Indlela UJehova Asisiza Ngayo Sikghodlhelele

1. Kubayini kungasi lula ukukghodlhelela begodu khuyini engasisiza sikghodlhelele? (1 Pitrosi 5:10)

SOKE siqalana nemiraro ehlukahlukeneko, yeke ngezinye iinkhathi kuba budisi ukuragela phambili sikghodlhelele. Abanye sele kuphele isikhathi eside bagula. Abanye baqalene nobuhlungu bokuhlongakalelwa mumuntu abamthandako. Kusese njalo, abanye bayatjhutjhiswa kungaba mindenabo namkha bajameli bakarhulumende. (Mat. 10:​18, 36, 37) Qiniseka bona nanyana ngibuphi ubudisi oqalene nabo, uJehova uzokusiza ubukghodlhelelele.—Funda yoku-1 kaPitrosi 5:10.

2. Khuyini esisiza sikghone ukukghodlhelela?

² Ukukghodlhelela kutjho ukuragela phambili uthembekile kuJehova begodu umlotjhe uthabile ngitjho nanyana uqalene nobudisi, utjhutjhiswa namkha ulingeka bona wenze isono. Bona sikghodlhelele sitlhoga ukukholwa bona izinto zizokuba ngcono. Into esenza sikghone ukukghodlhelela kukuthi uJehova usinikela “amandla angaphezu kajayelekileko.” (2 Kor. 4:7) Esihlokwenesi sizokucoca ngezinto ezine uJehova asiphe zona bona siragele phambili sikghodlhelela. Sizokubona nokuthi izintwezi zingasisiza njani.

UMTHANDAZO

3. Kubayini kuyikarisomraro ukuthi sikghona ukuthandaza kuJehova?

³ UJehova usenzele ikarisomraro engasisiza sikghone ukukghodlhelela. Ngitjho nanyana sizizoni wenze sakghona ukukhuluma naye begodu uyasilalela. (Heb. 4:16) Akhe ucabange ngendaba le: Singathandaza kuJehova nanyana kunini ngananyana yini. Ukghona ukusizwa ngananyana ngiliphi ilimi, nanyana sikuphi ngitjho nanyana sisodwa namkha sivalelwe ejele. (Jona 2:​1, 2; IzE. 16:​25, 26) Nasigandeleleke khulu bese singakghoni ukufumana amezwi esingawatjho emthandazweni, uJehova uyazwisisa ukuthi sifuna ukuthini kuye. (Rom. 8:​26, 27) Kuyikarisomraro kwamambala ukuthi sikghona ukuthandaza, sikhulume noJehova!

4. Sazi njani bona nasithandazela isizo lakaJehova bona sikghodlhelele uzosisiza?

⁴ UJehova usiqinisekisa ngeliZwi lakhe bona “nanyana yini esiyibawa ngokuvumelana nentandwakhe, uyasizwa.” (1 Jwa. 5:14) Singambawa na uJehova bona asisize sikghodlhelele? Iye, singambawa! UJehova ufuna siragele phambili sikghodlhelela. Sikutjho ngaliphi lokho? UJehova uthi nasihlala sithembekile, sinikela ipendulo kokhuluma kumbi ngaye, uSathana uDeveli. (IzA. 27:11) Ngaphezu kwalokho, iBhayibheli lithi uJehova ufuna ‘ukusekela labo abazinikele ngeenhliziyo ezipheleleko kuye.’ (2 Kron. 16:9) Yeke singaqiniseka ukuthi uJehova unakho kokubili amandla nesifiso sokusisiza sikghodlhelele.—Isa. 30:18; 41:10; Luk. 11:13.

5. Umthandazo ungasisiza njani sibe nokuthula? (Isaya 26:3)

⁵ IBhayibheli lithi nasithandaza kuJehova “ukuthula kwakaZimu okudlula koke ukuzwisisa kuzokuvikela iinhliziyo . . . [nemicabangwethu.]” (Flp. 4:7) Kodwana kutjho ukuthini lokho? Abantu abangalotjhi uJehova baqalana neentjhijilo ezihlukahlukeneko begodu balinga izinto ezinengi bona bafumane ukuthula. Ngokwesibonelo abanye balinga ukulawula izinto abazicabangako bona bafumane ukuthula. Umuntu nakenza njalo, akakghoni ukulawula indlela acabanga ngayo okwenza kube lula ukulawulwa madimoni. Kuyingozi khulu lokho. (Madanisa noMatewu 12:​43-45) Ngaphandle kwalokho, ukuthula uJehova asinikela khona nasithandaza kuye, kudlula nanyana ngikuphi ukuthula esingakufumana ngezintwezi. Nasithandaza kuJehova, sitjengisa ukuthi simthemba ngokupheleleko, yena uzosinikela “ukuthula okungapheliko.” (Funda u-Isaya 26:3.) Enye indlela uJehova akwenza ngayo lokho, kukuthi asikhumbuze amaqiniso asiduduzako aseliZwini lakhe. Amaqiniso lawo asenza sibe nokuthula ngombana siyazi bona uJehova uyasithanda begodu usifunela okuhle.—Rhu. 62:​1, 2.

