Kghani UZimu Ukhona?
Ipendulo yeBhayibheli
IBhayibheli lisinikeza ubufakazi obanelisako bokuthi uZimu ukhona. Lisikhuthaza bona sakhe ukukholelwa kwethu kuZimu, ingasi ngokukholelwa iimfundiso ezinganabufakazi kodwana ngokusebenzisa ‘amandlethu wokucabanga nelemuko.’ (Roma 12:1; 1 Jwanisi 5:20) Cabanga ngobufakazi napu obulandelako obuvela eBhayibhelini:
Ukuba khona kwezulu nephasi elihlelekileko elinokuphila kutjengisa bona kunoMdali. IBhayibheli lithi: “Kwamambala, enye nenye indlu yakhiwe ngothileko kodwana owakhe zoke izinto nguZimu.” (Hebheru 3:4) Nanyana iqinisweli libulula, abantu abafundileko bakufumana kubudisi ukulizwisisa.a
Njengombana siphila, sinesifiso sokuzwisisa umnqopho wokuphila okusifiso esihlala sikhona ngitjho nanyana singaba nezinto ezingangani. Lokhu kuyincenye yalokho iBhayibheli elikubiza ngokuthi ‘kutlhoga uzimu,’ okufaka hlangana isifiso sokwazi nokulotjha uZimu. (Matewu 5:3; IsAmbulo 4:11) Ukutlhoga uZimokhu akusinikeli ubufakazi bokuthi uZimu ukhona kwaphela kodwana kutjengisa nokuthi unguMdali onethando ofuna ukwanelisa isifisweso.—Matewu 4:4.
IBhayibheli linemininingwana yeemphorofido ezatlolwa eminyakeni eminengi eyadlulako begodu zazaliseka ngendlela ezabikezelwa ngayo. Ukunemba nemininingwana yeemphorofidwezi itjengisa bona zivela emntwini onamandla angaphezu kajayelekileko.—2 Pitrosi 1:21.
Abatloli beBhayibheli bebanelwazi elidlula ukuzwisisa kwabantu ebebaphila nabo. Ngokwesibonelo, ngeenkhathi zeBhayibheli abantu abanengi bebakholelwa ukuthi iphasi lisekelwe silwana esinjengendlovu, ifarigi yommango,namkha ikunzi. Ngokuhlukileko iBhayibheli lithi uZimu ‘ulembelelise iphasi emoyeni.’ (Jobho 26:7) Ngokufanako iBhayibheli lihlathulula ukuthi iphasi ‘liyindulungu.’ (Isaya 40:22) Abantu abanengi bakholelwa ukuthi abatloli beBhayibheli bebanelwazi elinembileko ngombana bebalifumana kuZimu.
IBhayibheli liphendula imibuzo eminengi ebudisi engenza ukuthi umuntu angasakholelwa kuZimu nayingakaphendulwa kuhle. Ngokwesibonelo: Nange uZimu anethando begodu anamandla, kubayini kunokutlhaga begodu kuzele ubumbi ephasineli? Kubayini zekolo esikhathini esinengi zinomthelela omumbi kunokuba nomthelela omuhle?—Titosi 1:16.
a Ngokwesibonelo, u-Allan Sandage osele ahlongakele obekasisazi seenkwekwezi wakhe wathi malungana nezulu nephasi: “Ngikufumene kubudisi ukukholelwa ukuthi indlela izinto ezihleleke ngayo ephasini nemkayini zenzeke ngengozi. Kufuze kube nekambiso ezihlelako. Angiyizwisisi indaba yokuba khona kwakaZimu, kodwana ukuba khona koMdali kungiyo yodwa ihlathululo ezwakalako yokuthi kubayini kunezinto kunokuthi zingabi khona.”