Siyini Isiphorofido?

Ipendulo YeBhayibheli

Isiphorofido mlayezo ovela kuZimu, sisambulo saphezulu. IBhayibheli lithi abaphorofidi “bakhuluma okuvela kuZimu basunduzwa mumoya ocwengileko.” (2 Pitrosi 1:20, 21) Yeke, umphorofidi mumuntu ofumana umlayezo ovela kuZimu bese yena awudlulisele ebantwini.​—IzEnzo 3:18.

Abaphorofidi bebawufumana njani umlayezo ovela kuZimu?

UZimu bekasebenzisa iindlela ezinengi ukudlulisela imicabangwakhe ebaphorofidini bakhe:

• Ngokutlola. UZimu wasebenzisa indlela le kanye lokha nakanikela uMosi imiYalo eliTjhumi ebekayitlolile.​—Eksodusi 31:18.

• Ngokukhuluma asebenzisa iingilozi. Ngokwesibonelo, uZimu wasebenzisa ingilozi bona inikele uMosi isinqophiso malungana nomlayezo obekufuze awutjele uFaro weGibhide. (Eksodusi 3:2-4, 10) Nakunomlayezo oqakathekileko, uZimu wanqophisa iingilozi bona zidlulisele umlayezo loyo, njengalokha nakazakuthi kuMosi: ‘Tlola amezwi la phasi ngombana ngenza isivumelwano nawe nama-Israyeli ngokuvumelana namezwi la.’​—Eksodusi 34:27.a

• Ngemibono. Ngezinye iinkhathi umphorofidi bekabona imibono angakalali. (Isaya 1:1; Rhabakhukhu 1:1) Eminye yemibono le beyibonakala kuhle kangangobana oyibonako bekahlanganyela kiyo. (Lukasi 9:28-36; IsAmbulo 1:10-17) Ngezinye iinkhathi umbono bewudluliselwa emuntwini kube ngathi ukude ngokomkhumbulo. (IzEnzo 10:10, 11; 22:17-21) UZimu godu bekatjela abaphorofidi bakhe umlayezo ngebhudango, nabaleleko.​—Danyela 7:1; IzEnzo 16:9, 10.

• Ukunqotjhiswa ngokomkhumbulo. UZimu bekanqophisa umkhumbulo wabaphorofidi bakhe bona badlulisele umlayezwakhe. Lokhu kukhambisana kuhle nalokho okutjhiwo liBhayibheli nalithi: “Zoke izinto ezitlolwe emiTlolweni eCwengileko zivela kuZimu.” Ikulumo ethi “zivela kuZimu” ingatjhugululwa nangokuthi “ziphefumulelwe nguZimu.” (2 Thimothi 3:16; i-The Emphasised Bible) UZimu wasebenzisa ummoyakhe ocwengileko namkha amandlakhe asebenzako, bona “aphefumulele” imicabangwakhe emikhumbulweni yabantu bakhe. Umlayezo bewuvela kuZimu kodwana abaphorofidi bazikhethela indlela yokubeka amezwi womlayezo lo.​—2 Samyela 23:1, 2.

Kghani isiphorofido sihlala sibandakanya ukubikezela ngengomuso?

Awa, isiphorofido seBhayibheli asigcini ngokubikezela ngengomuso. Nanyana kunjalo, imilayezo eminengi evela kuZimu ihlobene nengomuso, nanyana ingahlobani ngokunqophileko. Ngokwesibonelo, abaphorofidi bakaZimu bebasolo bayelelisa u-Israyeli wekadeni malungana neendlela zakhe ezikhohlakeleko. Iinyeleliswezi bezihlathulula iimbusiso zengomuso labantu nange bazilalela, kuhlanganise nehlekelele ebeyizobehlela nange babhala ukulalela. (Joromiya 25:4-6) Umphumela bewudzimelele endleleni ama-Israyeli ebewazokhetha ukuyilandela.​—Duteronomi 30:19, 20.

Iimbonelo zeemphorofido zeBhayibheli ezingahlanganisi ukubikezela kwengomuso

• Kesinye isenzakalo ama-Israyeli abawa isizo kuZimu, wathumela umphorofidi bona awatjele ukuthi akhenge awasize ngombana akhenge alalele imiyalwakhe.​—AbaHluleli 6:6-10.

• Lokha uJesu nakakhuluma nomfazi womSamariya, waveza izinto ngomfazi lo ebekangakghona ukuzazi kwaphela ngokwambulelwa kwaphezulu. Umma lo waqala uJesu njengomphorofidi nanyana angakhenge abikezele litho ngengomuso.​—Jwanisi 4:17-19.

• Nakudenjwa umlandu kaJesu, amanabakhe amgubuzesa ubuso, ambetha, bese athi: “Phorofida! Ngubani okubethileko?” Bekangafuni ukuthi uJesu abikezele ngengomuso kunalokho bekafuna asebenzise amandla waphezulu atjho ukuthi ngubani ombethileko.​—Lukasi 22:63, 64.