6. Khuyini ongayifaka emthandazwenakho? (Qala nesithombe.)

⁶ Khuyini ongakwenza? Njengombana ukghodlhelelela ukulingwa kokukholwa kwakho, “phosa umthwalwakho kuJehova” bese uthandazela bona akuphe ukuthula. (Rhu. 55:22) Thandazela nokuhlakanipha okutlhogako bona ukghone ukuqalana neentjhijilo zakho. (IzA. 2:​10, 11) Njengombana uthandazela isizo lokukghodlhelela, ungakhohlwa ukuthokoza emthandazwenakho. (Flp. 4:6) Cabanga ngeendlela uJehova akusiza ngazo qobe langa bona ukghodlhelele bese uyamthokoza ngesizo akunikela lona nangezinye izinto ezihle akwenzela zona. Ungavumeli iintjhijilo oqalene nazo zikwenze ungaboni iimbusiso onazo.—Rhu. 16:​5, 6.

ILIZWI LAKAZIMU

7. Ukufunda iBhayibheli kungasisiza njani sikghodlhelele?

⁷ UJehova usiphe iliZwi lakhe ukusisiza sikghodlhelele. IBhayibheli linamavesi amanengi asiqinisekisa ngokuthi uJehova uzokuhlala asisiza. Cabanga nganasi isibonelo. UMatewu 6:8 uthi: “UYihlo uyakwazi enikutlhogako ngitjho nanyana ningakambawi.” NguJesu owakhuluma amezwi la, wazi uJehova ukudlula nanyana ngubani. Yeke, asinamabanga wokungaqiniseki ukuthi uJehova uyazi bona sitlhogani nokuthi uzosisiza. IBhayibheli linamavesi amanengi akhuthaza njengalawa ukuthi singakghona ukukghodlhelelela iintjhijilo esiqalana nazo.—Rhu. 94:19.

8. (a) Nikela isibonelo sekambisolawulo yeBhayibheli esingasisiza sikghodlhelele begodu uhlathulule ukuthi ingasisiza njani. (b) Khuyini engasisiza sikhumbule iinkambisolawulo zeBhayibheli nasizitlhogako?

⁸ Iinkambisolawulo zeBhayibheli zingasisiza sikghodlhelele. Ngombana zinokuhlakanipha okungasisiza senze iinqunto ezihlakaniphileko. (IzA. 2:​6, 7) Ngokwesibonelo, iBhayibheli lisikhuthaza bona silise ukutshwenyeka ngokuthi kuzokwenzekani ngengomuso, kunalokho sithembele kuJehova qobe langa. (Mat. 6:34) Nasifunda iBhayibheli qobe langa bese sicabangisisa ngalokho esikufundako, kuzokuba lula ukukhumbula isiyeleliso seBhayibheli nakufuze senze isiqunto namkha nasifuna ukwazi bona singasikghodlhelelela njani isitjhijilo.

9. Nasifunda eBhayibhelini ngokuthi uJehova ubasize njani abantu bakhe, sizizwa njani?

⁹ EBhayibhelini sibuye sifunde ngabantu abanjengathi, abathembela kuJehova begodu wabasiza. (Heb. 11:​32-34; Jak. 5:17) Nasicabanga ngendlela uJehova abasize ngayo, siqinisa ukukholwa kwethu ukuthi nathi uJehova uzosisiza. UJehova “siphephelo sethu namandlethu, ulisizo elifumaneka msinya ngeenkhathi zokugandeleleka.” (Rhu. 46:1) Nasibona ukuthi abantu bakaJehova bahlala njani batjengisa ukukholwa kuye ngitjho nanyana baqalene neentjhijilo, nathi sikhuthazeka ukwenza okufanako.—Jak. 5:​10, 11.

