Indaba 43
UJoshuwa Uba Mdosiphambili Wama-Israyeli
UMOSIS ufuna ukuya eKanana nama-Israyeli. Ngalokho wabawa kuJehova wathi: ‘Akhe ngiyame uMlambo iJordani ngibone ubuhle benarha.’ Kodwana uJehova wathi kuye: ‘Kwanele Mosisi! Ungasayitjho into le kimi godu!’ Uyazi bonyana kubayini uJehova atjho njalo?
Kungebanga lento eyenzeka lokha uMosisi nakabetha idwala. Khumbula bona yena no-Aroni akhenge badumise uJehova. Akhenge batjele abantu bona nguJehova owabakhuphela amanzi edwaleni. Ngebangeli uJehova wathi ngeze bangena enarheni yeKanana.
Ngemva kweenyanga ezimbalwa u-Aroni afile, uJehova watjela uMosisi wathi: ‘Thatha uJoshuwa umjamise phambi kwaka-Eliyezare umpristi nabantu. Begodu phambi kwabo boke, batjele bonyana uJoshuwa mdosiphambili omutjha.’ UMosisi wenza njengombana uJehova atjhwile, njengombana ungambona esithombenesi.
UJehova watjela uJoshuwa wathi: ‘Qina, ungasabi. Uzokudosa ama-Israyeli phambili uwangenise eKanana engibathembise lona, begodu ngizokuba nawe.’
Ngokukhamba kwesikhathi uJehova watjela uMosisi bona akhwele esiqongolweni seNtaba iNebo enarheni yakwaMowabi. Alapho, uMosisi bekakwazi ukubona ngaphetjheya koMlambo iJordani, wabona inarha ehle yeKanana. UJehova wathi: ‘Le, yinarha engathembisa ukuyinikela abantwana baka-Abrahama, u-Isaka noJakobho. Ngizokwenza uyibone, kodwana angizukuvumela bona ungene kiyo.’
UMosisi wafela lapho phezu kweNtaba iNebo aneemnyaka eyi-120. Gade asaqinile namehlwakhe asabona kuhle. Abantu batlhuwa khulu bebalila ngokuhlongakala kwakaMosisi. Kodwana bathabela ukuba noJoshuwa njengomdosiphambili wabo omutjha.
Numeri 27:12-23; Duteronomi 3:23-29; 31:1-8, 14-23; 32:45-52; 34:1-12.