisa ngesabelo esitjha se-Middle East. Bekuzokuba nezinto ezinengi ezizokwenzeka, iintjhijilo, amalimi amatjha namasiko. Bekukunengi ebekufuze sikufunde enarheni enemiraro eminengi yezepolotiki nezekolo. Besiwathanda amalimi ahlukahlukeneko ebandleni, sabona ubunye ebebulethwa kulandela iinqophiso zehlangano. Siyabahlonipha abafowethu nabodadwethu balapho ngombana ngesibindi bakghodlhelelele ukuphikiswa malunga womndeni, abantwana abafunda nabo, abantu abasebenza nabo nabomakhelwana.

Ngo-2012, saya emhlanganweni okhethekileko ebewuse-Tel Aviv, e-Israel. Emhlanganweni lo, bekukokuthoma abantu bakaJehova bahlangene ngobunengi obungaka ngemva kwePentekoste lango- 33 C.E. Leso kwaba sisenzakalo esiqopha umlando!

Hlangana neminyaka leyo, sathunyelwa bona siyokuvakatjhela inarha lapho umsebenzethu ukhandelwe khona. Saphatha iincwadi zethu, sahlanganyela esimini begodu saya nemihlanganweni emincani. Amasotja aphethe iingidi bekakiyo yoke indawo kodwana besizizwa siphephile njengombana ngokutjheja besikhamba nabarhuweleli abambalwa.

SABUYELA E-AFRIKA

Ngo-2013 safumana isabelo esihluke khulu, isabelo sokuba segatjeni le-Kinshasa, e-Congo, inarha ekulu, enobuhle bemvelo kodwana enomlando womtlhago omkhulu nezipi. Ekuthomeni sathi, “Siyayazi i-Afrika; singakhamba.” Nanyana kunjalo, bekukunengi ebekufuze sikufunde, khulukhulu ngombana iinthuthi zakhona zilinganiselwe. Safumana izinto ezihle esingadzimelela kizo, ezihlanganisa ukukghodlhelela nethabo labafowethu ngitjho nanyana baqalene nobudisi bezeemali. Abafowethu nabodadwethu bebayithanda isimu begodu bebalinga ngamandla ukuba khona esifundweni nemihlanganweni. Sazibonela ngewethu ukuthi abantu abanengi bafuna ukufunda iqiniso. Iminyaka esaba nayo silotjha uJehova isikhathi esizeleko e-Congo, yasifundisa iimfundo eziqakathekileko begodu yasipha abangani abanjengomndeni kithi.

Nakuphela u-2017, sanikelwa esinye isabelo, nje sathunyelwa e-Sewula Afrika. Leli ligatja elikhulu khulu ekhe sasiza kilo begodu nemisebenzi esiyenzako mitjha kithi. Nanje, bekukunengi ebekufuze sikufunde kodwana izinto esakhamba sihlangabezana nazo esikhathini esidlulileko zasisiza. Siyabathanda abafowethu nabodadwethu okuphele iminyaka bakghodlhelela ngokuthembeka. Kuthabisa khulu ukubona umndeni we-Bethel osebenza ngobunye ngitjho nanyana uziinhlanga ezihlukahlukeneko begodu unamasiko angafaniko. Kulula ukubona ukuthi uJehova ubusisa abantu bakhe ngokuthula, abantu bakhe bambatha ubuntu obutjha begodu baphila ngeenkambisolawulo zeBhayibheli.

Eminyakeni edlulileko, sino-Debbie sifumene izabelo ezithabisako, sajayela amasiko ahlukahlukeneko begodu safunda namalimi amatjha. Bekungasilula ngaso soke isikhathi kodwana besihlala silizwa ithando lakaJehova ngehlanganwakhe nangabafowethu nabodadwethu. (Rhu. 144:2) Izinto ezinengi esizifunde ngokuba sekonzweni yesikhathi esizeleko, zisenze saba babantu abangcono.

Ngiyayithokoza indlela ababelethi bami abangikhulise ngayo, ngithokoza nokusekelwa mkami u-Debbie begodu ngithokoza neembonelo ezihle zabafowethu nabodadwethu ephasini loke. Njengombana siqale phambili engomusweni, sizimisele ukuragela phambili sifundiswa Mfundisethu omKhulu.