10. Khuyini ekufuze siyenze bona iBhayibheli lisisize ngendlela ephuma phambili?

¹⁰ Khuyini ongakwenza? Funda iBhayibheli qobe langa bese umerega amavesi owafumana alisizo ebujamweni okibo. Abantu abanengi bafunda incwajana ethi Funda ImiTlolo Qobe Langa ekuseni, lokho kubanikela isikhuthazo abazokucabanga ngaso ilanga loke. Udadwethu u-Mariea kwamsiza lokho ngesikhathi ababelethi bakhe bobabili bafunyanwa banekankere. Khuyini eyamsiza wakghodlhelela njengombana bekatlhogomela ababelethi bakhe iinyanga ezimbalwa ngaphambi kobana bahlongakale? Uthi, “Qobe langa bengifunda umtlolo welanga osencwajaneni ethi Funda ImiTlolo Qobe Langa bese ngicabangisise ngawo. Ukwenza njalo kwangisiza ngacabanga ngoJehova nezinto eziphuma phambili asifundisa zona eliZwini lakhe kunokucabanga ngemiraro esiqalene nayo kwaphela.”—Rhu. 61:2.

ABAFOWETHU NABODADWETHU

11. Sizizwa njani nasicabanga ngendlela abafowethu nabodadwethu abakghodlhelelela ngayo iintjhijilo?

¹¹ UJehova usibusise ngabafowethu nabodadwethu bephasini loke bona basisize sikghodlhelele. Ukwazi bona “ihlangano [yabafowethu] ephasini iqalana nemitlhago efanako” kusiqinisekisa ukuthi asisisodwa. (1 Pit. 5:9) Singaqiniseka ngokuthi nanyana yini esiqalene nayo, kunabafowethu nabodadwethu ekhebaqalana nayo begodu bakghodlhelela ngokuphumelelako. Lokho kutjho ukuthi nathi singakghodlhelela.—IzE. 14:22.

12. Abafowethu nabodadwethu bangasisiza njani, thina singabasiza njani? (2 Korinte 1:​3, 4)

¹² Abafowethu nabodadwethu bangasikhuthaza bona sikghodlhelele ngalokho abakutjhoko nabakwenzako. Lokho kwenzeka kumpostoli uPowula. Eencwadini zakhe uthokoza abantu abamsizako ngesikhathi avalelwe begodu ubatjho ngamagama. Bamkhuthaza, bamduduza bamnikela nezinto ebekazitlhoga. (Flp. 2:​25, 29, 30; Kol. 4:​10, 11) Nanamhlanjesi kungenzeka into efanako kithi. Nakutlhogeka sikghodlhelele abafowethu nabodadwethu bahlala bakulungele ukusisiza, nabo nakutlhogeka bakghodlhelele singenza okufanako.—Funda yesi-2 kwebeKorinte 1:​3, 4.

13. Khuyini eyasiza udadwethu u-Maya wakghodlhelela?

¹³ Abafowethu nabodadwethu baba sikhuthazo khulu kudadwethu we-Russia u-Maya. Ngo-2020 amapholisa we-Russia angena emzinakhe, asetjha. Kwafuze avikele ukukholwa kwakhe ahlathulule ukuthi kubayini akhuluma ngezinto azikholelwako. U-Maya uthi abafowethu nabodadwethu bamkhuthaza khulu ngeenkhathi ezibudisezi. U-Maya uthi, “Ngesikhatheso bengidiniwe tle, ngithukiwe begodu ngidanile. Kodwana abafowethu nabodadwethu bangidosela umtato, bangithumelela imilayezo begodu bangitlolela neencwadi. Bangiqinisekisa ukuthi bangithanda kangangani. Kusukela kade bengazi bona sinomndeni onethando kangangani. Kodwana kusukela ngo-2020 ngiqiniseka ngalokho kunanini ngaphambili.”

14. Khuyini ekufuze siyenze bona sifumane isizo kubafowethu nabodadwethu? (Qala nesithombe.)

¹⁴ Khuyini ongakwenza? Nawukghodlhelelela iintjhijilo, kuqakathekile ukukhuluma nabafowethu nabodadwethu nokuba nesikhathi nabo. Ungasabi ukubawa isizo kubadala. Bangaba “njengendawo yokubhaca esivunguvungwini.” (Isa. 32:2) Khumbula ukuthi abafowethu nabodadwethu nabo bakghodlhelelela iintjhijilo. Yeke nawuba nomusa emuntwini osesizini, uzokuthaba begodu lokho kuzokusiza ukghodlhelele.—IzE. 20:35.

ITHEMBA ESINALO

15. Ithemba lamsiza njani uJesu begodu thina lingasisiza njani? (Hebheru 12:2)

¹⁵ UJehova uzokuphetha iinthembiso zakhe nanyana kungenzekani, ithembelo lisisiza siragele phambili sikghodlhelela. (Rom. 15:13) Khumbula ukuthi ithemba lamsiza njani uJesu ngesikhathi esibudisi ukudlula zoke asephasini. (Funda amaHebheru 12:2.) UJesu bekazi bona nakahlala athembekile, uzokuba nesandla ekuhlwengiseni igama lakaJehova. UJesu bekasiqale ngabomvu isikhathi lapha azokuthaba noYise nakalotjha uJehova nabafowabo emBusweni wezulwini. Nathi ithemba lokuphila ephasini elitjha lisisiza sikghodlhelelele iintjhijilo esiqalana nazo ephasini lakaSathana.

16. Ithemba lamsiza njani omunye udadwethu, ufundani kilokho akutjhoko?

¹⁶ Tjheja ukuthi ithemba lokuphila ephasini elitjha lamsiza njani udadwethu we-Russia u-Alla. Indodakhe yabotjhwa, yavalelwa ejele njengombana beyilindele bona umlandwayo udenjwe. Lokhu nakwenzekako u-Alla wathi, “Ukuthandaza ngeenthembiso zengomuso nokucabangisisa ngazo kungisiza ngingagandeleleki khulu. Ngiyazwisisa ukuthi izinto azipheleli la. UJehova uzokuhlula, okutjho bona nathi sizokuhlula.”

17. Singatjengisa njani ukuthi siyathokoza ngethemba uJehova asiphe lona? (Qala nesithombe.)

¹⁷ Khuyini ongakwenza? Thatha isikhathi sakho ucabangisise ngengomuso uJehova asibekele lona. Zibone usephasini elitjha uthabela iimbusiso esizozifumana. Nawenza njalo, nanyana ngiziphi iintjhijilo oqalana nazo zizokubonakala ‘zingezesikhatjhana.’ (2 Kor. 4:17) Okhunye ongakwenza, yenza koke okusemandlenakho ukutjhumayela iindaba ezimnandi. Cabanga ukuthi abantu bazizwa njani nabaqalana neetjhijilo zakaSathana bangayazi ihloso kaZimu yengomuso. Ungabatjela ngezinto ezimbalwa, ezingabenza bagcine sele bafuna ukwazi okungeziweko ngomBuso kaJehova nangeenthembiso zakhe zengomuso.

18. Khuyini esenza sizithembe iinthembiso zakaJehova?

¹⁸ Ngemva kokuthi uJobho akghodlhelelele iintjhijilo ngokuthembeka wathi, “Sengiyazi bona ukghona ukwenza zoke izinto begodu akunalitho elisemkhumbulwenakho obhalelwa kulenza.” (Job. 42:2) UJobho wafumana isifundo sokuthi ayikho into engavimba uJehova bona enze izinto azithembisileko. Ukwazi lokho kungasiqinisa nasikghodlhelelela iintjhijilo. Ngokwesibonelo, cabanga ngomma ogulako ophelelwe lithemba ngebanga lokuthi uye kibodorhodera abanengi kodwana abakghoni ukulapha ukugula okumphetheko. Kodwana nakafumana udorhodera owaziko umsebenzakhe, amtjele ukuthi khuyini emenza agule amtjele nokuthi uzomsiza njani azizwe angcono. Khonokho uzozizwa angcono nanyana kufuze alinde isikhatjhana ngaphambi kokuzizwa angcono. Nje kuzokuba lula ukukghodlhelelela ukugula kwakhe ngombana uyazi ukuthi uzokuphola. Ngendlela efanako ukuqiniseka esinakho ngethemba lePharadesi kusisiza sikghodlhelele.

19. Khuyini esiyitlhogako bona sikghodlhelele?

¹⁹ Njengombana sibonile, uJehova usebenzisa umthandazo, iliZwi lakhe iBhayibheli, abafowethu nabodadwethu nethemba esinalo bona asisize sikghodlhelelele iintjhijilo. Nasizisebenzisako izintwezi, uJehova uzosisiza kunganandaba ukuthi ngisiphi isitjhijilo esisikghodlhelelako nje. Sizokukghona ukuragela phambili sikghodlhelela bekube sikhathi iphasi lakaSathana nakho koke ukutlhaga kungasekho.—Flp. 4:13.